यूहन्ना 13
13
यीसु चेलौ रा पग धोया
1फसह रै तैंवार ऊं पैली, जद यीसु जांण गिया, के अबै इण संसार नै छोड़नै पिता रै खनै जावण री घड़ी आयगी है, वे आपरा लोगां ऊं जिकौ जगत में हा, जैड़ौ परैम वो राखतौ हो, आखरी तांई वेड़ौ इज परैम राखतौ रियौ। 2अर जद सिंझ्या खाणै रै वगत सैतान समौन रै बेटौ यहूदा इस्करियोती रै मन मांय विचार घाल दियौ हो की यीसु नै धोखे ऊं पकड़ाणौ। 3यीसु आ बात जांणता हा के, “पिता परमेसर सगळौ म्हारै हाथ में कर दियौ है अर म्हैं परमेसर रै खनै ऊं आयौ हूं, अर परमेसर रै खनै जावूं हूं।” 4इण वास्तै खाणै माथै ऊं उठनै आपरा ऊपरला चोळौ उतारनै, अंगोछौ लेयनै आपरी कमर बांधी। 5तद एक बरतन मांय पांणी लेयनै चेलौ रा पग धोया अर जिण अंगोछे ऊं आपरी कमर बांधी ही उण ऊं पोंछणै लागौ।
6जद यीसु समौन पतरस रै खनै आयौ, तो पतरस वांनै कयौ, “हे परभु, कांई थै म्हारा पग धोवो हो?”
7यीसु उणौ नै जबाब दियौ, “म्हैं जिकौ अबार करूं हूं, थै उणै नीं जांणौ, पण इणरै पछै समझौ ला।”
8पतरस यीसु ऊं कयौ, “म्हैं थांनै म्हारा पग कदैई नीं धोवण देवूंला।”
ओ सुणन यीसु जबाब दियौ, “पण जे म्हैं थांरा पग नीं धोया तो थांरै साथै म्हारौ कोई रीसतो कोनीं।”
9समौन पतरस यीसु नै कयौ, “हे परभु, तो म्हारा पग ही नीं, बल्कि हाथ अर माथो ई धो दो।”
10यीसु उणनै कयौ, “जिकौ स्नान कर लियौ है, उणनै सुद्ध होवण खातर सिरफ पग धोवण री जरुत है। पण वो एकदम सुद्ध है, अर थै सुद्ध हो, पण सगळा कोनीं।” 11वो तो खुद नै पकड़ाणै वाळै नै जांणतौ हो। इण वास्तै उणै कयौ, “थै सगळा रै सगळा सुद्ध कोनीं।”
12 #
लूक 22:27
जद वो वांरा पग धोया पछै वे आपरौ चोळौ पेरियो अर पाछा हेंठे बैठ गा। तो उणौ नै कैवण लागा, “कांई थै समझया, म्हैं थांरै साथै कांई करयौ? 13थै म्हनै गुरु अर परभु कैवौ हो, अर ठीक इज कैवौ हो, क्यूंकै म्हैं वोहीज हूं। 14जे म्हैं गुरु अर परभु होन थोरा पग धो सकूं, तो थांनै ई एक-दूजै रा पग जरुर धोवणा चाहीजै। 15क्यूंकै म्हैं थांनै एक तरीको देखा दियौ, की ज्यूं म्हैं थोरै साथै कियो, थै भी त्यूं दूजा रै साथै किया करौ। 16#मत 10:24; लूक 6:40; यूह 15:20म्हैं थांनै साची कहूं, की नौकर कदैई मालिक ऊं बढ़ौ नीं व्है। अर नीं भेज्यौड़ौ अपणै भेजणे वाळै ऊं। 17थै तो ऐ बातां समझौ हो, जे इण माथै चालौ, तो धन्य हो।
18“म्हैं थांरै सगळा रै बारै में कोनीं कहूं, जिणनै म्हैं चुण लियौ है, उणै म्हैं जांणूं हूं। पण ओ इण वास्तै हो, की पवितर सास्तर रौ ओ वचन पूरौ हो, ‘जिकौ म्हारी रोटी खावै है, वो इज म्हारै माथै लात उठाई।’
19“म्हैं थांनै ऐ बातां इण खातर बताऊं के जद ऐ बातां पूरी व्है जावैला तद थै म्हारै माथै भरोसौ करौ के म्हैं वोहीज हूं। 20#मत 10:40; मरकु 9:37; लूक 9:48; 10:16म्हैं थांरै ऊं साची कहूं, के जिकौ ई म्हनै भेजणे वाळै नै स्वीकार करै है, वो म्हनै स्वीकार करै है। अर जे म्हनै स्वीकार करै है, वो म्हनै भेजणे वाळै नै स्वीकार करै है।”
यहूदा विसवासघाती री तरफ इछारौ
(मती 26:20–25; मरकुस 14:17–21; लूका 22:21–23)
21ऐ बातां कैन यीसु मन मांय घणा दुखी व्हिया। अर आ गवाई दीनी, “म्हैं थांनै साची कहूं, की थांरै मांय ऊं एक म्हनै धोखे ऊं पकड़ावैला।”
22सगळा ई चेला अचूम्बे ऊं एक दूजै रौ मूंडौ देखण लागा, के ओ कीण रै बारै में कैवै है। 23सगळा चेलौ रै में ऊं एक चेलौ जिकौ लाडलौ कैलातो हो, यीसु रै नजीक बैठौ हो। 24तद समौन पतरस वांरै सांम्ही इछारौ करनै पूछयौ, “पूछौ तो, ओ किणरै बारै में कैवै है?”
