Genesis 30
30
1Alagad mayo pa minsan sarong aki si Rachel kaya naara siya sa saiyang tugang. Sinabihan niya si Jacob, “Tawe ako nin mga aki ta kun dai, magagadan ako.”
2Naanggot si Jacob saiya asin nagsabi, “Ano ako, Dios? Siya an habo na magkaigwa ka nin mga aki.”
3Nagsabi si Rachel, “Uya an katabang kong si Bilha; dorogan mo siya tanganing magkaigwa siya nin aki para sako. Sa paagi niya, ako magigin sarong ina.” 4Kaya itinao niya si Bilha ki Jacob asin dinorogan kaini an katabang. 5Nagbados si Bilha asin nag-aki nin lalaki. 6Olay ni Rachel, “Hinukoman ako nin Dios. Dinangog niya an sakong mga pamibi asin tinawan niya ako nin aki;” kaya an aki nginaranan niyang Dan.#30:6 DAN: Sa pandangog, an ngaran na ini nakakaarog sa Hebreyong tataramon na hinukoman. 7Nagbados giraray si Bilha asin namundag an ikaduwang aking lalaki. 8Nagsabi si Rachel, “Nakilaban ako nin marahay sa sakong tugang asin ako an nanggana;” kaya an aki nginaranan niyang Neftali.#30:8 NEFTALI: Sa pandangog, an ngaran na ini nakakaarog sa Hebreyong tataramon na laban ko.
9Kan dai na nangangaki si Lea, itinao niya ki Jacob an katabang niyang si Zilpa bilang agom, 10asin nangaki ining lalaki. 11Olay ni Lea, “Maswerte ako;” kaya an aki nginaranan niyang Gad.#30:11 GAD: Sa Hebreyo, an ngaran na ini nangangahulogan na swerte. 12Nangaki giraray nin lalaki an katabang ni Lea na si Zilpa. 13Nagsabi si Lea, “Maogma ako! Poon ngunyan, aapodon akong maogma kan kababaehan,” kaya an aki nginaranan niyang Aser.#30:13 ASER: Sa Hebreyo, an ngaran na ini nangangahulogan na maogma.
14Kan tig-anihan nin trigo, nagduman si Ruben sa oma asin nakakua nin mga mandragora;#30:14 mandragora: Mga tinanom na tinutubodan na nakakapahale kan pagkabaog nin sarong babae asin ginagamit na panlumay. dinara niya an mga ini ki Lea na saiyang ina. Olay ni Rachel ki Lea, “Tawe man ako kan mga mandragora kan saimong aki.”
15Nagsimbag si Lea, “Dai ka pa nakontento sa pag-agaw kan sakong agom? Ngunyan gusto mo pang kuahon an mga mandragora kan sakong aki?”
Nagsimbag si Rachel, “Kun itao mo sako an mga mandragora kan saimong aki, pwede mong dorogan si Jacob ngunyan na banggi.”
16Pagkabanggi, pag-abot ni Jacob hale sa oma, sinabat siya ni Lea asin sinabihan, “Ako an dorogan mo ngunyan na banggi, huli ta itinao ko ki Rachel an mga mandragora kan sakong aki bilang bayad para saimo.” Kaya kan bangging idto, si Lea an dinorogan ni Jacob.
17Sinimbag nin Dios an pamibi ni Lea; nagbados siya asin nangaki kan ikalimang lalaki. 18Olay ni Lea, “Tinandaan ako nin Dios huli ta itinao ko an sakong oripon sa sakong agom;” kaya an aki nginaranan niyang Issakar.#30:18 ISSAKAR: Sa pandangog, an ngaran na ini nakakaarog sa Hebreyong tataramon na tinandanan an sarong lalaki asin igwa nin tandan. 19Nagbados giraray si Lea asin nangaki kan ikaanom na lalaki. 20Olay niya, “Tinawan ako nin Dios nin magayon na regalo; ngunyan aakoon na ako ni Jacob bilang agom huli ta anom nang aking lalaki an ipinangaki ko”; kaya an aki nginaranan niyang Zabulon.#30:20 ZABULON: Sa pandangog, an ngaran na ini nakakaarog sa itinaram ni Lea sa bersikulo 20. 21Pakatapos, nangaki siya nin sarong babae na nginaranan niyang Dina.
