Genesis 18
18
Tulu Boysi Gagalea
1Iaova sa takabula te kue Ebarahami vatanga te oyra azu taboyna ni Mamere sada oye sa tongunu te mataqamanae ona toypaka pua te voylae ngada kanaka. 2Ebarahami sa kingala puka no mi la, da soy tulu boysi ka diere vatanga. Sada oye sa mia oyra, da soy oye sa juolo kesini mataqamanae ona toypaka pua sa la soy me tepere oyra no oye sa kapata juolo la te lua.
3Sa voy goyti oye, <<Sada re ko kemani aqo ne, qo buoe, kasi paqolo koye mo nabulu. 4Aro me iro me ngoyni bi, soy ram mam quoluni nikini mina no ram mam mamana te sarajuoloa azu goyti. 5Aro me iro me kavia pitanaki, soy me vakarapota ram sinani mina zo, bati sinani kam me te kue mina nabulu,>> sa voy.
Oyra ka vatavele la, <<Sa noyi sua to, mo joyjuni pita re ko soyna,>> ka voy.
6Ebarahami sa dada puka la te ona toypaka pua, sa soynani Sera. <<Dada pale mano kiloqaramu palava noyi, no mo joyjuni mo vamoja kavia bereti,>> sa voy.
7No Ebarahami sa jikele la te ngoyni sa kue vaua pita pupura, sa pale kieke toytu bulumakao sa kusuru, no sa koyna kieke ona nabulu me dada vanama. 8No Ebarahami sa pale kavia meleike sa dodolo, no meleke luka, no bulumakao varoqa ka vamoja, no sala toyro te tarakenakae doyra oyra. Sada oyra ka aki, oye sa diere vatenge oyra te sarajuoloa azu.
9Oyra ka tanani oye, <<Be sa kue mo quolekutae Sera ne?>> Ka voy.
Ebarahami sa vatavele la, <<Oye sa kuo te toypaka pua gei,>> sa voy.
10Sinani kieke te oyra sa voy, <<Aro ko soynani amo re aro me vele napu me te kue re te sada sa seva goyti ave same, vanata! Mo quolekutae Sera me tungene kieke toytuleike.>> Sera sa diere te mataqamanae toypaka pua te rokusua oye, sa vanata.
11Ebarahami no Sera kuru kaji varoka, no Sera sa koyini moyna avea me tungene so. 12Si, Sera sa biere noypo tani, sa voy, <<Aro koto balava no qo leike buoe sa valaka soy, be sa voy aro ko majala soyko pato koype oye ba?>> sa voy.
13No Iaova sa voy goyti te kue Ebarahami, <<Be sa voy Sera sa biere no sa tanani noypo tani, <Be sa voy aro, sa tuna ko majala vapuodo kieke so, sada aro ko balava, ba?> sa voy. 14Ata sa voy, ka pita sa takani Iaova ba? Aro me vele napu me te kue re te sada sa taveni ave same, no Sera me tungene kieke toytuleike,>> sa voy.
15Sera sa isi, no sa tuqa, sa voy goyti oye, <<Aro kama biere qo,>> sa voy.
Ba sa voy goyti oye, <<Sa tuna, re ko biere,>> sa voy.
Ebarahami Sa pipini ni Sodomo
16Sada oyra taratulu ka kesini ngoyni noyene, ka mia juolo la kumala ni Sodomo, no Ebarahami sa zo koype la oyra voy me mia oyra moyra zo. 17No Iaova sa voy, <<Be sa voy, Aro me pekani Ebarahami pita Aro vatanga me joyjuni ne? 18Oyra sokutu arasumae Ebarahami moyra tubia boysi no karapota, no oyra taba tubia boysi te vodu ni te lua moyra pale mana me tae me te kue oye. 19Bati aro ko vene moyna oye, soy me varuini oyra toytu no oyra ona taotao te rokusua oye moyra vauteve zoka te Iaova, moyra joyjuni pita sa noyi no tutungono, soy Iaova me joyjuni koyna Ebarahami oyra taba pita oye sa puini moyna te kue oye,>> sa voy.
