HINI UWASI-BIADRCIMOWA ya-sfadoci MAFIYO 12
12
1Hina lrqv Jesise wapfa ini tv hvlwrkvhsi-gesagigi via srpwi nili kvwvsqi-gtigrnv; chena u kvgahgimrfhi sqrlvwahi macimi nihki ut valmi gisgiqanr-nrwv ini wvhsi meci-wrci. 2Pvyaqv nihki Palaseki, iah namu-wrci ini, Wrpvmi, gi kvgahgimrfvki yasi lvwe-wrci ini buryr mvyrugi kutaladewa-nagi wvhsi lvwegi tv hvl-wrkvhsi-gesagigi, u takuhi. 3Pvyaqv, Hv mvtv ki mah’ lrbrtudr-nrwv yasi lvweci Dapide, iah sqrlvwaci, chena nihi Wa-wedfa-makuci; 4yasi becfrci ini u wegiwr-pimi Mvnatu, chena u meci ini ufapi tvkuwhv, buryr ini mvyrugi kutaladewa-nagi wvhsi welv mecici, mvtv nuhgi nihi wa-wedfa-makuci, wakv nihki mkvtaukulv-yaki pahi? u talvhi. 5Walr hv mvtv ki mah’ lrbrtudr-nrwv ini kutaladewa-nagi, yasi nihki mkvtaukulvyaki myrsdo-wrci ini vlwr-kvhsi-grsagigi betiga ini mvmrtumawi-kvmiqi tv hvlwrkvhsi-gesagigi, macimi mvtv mvci-lvweki? 6Pvyaqv gi tala-pwv nelv, yasi nakuti vlikv ilafi notv ini mvmrtumawi-kvmiqi utvsi vpici. 7Wakv naiahkv wrkutv-maqa ya-yoyrgi yomv, Skvtv ni ta la-latv gita-minrqa-ladewa, macimi mvtv vpanvwawa, mvtv ki tvh mah’ pvgidrmr-wrki buryr mvci-lvwecki. 8Xvga inv u Qihfvli ilani Dabalatvkv ini vlwrkvhsi-grsagigi.
9Chena ini uci wapfa, macimi u msi-kvmikum-wrki si becfa : 10chena wrpvmahku, ilani u bonv vhkvpwi-lajawa. Macimi nihki u nvtuhtvwrwrli nili, Hv mvyrwvtwi ini kutaladewa-nagi wvhsi gegahi-wagi tv hini vlwrkvhsi-gesagigi? iwvki, wvhsi manvwvhi masdrwimr-wrci nihki. 11Macimi inv, Nafvwa ilani ntvsi vpiwv gelvwv, wah bonrli nakuti magefvli, chena qahqi yolumv wrsrlvkugi si pansinoli tv hini vlwrkvhsi-gesagigi, hv mvtv inv u tvhsi foginrli, macimi u kuqici-pvgilrli nili? u talvhi. 12Drniwa laghi si vliwi waci-ganv’ hilani lalamakufi notv magefv ! Yone uci ini mvyrwvtwi kuta-ladewa-nagi wvhsi wa-uwasrgi silvwegi tv hini vlwrkvhsi-gesagigi. 13Hina uwa inv, Jegi-lacasgrlu, u talrli nili ilaneli. Chena inv mrsi jegi-lacaskv; macimi ini patagi mafdodali, brsi ini vsuwa kutvgi. 14Pvyaqv nihki Palaseki luhfaki, macimi u tapuwrlrwrli nili wvhsi nihki manvwvhi mvci-lutvwrwrci nili.
15Chena Jesise u molalatv ini macimi ini-uci srwa : macimi maci u nakvlrwrli nili; macimi inv u gegahvhi jrivhki nihi, 16chena u tapinvlaqi-mvhi nihi wvhsi bur nihki wrkumakufi-hrwrci nili : 17wvhsi ini manvwvhi uqrufagi ga-kvlvwigi srpwi Visviv inv mrmosiges-qatv,
18Wrpvmahku, nit vlolrkv mviahci mvmvkv;
Nit vhqalademv nileni mvyrwi-neyrnv manwalamrci :
Husgici inv nah si bonv ni Cvjrlvhqv,
Chena wah muhgrtutv-mvwvhi mahtvh-kuwawa nihi Nvnvhkvwi-lanihi.
