John 12

Bethany taka Jisua sariek polin aom

(Mat 26:6-13; Mk 14:3-9)

1Kalkân kût rang sûnruk motona Jisua chu thina renga a kaithoi Lazarus omna Bethany khuoa a sea. 2Ama rangin kholoibu nêk rang an mintuo pea, Martha hah bu-an, semin a san ngeia, Lazarus chu dosânga Jisua bukhalâi otpui ngei lâia inkhat ani. 3Hanchu Mary'n nard sariek mirimhoi man luttak liter in-ang a hong chôia, Jisua ke a buoka, a sam leh a ke a hûi pea. Ha sariek mirimhoi han insûng pumpui asip zit zoi.#Luk 7:37,38 4Jisua ruoisingei lâia inkhat Judas Iscariot, ama a minsûr rangpu han, 5“Hi sariek mirimhoi hih ithomo duli #12:5: sumdâr duli ngei: 6:7 en roh. razanthumin juorin male inrieng ngei kôm a pêk loi?” a tia. 6Hi chong hih inrieng ngei rang lunghâng ân shak sika a ti nimaka, inru ani sika ani. Ha mi han sumkok a chôia asûnga sum hah ama rangin a lâk ngâi sikin ani.

7Aniatachu, Jisua'n a kôm, “Rokôk no roh! a dôn hih phûma ko om nia rangin rê rese. 8Inrieng ngei chu nin kôma om tit rang an ni, kei chu nin kôm om bang no ning,” a tia.#Bal 15:11

Lazarus that rangtie an mintuo

9Mi tamtakin Bethany khuoa Jisua a om ti an rietin chu Jisua mu rangin le Lazarus Jisua'n thina renga a kaithoi nôkpu mu sa rangin an sea. 10Hanchu Ochaisingei han Lazarus khom that sa rangin an bôka, 11ama sika Juda tamtakin anni ngei hengin Jisua an iem zoi sikin.

Jisua inlaltakin Jerusalema a lût

(Mat 21:1-11; Mk 11:1-11; Luk 19:28-40)

12Anangtûka chu Kalkân kût khohoia hong loko tamtakin Jisua Jerusalema a hong ti an rieta. 13Masikin letûmbuongei an chôia ama lamdon rangin an sea, “Hosanna! Pumapa riminga juongpu chu Pathien'n satvur rese! Pathien'n Israel Rêngpa satvur rese!” tiin an inieka.#Lap 118:25,26

14Jisua'n sakuording inkhat a mua, a chunga a chuonga, Pathien Lekhabu'n ati anghan,

15“Chi no roh, Zion khopuilien!

Ne Rêng hah sakuordingte,

chunga chuongin a hong ani.”#Zak 9:9

16Ha chong hah aphut han chu a ruoisingeiin riet thei mak ngeia; aniatachu Jisua inlaltakin inthoiin a om suo tena chu Pathien Lekhabu'n ama chungroi a lei miziek ani ti le a chunga ha anga han an lei tho ti an riet zoi.

17Jisua'n Lazarus thân renga a koi suoka, thina renga a kaithoi lâia mipui om ngei han a thurchi an misîr tir zoia. 18Ha sininkhêl hah an riet sikin mipui ngeiin an lei don ani. 19Hanchu Phariseengei han, “En ta u, ite chang khâi mak me! En roi, rammuol pumpuiin ama kêng an jûi zoi hi!” an tia.

Greekngei senkhatin Jisua an rok

20Khohoia Pathien chubaimûk ranga Jerusalema hong se ngei lâia han Greekngei senkhat an oma. 21Anni ngei han Philip (Galilee rama Bethsaida khuo mi) kôm an sea, “Pu, Jisua mu kin nuom,” tiin an ngêna.

22Philip a sea male Andrew ava rila, male anruonin an sea, Jisua an va rila. 23Jisua'n an kôm, “Miriem Nâipasal inlaltaka a om zora atung zoi. 24Chongdiktak nangni ki ril: buhûm pila a tâka athi nônchu aramalin aom chien ngâi, athin vai kêng tamtakin ânra ngâi. 25Tukhom an ringna moroi kaiin machân an ta, tukhom rammuola an ringna min pâm loi kaiin kumtuong ringna dôn tit an tih.#Mat 10:39; 16:25; Mk 8:35; Luk 9:24; 17:33 26Tukhom ki sintho nuom kaiin chu mi jûi ngêt rese ngei, masikin ki sinthopu ngei chu ko omna an om sa theina rangin. Tukhom ki sintho ngâi kai chu ka Pa'n mirit tho ngei atih.

Jisua'n a thi rang roi a misîr

27“Atûn hin ku mulung akâng male imo ki ti rang ani zoi? ‘Pa, hi zora hih ku chunga mi mintung pe no roh ki ti rang mini’? Aniatachu, hi dûktuong rang piela juong ki ni, masika han hi dûktuongna zora hih palin ke se rang ani. 28Pa, ni riming roiinpuina juong mintung roh!” a tia.