22Dangan nagiromdoman nin Dios si Rachel; sinimbag niya an mga pamibi kaini asin pinapangyaring mag-aki. 23Nagbados si Rachel asin nangaki nin lalaki. Olay niya, “Hinale na nin Dios an sakong kasosopgan. 24Tawan pa logod ako nin Kagurangnan nin sarong aking lalaki”; kaya an aki nginaranan niyang Jose.#30:24 JOSE: Sa pandangog, an ngaran na ini nakakaarog sa Hebreyong tataramon na tawan pa niya logod ako nin saro pa asin hinale niya.
Nakikondisyon si Jacob ki Laban
25Pagkamundag ni Jose, sinabihan ni Jacob si Laban, “Tugote akong maghale tanganing makapuli ako sa sadiri kong harong asin daga. 26Tawan sako an sakong mga agom asin kaakian na napasako huli sa paglingkod ko saimo asin mahale na ako; aram mo kun anong paglingkod an ginibo ko saimo.”
27Alagad nagsimbag si Laban, “Ini an masasabi ko: sosog sa naaaraman ko sa panghuhula, benendisyonan ako nin Kagurangnan huli saimo. 28Magsabi ka kan sweldong gusto mo asin itatao ko iyan saimo.”
29Nagsimbag si Jacob, “Aram mo kun paano ako nagtrabaho para saimo asin kun paano nagdakul an saimong mga hayop sa pangataman ko. 30Dikit an sadiri mo bago ako mag-abot; ngunyan dakul nang marahay asin benendisyonan ka nin Kagurangnan huli sako. Bako daw panahon na tanganing mangnohon ko man an sakong sadiring pamilya?”
31Naghapot giraray si Laban, “Ano an ibabayad ko saimo?”
Nagsimbag si Jacob, “Dai ko kaipuhan an sweldo. Padagos kong aatamanon an saimong mga hayop, alagad sa sarong kondisyon: 32tugotan mong pilion ko asin laenon sa mga hayop mo an mga karnero asin kanding na may patak-patak saka may raya-raya asin an gabos na itom an kolor; ini an magigin kabayadan ko. 33Sa maabot na aldaw madali mong maaaraman kun ako nagin onesto sa saimo; kun makahiling ka nin hayop na bakong may patak-patak saka may raya-raya o bakong itom an kolor sa mga hayop ko, ibilang mo iyan na hinabonan ko.”
34Nagsimbag si Laban, “Sige, gibohon ta an sinabi mo.” 35Alagad kan aldaw na iyan, hinale ni Laban an gabos na lalaki asin babaeng kanding na may patak-patak asin may raya-raya; hinale man niya an mga itom na karnero asin ipinaataman an mga ini sa mga aki niya. 36Dinara ni Laban an mga hayop sa sarong lugar na an rayo hale ki Jacob tolong aldaw kun lalakawon. Si Jacob an nag-ataman kan mga natadang hayop ni Laban.
37Kuminua si Jacob nin mga sanga nin mga kahoy na alamo, abellano asin kastanyo dangan binakbak niya an ibang kabtang kan mga ubak tanganing magkaigwa nin puting patak-patak. 38Ibinugtak niya an mga sanga sa atubang kan mga raraan kan hayop huli ta nagmamaroan an mga ini kun sinda minaduman sa pagrara. 39Kaya an mga hayop na nangidam sa atubang kan mga sanga, nag-ogbon nin may patak-patak asin may raya-raya.
40Linaen ni Jacob an mga karnero sa mga kanding. Pinaatubang niya an mga karnero sa may mga raya-raya asin mga itom na hayop ni Laban. Sa paaging ini, napadakul niya an saiyang mga hayop asin sinuhay niya an mga ini sa mga hayop ni Laban.
41Kun an makokosog na hayop an nagmamaroan, ibinubugtak ni Jacob an mga sanga sa mga raraan, sa atubang kan mga hayop tanganing pangidaman ninda an mga sanga. 42Alagad dai niya ibinubugtak an mga sanga sa atubang kan mga maniwang na hayop. Kaya an gabos na maniwang napaduman ki Laban, asin an gabos na makosog napaduman ki Jacob. 43Sa paaging ini, nagyaman nin marahay si Jacob. Nagkaigwa siya nin dakul na hayop, oripon, kamelyo asin asno.
Zur Zeit ausgewählt:
Genesis 30: MBBBIK92
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Marahay na Bareta Biblia © Philippine Bible Society, 1992.