25तद उणै उणी तरैह यीसु री तरफ झुकनै पूछयौ, “हे परभु, वो कुण है?”
26यीसु जबाब दियौ, “जिणनै म्हैं ओ रोटी रौ टुकड़ों डूबोयनै दूंला वोहीज है।” अर वो टुकड़ों डूबोयनै समौन रै बेटे यहूदा इस्करियोती नै दियौ। 27अर टुकड़ों लेवतौ ई सैतान उण मांय घुस ग्यौ।
तद यीसु उणनै कयौ, “थनै जिकौ ई करणौ है, तुरत कर।” 28पण खाणौ जीमण वाळा मांय ऊं कोई नीं समझयो की यीसु उणनै ओ क्यूं कयौ। 29केई जणा समझया के यहूदा खनै रूपिया री थैली है, इण खातर यीसु कैवणौ चावै है, के जे कई तैंवार खातर जिकौ ई लावणो है लिया की पछै गरीबो नै जिकौ देवणो है देय दे। 30तद यहूदा रोटी रौ टुकड़ों लेयनै झट उठै ऊं बारै जातौ रियौ, अर ओ रात रौ वगत हो।
नवी आग्या
31जद यहूदा उठै ऊं बारै ग्यौ तो यीसु कयौ, “अबै म्हैं मिनख रै बेटे री महिमा होई, अर परमेसर री महिमा म्हारै मांय होई है। 32तो परमेसर भी आपरै में म्हारी महिमा करैला, बल्कि तुरत करैला।
33 #
यूह 7:34
“हे म्हारै टाबरां, म्हैं थोड़ीक देर तांई वळै थांरै खनै हूं। पछै थै म्हनै सौधौला, अर ज्यूं म्हैं यहूदियो ऊं कयौ हो, के जठै म्हैं जावूं हूं उठै थै नीं आ सकौ, व्यौंही म्हैं थांनै भी कैवूं हूं। 34#यूह 15:12,17; 1 यूह 3:23; 2 यूह 1:5म्हैं थांनै एक नवी आग्या देवूं हूं, की एक-दूजै ऊं परैम राखौ। ज्यूं म्हैं थांरै ऊं परैम राखियौ है, त्यूं इज थै भी एक-दूजै ऊं परैम राखौ। 35जे आपस में परैम राखोला तो इण ऊं सगळा जांणैला, की थै म्हारा चेला हो।”
पतरस रै इन्कार रौ इछारौ
(मती 26:31–35; मरकुस 14:27–31; लूका 22:31–34)
36समौन पतरस उणनै कयौ, “हे परभु, थै कठै जाओ हो?”
यीसु जबाब दियौ, “जठै म्हैं जावूं हूं, उठै थूं अबार म्हारै लारै नीं आ सकै। पण इणरै पछै म्हारै लारै आवैला।”
37पतरस उणनै कयौ, “हे परभु, अबार म्हैं थांरै लारै क्यूं नीं आ सकूं? म्हैं तो थांरै खातर म्हारौ जीव ई दे दूंला।”
38यीसु जबाब दियौ, “कांई थूं म्हारै खातर अपणौ प्रांण दैला? म्हैं थनै साची कहूं की कुकड़ा री बांग दैणै ऊं पैली थूं म्हनै ओळखणै ऊं तीन बार मना करैला।”
Zur Zeit ausgewählt:
यूहन्ना 13: RWR
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© NLCI CC BY-NC-ND 4.0
