Matááyo 16
16
Gál Farisaay hé af ˈdaˈdabo-, il ki aargiroká afo he ki fede
1Aalé kulich tikiˈd gál Farisaay ubaa gál Saˈdukaay ˈgíérích he Yíésu ˈdéé af kí dhaˈgasanká hol af gáá maale, kí kie, mú ˈdu gáá yimie. Gaal mú heete, giri mu fargogint urietká hé gálaat hí af ˈdaˈdaboká ki ekemeyo-, gaalí aargiroká.
2Yíésu gáál ˈdéé hol ˈdú nie, kieye, Itín aadh dhúú ˈjeˈjeen-, búr chie-, biiy gaa raarayyeka, hí kieye, Waanich af haí miidhandha, hí cheedhe. 3Bur biiy fuate-, waag he búr chie-, nyáˈdow ilishká hí argiyyeka, itín hí kieye, Biiy kúlíchallá ir haí gaa tuuna, hí cheedhe. Itín yaalmit biiy ˈdugoká in hélle hí kiimisata háluke, tá háteeye bííy barallóóllá hé hí yé gáá ˈdeˈdeenká hélle hí ma kiimisan? 4Gál hé gaa nyakarichká geer ki sisidho-, Waag hol a taak gaa nieká in hé gáál af ˈdaˈdabsuoká aargiroká fede. Tá gáál hé máá níínní hí hé kinaallá aargisuoká mán. Hé gaal hí aargiroká tikiˈd tákáma. Hé kinaallá héllé ki égká he yaalmit máá Waag hí ˈdeem ka shigiche-, Yónnas léká. Yíésu hí gáál yie. Aalé Yíésu đo gáál in ká kie, ali gaa sedhe.
Yíésu he onisiny Gál Farisaay ubaa gál Saˈdukaay maat hol ki ekey
5Yíésu ubaa lalille bás ílung ˈdaatí yé ki ˈdeˈdemeká mú lalille balashá hí in ká bađayye, hé balashá ma éen. Gaal ílung ˈdaatí ˈdoyká, 6Yíésu gáál geey, kieye, Tág ˈdée! Gál Farisaay ubaa gál Saˈdukaay maatle hol raaradhíe, yie. 7Aalé gál láliká íín hol geey, kieye, Hééllá he ˈdaa giri múún ke balashá ma ka éenká, yie.
8Tá Yíésu íín hé gáál gééchollééllá onnoy, mu gáál geey, kieye, It iiy yeen hí ninníil! Háteka balasha hí mánká ˈdeenyle hí hol geđicháal? 9It hátle me hí ma bíriny? Balasha chen-, gál shíí chen heyisicheká hélle inno hí ká bađay? Tá balasha ká naate-, hí hol ˈdú faafiyyeká illam mia koch koch hoyche? 10Itín balasha tiiya-, gál shíí afur heyisicheká úba mé haí gaa súoy? Tá balasha ka naate-, hí hol ˈdú faafiyyeká úba illam mia koch koch hoyche? 11Itín háteeye yú hát balashá ˈdeenyle ma hogonká hí eiy ma nannasan? Yú hé hí geđuoká, gál Farisaay ubaa gál Saˈdukaay maatle hol raaradhíe, hí yegedhe, Yíésu hí gáál yie.
12Gál láliká đo Yíésu héllé hogodheká eiy naate, mu hát maat gaalí balashá fafuoká ˈdeenyle ma hogonká kimite. Mu ta gál Farisaay ubaa gál Saˈdukaay he onisinyle hol ˈdeeˈdemíe, he gáál yegie.
Bétiro Yíésu hát Messíya-, Iny Waaˈgietká hodhe
13Aalé Yíésu ˈjien Kaisaria Filibi lésle ki ˈjieká lalille heete, kieye, Gálaat yáá Iny Máádhátallá in mááya he ye yegedhe? yie.#16:13 Márko 6:14 14Gaal mú ˈdéé hol ˈdú nie, kieye, Gálaat ˈbáál kuun Yuána gálaat bie gim nannieká he ko yegedhe, gáál ˈbáál Elíya ko yegedhe. Héétí gáál ˈbáál kuun Yeremía, muuninyka, gál Waag hí ˈdeem ka shigicheká mú tikiˈde ko yegedhe, gaalí yie.
