متّای انجیل 4
4
عیسی امتحون بنه
1بازین روح القدس، عیسی بیابؤن میئن راهنمایی بُوده تا ابلیس اونه امتحؤن بکونی. 2عیسی بعد اونکه چهل شبندهروز، روزه بو، وَشتَه بو. 3هو وخت ابلیس اینه ورجه بومَه و بوته: «اگه خدا ریکه ایسّی، ایی سنگؤنِ بگو نون ببی!» 4عیسی اونه جواب میئن بوته: «تورات میئن بنویشته بوبُو که:
«”آدمی فقط نؤن أمره زنده نیه،
بلکه هر کلامی أمره که، خدا دهنای بیرون هنه.“»
5بازین ابلیس اونه مقدّس شهرِ سو ببرده و معبدِ گوف سر بنه 6و عیسی بوته: «اگه خدا ریکاکی، تَه جیر تؤدی، چونکه کتابِ زبور میئن بنویشته بوبُو که:
«”تی وسه خوشِ فرشته أنِ فرمؤن دئنه و
اوشؤن تَه خوشؤن دستؤن سر گینَن
نبی که تی پا یکته سنگ بزنی.“»
7عیسی اونه جواب بده: «اینم تورات میئن بنویشته بوبُو که:
«”خداوندْ تی خُدا امتحؤن نکون.“»
8یبار ده ابلیس اونه یکته پیله کوه گوف سر ببورده و تمؤم دنیا ممالک با تموم اوشون شکوه و جلال، عیسی نیشون بده 9و بوته: «اگه می جلو خاک سر بکّای و مَه پرستش بکونی، ایشون هَمَه تَه هدئنم.» 10عیسی اونه بوته: «دورَه بو، ای شیطون! چونکه توراتِ میئن بنویشته بوبؤ:
«”خداوندْ تی خُدا، پرستش بکون
و فقط اونه عیبادت بکون.“»
11بازین ابلیس اونه ویلَه گوده و فرشته أن بومئن و اونه خدمت بودَن.
عیسی خدمت شروع کوئنه
12هیطو که عیسی بشتؤسه یحیی گرفتارَ بؤ، جلیل سو وگرسه. 13بازین ناصره شهرای بوشؤ کفرناحوم سو و اوره بیسَه. کفرناحوم جلیل دریا ور بو و زِبولون و نفتالی سامؤن میئن هنّه بو. 14ایی اتفاق دکته تا اِشعیای پیغمبر کلام به انجوم برسی که، بوته بو:
15«زبولون سامؤن و نفتالی سامؤن،
شمه ایی که دریا راه سر، اوطرفِ اُردن ایسائین،
جلیل ملتؤن؛
16مردومی که ظلمات میئن ایسابون،
پیله روشنایی بدِئن،
و اوشؤنیِ که، مرگ سایه میئن زیندیگی گودَن،
روشنایی فتؤسه.»
17او زمؤنَ جی عیسی بنا بُوده، موعظه گودن و گوت: «توبه بکونین، چونکه آسمؤنِ پادشاهی نزدیکَ بؤ!»
عیسی اوّلی شاگردؤن
18وختی عیسی جلیل دریا کنار راه شوءدبو، دو ته برأره بدِه به ایسم شمعون نامدار به پطرس و اونه برار آندریاس که، آؤ میئن سالی زِدبوئن، چونکه صیاد بوئن. 19عیسی ایشؤنه بوته: «می دومبالسر باین که مو شمره مردوم صیّاد چأکونم.» 20اوشؤن درجا خوشؤنِ سالیِ أنِ ویلَه گودَن و اونه دومبالسر تاتأدی راه دکتن. 21هیطو که خوشِ راه شوئدبو، دوته برأر دیگرم یعنی یعقوب، زِبِدی ریکای و اونه برأر یوحنا بدِه که، خوشؤن پئر زبدی اَمره نوء میئن ایسأ بُن و خوشؤنِ سالی أنِ حاضیرَ کادبُون. اوشؤنم دوخنده؛ 22ایشونَم درجا نوء و خوشؤن پئره ویله گودَن و اونه دومبالسر بوشوُن.
ناخوشون شفا
23ایطو بوکه، عیسی سرتاسر جلیل گَرس و ایشونه عبادتگاه أنِ میئن آموتی و خدا پادشاهی خوروم خبرِ اعلؤم گود و هر جور درد و ناخوشی مردومِ شه، شفا بخشی. 24پس عیسی آوازه تمؤم سوریه میئن فیبیته و مردوم همه‌ء ناخوشؤنِ که، هرجور مرض و ناخوشی داشتن، و اوشؤنی که دیو بزه بوئن و غشّی أن و فلوجؤن اونه ورجه اَردَن و عیسی اوشونه شفا دائ. 25پس یکته پیله جماعت جلیل و دکاپولیساجی، اورشلیم و یهودیّه و اُردن اوطرف، اونه دومبالسر راه دکتن.
Zur Zeit ausgewählt:
متّای انجیل 4: EGB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
@ 2024 Korpu Company