Luk 4
4
Ia Setan e tovoa ia Jisas
(Matiu 4:1-11; Mak 1:12-13)
1Na Tarunga Tabu e tuhuruvia ia Jisas me basiaa na kolo i Jodan, me udungia ia me dia tana talu mangu. 2Me laba ia Setan me tovoa ia Jisas lalona e vati sangavulu na dani. Ma ia Jisas e teha na haniana siki hahani tana tahu matadu nia, me rota na ngalo hanina.
3Me laba ia Setan me kori vahai vania de, “Tina ihoe na Dalena ia God, mo ko kejalia na makara de me ke lia na bred.”
4Ma ia Jisas e kori vahai vania de, “Tana Mamare Tabu e kori vahai de, ‘Na tinoni e teha kevu mauri tana bred bamu.’ ”
5Me laba ia Setan me dungi datoa ia Jisas tatana chikai na vuvungana, me tihisi vani kesaa visa na baravata tana pari de. 6Me kori vahai vania de, “Inau ngeni ba ku sau vaniho hoe na susulihana ko ni hae taonia na vera kode nira de kolu visa na omea talana lalona, rongona ira ara sau vaniu nau, minau u hanaa na vania sei tu kilia. 7Tina vahai hoe ko chuporu mo ko livu kaeu nau, hoe ngeni ba ko tamani kodea visa na omea de.”
8Ma ia Jisas e kori vahai vania de, “Ara marea tana Mamare Tabu, ‘Ko livu kaea ma na ago vani bamua ia God nimiu Taovia.’ ”
9Ba, me tuu ia Setan me dungi dia ia Jisas i Jerusalem me livu kakaea tana chochopuna na Vale Tabu Leho nia me kori vahai vania de, “Tina ke mana ihoe na Dalena ia God mo ko chipu sivo i pari, 10rongona tana Mamare Tabu e kori vahai de, ‘Ia God ba ke kejalira nina enjol kara morosi taoniho ma kara tu utusiho. 11Mi ira kara dauho me ke teha na tuamu hado tatana siki makara.’ ”
12Ma ia Jisas e kori vahai vania de, “Ara marea tana Mamare Tabu e kori vahai noha de, ‘Mui hamu na tovoana ia God, nimiu Taovia.’ ” 13Mi tahuna ia Setan te kode na tovoa ia Jisas, me basiaa ia, me ke pitu lakaa siki tahu ni tovoana.
Ia Jisas e tuturiha nina ago i Galili
(Matiu 4:12-17; Mak 1:14-15)
14Kode me visu ia Jisas i Galili kolu na susulihana na Tarunga Tabu tatana ia, ma na kokorina tana rongona ia e tangi talihu laba tana provins i Galili. 15Ma ia Jisas e sasanira tana nidira vale lotu diadia ira na Jiu, mi ira kode ara hotua ia.
Ira i Nasaret ara hoso tahania ia Jisas
(Matiu 13:53-58; Mak 6:1-6)
16Ma ia Jisas e dia i Nasaret, na vera te leho mai ia tatana, mi tana Sabat me dia ia tana vale lotu ira na Jiu vahai te diadia ia visa tahu. Me tuchau me ke ni iju tana Mamare Tabu. 17Ara vania na buka te marea ia Aesaea na propet me pokaa me iju tana meana te kori vahai de,
18“Nina Tarunga Tabu na Taovia e toha tatagu nau,
rongona te viliu nau ku tahaa na saurongo talana vanira ira tara teha tamani siki omea.
Ia e sau maiu nau ku kori lengaa vanira ira tara toha tana sosori kara toha manga
mi ira tara doko ke marara matadira
mi ira tara toha vavana nidira susuliha kesana tinoni kara toha manga laka,
19mu ku kori lengaa te laba noha de nina tahu na Taovia te talana vanira nina tinoni.”#Aesaea 61:1-2
20Ma ia Jisas e vongo visua na buka nia me sau visu vania na tinoni ago tana vale lotu nia, me tohatuu me ke ni sanira ira. Mi ira kode lalona na vale lotu nia ara moro vatavata dia tatana ia, 21me laba ia Jisas me kori vahai vanira de, “Na mamare tabu tamu valingea hamu tu ijua nau e laba lenga i ngeni de.”
22Mi ira ara hotua mara makai kodea visa nina valagu talana te liu mai tana vuvula ni mangana ia tahuna te sanira ira, mara kori vahai kesana de, “!Tinoni de na dalena bamu ia Josep!”
23Ma ia Jisas e kori vahai vanira de, “E mana, nau hana nomua ngeni ba kamu kateli vaniu nau na kori titihila de, ‘Tina hoe na tinoni tataru, e talana ko taruhi tovosiho luhi.’ Me vahai soha nimu, hamu ngavina nau ku agosi lakamua tana veragu na valajaja nira vahai tamu rongosia hamu tu agosia nau i Kapaneam. 24Minau ba ku kori vanihamu na kori tutuni, e teha chikai na propet kara hae vagoa tana verana tovosi.
