YA-SFADOCI JRNE 8
8
53 [Chena nihki wapfaki jrgi ilani nahvlwrkv ya-drci wegiwv hawv : 1wakv Jesise ini Vlifiwi maqvhgigi hawv. 2Chena ini qalvhwhrpvgi biawv nuhgi ini mvmrtumawi-kvmikugi, chena jrivhki nihki lanvwaki u bialutvwrwrli nili; macimi lamvtvpiwv, chena u kvgahgimvhi nihi. 3Chena nihki yr-ivwigacki macimi nihki Palaseki u bialrwrli iqali masanofoli wrpvsiphigawa-nagi; macimi yasi mahtvh-gabhrwrci nili, 4Ga-gahgimiwa, yrmv iqawv mahci masanofu wrpvsiphigawa-nagi, tapilo ini si Ivwewa-nagi. 5Huwa ini kutaladewa-nagi Mosise ni tapimakunv wvhsi sekunwhvkici yone ya-takv : nahiwa uwa ga hilv gelv? u talrwrli nili. 6Macimi wacitv nihki yomv iwvki, u kuchrwrli nili, wvhsi manvwvhi bonvmuwrci wv huci cvhtvwrci-mrwrci nili. Pvyaqv Jesise svhgigi si wrgi, macimi u lajali uci vwiga ini vsisgegi. 7Pvyaqv iah nakutanwi nihki nvtuhtvwrwrci nili, inv susgewv, macimi, Inv ba-bur vhdalitv mvje-lafiwilvwewa alagenv gelvwv, welrni inv nhihtv sekunwhrta nili u talvhi. 8Chena inv nuhgi svhgigi si wrgi, macimi u lajali uci vwiga ini vsisgegi. 9Macimi nihki iah notvmuwrci ini, luhfaki mrsv nakuti, inv gci-gigilani uci wasgi brlu’ hinv jaiahqi : macimi Jesise nrnsihkv nvkvlofu, chena inv iqawv, tv hvpici, ini alaghi. 10Macimi Jesise susgewv, chena Iqawv, drnihkiwa nihki? hv mvtv ilani gi myrlvhkuwrlaqv? u talrli nili. 11Macimi inv, Dabalamiwatv, mvtv ilani, isiswa. Chena Mvtv nuhgi nelv gi myrlvhkuwrlala : nhrlu ia hrivni; yoci tagi gidani mvjesilvwelu, u talrli Jesise.]
12Nuhgi waciganvhi Jesise u kvlolvhi nihi, Neiv ini wvivhfayrgi ini ya-lakuqvh-kvmigigi : inv na-nakvsitv mvtv ivh brrnfa ini lr papagicv, wakv wah bonv ini wvivhfayrgi lanvwawewa, hiwv. 13Waciganvhi nihki Palaseki, Pasiqi gi pvh-nema gelv si dabwawa; mvtv mvyrwvtwi gi dabwawa, u talrwrli. 14Hrpvfsa Jesise macimi, Weginrqi qahqi pasiqi pvh-nemaiv nelv si dabwawa, ni dabwawa mvyrwvtwi; xvga ni wrkutv wa-maiv, macimi ya-hriv; wakv gelvwv mvtv ki wvkudrnrwv wa-maiv, walr ya-hriv. 15Nvwvci ini wivufi yagi ki talvhkuwapwv; mvtv nelv ni tapuwrlv ilani. 16Hvnkv macimi qahqi tapuwrsiwaiv nelv, ni tapuwrsiwawa mvyrwvtwi; xvga mvtv nrnsihkv nelv, wakv nelv macimi inv Ufimv wa-wrwenaskvwitv. 17Hvnkv macimi ini ki kutaladewanwrgi mahtv-wigrta ini, yasi u dabwawanwv neswi ilaneki mvyrugi. 18Nelv inv ba-pvh-nemakv pasiqi neiv si dabwawa, macimi inv Ufimv wa-wrwenaskvwitv ni pvh-nemrqv dabwawa, u talvhi. 19Waciganvhi nihki, Drnvwa g’Uhfv? u talrwrli. Jesise rpvfsa, Mvtv ki wrkumipwv nelv, mvtv nuhgi n’Uhfv : wrkumiyaqa gelvwv, nahfrpi kih wrkumrwv n’Uhfv, u talvhi. 20Hini muni-bonvhfowigr-nagi kvlvwi yolumv kvlvwewanv, yasi kvgahgimiwaci ini mvmrtumawi-kvmikugi : macimi mvtv ilani u masanrli; xvga ud rtafvmowa gawvgi mvtv biaiv.