15Aalé Yíésu gáál yiete, kieye, Tá itín mááya hí ye chegedhe? yie. 16Símon Bétiro kieye, Kúún he Messíya,#16:16 Messíya hélle kieye, Máá Waag hí salab mé ki liiyye-, Waag hí kansím koyyeká. Iny Waag bííyyo ali iđoká, yie.
17Aaléka, Yíésu Bétiro geey, kieye, Símon, iny Yonnas, kó Waag ko ˈdú ˈjiiyye. Hé hotééllá hé máádhát hí ko ma kí edhesîny, ˈJaa chia úr ijoká hí ko kí edhesie. 18Aaléka, yáá ko meeny Bétiro léká shie.#16:18 Meeny Bétiro lééllá hélle kieye, Wáár. Wárallá in ˈdugle gál ye iiy yeetká lulle yú gaa ˈdiisa, tá gál chiallá hé kúfach fargogintle hí a mé ma kí ˈjeeminy. 19Guch Uratiká kárle aflé gaalí ki fufuroká ha yú ko ká shigia. Ameeny hé kuun hí lésallá gaa điitoká hé úba Waag hí úratí gaa điite. Ameeny hé kuun hí lésallá iiy gaa cheetoká hé úba Waag hí úratí iiy gaa chie, Yíésu hí mú yie. 20Aalé Yíésu gáál il gíl gaa helie, giri mu hát Messíyaká gaalí máádhat ma geđinyká.
Yíésu kúfách kufunanká ubaa uushich yé gáá ˈdímle huogodhe
21Ameeny kinaallá in Yíésu lalille geey, giri Yerúsalem mé nannuo-, ál kinaal káru ubaa gál guguđo-, suoryoká tá gál nyatalaamká hí manyjasiny guđoká mé ki kokuo-, gaalí yeges-, tá kúlích ki seđeká Waag hí logolnoycho-, Waag hí uushich yé gáá ˈdeđichoká. 22Bétiro đo Yíésu tól eedhdhe, Yíésu ˈdeenyle mé ˈdoy, kieye, Waag hí ko hé kinaallá af gaa layyo! Hééllá hé kuun ko mé ma gáá ˈjeeminy, yie. 23Yíésu Bétiro gaa dhaay, kieye, Sátan, ye innum gaa sí! Kuun he mé ilchú. Tawuny ˈgayyóóllá hé tawuny Waaˈgiet muuniny, tawuny gálaat, Yíésú hí mú yie.
24In aaléka Yíésu lalille geey, kieye, Máádhat ye el gáá verenoká fedoka, íín dhúrle erkob hí hol điidho, hí ˈgórlé đarám yaalká eet,#16:24 Hol điin ubaa ˈgór đarám yaalká een, hélle kieye, hol silliny ke Yíésu hol ˈdú silmuo-, ke mú hol gíl geer gaa kakaw-, hef ˈdaa Kiristoka muun gáál ka higiloká ke gaa yíéđian-, ke mé ki chichirsatká. tá hí ye el gáá veero. 25Máá sídhle tág chichirat-, fedoká sídhle hai baađisia. Tá máá sídhle ˈdaachú ˈdugaka bađisuoká sídhle hai riima. 26Máádhat he les lulle liledhe-, tá Waag điidhe-, sídhle Waag gaa ˈgisateka, mu in hé ˈdúwa-, yé ˈdú ˈdeˈdeenká hé ˈgúo? Máádhat sídhle hé hé lesalloká in gaa nannuo ririan? 27Yáá Iny Máádhátallá guch ˈJaachú ha kí yiimedhe, ubaa gál chia ˈgasso-, urruká hollo nyí hol ká egeete. Af kinaallá gálaat lulle héllé eekemeyká eiyyo yú hol gaa nannaa, gál hé midhabká eekemeyká hé shiicho ha yú shigia, gál hé ˈdeđewká eekemeyká íín he il haí aargiˈda. 28Tá yú hí hé ˈdúwaká geeye, gál állá ˈgíéllá ˈbaal hé ma kufuminy, ˈdaab yáá Iny Máádhátallá Guchchú ma kí yímen-, ye ma árginyká.
Επιλέχθηκαν προς το παρόν:
Matááyo 16: dsh
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Translation and Literacy