Johannesi 8
8
1Ene Jesusi gha yendire kundirundu dyondhwe. 2Murughura pamathiku‐thiku, gha yendire Jesusi karo mutembeli no mbunga dhodhihe dheyire kukwendi. Aye gha hungumanine no gha tangire kuwahonga.
3Hakamarukwaro naWafarasayi, ha mu reterire mukamadi yu ha wanine murungu no ha mwimekire mukatji kombunga dhawanu. 4Ha mu tongwera kwawo eshi: “Muhongi, mukamadi yu ghana pu kukwata parungu rwendi thinda. 5Mosesi gha tu rawerire mumuragho eshi, mukamadi ghokenge yo, kumupagha nomawe. Ngo yowe ne ngo ngepi?”
6Eyi ha yi mwipwerire kemo, kufika‐fika ha mu fika-fikire eshi, ha wane po thinu thokumuhetitha. Ene Jesusi gha fumberire no gha tjangire nomunwe wendi pamuve.
7Oku shime ha karera mukumwipudhura, ko kukapuka kwendi no gha wa tongwerire eshi: “Oyu gha pira murandu pakatji kenu, yo sho gha tange kumuvukuma nodiwe.”
8Munyima gha fumberire karo no gha tjangire pamuve. 9Apa ha yi yuvire, ko kutunda po kwawo munu‐kumunu kutunderera kwawakuru. Ha thighara Jesusi pithendi, namukamadi yu ghemanine mukatji kawanu. 10Munyima gha tambire kwamukamadi no gha mwipurire eshi: “Mukamadi, kupi ha di? Noyofotji temba ghopapawo yu ghana kutetera ndhango ndi?”
11Aye eshi: “Avako, noyofotji temba Fumu.”
Ha ningi Jesusi eshi: “Name temba. Ka yende ngenyu, ene perere poye kutunda kudyarero, mbadi wa kona kuharura karo.”
Wihe ghana kunongonona naye yokwaJesusi
12Parumweya gha ghambire Jesusi kwawanu eshi: “Yame munyenge ghokaye. Oyu ghokunikutha, mbadi mbo gha yendaghura mumakokore, ene mbo ghana wana munyenge ghokutapa moyo.”
13Ko kumutongwera Hafarasayi eshi: “Owe ne ghothinda ghuna kukunongonona, yodigho manongweneno ghoye ne kadi gha ghushemwa.”
14Po gha wa hutherire Jesusi eshi: “Ngambi ha ni kunongonona nothinda, makunongweneno ghange gha ghushemwa. Yoyi na dimuka eshi, kupi ku na tundire no kupi ku na kuhuka. Amwe ne mbadi mwa dimuka ku na tunda, no kupi na kuyenda. 15Karo ne muna kutetera ndhango, ghumweya, thika di muna kuyimumonena. Ame ndani, kadi wa kutetera ndhango ghumweya kemo. 16No ngeshi ha ni tetera ndhango ghumweya, ndhango dhange ne dhihunga, yoyishi kadi yoYame pithange vene yu, ene naTate yu gha ni tumine Me. 17Mumuragho wenu ya pwa kutjanga eshi, ghunongononi wawanu hawadi ne wa ghushemwa. 18Keho ne, Ame kukunongonona nothinda, naTate yu gha ni tumine.”
19Awo ha mwipurire eshi: “Kupi wiho?”
Ha hutha Jesusi eshi: “Mbadi mwa ni dimuka Me, naTate temba. Ngo mwa ni dimuka, naye Tate ngo mwa mu dimuka.”
20Yinu yi gha yi ghamberire Jesusi kumutara ghu gha karire mambangu ghoyitapa, oku ye pakuhonga hanu mutembeli. Ene noyofotji temba yu gha mu kwatire, yoyi nako dhendi di ne mbadi dheyire tango.
