مَرقُس 15
15
عیسی پیلاتُسینگ اُوونده
مَتّیٰ ۲۷:۱-۲، ۱۱-۱۴؛ لوقا ۲۳:۱-۵؛ یوحنا ۱۸:۲۸-۳۸
1ایر سَحِر بیلِن یُلباشچی کاهینلار، یاشولیلار، دین عُلَمالار و مِجلِسینگ هِمّه‌سی ماصلاحاتلاشیپ، عیسانی دانگیپ، پیلاتُسا تابشیردیلار. 2پیلاتُس عیسادان: «سِن یَهودیلِرینگ پادیشاهسیمی؟» دییّپ سُرادی. عیسی: «اُز آیدیشینگ یالیدیر» دییّپ جُغاپ بِردی. 3یُلباشچی کاهینلار اُنی کَن زاتلاردا تُهمِت اوردولار. 4پیلاتُس یِنه-ده اُنگا: «سِن هیچ هیلی جُغاپ بِرجِک دَلمی؟ گُر، نَچه زاتلاردا سانگا تُهمِت اوریارلار!» دییدی. 5اِمّا عیسی باشغا هیچ هیلی جُغاپ بِرمِدی. پیلاتُس حایران قالدی.
عیسی اُلومه مَحکوم اِدیلیَر
مَتّیٰ ۲۷:۱۵-۲۶؛ لوقا ۲۳:۱۳-۲۵؛ یوحنا ۱۸:۳۹–۱۹:۱۶
6پیلاتُس هِر پِسَح بایرامیندا خالقینگ خاییشینا گُرَه بیر زیندانینی بُشادیاردی. 7قالماغالدا آدام اُلدورِن قالماغالچیلار بیلِن بیله زیندان اِدیلِن باراباس آدلی بیری باردی. 8خالق پیلاتُسینگ یانینا گِلیپ، هِمیشه‌کیسی یالی، اُزلِری اوچین بیر زیندانی بُشاتماغینی سُراماغا باشلادی. 9اُنسُنگ پیلاتُس اُلارا جُغاپ بِریپ: «سیزینگ اوچین یَهودیلِرینگ پادیشاهسینی بُشاتماغیمی ایسلِیَرسینگیزمی؟» دییّپ سُرادی. 10اُل یُلباشچی کاهینلارینگ عیسانی باخیلچیلیقدان تابشیراندیقلارینی بیلیَردی. 11اِمّا یُلباشچی کاهینلار عیسانینگ دِرِگینه باراباسی بُشاتماغینی ایسلَنگ دییّپ، جِماغاتی کوشگوردیلِر. 12پیلاتُس یِنه اُلاردان: «اُندا مِن سیزینگ یَهودیلِرینگ پادیشاهسی دییَّن آدامینگیزی نَمه اِدِیین؟» دییّپ سُرادی. 13اُلار بُلسا: «اُنی صلیبه چویله!» دییّپ قیغیریشدیلار. 14پیلاتُس اُلاردان: «نَمه اوچین؟ اُل نَمه یامانلیق اِتدی؟» دییّپ سُرادی. اِمّا اُلار: «اُنی صلیبه چویله!» دییّپ، خاص بِتِر قیغیریشدیلار. 15شُندا پیلاتُس خالقی راضی اِتمِک قارارینا گِلیپ، باراباسی بُشاتدی. عیسانی بُلسا قامچیلادیپ، صلیبه چویلِمِک اوچین، سِربازلارینگ اِلینه بِردی.
سِربازلار عیسانی ماسغارالایارلار
مَتّیٰ ۲۷:۲۷-۳۱؛ یوحنا ۱۹:۲-۳
16حاکیمینگ سِربازلاری عیسانی حُکومِت کاخینینگ حایاطینا اِلتیپ، هِمّه قُشون بُلومینی اُنونگ داشینا اویشوردیلِر. 17اُنونگ گِرشینه ارغوانی دُن، باشینا تیکِندِن تاج گِیدیردیلِر. 18«یاشاسین، اِی یَهودیلِرینگ پادیشاهسی!» دییّپ، اُنی قیزقین قارشیلان بُلدولار. 19باشینا تایاق بیلِن اوردولار، اوستونه تویکوردیلِر، اُوونده دیزا چُکوپ، اُنگا سِجده اِدِن بُلدولار. 20اُنی ماسغارا اِدِنلِریندِن سُنگ، ارغوانی دُنی اِگنیندِن چیقاردیلار-دا، اُز لِباسینی گِیدیریپ، صلیبه چویلِمَگه اَکیتدیلِر.
عیسی صلیبه چویلِنیَر
مَتّیٰ ۲۷:۳۲-۴۴؛ لوقا ۲۳:۲۶-۴۳؛ یوحنا ۱۹:۱۷-۲۷
21شُل واقت قیرِوانلی شمعون دییِن بیر آدام اِکینچیلیگیندِن گِلیَردی. اُل اسکندر بیلِن روفوسینگ آتاسیدی. سِربازلار اُنی توتوپ، عیسانینگ صلیبینی گُتِرمَگه مِجبور اِتدیلِر. 22اُلار عیسانی جُلجُتا، یَعنی «کِلّه‌چاناق دِپه‌سی» دییِن یِره اِلتدیلِر. 23اُنسُنگ اُلار عیسانینگ دِردلِرینی کِمِلتمِک اوچین، اُنگا آجی قاریلان شِراب هُدورلِدیلِر، اِمّا اُل ایچمِدی. 24سُنگرا اُنی صلیبه چویلِدیلِر. کیمه نَمه دوشِرکَه دییّپ قُرعه آتیشیپ، اُنونگ لِباسلارینی اُزآرا پایلاشدیلار.