21Waciganvhi nuhgi u talvhi nihi, Nah wapfa, macimi gah nvtunawhipwv, chena gah napapwv ki mvjesilvwewa-nwrgi : Ya-hriv, ga hrlwi kvtvwi si birpwv. 22Nihki Josvki waciganvhi Kvnhv wa ndo weiv, waci iuci inv, Ya-hriv, ga hrlwi kvtvwi si birpwv? iwvki. 23Chena gelvwv sebrci k’uciwipwv; nelv spam-agi n’uciwi : gelvwv yomv ya-lakuqvh-kvmigigi uci, mvtv nelv ya-lakuqvh-kvmigigi uci, u talvhi nihi. 24Waciganvhi gi talapwv nelv, wvhsi gelvwv napayaqa ki mvjesilvwewa-nwrgi : xvga waci-waphi gelvwv dapwahsa-yaqa yasi lieyrwiv inv, gah napapwv ki mvjesilvwewa-nwrgi. 25Nihki waciganvhi, Nafvwa gelv? u talr-wrli. Datapilv’ hini mviahci nahfrpi kvlolalvku ina wasgi uci. 26Maci wiahi ni bonv wvhsi kvlvwiv macimi wvhsi mahtvhku-waiv gelvwv si : pvyaqv inv wa-wrwenaskvwitv mvyrwaf i; chena nili wiahi mviahci inv uci notvmv, nileni ini ya-lakuqvh-kvmigigi ni tah kvlvwi, u talvhi Jesise. 27Mvtv nihki u molaladrnrwv yasi inv nili Ufimrli rtutvmvwrci nihi. 28Waciganvhi Jesise, Hina gelvwv mahci kuqitanaqa inv u Qihfvli ilani, uwa gah wrkudr-nrwv yasi neyrwiv inv, macimi yasi mvtv-wiahi si Ivweiv pasiqi nelv, wakv yasi inv Ufimv kvgahgimici, ni kvlvwi yolumv wiahi. 29Chena inv wa-wrwenaskvwitv ni wejemaqv; mvtv nrnsihkv nelv ni mah’ nvkvlaqv; xvga nili wiahi ma-nwilapwvsgr-kuci inv mosvtvwi ni tasi Ivwi, iwv. 30Yasi inv kvlvwici yolumv wiahi, maci u dapwahtvwr-wrli nili.
31Waciganvhi Jesise, Qahqi ni kvlvwewa-nagi vpiyaqa, uwa gialv tapilo ni kvgahgimrfvki gelvwv; 32chena gah wrkudrnrwv ini dabwawa, macimi ini dabwawa gah melakunrwv tabalatv-mowafewa, u talvhi iuhumv Josvhi mviahci dapwahdrkuci. 33Hud rpvfdrkuhi nihi, Aplahame u menkv nelvwa, macimi mvtv-lrqv gawvgi ni mah’ geganikvni-nakunv ilani : nahiwa gelv g’uci, Gah melakunrwv tabalatvmowafewa, iu? 34Hud rpvftvwvhi Jesise, Tapilo, tapilo, gi talapwv nelv, Jrgi wiyafv ma-mvcilvwetv mvjesilvwewa, mvjesilvwewa u geganikv-nvli nili. 35Macimi inv geganigrfv mvtv goqa-lrqvsi vpiwv ini wegiwr-pagi : hinv uqih-fimv vpiwv goqa-lrqvsi. 36Qahqi waciganv’ hinv Uqihfimv melalwrqa tabalatvmowafewa, svpkvhi gah tabalatvmo-wafipwv gelvwv. 37Gi wrkumalapwv yasi Aplahame u mengrnici gelvwv; pvyaqv ki nvtunahrnrwv wvhsi nsiyaqa, xvga ni kvlvwewa mvtv mah’ tabalatvmfaiv geyrwrgi. 38Ni kvlvwi nili wiahi mviahci namaiv weci n’Uhfv : macimi gelvwv nahfrpi nili wiahi ki tasi Ivwepwv mviahci k’uhfwv uci notvmaqa. 39Hrpvfsaki nihki macimi, Nelvwa Aplahame n’uhfanv, u talrwrli. Qahqi Aplahame ut vpaluhfa-mita gelvwv, nili u pakvtafewanv Aplahame kih silv-wepwv gelvyv, u talvhi Jesise. 40Wakv uwa ki nvtunahrnrwv wvhsi nsiyaqa, ilani mviahci wetvmolwrqa ini dabwawa, Mvnatu waci notvmv : mvtv Aplahame yomv si Ivwi. 41Ki tasi Ivwepwv gelvwv nili u pakvtafewanv k’uhfwv. Nihki, Mvtv nelvwa wabal-adeuhadewa-nagi ni uci negipa; ni bonrpa nakuti Ufimv, datapilv-hi Mvnatu, u talrwrli. 