Rut 3
3
Da'me lichoĝodenataĝanaĝac ñe'me Booz
1'Uo joca'li jo'me nolo' Noemí dojapegue' jañe'me Rut, male enaac:
«Yalole, male jetapega laloqo' da'me jelaque ga'me adoua jo'ne yataqachiñe en am matac, nataq'aen 'uo ga'me mach'e at'achaqa'. 2Qalaĝaja jetaque auec'aten jena'me jenjo' ya'yoĝoua Booz, jo'ne nach'eñe ouetauelo jogaa'me lamaĝajel. Qama'le nayi cha'li yataqachiñe jayem anaquiaĝana queda'me am ja'aĝatem jenjo' yapaĝaguenataĝanaĝac: jenjo' pi'yaq na'me Booz ue'ta jona'me lanaĝanaqa', ja queuo, qa'a male yiyamaĝachiñi joga'me lanec jo'ne napoguec, jo'ne uetaue na'me quipi. 3Qama'le nayi cha'li anachil, aua'uo joga'me aneyoĝoqui jo'ne yataqachiñe davioĝon, nataq'aen da'me auaeñi jaga'me onaĝae aneuoĝoe, qama'le yemta auajoyi joga'me nanaĝanaqa' jo'ne ue'ta na'me Booz, qalaĝaja ena'te ta'le analoĝona qom maliaĝa ja yem da'me liqui'yaĝac. 4Cha'li yataqachiñe auec'aten joga'me ua'ña nale t'oche, qaedi qomle yataqachiñe t'oche, auec'ata qama'le oua'ña joga'me noqojoĝonaqa' joñe'me, qaedi etapega yataqachiñe aneta'a jona'me. Yem jo' qomle male am yaloĝona joga'me aua'uo.»
5Rut male 'yateguet jañe'me li'yodo:
«Yema ja'uo joga'me jayem auapaĝaguenec.»
6Male dajoyi ca'li di'me nanaĝanaqa' jañe'me Rut, qama'le yema ya'uo joga'me lapaĝaguenataĝanaĝac jañe'me li'yodo. 7Male yem joca'li da'me liqui'yaĝac ñe'me Booz, qama'le yaloĝon da'me yataqachiñe matac joñe'me. Yec'ata joga'me ua'ña ga'me jalcote jala, qama'le nach'ega ua'ña da'me t'oche. Qama'le joca'li ñe'me Booz yataqachiñe t'oche, male jañe'me Rut yec'ata di'me ueta'ña jodi'me, nodichiñi qama'le ua'ajop joca'li.
8Qama'le joca'li pi'yaq laeñi ñe'me Booz male neloye, qama'te 'uo jaga'me noqojoĝotaguet da'me t'ochetac, qama'le yataqachiñe yoqoch'em da'me 'uo jaga'me ue'tajop, qama'le paja'a yenat joca'li:
9«¿Jach'e am?»
Male 'yateguet jañe'me:
«Jaliaĝanec, mach'e jayem Rut. Nataq'aen mach'e am laqaya jodi'me te'me jona'ajop ca'li, qama'le naqa'am jo'ne am qoyaje'tem ta'le jayem adetela. Chane'eja nayi jetaque jen am youa.»
10Enaac joñe'me Booz:
«¡'Noota qom joñe'me Jaliaĝanec yataqachiñe am ue'tajop! Nataq'aen yitaĝa am jec'atenec da'me yataqachiñe adoqopita jodi'me adoua, te'me jalcote jena'me jiyaĝadipi ta'le auelaque ga'me nejoqolec neuoyaq, uotaĝa qaya'te yauana, qaedi ona'ajop, qalaĝaja ja naq'aeta. 11Ena'te ado'e, yalole, yataqachiñe 'noota joga'me jetaque aua'uo, qa'a jena'me jenjo' noic joote qoyayaten queda'me am yauo jo'ne yataqachiñe onaĝaicaloec nataq'aen yataqachiñe ja jalajaĝana jena'me jenjo' jo'ne jayem a'uaĝatem nayi chayovida'a da'me yema ja'uo joga'me jetaque aua'uo. 12Uotaĝa te'me eja da'me yataqachiñe ja jayem 'te yaqa'a, yataqachiñe yaqaya di'me adoua, qalaĝaja 'uo jo'me jiyaĝaua laqaya jo'ne yataqachiñe am davi'teguet ta'le en am loua. 13Cha'li oua'ña jena'me jenjo' pi'yaq, cha'li yataqachiñe a'nomategue. Qom nete' qama'le jec'ata jenjo' jiyaĝaua qaedi jojapegue': qom jetaque am yichoĝoden yajouaĝat da'me mach'e ada'yoĝoua, qama'le 'noota qom ya'uo. Qalaĝaja qom ja naq'aeta, qama'le naqayem ta'le qonelochi'ña qaedi ja'uo yichoĝodenataĝanaĝac.»
14Rut male t'ochetac ueta'ña noqojoĝonaqa' joñe'me Booz joca'li, qama'le ca'li maliaĝa qaya'taguet joga'me nete', paja'a ñejeguem joca'li qa'a Booz yepaquetapega da'me qaya'te yauana da'me ua'ajop joñe'me. 15Ca'li yamta'le ec, Booz enaac:
«Anaqat na'me adapoto lae nataq'aen yataqachiñe a'uañaĝachiñi qaedi jauoqo joga'me adi'yac jena'me jenjo' yanec.»
Qama'le joca'li male yemichigui yataqachiñe en t'adaic jo'me en li'yac nalo'taguet cuarenta kilos yataqachiñe jalcote, male lecochiya da'me yachalegue jaga'me lauague. Male ec jañe'me Rut, dajoyi di'me noic.
16Qama'le ca'li yovi' jañe'me Rut yovita joga'me ue'ta jañe'me li'yodo Noemí, paja'a yenat:
«¿Jach'e ga'me eeta jo'me adeuoĝoc, yalole?»
Qama'le jañe'me Rut 'yaĝatem yema joga'me 'yetec joñe'me Booz, joda'me yataqachiñe yichoĝoden jañe'me. 17Nataq'aen enaac:
«Choqoda'me jayem yanem jena'me jenjo' jo'ne yi'yac, nayi auec'atetac, nataq'aen jayem 'yaĝatem queda'me ja 'noota nale qaya'te yi'yac, uotaĝa ochichiyelo jonaa'me youa'. Nach'ena jena'me jenjo' jayem 'yaĝatem.»
18Noemí yitaĝa ya'uo joga'me 'laqatac jo'ne enaac:
«Qama'le nayi, yalole, cha'li auajoya'a joga'me 'uo, nataq'aen jena'me jenjo' jiyaĝaua yataqachiñe onaĝaicaloec, ja 'nomategue qom ja yauana ga'me lajoĝoc jena'me jenjo' jetaque ya'uo.»
Επιλέχθηκαν προς το παρόν:
Rut 3: TDO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia en Toba del Oeste © Sociedad Bíblica Argentina, 2014, 2019.