Hajuda mbadi ha dimuka Jesusi
21Shime ha wa tongwera karo Jesusi eshi: “Kuyenda na kuyenda, amwe mbo muna ni shana, ene mbo muna fu mumaharwero ghenu. Oku na kuyenda Me, mbadi mwa kona kukuma ko.”
22Ko kuninga Hajuda eshi: “Kumina ghana kukumina thinda, eyi ghana kuninga eshi: ‘Oku na kuyenda ne, mbadi mwa kona kukuma ko’?”
23Aye gha wa tongwerire eshi: “Amwe ne mwakamuno, ene Me nomukawiru. Amwe, mwakakaye kano, Ame ne kadi nomukakaye kano. 24Yo na mu tongwerera eshi, mbo muna fu mumaharwero ghenu. Yoyishi ngeshi mbadi sho mu tawe eshi, Yame yoYame yu ni di, ngo mbo muna fu mumaharwero ghenu.”
25Ha mwipura kwawo eshi: “Yowe dye ne?”
Jesusi gha wa tongwerire eshi: “Nye na kughambera shime nenu? 26Na kona kughamba yinu yoyingi yokukwenu, no kumutetera ndhango; ene Yu gha ni tumine, mukaghushemwa. Karo, yoyi na yuvire kukwendi keho, yo na kona kutongwera kaye.”
27Awo ne mbadi ha tjwathanine eshi, yokwaWihe gha ghambire nawo. 28Munyima gha wa tongwerire Jesusi eshi: “Kutunda pa mbo mu yeyura Mwanamunu, po mbo mu dimuka eshi, Yame ghoYame yu. No mbadiko thokutenda mumwange nothinda, ene na kuyuvitha eyi gha ni hongire Tate. 29Oyu gha ni tumine, nange gha di. Mbadi gha ni thigha pithange, yoyishi kutenda na kutenda roruhe eyi gha hima.”
30Oku shime gha karera mukughamba yinu yi, ko kutawa hanu hohengi kukwendi.
Nyambi ne kadi Wihawo
31Ko kuninga Jesusi kwaWajuda wa ha tawire muMwendi eshi: “Ngeshi ngo mu tjimape kuman̂ando Ghange, ngo mwakathishongero wange hoshemwa; 32no ngo mbo muna dimuka ghushemwa. No ghushemwa, ngo mbo ghuna mu shutura.”
33Awo ha mu huthire eshi: “Atwe ne twanahoka waAbrahamu, no shimetushemwa kukara hapika ghumweya. Ngepi di wa kona kuninga eshi: ‘Mbo muna shutuka’?”
34Ha ningi Jesusi kukwawo eshi: “Ghushemwa na kumutongwera: Kehe yu ghokuharura ne, mupika diharwero. 35Mupika, mbadi gha karanga roruhe paditete, mwana ndani yo gha karanga roruhe paditete. 36Tango mbo gha mu komonone Mwana, po mbo mu komonoka shemwa. 37Name na yi dimuka eshi, amwe ne mwanahoka waAbrahamu. Ene muna shana ku ni pagha, yoyi man̂ando Ghange ghana piri kambenene mumwenu. 38Ame na kughamba eyi na monine kwaTate, amwe ne muna kutenda eyi mwa yuvire kwawihenu.”
39Gho ha mu tongwerire eshi: “Wihetu ne Abrahamu.”
Jesusi gha wa huthire eshi: “Ngeshi ngo mwana Abrahamu mwe, ngo mwa tenda eyi gha tendire Abrahamu. 40Ene muna shana ku ni pagha, ame yu na kumuyuvitha ghushemwa ghu na yuvire kwaNyambi. Eyi ne kadi yo gha tendire Abrahamu. 41Amwe, kutenda mana kutenda yi gha tendire wihenu.”
Munyima ha mu huthire eshi: “Atwe ne mbadi twa pwa kushamuruka paruhonda. Twa kara noWihetu yofotji, eshi Nyambi.”