20Sinani Iaova sa voy goyti, <<Oyra boysi taba ka norekeni varoka taba pita roka ka joyjuni oyra boysi ni Sodomo no Qomora, no doyra zaqala sa poyu varoka, 21Aro me juolo la me mia vatasuku oyra pita ka norekeni varoka oyra, moyna ka tuna ba kareo, Aro me utini,>> sa voy.
22Sinani keri boysi kuru liboro no kuru zo voy la Sodomo, ba Ebarahami sa diere taru te tarakenakae Iaova. 23Ebarahami sa me vatanga te kue oye no sa tanani oye; <<Be sa voy, sa tuna re mo siro toringini oyra boysi roka oyra boysi tutungono ne,? 24Sada ka kuo lamangulu boysi tutungono te kumala lata ta ne, be sa voy, re mo siro beito to kumala lata, ba? kama voy mo marovelini ngoyni ta soy mo vakavele oyra lamangulu boysi tutungono ka kuo te ngoyni ta, ne? 25Tuna re kama voy mo voyevale toringini oyra boysi tutungono oyra boysi roka, kama majala mo aravirini oyra ka tutungono no oyra ka roka. Re sa taka mo joyjuni sa seva ta! Kama re vo buoe aratanae te vodu taba ni te lua me joyjuni veveni tutungono ba?>> sa voy.
26Sa voy goyti Iaova, <<Sada aro ko mia loymangulu boysi tutungono te kumala lata ni Sodomo, aro kasi qo vaupu kumala lata, bati ka kue loymangulu boysi ka tutungono,>> sa voy.
27Ebarahami sa ngeoro napu, <<Ke vanata! Sinani aro ko poro ngeoro te kue re Iaova, aro kareo zozoa qu ba ko seva to ngasonoro no kau, 28Be sa voy sada vatingululoyma to oyra boysi tutungono ka kuo? Re mo vaupu beito toyini kumala lata loyma to boysi roka ba?>> Sa voy.
Iaova sa vatavele la, <<Sada aro ko mia vatingululoyma boysi tutungono, aro kasi qo vaupu kumala,>> sa voy.
29Ebarahami sa ngeoro napu vele te kue Iaova, <<Be sa voy sada re ko mia vatingulu to oyra boysi tutungono te ngoyni ta?>>
Iaova sa vatavele la, <<Sada aro ko mia vatingulu boysi tutungono, aro kasi qo vaupu kumala>> sa voy.
30Sa voy goyti Ebarahami, <<Qo buoe moyna ko momani aqo, aro ko soyko ngeoro napu te kue re. Be sa voy sada re ko mia tolongonu to oyra boysi tutungono te ngoyni ta?>> Sa voy.
Iaova sa vatavele la, <<Sada aro ko mia tolononu boysi tutungono, aro kasi qo vaupu kumala,>> sa voy.
31Sa voy goyti Ebarahami, <<Ke vanata! Aro ko poro ngeoro te kue re qo buoe, Be sa voy sada re ko mia karabite to oyra boysi tutungono te ngoyni ta?>> Sa voy.
Iaova sa vatavele la, <<Sada aro ko mia karabite boysi tutungono, aro kasi qo vaupu kumala,>> sa voy.
32Sa voy goyti Ebarahami, <<Ke vanata! Qo buoe moyna ko momani aqo, no aro me ngeoro kieke vele to sada. Be sa voy sada aro ko mia mano to oyra boysi tutungono te ngoyni ta?>> Sa voy.
Iaova sa vatavele la, <<Sada aro ko mia mano boysi tutungono, aro kasi qo vaupu kumala>> sa voy.
33Sada Iaova sa beito vakangiere Ebarahami, oye sa kesini oye, no Ebarahami sa seipele vele la te ona kumala soy.
Zur Zeit ausgewählt:
Genesis 18: BAA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024, Islands Bible Ministries. All rights reserved.