Yohanes 3
3
Yesus ap, tonoknye el si Nikodemus ap, yupu talipmarika ati, nyabuk yupu
1Tonok talak ara, Farisinye#3:1 Farisi nang ara, Yahudi yala ninye, sik deiyok nang koprop ulamikce, agama pil dona deiyok nang ulamik. Tonda, Allah yupu weik kel nang ulamikce, ayupu peterelamik bukni, Yesus ati diba kum tenelamik. Tonda, laka nyana yupu nomor 10 dindelelume. tonok, Yahudi yala ninye sik deiyok nang pil dolamik touk, el babye apil talibuka dolamuk. Anye bira, el si ara Nikodemus, Yesus el dam yayuk. 2Lukunyan noutamak arye, Yesus dam yanmokce, Yesus ati ayupu nyabuk. “Naio, ance ninye arye winipmanto kum ning, mambul pil weik dominya ati ara, yatanye do nirya, Allah el mikip deice kum meliptopura, ato pil kum doptue. Talinye birye, apil kum dopmanto anya arye, nun kele. Allah arye dopdeipkukba, anda Allah yupu peterena deiyoknye ulyame.” Nikodemus arye, Yesus ati nyabuk.
3Nyabukura, Yesus arye domon yupu atonun yupu deice arye tamubuka nyabuk. “Na dipkoprop nyapkine. Yata nang do nirya, nun ni yapu arye winiryuk deipsikikba, winiryuk mapu ulamap touk, nun kanye talima noutamak ara, Allah arye ila tamubuka tonap winiryuk ninye#3:3 winiryuk ninye – Yesus arye winiryuk ninye nyabuk yupu deiyok ara, Yesus ati diba tenebibyopura, Allah arye nun kanye talima teleb kipdeipsilirye, winiryuk nang atonun unyabe. Winipsilirye, nun kanye talima talipsilyopura, el mapu unyabe. Winisulul deice arye, el ap neika pia unamabe. atonun deipnamsile. Kanye talima winiryuk ninye atonun kum deipsilyopura, Allah lyepsilirye, nun kanye talima talinamsil ning nirya ara, aninye kum eibikirye kum dopropnamake,” nyabuk.
4Nyabukura, Nikodemus arye Yesus ati tamubuka nyabuk. “Se, naio, wisi akunum dapyopura, yata wiribuka tuba tamubuka tonap deipsiting do? Yatanye birye, el lin mun pum bisik tuba tamubuka tonap wektuba, akil arye deiptu do? Aning ara, kum winipmanto ning atia,” nyabuk. 5Nyabukura, Yesus arye tamubuka nyabuk.
Dipkoprop nyapkine, yatanye do nirya, mek#3:5 mek – Ayupu deiyok ara ani. Nun nin yapu arye delisinyak talak ara, mek sakliba delisinyake. Allah arye kam pia una ati deiyok ning arisilye talak ara, Allah El Dib Kanye mikip deice arye arisulule. ap, Allah El Dib Kanye mikip ap, abitinye deice arye kum deipsilyopura, Allah lyepsilirye, nun kanye talima talinamsil ning nirya ara, anye birye kum wektue. Tonda, kam pia kum uptinge. 6Ninye arye delinyak ning ara, talye ninye nonguk delinyak bukni, Allah El Dib Kanye el mikip deice arye, ninye dib kanye ati, kam una deiyok ning arisilirye, winiryuk ninye atonun kilisulule. 7Ati, narye, ‘Yatanye do nirya, Allah arye tuba tamubuka tonap winiryuk ninye atonun kum deipsilyopura, Allah lyeplirye, anye bira el kanye talima kum talinamle,’ nyapmakin yupu ati, lukdanuka teniltona meme.