Hanchu invân renga rôl ajuon ringa, “Ko roiinpuina ku juong mintung zoi, la juong mintung nôk ki tih,” a tia.

29Lokongei a kôla ânding ngei han ma rôl hah an rieta, male an lâia senkhatin, khuonri kêng ani an tia, adangngeiin chu, “Vântîrtonin a chongpui kêng!” an tia.

30Aniatachu Jisua'n an kôm, “Ma rôl ha keima ranga ajuon ring nimaka, nangni ngei rang kêng ani. 31Atûn hin hi rammuol roijêkin aom rang zora ani zoi; hi rammuol roijêkpu khom hi atûn, pai nîng atih. 32Pilchung renga makhâiin ko om tikin chu mi murdi ki tieng kaikuoi ki tih,” a tia. 33(Hi chong hih thina a tuong rangtie riet theina ranga a ti ani.)

34Mipuingeiin a kôm, “Kin Balam lekhabu'n Messiah chu tuonsôtin ring tit atih” tiin mi ril ngâi. Hanchu, kho angin mo nangman, “Miriem Nâipasal hi târin om atih, ni ti thei? Hi Miriem Nâipasal hih tumo ani?” tiin an thuona.#Lap 110:4; Isa 9:7; Ezek 37:25; Dan 7:14

35Jisua'n a thuona, “Vâr hi chomolte chu nin lâia la om nîng atih. Vâr nin dôn lâiin lêng roi, masika han ijîngin nangni adê loina rangin; tukhom ijînga a lônin chu a sena riet ngâi mak. 36Vâr nin dôn lâihin vâr hi iem ta roi, avâr mingei nin ni theina rangin,” a tia.

Mingei iemloina

Jisua'n hi chong hih a ti suole chu a thengpata, an mu thei loina ranga a vânthup zoi. 37An mitmua sininkhêlngei tamtak a sin suonûk khomin anni ngei han ama iem mak ngeia, 38masikin dêipu Isaiah lei ti hah ahong tung adik theina rangin: #Isa 53:1 (LXX)

“Pumapa, kin thurchi misîr tumo a iema?

Tu chunga mo Pumapa'n arnak a minlang?”

39Male masika hi an iem thei loi ani, Isaiah nanâkin a tia:

40“Pathien'n an mit a mincho pe ngeia #Isa 6:10 (LXX)

male an mulungbôkngei khom a min môl pe ngei sa,

masikin an mitin an mu loina rang,

le an mulungbôkngei khomin an rietthei loina rangin,

male ko kôm an hônhei nôk duoia,

ke lei mindam ngei theina rangin, Pathien'n a tia.”

41Isaiah han Jisua roiinpuina a mu le a thurchi a misîr sikin hi chong hih a ti ani.

42Nikhomsenla Juda rachamneipu tamtak ngeiin Jisua an iem zoia; hannirese Phariseengei sikin misîr minlang ngam mak ngeia, ma anghan ani nônchu synagog renga khâipaiin an om rang ani. 43Pathien pomna nêkin munisi pomna an min lut uol ani.

Jisua chongbâingei roijêkna

44Jisua'n rôl inringtakin a tia, “Tukhom mi iempu chu keima mi iem vai niloiin mi tîrpu khom a iem sa ani. 45Tukhom keima mi mu chu mi tîrpu khom a mu sa ani. 46Rammuola hin vâr angin ku juong ani, masikin tukhom mi iem ngei murdi chu ijînga an om loina rangin. 47Tukhom ku thurchi misîr a rieta a jôm loi khom nisenla, keiman an roijêk no ning. Rammuol roijêk ranga juong ni mu unga, rammuol sanminring ranga juong kêng ki ni. 48Tukhom keima me henga, ku thurchi misîr pomloi ngei chu anni ngei roijêk rangin mi inkhat aom. Ku thurchi misîr ha sûn nûktaka chu anni ngei roijêkpu la ning atih! 49Mahi adik ani, asikchu Keima ka rachamin ite misîr ngâi mu unga, ka Pa mi tîrpu'n kêng ki ti rang le ki misîr rang chong mi pêk ngâi ani. 50Male a chongpêk ngei chu kumtuong ringna ani ti ki riet. Masikin ki ti ngei hi Pa'n mi ril lam angtakin ki misîr ani,” a tia.

Επιλέχθηκαν προς το παρόν:

John 12: SAKNT

Επισημάνσεις

Κοινοποίηση

Αντιγραφή

Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε

Μάθετε περισσότερα για Pathien Lekhabu Inthieng Chongtung Thar

John 12

Δημοφιλή Βιβλικά εδάφια από
John 12

Ακρόαση John 12

Αγία Γραφή:

Sakachep

Μετάφραση: Pathien Lekhabu Inthieng Chongtung Thar - SAKNT

John 12

John 12

Δημοφιλή Βιβλικά εδάφια από John 12

Ακρόαση John 12

Αγία Γραφή:

Sakachep

Μετάφραση: Pathien Lekhabu Inthieng Chongtung Thar - SAKNT

John 12

Δημοφιλή Βιβλικά εδάφια από
John 12