Mateus 15
15
ONTOPORUA 15.
Jesus ta pukurura aafariseji
1Aanongo jomambo naafariseji oje ja ku Jesus, ja zi ku Jerusalem, taa ti:
2Otshike aarongua johe taa tokora eemukaro daakuru jonare, oshoka kaa hikosha keenjara, nge taa ri?
3He ta jamukura, ta ti: Otshike tamu tokora otshipango tsha Karunga moru eemukaro deni, nande Karunga ta ti:
4Simaneka sho na njoko, nde ngu ta tuka she na hina, na se.
5Ndere ne otamu ti: Keshe tuu ngu ta ti ku she nenge hina: ajishe mbi ondi nokukupa, otaji ningi egano, he ina pumbua ue okusimaneka she na hina.
6Otsho mua dima po otshipango tsha Karunga moru eemukaro deni.
7Jakengereri ne! Isaias okue mu shunganekera notshiri, sho ta ti:
8Orudi ndu otaru simaneke ndje ouara neemurungu, ndere eemutima dauo odi ri kokure na ngaje.
9Jo otaa simaneke ndje ouara, sho taa rongo aantu omarongo niipango jaantu.
10H’oti icana aantu ku he, nde ta ti: Puakeneni, ne mu uve ko naua!
11Katshi shi shi tatshi hi mokana, tatshi nigirikica omuntu, aaue, nde shi tatshi zi mo mokana ike, tatshi nigirikica omuntu.
12Nena aarongua oje ja ku Jesus, taa ti: Ou tshi tshi nani, nokutja aafariseji oja geja, sho ju uva eehapu dohe?
13He ta ti ku jo: Keshe tuu otshimeno, shi inatshi tsikua ku Tate homeguru, otatshi tudua po.
14Je eceni, ojo aaposi naatetekereri jaaposi. Ndere omuposi, nge ta tetekerere omuposi, ajeshe jo jaari otaa guire motshirambo.
15Petrus h’ota jamukura: Tu ororera ejere ndika.
16He ta ti: Na ne kamu neendunge nani?
17Kamu uete nani, kutja ajishe, mbi taji hi mokana, otaji hi uo mepunda, jo taji zire mo uo mompito ha tshitua.
18Ndere ajishe, mbi taji zi mokana, otaji zi momutima uo, mbika otaji nigirikica nduno omuntu.
19Oshoka mbi taji zi momutima, ojo mbi: omadiradiro omiineji, omadipagano, omaagero, joshoni, uufuci, omarundiracano, omatsheko.
20Ojo mbi taji nigirikica omuntu. Ndere okurja neenjara inadi koshua, itaku nigirikica omuntu.
Omukiintu omukananeji.
21Jesus okua zi po mpo, nde ta hi motshirongo tsha Sidon na Tirus.
22Nde tara, omukiintu omukananeji okua zi keemukunda dija depora, ti igida, ta ti ku he: Sa ndje oshenda. Muene, Mumua David, omumuandje omukadona ota monicua iishuna kombepo ombuineji.
23Ndere Jesus ine mu jamukura nand’ohapu. Aarongua oje ja ku he, taa mu indire: Rareka ngu a he ike, oshoka ota jogerere monima hetu.
24Ndere he ta ti: Onda tumu’ike keenzi di da kana maandja Israel.
25Omukiintu okue ja popepi, ti injongamene ku he, ta ti: Muene, kuaca ndje!
26He ta jamukura: Inatshu uka to kuc’okurja ku uunona, nde to ku umbire uumbuagona.
27Ndere he ta ti: Eno, Muene, uumbuagona ohau ri ike uupambu, mbu hau gu kiiriro joojene.
28Jesus ta jamukura: Mukiintu, ehiteero rjohe enene, ningirua ngashi ua ara. Okuza tuu mpoka omona okue eruka.
Itshee Jesus ta kutica aantu omajovi
29Mpa Jesus h’okua piti, ta hi kefuta rja Galilea, ta rondo kondundu, nde ta kaatumba.
30Aantu ojendji oje ja ku he, na mba ja sit’eui, aaposi, iirema, nojendji ja fa mboka, oje ja rangeke keempadi de, h’ote je erukica.
31Aantu ja kumua ko, sho taa mono aasitamaui taa popi, iirema taje ende, aaposi taa mono ko; jo otaa amberere Karunga ka Israel.
32Jesus h’oti icana aarongua je, ta ti ku jo: Ondu uvitire aantu oshenda, oshoka omasiku gatatu ja kara pu ngaje, ndere inaa rja tsha. Inandi ara okujarareka ja he, inaa rja tsha, kaa ka sire mondjira.
33Ndere aarongua taa ti: Otatu kuca peni muka mombuga eemboroto okukutica aantu je cike mpoka?
34Jesus h’ote ja pura: Mu neemboroto ngapi? Jo taa ti: Uunuaari neeshi eentshona.
35H’ota rombuere aantu ja kaatumbe poshi.
36Nde ta kuc’eemboroto di uunuaari neeshi tuu, ta amberere, te di pambura, h’ote di p’aarongua, je di toporere aantu.
37Jo ajeshe oja rja, nde taa kuta. Iihupe oje ji gongere, iimbare uunuaari ju uda.
38Mba ja rja, oja ri aarumentu omajovi gane, aakiintu naanona inaa jarurua.
39H’ota rareke aantu, ta rondo mosikepa, nde ta hi motshirongo tshaamagedan.
Zur Zeit ausgewählt:
Mateus 15: KWM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Omission Heklesia Ekatolika, 1951. Namibian Catholic Bishops Conference.