25“Ku kori vanihamu talana laka nau, e danga na daki chamu tara toha i Israel tana nina tahu ia Elaeja. Tahuna nia e teha na usa lalona e tolu na uvi me ono na vula, me liu na tavoro leho tana vera matadu i Israel. 26Ma ia God e teha na kejaliana ia Elaeja ke dia ke sangara na daki chamu nira i Israel. Ma ia e sau dia me sanga bamua e chikai na daki te toha i Serepat tana vera i Saedon. 27Kode me danga ira na Israel e hadora na mudo tana nina tahu na propet Elaesa. Ma ia God e teha kejalia ia Elaesa na taruhia chikai na vidadira ira, me taruhi bamua e chikai na tinoni ni Siria, asana ia Neman.”
28Tahuna tara valingea ira nina valagu ia Jisas, mi ira tana vale lotu nia ara kore solehana. 29Mara tu laba ira mara ragaa ia Jisas tana vera leho nia. Ma na vera leho nia te toha tana vungavungana, mara dia tatana chikai na keokeo ma kara ni choni sivoa. 30Ma ia Jisas e pililiu me dia levuhadira ira me dia salihi.
Ia Jisas e huru chonia chikai na tarunga seko
(Mak 1:21-28)
31Bukena mai, me sivo dia ia Jisas i Kapaneam, e chikai na vera leho i Galili. Mi tana danina na Sabat, e sanira ira na tinoni tana vale lotu ira na Jiu. 32Mi ira ara makaia na susulihana te valagu ia tatana. 33Tana lalona na vale lotu nia, e chikai na tinoni te datovia na tarunga seko me huu leho me kori vahai de, 34“!Ae! Ihoe Jisas ni Nasaret. ?Na hua to ngavina hoe tatamami hami? ?Saga hoe o mai rongona to ngavina na luvusihami ihami? !Minau u hana talanaa isei hoe. !Ihoe na nina Tinoni Tabu ia God!”
35Me tu laba ia Jisas me kejalia na tarunga seko nia ke toha mui me ke dia choni tatana tinoni nia. Ba, me laba na tarunga seko nia me vahania na tinoni nia me ruchu sivo me jaro i pari tana matadira visa kode na tinoni, me chulu me teha laka vahania ia siki omea. 36Me visa kode na tinoni ara makai kodea mara vaigesuhi mara kori vahai de, “?Na valagu vahai sahata vei te koria na tinoni de? Ia te tamani susuliha me huru chonia na tarunga seko.” 37Ma na kokorina ia Jisas e tangi talihu laba tana vera matadu nia.
Ia Jisas e vani maurisira danga na tinoni tara oche
(Matiu 8:14-17; Mak 1:29-34)
38Ma ia Jisas e basiaa na vale lotu nia me dia tana valena ia Saemon, me haea na vungona ia Saemon te bilabila leho solehana. Mara nongia ira ia Jisas ke sangaa na daki nia. 39Ma ia Jisas e dia me tuu lilihi ni mihena na daki nia me kejalia na oche nia ke dia choni. Me laka na daki nia, me lovo tuu chikai me valaka hahani vanira ira.
40Mi tahuna te joku na aso tana levu au me kode na Sabat, mara taha mai kode vania ia Jisas visa na tinoni tara tamania danga na vata ni oche tana vera nia. Ma ia Jisas e livu limana tatadira ira mara laka kode. 41Me danga na tinoni e sivolira na tarunga seko, me chulu na tarunga tatadira mara haila mara kori vahai de, “!Ihoe kalavata na Dalena ia God!” Ma ia Jisas e valagu susuliha vanira me lutira na valagu matengana tara hanaa ira ia na Mesaea.
Ia Jisas e kori lengaa na saurongo talana tana vale lotu ira na Jiu
(Mak 1:35-39)
42Tana mohomoho putiputi tana dani chikai e dia tovosina ia Jisas chikai malengana te mangu. Mi ira ara daia ia mi tahuna tara chaulia ira ia, mara nongia ia ke toha kolu vatara ira. 43Me laba ia Jisas me kori vahai vanira de, “Inau nigu ago ku kori lengaa na saurongo talana de tana nina baravata ia God tatana kesana laka vera, ia vahai e vu ni sau maiu nau ia God.” 44Me dia ia Jisas me valagu tana nidira vale lotu nira ira na Jiu i Jiudia.
Zur Zeit ausgewählt:
Luk 4: mln
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 (active), Wycliffe Bible Translators, Inc. All rights reserved