1 कुरिन्थियो 6
6
मसीहियो में मुकदमेबाजी
1जे आप लोगां में कोई आपसी झगड़ौ हो, तो थै न्याव रै लियै अविसवासियो रै खनै जाओ, अर परमेसर रै लोगां रै खनै नीं जाओ? 2कांई थै कोनीं जांणौ की परमेसर रा लोग जगत रौ न्याव करैला? इण वास्तै जद थांनै जगत रौ न्याव करणौ है, तो कांई थै छोटे-से झगड़ै रौ भी न्याव करणै रै लायक कोनीं? 3कांई थै कोनीं जांणौ की म्हौ सरगदूतो रौ न्याव करांला? तो कांई सांसारिक बातां रौ फैसलो नीं करौ? 4जे थांनै सांसारिक बातां रौ फैसलो करणौ हो, तो कांई उणौनै बैठाओला जिकौ कलीसिया में कीं नीं समझया जावै है? 5म्हैं थौरी बेजती करणै रै लियै ओ कैवूं हूं। कांई साचांणी थौरे में ऊं एक भी समझदार कोनीं मिळै, जिकौ अपणै भाइयो रौ फैसलो कर सकै? 6पण थौरे में भाई-भाई में मुकदमो होवै है, अर वो भी अविसवासियो रै सांम्ही।
7पण हकीगत थौरे में मोटो दोस तो ओ है की आपस में मुकदमा करौ हो। अन्याव सहन क्यूं नीं करौ? अपणौ घाटौ क्यूं नीं सहन करौ? 8इणरै बदळै थै तो खुद अन्याव करौ अर नुकसाण करौ हो, अर वो ही भाइयो रै साथै। 9कांई थै कोनीं जांणौ की अन्याव करणै वाळा लोग परमेसर रै राज रा वारिस नीं होवैला? धोखो नीं खाओ, नीं व्यभिचारी, नीं मूरती पुजारी, नीं पराई लुगाई खनै जावणौ, नीं मिनख मिनख रै साथै। 10नीं चोर, नीं लोभी, नीं पियकड़, नीं निंदा करणैवाळौ, नीं धोखेबाज परमेसर रै राज रा वारिस होवैला। 11और थौरे में ऊं कईक ऐड़ा ही हा। पण थै परभु यीसु मसीह रै नाम ऊं अर म्हौरै परमेसर री आतमा ऊं धोया गिया अर पवितर होया अर धरमी ठैरया।
सरीर अर आतमा में परमेसर री महिमा
12 #
1 कुरि 10:23
सगळी चीजों म्हारै लियै वाजिब तो है। पण सगळी चीजों फायदे री कोनीं। सगळी चीजों म्हारै लियै वाजिब है। पण म्हैं किणी बात रै अधीन नीं होवूंला। 13खाणौ पेट रै लियै, अर पेट खाणै रै लियै है। पण परमेसर इणनै अर उणनै दोनूं नै नास करैला। सरीर व्यभिचार रै लियै कोनीं, बल्कि परभु रै लियै है, अर परभु सरीर रै लियै है। 14परमेसर आपरी सामरथ ऊं परभु नै मरयोड़ौ में ऊं जिलायौ, इण तरैह अपांनै भी जीवता करैला। 15कांई थै कोनीं जांणौ की थौरो सरीर मसीह रौ अंग है? तो कांई म्हैं मसीह रै अंग लेयनै उणनै वेसया रौ अंग बणाऊं? कदैई कोनीं। 16कांई थै कोनीं जांणौ की जिकौ कोई वेसया ऊं संगति राखै है, वो उणरै साथै एक तन हो जावै है? क्यूंकै लिख्योड़ौ है, “वे दोनूं एक तन होवैला।” 17अर जिकौ परभु री संगति में रैवै है, वो उणरै साथै एक आतमा हो जावै है।
18व्यभिचार ऊं आगा रौ। जितरा दूजा पाप मिनख करै है वे सरीर ऊं बाहर है, पण व्यभिचार करणैवाळौ आपरै ही सरीर रै विरोध पाप करै है। 19#1 कुरि 3:16; 2 कुरि 6:16कांई थै कोनीं जांणौ की थौरो सरीर पवितर आतमा रौ मिंदर है, जिकौ थौरे में बसयोड़ौ है अर थांनै परमेसर री तरफ ऊं मिळियौ है? थै खुद रा ही कोनीं हो। 20क्यूंकै थांनै दाम देयनै मोल लियोड़ा हो, इण वास्तै अपणै सरीर रै जरियै परमेसर री महिमा करौ।
Zur Zeit ausgewählt:
1 कुरिन्थियो 6: RWR
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© NLCI CC BY-NC-ND 4.0