MAT 7
7
इंगोगोरदी न्याय शेयाकुंडा
1येशुड नेरपेद चालु फेट्या इंगा आन्या इंगोगोरदी न्याय शेयाकुंडा, आंटे मिद पण न्याय शेशेदेंक दाका फोई. 2येनटीक की यल्ला मीर इंगोगोरदी न्याय शेस्तार आल्ले परमेश्वर मिद पण न्याय शेशी इंगा परमेश्वर मी जताक आल्ले वागाशी यल्ला मीर इंगोगोर जताक वागास्तार. 3निक नी कंडलालोंदी इंतोट कचरा#7:3 इंतोट कचरा मी स्वताय फेद्दा दोषलु कमसाद पण नु इंगोगोर कंडलालोंदी इंतुस्के कचरा#7:3 इंतुस्के कचरा इंगोगोरी शिन्नाय दोषलु येनटीक सुस्ताव? 4लेकाते ‘नी कंडलालोंदी इंतुस्के कचरा नन्नु तीयानी’ इल्ला नु इंगोगोन यल्ला आंटाव? यप्पुड, नी स्वता कंडलालाने इंतोट कचरा उंडाद. 5अरे ढोंग्या, पहिला नी कंडलालोंदी कचरा तिस्काड आंटे इंगोगोन कंडलालोंदी कचरा तिशेदेंक निक शिंगार सुडा वच्ची.
6 आ मंदीक परमेश्वरदी वचन शप्पाकुंडा यवारकी आदी इनेद लेद. जर मीर आल्ला शेस्तार, तर आदी कुक्कालकी पवित्र वस्तु येशीन लेका आय्यी, लेकाते फंदुला मुंदार मोतील येशीन लेका आय्यी इंगा आय आटलान काळाता तोक्की इंगा यंक्सार आय वापस तिरगी वच्ची मिमलान शिंचेशी.
परमेश्वरनी आडगेद इंगा प्राप्त शेशेद
7येशुड मुंदारकी आन्या, आडगुना आंटे मिक इच्चेदेंक वच्ची. फुडकुना आंटे मिक शिक्की, कोटना आंटे मी इचांग कवाड तेरशेदेंक वच्ची. 8येनटीक की यवाड येमाना आडगुताड आदी वानकी शिक्ताद, यवाड फुडकुताड वानकी शिक्ताद इंगा यवाड कोटताड, वान इचांग कवाड तेरशेदेंक वस्ताद. 9मी दिंटल्या या मनशी इल्ला उंडाड, की वान कोडकु रोट्या आडगुते तर वाड वानकी राय इच्ची? 10लेकाते मीन आडगुते, दान बद्दल वानकी फाम इच्ची? 11जर मीर वाईट उंडीगास पण मी बिळ्ळाक मंची माटलु इच्चेद मिक तेलस्ताद तर मी स्वर्गीय परमेश्वर आब्बाड यवार वान आडगुतार वारकी, वाड मंची वस्तुल येनटीक इयाक फोई?
सुवर्णनियम
12येशुड मुंदारकी आन्या, दिनिचांग याय माटलु मंदी मी इचांग शेयाला इल्ला मिक वाटास्ताद आय आन्नी माटलु मीर पण वार इचांग शेयना, येनटीक की नियमशास्त्र इंगा संदेष्ट्याल राशीने लेखदी अर्थ इद्दे उंडाद.
सरळ इंगा कठीण दावा
13येशुड मुंदारकी आन्या, मीर फक्त शिन्ना कवाडताने लोनीक फोई शकास्तार, येनटीक की नाशतीकुड फोयेद कवाड फेद्दाद इंगा दावा सरळ उंडाद इंगा दांटल्योन्केल लोनीक फोयेतोर शेंगेम मंदी उंडार. 14पण सार्वकालिक जीवन तीकुड फोयेद कवाड शिन्नाद इंगा दावा अडचणदी उंडाद इंगा यवारकी आदी शिकताद वार शेंगेम कमी मंदी उंडार.
फळला मिंदकेल शट्टुन गुरतु फट्टेद
15येशुड मुंदारकी आन्या, खोटा संदेष्ट्याल बद्दल सावधान उंडना. यवार मेंढऱ्याल रुप येस्केन मी तीकुड वस्तार. पण खरेम शपते तर वार लोनीकेल क्रुर लांडगाल उंडार. 16वार फनुला मिंदकेल मीर वारनी ओळखाशार. मुंडला शट्टुक अंगुरलु आंटताय येम? का मुंडला शट्टुक अंजीरलु आंटताय येम? 17आल्ले शिंगार शट्टु शिंगार फळ इस्ताद, पण वाईट शट्टु वाईट फळ इस्ताद. 18शिंगार शटलाक वाईट फळलु इया दाद इंगा वाईट शटलाक शिंगार फळलु इया दाद. 19याय शटलु शिंगार फळलु इयाव आय तेम्पदेंक वस्ताय इंगा आग्गीला येशेदेंक वस्ताय. 20दिनिचांग मीर खोटा संदेष्ट्यालनी वार वागनुक मिंदकेल गुरतु फट्यार.
परमेश्वर कपटी मंदीक सजा इच्ची
21येशुड मुंदारकी आन्या, नन्नु प्रभु, प्रभु इल्ला आनेतोर आंदार स्वर्ग राज्यला फोयारुच इल्ला लेद; तर ना स्वर्गलोन आब्बान इच्छाता यवाड वागास्ताड वानदे प्रवेश स्वर्ग राज्यला आय्यी. 22न्याय दिनमु नाबद नन्नु शेंगेम मंदी आन्यार, हे प्रभु, हे प्रभु, मिम नी फेरता भविष्यवाणील शेस्तीम, नी फेरता दैयाल फारा मततीम इंगा नी फेरता शेंगेम चमत्कारलु पण शेयालेद येम? 23आप्पुड निन वारकी सरळ शप्यान की, हे दुष्ट मंदीलाला निन मिमलान गुरतु फट्टान, ना देगाटेल यल्ली फोंडा.
बुद्धिमान इंगा मुर्ख मनशी
24येशुड मुंदारकी आन्या, दिनिचांग यवाड पण नाय इ माटलु इनी निन शप्पीनेलेका नडस्ताड वाड आ बुद्धीमान मनशीलेका उंडाड, यवाड मना इल्लुद जोता राय मिंदा कटनाड. 25मंग शेंगेम वाना वच्या इंगा पूर वच्या. शेंगेम घाली वच्या. सुटुर घालीला इल्लु शिक्की फोया, पण आदी फडालेद येनटीक की दानदी जोता राय मिंदा कटनेद उंड्या. 26पण यवाड पण नाय इ वचनलु इनी आटला लेका नडवाड वाड आ मूर्ख मनशीलेका उंडी, यवाड मना इल्लुद जोता रेती मिंदा कटन्या. 27मंग बेग्गे वाना वच्या इंगा पूर वच्या. बेग्गे घाली इड्या. सुटुर घालीला आदी इल्लु शिक्या इंगा आदी आंता इल्लु कुलीगास फडी फोया.”
येशुनदी अधिकार
28येशुड इदी आंता माटलाडीनेंका इल्ला आय्या की, मंदीद गर्दी वान शिक्षनता चकीत आय फो. 29येनटीक की येशुड वारकी वार नियमशास्त्र शिक्षकला लेका लेद, तर अधिकारी लेका नेरपु.
Zur Zeit ausgewählt:
MAT 7: WNT
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.