8Winipmanto yupu nyapnukine. Kumanya ara, elcuk tenelul touk talye dolule. El mikip aryuk dolulba, lelim kekelulum bukni, akunuma. Anggunce, ‘E, kumanya lelim kekepmapa ara, atam arye yanganmalaba, otam banmale,’ kum nyaptume. Aning atonun, Allah El Dib Kanye arye kam una deiyok ning areblirye, winiryuk ninye atonun kilisulul ninye ara, aning deiyok nirya ara, laka nyabuka kel kum kiptume. Ara, talye asing arye kum eipmanto ning atia. Yesus arye nyabuk.
9Nyabukura, Nikodemus arye, “Se, naio, ayupu nyapnilam ning ara, yata wiribuka winipsutu do?” nyabuka asipdeyuk. 10Asipdeyukura, Yesus arye tamubuka nyabuk.
“Nikodemus anda, Israel ninye, sik Allah yupu peterena deiyoknye ulyam bukni, anyapmakin ning moubuka min kum kel bikmalamce, walwal arye nyapnilam do? 11Dipkoprop nyapkine. Na ap, na mapu nirya ap, nun nirya arye asing elilamuburye, akunum kel bikamubu ning nirya ap, ‘Anang kekenamak’ tenen, lakak nyanyap bukni, Anggun Farisi ninye ara, nun yupu diba tenebuka kum dololulume. 12Narye talye tukwak ulul ning ati yupu nyapmasinye babye, kum diba tenelulume. Ati, im deice ning, mambul weik yupu nyapsitinye babye, yata wiribuka diba tenepnutum do?
13Minop talak arye dipdongobuka wini talak babye, yuk ninye nirya im deice ton kum welebanyake. Tonoknye bira, Ninye Mi Koprop Atonunye, elda im deice ulamukce, tukwak yayuknye binya arye, el tonok ara, im deice weklamuk. 14Minop talak mok ap, ninye ap, pia kum uamuk mutuku noutamak ara, ninye on kwatima arye ninye weik olamukba, Musa arye kat ning dobuka, kwatima urasin atonun puturubukce, cang yo deice kwatipdongobukce, ikuka erepdeibuk touk, nati ton atonun wininamake.
Ara, Ninye Mi Koprop Atonunye dobuka, yo deice deibikirye, ikuka tikeipnamniake. 15Winipnamniyak ning ara, talye ati kume. Ara, yata ninye do nirya, nati diba tenepnikcopura, Allah arye sikti, kam una deiyok ning arisilyopura, pia kam unamaka ati, nara Yesus yo deice erepdeipnamniyake,#3:15 erepdeipnamniyake – Ayupu nyabuk ning ara, malye nang arye, Yesus dobuka wanwanun yo deice arye opnamika ati nyabuk. nyapsine.” Yesus arye nyabuk. Nyabukce, ayupu tonap nyabuk.
16Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke. 17Aning ara talye ati kum nyapsine. Allah arye el Mi Koprop dobuka, tukwak ninye unyabak dokdeipsuka deiyok ara, ‘Elce tukwak ninye nirya ati, wenebuka oplopnamle’ tenen, kum dopdeipsuke. Aning kum bukni, Allah arye, ‘Na Mi dopdeipnibuk, ninye arye elti, diba tenebikca deice arye, ninye mutuku-mutuku noutamak, kili sal weik lyepnamne,’ tenyamukce el mi ara, tukwak ninye unyabak dopdeibukba, nun dam yayuke.
18Ati, yatanye do nirya, Allah el Mi Koprop ati diba teneplinye bira, Allah arye wenebuka kum oplopnamle. Bukni, diba kum teneplinye bira, dipkoprop wenebuka opnamle. Aning babye talye ati kume. Deiyok ara, sik diba kum tenenyak ninye arye, Allah el Mi Koprop tonok el ap, el si ap ati, diba kum tenenyaka anya arye, Allah el kanye ara, ‘Sikda akunum wenebuka oplopse ninye atonun unyake,’ tenelule. Ati, aninye ara kum lyepnamle.