25اُنی صلیبه چویلَنلِرینده، ایر ساغات دُقوزدی. 26دِپه‌سیندَکی اِتمیش یازویسیندا بُلسا: «یَهودیلِرینگ پادیشاهسی» دییّپ یازیلیپدی. 27عیسی بیلِن بیله ایکی اُغرینی هِم صلیبه چویلِدیلِر، اُلارینگ بیری اُنونگ ساغ طارافیندا، بِیلِکیسی سُل طارافیندادی. [ 28شِیلِلیک بیلِن «اُل گونَه‌کَرلِر بیلِن بیر ساییلدی» دییِن مُقادِّس یازغی بِرجای بُلدی.] 29گِچیپ باریانلار باشلارینی چایقاپ، عیسی سِووپ: «هانی-دا، سِن عیباداتخانانی ییقیپ، اوچ گونده سالجاقدینگ-آ. 30ایندی صلیبدِن آشاق دوش-ده و اُزونگی نِجات بِر-دا!» دییَّردیلِر. 31یُلباشچی کاهینلار بیلِن دین عُلَمالار-دا عیسانی اِدیل شونونگ یالی ماسغارالاپ، بیری-بیرلِرینه: «باشغالاری نِجات بِردی، یُنه اُزونی نِجات بِریپ بیلِنُق. 32اسرائیل‌ینگ پادیشاهسی مسیح، قُی، شو واقتینگ اُزونده صلیبدِن آشاق دوشسون، بیز هِم مونی گُروپ ایمان گِتیرِلی» دییَّردیلِر. عیسی بیلِن صلیبه چویلِنِنلِر-ده اُنگا سِویَردیلِر.
عیسانینگ اُلومی
مَتّیٰ ۲۷:۴۵-۵۶؛ لوقا ۲۳:۴۴-۴۹؛ یوحنا ۱۹:۲۸-۳۰
33گونُرتان اُن ایکیدِن اُیلَن ساغات اوچه چِنلی هِمّه یوردی قارانگقیلیق آلدی. 34اُیلَن ساغات اوچ تُوِرِگی عیسی قاتی سِس بیلِن قیغیریپ: «ایلی، ایلی، لما سبقتنی؟» یَعنی: «خوداییم، خوداییم! نَمه اوچین مِنی تِرک اِتدینگ؟» دییدی.#زِبور ۲۲:۱ 35اُل یِرده دورانلارینگ کَبیرلِری مونی اِشیدِنلِرینده: «قُلاق آسّینگ، اُل اِلیاسی چاغیریار» دییدیلِر. 36بیر آدام یُرتوپ باریپ، بیر اَبری تورشی شِرابا باتیردی. اُنی بیر تایاغینگ اوجونا داقیپ، عیسی ایچیرجِک بُلوپ اوزاتدی-دا: «هانی، گُرِلینگ! اِلیاس گِلیپ، اُنی آشاق دوشورِرمیکَه؟» دییدی. 37اِمّا عیسی قاتی قیغیریپ جان بِردی. 38شُل واقت عیباداتخانانینگ پِرده‌سی یُقاردان آشاقلیغینا ییرتیلیپ، ایکَه بُلوندی. 39عیسانینگ قارشیسیندا دوران اَفسَر اُنونگ شِیله جان بِرِنینی گُرِنده: «بو آدام، دُغرودان هِم خودایینگ اُغلی میشدیق» دییدی.
40اُل یِرده بُلیان زاتلارا اوزاقدان گُزلَپ دوران نَچَه آیال‍لار-دا باردی. مَجدَلَلی مریم، یوشا بیلِن کیچی یعقوبینگ اِنه‌سی مریم و سالومه هِم اُلارینگ آراسیندادی. 41بولار عیسی جلیل‌دِکَه ایزینا دوشوپ، اُنگا خیدمات اِدیپدیلِر. اُل یِرده عیسی بیلِن اورشلیمه گِلِن باشغا-دا کَن آیال‍لار باردی.
عیسانینگ جایلانماغی
مَتّیٰ ۲۷:۵۷-۶۱؛ لوقا ۲۳:۵۰-۵۶؛ یوحنا ۱۹:۳۸-۴۲
42-43اُل گون تاییارلیق گونودی، یَعنی سَبَّتینگ اُوونگچَکی گوندی. آغشام مِجلِسینگ سیلانیان اعضاسی، خودایینگ پادیشاهلیغینا اومید بیلِن قاراشیان رامه‌لی یوسف گِلدی. اُل یورِگینده باشاراریم دییّپ، پیلاتُسینگ یانینا باردی و اُندان عیسانینگ جِسِدینی دیلِدی. 44پیلاتُس عیسانینگ باسیم اُلِندیگینه گِنگ قالدی، اَفسَری چاغیریپ: «اُلِنینه کَن واقت بُلدومی؟» دییّپ سُرادی. 45مونی اَفسَردِن بیلِندِنگ سُنگ، جِسِدی یوسفه بِردی. 46یوسف هِم کِفِنلیک پارچا ساتین آلدی، جِسِدی آشاق دوشوریپ، کِفِنه دُلادی-دا، قایادا قازیلان بیر قابردا جایلادی. سُنگرا اُل قابرینگ آغزینا بیر داش تُغالاپ گِتیریپ قُیدی. 47مَجدَلَلی مریم بیلِن یوشانینگ اِنه‌سی مریم عیسانینگ نیرِده جایلانان‌دیغینی گُردولِر.
Επιλέχθηκαν προς το παρόν:
مَرقُس 15: TUKIR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Turkmen Truth