19Mvtv wah mvwinvhga, walr ulrmvhotvmwv;
Mvtv nuhgi wiyafv wah notvmvwrli u ta sihsimowa lr nili udawani-myawanv.
20Sa-saqvfgodagi mfvsqvlwi mvtv wah puskv,
Macimi mvfrnvli bami lewvfigalici mvtv wa hvhtawhrli,
Brlid hinv kulapgrwawa-nagi sfvdota mahtvh-kuwawa.
21Macimi u wefowa-nilici wah si nihki Nvnvhkvwi-laneki nvnrci-tahaki;
iupi.
22Hina uwa biadrqi nakuti u lakusgrgoli wvninahfeli, kvgabeqa macimi gipitunwv : macimi inv u gegahrli nili, dapi laghi wvhsi inv gipitunawi-lani kvtvwici macimi tapinvgi. 23Macimi jrivhki nihki mahsalagiki qvqahdrni-tahaki, chena, Kvnhv yrmv nili u qihfvli Dapide? iwvki. 24Pvyaqv ina nihki Palaseki iah notvmuwrci ini, Mvtv yrmv ilani u luhfa-pvgilvhi wvninahfihi, Pialsipvleli uci wakv nili ugimr-osrkvnwrli nihki wvninahfeki, iwvki. 25Macimi inv u wrkutv yasi tahawa-nilici, Jrgi si ugimrwewa pvhfahgrdeiv lekvtvh-kvmigifewa-nagi si biadota; chena jrgi udawa walr wegiwv pvhfah-grdeiv mvtv ivh nepvweiv, u talvhi : 26chena qahqi Satane luhfa-pvgilrta Sataneli, pvhfahgrti inv; nahiwa uwa wah si nepvweyrli u ugimrwewa? 27Chena qahqi nelv Pialsipvle uci kvtvwi luhfa-pvgi-lvga wvninahfeki, nafvliwa ki qihfwrki uci kvtvwi luhfa-pvgilrwvhi nihi? waciganvhi nihki ga hu tapvsvwvhkuwamipwv. 28Wakv qahqi nelv nili Mvnatu Ucvjrlvhqvli uci kvtvwi luhfa-pvgilvga wvninahfeki, uwa galv ini u ugimrwewa Mvnatu ki mvtvlakunrwv. 29Walr nahiwa wih si kvtvwi becfa wiyafv ini ya-drlici wegiwv nili wesigi ’laneli, macimi mvci-lutvmvwrli u wiahemilici, waciwaphi inv nhihtv gijepilrta nili wesigi ’laneli? macimi ina chena wah mvci-lutvmvwrli ya-drlici we-giwv. 30Hinv ba-bur wejemitv ni pipahtanaqv; chena inv ba-bur weci mrwvtunigamitv lfwaniga. 31Waciganvhi gi talapwv nelv, Jrgi si mvjesilvwewa macimi pvhdrmowa wah pvgfa-latvmrqeki ilaneki; wakv ini u pvhdrmofowa inv Ucvjrlvhqv mvtv ivh pvgfa-ladota. 32Chena goqa-nafv-grci wa pipahcimrli kvlvwewa nili u Qihfvli ilani, ini wah pvgfa-latvmrqi inv; wakv goqa-nafv-grci wa pipahcimrli nili Ufapi Ucvjrlvhqvli, mvtv ini ivh pvgfa-latvmrqi inv, nayeswalanv mvtv utvsi ya-lakuqvh-kvmigigi macimi ini betiga wrsv biayrgi. 33Walr u uwasdoku ini mtaqi, macimi ini mvwifowa uwasv; walr myrsdoku ini mtaqi, macimi ini mvwifowa myrlatwi : xvga ini mtaqi ini mvwi-fowa uci wrkudota. 34Gelvwv lawvki udosrkvnvki, nahiwa kih si kvtvwi gelvwv, ma-jelafiyaqa, kvlvwipwv uwasi wiahi? xvga ini utahi si mrlafewa uci kvlvweiv ini udoni. 35Hinv uwasi ilani uwasi u pvwawa-nagi uci biatu uwasi wiahi : chena inv majelafitv ilani u mvci pvwawa-nagi uci biatu mvjrfi wiahi. 36Chena gi talapwv nelv, jrgi si naluhci kvlvwewa ga-kvlvwiwrci ilaneki, wah meliwaki tapv-svwrcimowa ntvsi ina jaiahqvh-kuwawi grsagigi. 37Xvga gi kvlv-wewanv gelv ga huci tapvsvuha-gopi, macimi gi kvlvwewanv ga huci mvtvhkuwrla-gopi.