19Allah arye tukwak ninye ati, yupu bokeipnamla deiyok ara nyapnusine. Ara, dirina deiyoknye birye, tukwak ninye dam akunum yayuk bukni, tukwak ninye ara, sik winilamak ning ara, pia malye ulula anya arye, sikda, ‘Dirina ara nun lik bukni, nunda kunuknak ning tonok kanye delinyabe,’ tenebuka unyake. 20Yata ninye do nirya, sik malye-malye wininyak ninye ara, ‘Dirina ara nun like,’ tenebikirye dirina ulyak ara kum yanganyake.
Wininyaka deiyok ara ani. Ara sikce, ‘Kume, dirina ulyak yanuka bukeipyopura, adirinarye nun malye wininyap ning laka kipdeipsilyak’ tenen, adirina ati batakanyake. 21Sikda wininyak bukni, yata ninye do nirya, Allah el dipkoprop yupu nyasilye touk kekebikirye, ayupu uk talibuka dobolbanyak ninye ara, Allah el dirina ulyak yanganyake. Wininyaka deiyok ara ani. Ara, ‘Dirina ak bikcopura, yuk nang kel biknamsiyake. Ara, nun winilamap ning nirya ara, Allah el mikip deice aryuk wininyabe’ tenen, kel biknamsiyake. Dirina ati kanye delinyak ninye ara, aning atonun tenenyake. Yesus arye nyabuk.
Diba tenen ninye dobuka, mek dongolamuknye, Yohanes arye, Yesus ati nyabuk yupu
22Yesus ap, Nikodemus ap yupu talipmarika ani, akunum sirya dakrik talak ara, Yesus ap, el yupu kekebuka melibuka dobolbalamik obarye nang ap, Yudea tam noutamak bukni, ninye asik kum dolamikak bai tam mutuku binuka ulamik. Sik amutuku uk ulamik talak ara, Yesus arye peterelamukbuk, ninye weik diba tenebik. Diba tenebik ati, Yohanes arye, aninye yuk-yuk dobuka mek dongolamuk. 23Atalak noutam akuk, Yohanes arye yuk mutuku si ara Ainon ap, Salim mutuku ap noutamak ara, diba tenen ninye dobuka mek dongolamuk. Ara, amutuku bitinye, el ulamuk mutuku noutamak ara, mekwen weik uamuka ati, ninye arye, ‘Mek dongopsutue’ tenen, tuba-tuba yangalamikba, Yohanes arye adip tenebik ninye dobuka, mek dongolamuk. 24Yohanes arye apil dolamuk talak ara, yu nang arye el dobuka wenena aik min kum dongamik talak ara, diba tenen nang dobuka mek dongolamuk.
25Atalak ara, Yohanes peterebuk yupu kekelamik nang ap, tonok Yahudi yalanye ap, yupu deice arye derelanmek. Yupu deice arye derelanmeka deiyok ara, Farisi nang arye, ‘Allah derepsilyak’ tenen, “Mem pil dona atonun ning ara, taruk mek likna ara, winibuka, winibuka taruk mek likinamlulume,” nyabuka, peterelamik ning ati, tonok kanye bobuka kum winilamika ati, ayupu deice arye derelanmeke.
26Anang ara, Yohanes el dam yanmekce nyabik. “Anda, peterena deiyoknye ulyame.#3:26 peterena deiyoknye – Ibrani yupu deice arye ‘Rabi’ nyanyake. Ayupu deiyok ara, Allah yupu peterena deiyoknye biti nyalamik. Ance nyapsulumnye, Yordan mek otam, an ap neika unmarumnye bira, ninye weik mek dongonmale. Tonda, ninye weik arye, ‘El yupu kekepnuyap’ tenen, el damuk yanganmake. Aning ara, teleb do, malye do. Anda yata tenepmalam do?” nyabuka asildenmek. 27Nyanmekba, Yohanes arye anang ati nyabuk.