42Jesusi gha wa huthire eshi: “Ngeshi ngo Wihenu Nyambi, ngo mwa ni haka, yoyishi Ame ne kwaNyambi na tunda. Pan̂anyin̂anyi ne Yame no. No mbadi na kwiyithire nothinda, yo gha ni tumine. 43Nye mwa dhirera kutjwathana, eyi na kughamba? Yoyi mbadi muna kutegherera kumbudhi Dhange. 44Amwe, mwana Shatani yowihenu, no mwa hima kutenda, eyi gha hima wihenu eshi mu yi tende. Aye yomupaghi kutunda kumatangero. Karo mbadi gha kundama kumutara ghoghushemwa, yoyi gha pira ghushemwa mumwendi. Apa gha ghambanga mbango, ya mu rikanya thinda, yoyishi aye ne mukambango no wiha mbango. 45Ame ghushemwa na ghambanga, yo mwa dhirera kutawa muMwange. 46Yidye ghopapenu ghokunipambeka murandu? Ngeshi ngo ghushemwa na ghambanga ne, yinye mwa dhirera kutawa muMwange? 47Oyu gha kara mwanaNyambi, ghana kutegherea kuman̂ando ghaNyambi. Yashemwa, yo mwa dhiranga kutegherera, yoyishi amwe ne kadi mwanaNyambi.”
Jesusi gha karire kughutho waAbrahamu
48Hajuda ha mu tongwerire eshi: “Tuna ghamba pakutanga sha, eshi owe ne ghoMukasamariya ghondhanyi no gha kunyika Shatani!”
49Jesusi gha huthire eshi: “Ame ne mbadi na kara naShatani, Tate na fumaneka, amwe ne ho mwa ni shwahura. 50Karo Ame, mbadi na kushana dikuto dyange nothinda, po gha di yofotji Yu ghana shana dikuto dyange, Aye yomupanguri. 51Shemwa na kumutongwera: Ngeshi ha kwata ghumweya man̂ando Ghange mumutjima, mbadi mbo gha fa kuroruheya.”
52Hajuda ha mu huthire eshi: “Tuna dimuka pan̂anyin̂anyi eshi wa yara naShatani we. Abrahamu gha fire nawaporofeta nawo, ene shime ho ghamba eshi: ‘Ngeshi ha kwata ghumweya man̂ando Ghange mumutjima, mbadi mbo gha fa kuroruheya.’ 53Owe ne wa piterera wihetu Abrahamu oyu gha fire ndi? Haporofeta nawo ha fire. Ngepi di ghuna kukughayarera we, yowe dye nane?”
54Ha hutha Jesusi eshi: “Ngeshi ha ni kufumaneka nothinda, difumanekero dyange ne ngo kadi thinu. Oyu ne Tate yo gha ni fumaneka. Amwe ne ho muna kuninga eshi: ‘Nyambi wetu,’ 55shemwa mbadi mwa mu dimuka. Ame ne na mu dimuka. Ngeshi ngo ni ninge Me eshi, mbadi na mu dimuka, ngo ni kare mukambango yira yamwe. Ene na mu dimuka Me, no na kwata man̂ando ghendi mumutjima. 56Abrahamu ghowihenu, gha nyanyukire kukumona diyuwa dyange, naye gha di monine no gha shambererire.”
57Hajuda ha mu tongwerire eshi: “Owe ne mbadi wa kuma shime kumyaka makumi kwoko, wa mu monine Abrahamu ndi?”
58Jesusi gha wa huthire eshi: “Shemwa na kumutongwera, Ame ne Yame vene. Oku shime Abrahamu nongayaro temba, Ame na kara po.”
59Ko kutumbura kwawo mawe eshi ha mu vukumithe ko. Ene Jesusi gha hondhorokire ghushwagha mutembeli, gha ka yende.
Zur Zeit ausgewählt:
Johannesi 8: MHW1986
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Mbunga dhoBayibili dhaNamibia (Bible Society of Namibia) 1986