38Hina uwa nr-nakuti nihki yr-ivwigacki chena Palaseki ud rpvftvwrwrli nili, Ga-gahgimiwa, nih namapa giginolowa gelv uci, isiwaki. 39Pvyaqv inv rpvfsa macimi, Mvjelafi chena wrpvsiphi-gawafi sqewanv u nvtunahv giginolowa; macimi mvtv wah melrwv giginolowa wakv ini Jonv u giginolowa inv mrmosigesqatv, u talvhi nihi : 40xvga yasi Jonv nfwi gesqa macimi nfwi tapuqa vpici u pah-qvdrgi inv msi nvmahfilahf i; yone wah si inv u Qihfvli ilani vpici nfwi gesqa macimi nfwi tapuqa ini u tahigi inv vsisgi-drmqa. 41Nihki Nanifv uci laneki wah nepvweki ina jaiahqvh-kuwawa-nagi weci yolumv sqewanvli, macimi wah mvdrmrwrli : xvga nihki mvtveni si ta-haki tv hini u nvnvhimiwa-wilici Jonvli; macimi wrpvmahku, vliwi ya-lafitv notv Jonv utvsi vpiwv. 42Hinv ini yalrwvhqagi uci ugi-mrwi-iqa wah pvfaqi ina jaiahqvh-kuwawa-nagi weci yolumv sqewanvli, macimi wah mvdrmrli : xvga inv ini ya-iqihqihfaki ini vsisgi-drmqa uci biawv wvhsi notvgi ini u laburwa Svlvmvne; macimi wrpvmahku, vliwi ya-lafitv notv Svlvmvne utvsi vpiwv. 43Wakv inv wivgilahfi, ina nili ilaneli ia huci luhfrci, pami srpwi pamfa tvh bur lrqvsi vhdagi napi, u pami nvtunahv vlwrkvhsewa, macimi ini u qelv. 44Hina uwa, Patagi nahv ya-driv wegiwv waci biaci luhfriv, hiwv; macimi ina iah birci, u mkv ini sasibriv, jekvthota, macimi wrwasih-kvta. 45Hina uwa nhawv, macimi u gilaginv weiv neswvhfwi kutvkhi lahfihi vliwi si mvjelafihi notv welv, chena nihki becfaki macimi ntvsi daki : macimi ini jaiahqi u ta lafewa inv ilani vliwi si mv-jrfi notv ini wasgi. Datapilvhi yone nahfrpi wa hisi nvmuci yrmv mvci sqewanv.
46Ia haiahi gawvgi kvlolrci nihi mahsalalici, wrpvmahku, ugali macimi u janinvhi frgici nepvwihi, bami nvtunahv-malici wvhsi kvlolakuci. 47Macimi wiyafvli, Wrpvmi gi giv chena gi janinrki frgici nepvweki, bami nvtunahv-muwrci wvhsi kvlolahgi, u tagoli. 48Pvyaqv rpvfsa macimi, Nafvwa ni giv? macimi nafvkiwa ni janinrki? u talrli nili wa-wetvmrkuci. 49Macimi mrsi jegingaskv u kvgahgi-mrfhi wvyaci, chena, Wrpvmahku, ni giv chena ni janinrki ! 50Xvga goqa-nafv-grci wa hini silvwi u tasi tahawa n’ Uhfv ya-pitv wafapvh-kvmigigi, hinv ni janinv, chena nit iqamv, macimi ni giv, iwv.
Zur Zeit ausgewählt:
HINI UWASI-BIADRCIMOWA ya-sfadoci MAFIYO 12: SJW
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published for Thomas Wildcat Alford in 1929