Yata nang do nirya, mambul pil dona deiyok ning dolonyaka ara, Allah im deice arye arepsutopura, doproptingce, apil dopting bukni, Allah im deice arye, apil dona deiyok ning kum arepsilyopura, apil kum doptinge. 28Anggun babye anggun kele. Narye anggunti nyapsise. “Allah arye wipdeibuknye, Ninye Lyena Deiyoknye, Kristus ara, na Yohanes kum unune. Allah arye, ‘Ninye Lyenanye aminyan yanamla ati, kintinilin pil donamle’ tenen, na dobuka minopce dopdeipnuke. Weik mambulnye Kristus ara aminyan yanamle,” nyapsise.
29Winipmanto yupu ton nyapnusine. Ninye dona ati, arepnamace kil ara, akil dopnamalinye, elcuk akil talilamle. Akil dopnamalinye, el melina nang ara, talyeuk unyak bukni, ‘Nun kwit dan talak yanamle do?’ tenen, kintinibikirye, kekenauk unyake. Winibuka daunmakiba, kil dopnamalinye yalirye, yupu nyaplibuk kekebicopura, kanye deibuka pin-pin arye unyake. Anang kanye deibuka pin-pin arye ulamak touk, na babye atonun unune. Nara, kanye deibuka pin-pin weik arye akunum unune.
30Anggunce nyapmanulumnye Yesus ara, akunum yanmala ati nyapsine. Elda adiparyuk weik mambulnye upnin banamle. Nauk ara, el amu tam unirye mitik mambulnye binyuk ununa anya arye, na si ara mitik upnin banamle. Nara, mambulnye kum atia. Yohanes arye nyabuk.
Nyabukopura, ayupu ton nyabuk. 31Im deice tam arye yalinye bira,#3:31 im deice arye yayuknye – Yohanes arye, “Im deice arye yayuknye,” nyabuk yupu ara, Yesus ati nyabuk. aning-aning nirya deice tam ulirye, weik mambulnye ulule. Tukwak nang aryuk deipnik ati, nara talye tukwaknye unirye, yupu uk nyanune. Im deice tam arye yalinye bira, aulul ning nirya deice tam ulirye, weik deiyoknye ulule. 32Im deice arye yayuknye birye, el elilamuk ning ap, kekelamuk ning ap ati, laka nyasulul bukni, tukwak ninye nirya arye, el yupu diba tenebuka kum kekenyake. 33Ton nang ara kum kekenyak bukni, yuk nang el nyasilye yupu diba tenebuka kekebicopura, adeice arye, lak akarye nyasinyake. Ara, ‘Allah elda pia dipkoprop yupu uk nyasulule’ tenen, kel kibika ati, sik diba tenenyak deice arye, yuk nang babye eibikirye, ‘Allah ara dib yupu uk nyasulule’ tenen, kel kinyake.
34Allah arye tukwak mutuku dopdeipsuknye, elce talye yupu kume. Allah el dipkoprop yupu nyasulule. Allah arye anye biti, el Dib Kanye weik arye arilule. Ara mitika arye bokuka arena kume. Kum nukmanto pia weik, Allah arye el mikip ariliba, im deice arye tukwak mutuku yayuknye birye amikip dololule.
35Nun ni koprop Allah arye, el Mi Koprop ati, kanye deibuka el talima arilule. Ati, yata ning do nirya, Allah arye aning-aning nirya, el Mi Koprop ati aribukba, el taruk aryuk talilirye, aning-aning deice tam deiyoknye ulule. 36Yata nang do nirya, Allah el Mi Koprop ati, diba tenebicopura, Allah arye kam una deiyok ning ariliba, pia kam unamake. Bukni, Allah el Mi Koprop ati, ‘Nun like’ tenen, batakice ninye nirya ara, Allah arye aninye ati, yu kiplirye, weik arye wenebuka opnamle ati, kam un ning kum dopdopnamake. Sik dibikibuk, tuba tamubuka tonap, kam pia kum unamake. Allah arye aninye wenena ati, el yu sik deice tuba delinamle.
Yohanes arye ayupu nirya nyabuk.
Zur Zeit ausgewählt:
Yohanes 3: EIPA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, Wycliffe Bible Translators, Inc. All rights reserved.