42Qahqi Mvnatu Ufiyaqa, ki hvhqalam-ipwv : xvga ni biaci luhfv nelv macimi Mvnatu n’uma; xvga mvtv nuhgi ni mahci pasiqi bir, wakv inv ni wrwenasgrqv, u talvhi Jesise. 43Gociwa mvtv ki nanuhdrnrwv ni pagikvlvwewa? Xvga datapilvhi ni kvlvwewa kid rlwi kvtvwi nodr-nrwv. 44Hinv mvci—mvnatu k’uhfwv k’uciwipwv gelvwv, macimi nili u Ivsegrci vgrwrtvmawanv k’uhfwv ini ki tasi tahawanwv wvhsi lvweyaqa. Nrnsiwatv inv ina vlamvh-kvmikvtwi uci, macimi mvtv ini dab-wawa-nagi nepvwi, mvtv-lrqv xvga dabwawa weyrgi. Iah kvlv-wici nrnhrcimowa inv, u nhvlwrf ewa uci kvlvwi : xvga inv nrnrn-hrcimutv, macimi inv ufimv ntvsi. 45Wakv xvga ini dabwawa ni taiu, mvtv ki dapwahtvwipwv gelvwv. 46Drnvwa gelvwv ni dapi-maqv mvjesilvwewa? Qahqi dabwawa ni hiu, gociwa gelvwv mvtv ki dapwahtvwipwv? 47Hinv Mvnadoli waciwitv u nodrnv nili u kvlvwewanv Mvnatu : xvga vlv-yomv waci mvtv notvmaqa nili, xvga mvtv Mvnatu k’uciwipwv gelvwv. 48Hrpvfsaki nihki Josvki macimi, Hv mvtv ni uwasi iupa yasi gelv Samaliyawivni, macimi bonvci wvninahfi? u talrwrli. 49Jesise rpvfsa, Mvtv ni bonv wvninahfi; wakv n’ utvgalamv n’Uhfv, chena gelvwv ki myrsi-makufihipwv. 50Pvyaqv mvtv ni nvtunahv ni wvhfrci-makufewa : hvpiwv nakuti na-tunahigatv macimi da-puwrsiwatv. 51Tapilo, tapilo, gi talapwv nelv, Qahqi ilani kjetunvga ni kvlv-wewa, inv mvtv-lrqv wah nama iqinvmowa. 52Nihki Josvki, Uwa ni wrkudrpa yasi bonvci wvninahfi. Aplahame napwv, chena nihki mrmosigesqacki; macimi, Qahqi ilani kjetunvga ni kvlvwewa, inv mvtv-lrqv wah kutvtv iqinvmowa, gi taiu gelv. 53Hv vlikv gi ta lafi n’ uhfanv Aplahame, napakv? macimi nihki mrmosiges-qacki naboki : nafvwa gi tasdo geiv gelv? u talrwrli. 54Jesise rpvfsa, Qahqi wvhfrci-makufihdoiv neiv, ni wvhfrci-makufewa mvtv-lrqv wiahi : n’Uhfv inv wa-wvhfrci-makuf ihitv; yr-cimaqa yasi inv u Mvnadomi-yaqa; 55Chena mvtv inv ki mah’ wrkumr-wv : wakv ni wrkumv nelv; chena qahqi mvtv ni wrkumv ni hiu, brsi gelvwv nah lafi, nrnrnhrcimutv : pvyaqv ni wrkumv inv, macimi ni kjetunv u kvlvwewa. 56K’uhfwv Aplahame usvsilapwv wvhsi namagi ni grsagigi; chena ini u nama inv, macimi uwasil-apwv, u talvhi. 57Waciganvhi nihki Josvki, Mvtv gawvgi nryl-vnwr-pitvgi gi mah’ tfwi gikvdowi, chena gelv hv gi mahci nawv Aplahame? u talrwrli. 58Tapilo, tapilo, gi talapwv nelv, wihsi-bur negici Aplahame, nit vpi nelv, u talvhi Jesise. 59Nihki u mvmrwvhi sekunhi waciganvhi wvhsi pgitawhrwrci nili; pvyaqv Jesise u gigido weiv, macimi luhfa ini mvmrtumawi-kvmiqi.
Zur Zeit ausgewählt:
YA-SFADOCI JRNE 8: SJW
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published for Thomas Wildcat Alford in 1929
