Matthew 10

Tîrton sômleinik ngei

(Mk 3:13-19; Luk 6:12-16)

1Jisua'n a ruoisi sômleinik ngei hah a koitûp ngeia, ratha saloi ngei rujûlpai theina le damloina le ri murdi mindam theina ranak a pêk ngeia. 2Tîrton sômleinik ngei riming chu hi ngei hih an ni: Amotontaka Simon (Peter an ti) le a nâipa Andrew; Jebedee nâipasal inik Jacob le a nâipa John, 3Philip le Bartholomew; Thomas le chôiruol rusuongpu Mathew; Alphaeus nâipasal Jacob le Thaddaeus; 4Canan mi Simon le a minsûrpu Judas Iscariot ngei an ni.

Sômleinik ngei an sintho rang

(Mk 6:7-13; Luk 9:1-6)

5Hi miriem sômleinik ngei hih Jisua'n a tîr ngeia, an kôm hi angin a ril ngeia: “Jentailngei rama le Samari mingei khopuingeia chu se no roi. 6Manêkin, Israel mingei lâia belri inmangngei kôm nin se rang ani. 7Se ungla, ‘Invân Rêngram chu anâi zoi!’ #Luk 10:4-12 tiin va misîr roi. 8Damloingei mindam ungla, athi ngei kaithoi ungla, aphârngei minthieng ungla, ramkhoringei rujûlpai roi. Manboia nin man ania, manboi nanâkin pêk roi. 9Nin pepa rângkachak sumdâr mo, ruphâi mo, sumsen mo chôi no roi; 10nin chaina rangin cholite mo, kancholi bob mo, kekok bob mo, khiengrol bob mo chôi no roi. Sinthopungei chu an nângngei hah pêk rang ani.#1 Kor 9:14; 1 Tim 5:18

11“Khopuia mo, khochinna mo nin lûtin nangni mintung rang nuoma nangni lei phâm mi rok ungla, ma mun hah nin mâknôk mâka chu ama kôm han om tit roi. 12Insûng nin lûtin chu, ‘Nin chunga rathanngamna om rese,’ ti roi. 13Ma ina omngei han nangni an lei modômin chu nin rathanngamna chibaimûkna hah an chunga tung rese; hannirese nangni an lei modôm nôn chu nin chibai chongbâi hah lâk mikhîr nôk roi. 14Male, kho in khoma, kho khuo khoma nangni an lei phâm noa, nin chong an rangâi nôn chu ma mun hah mâkrak ungla, nin kea pildi hah không mathâk roi.#Sin 13:51 15Adiktakin nangni ki ril, Roijêk Nikhuon chu ha khopuia mingei tuong rang nêkin chu Pathien'n Sodom le Gomora khopuia mingei tuong rang chu inriengmuna minlang uol a tih!” #Mat 11:24; Aph 19:24-28

Nuomlonangei hongtung rang

(Mk 13:9-13; Luk 21:12-17)

16“Rangâi roi! Melang pâl kâra belri om angin nangni ki tîr ani. Murûlngei anghan vârin le vasu-ngei anghan nuninêmin nin om ngêt rang ani.#Luk 10:3 17Aniatachu indîn roi, nangni sûra, roijêknamuna nangni tuonga, synagog inngeia nangni vîk rang an om rang sikin.#Mk 13:9-11; Luk 12:11-12; 21:12-15 18Keima sika roijêkpungei le rêngngei makunga lân ding nin tih, anni le Jentailngei Thurchi Sa nin misîr pe ngei theina rangin. 19Nin chung roijêk ranga nangni an tuong tika, imo nin ti rang aninônchu kho angin mo nin ti rang lei mindonin nan kângmindoi no roi; azora ahong tungin chu nin ti rang hah pêkin om nin tih. 20Chong nin ti rang ngei hah nangni nin chong nino nia; nin Pa Ratha renga juongin nangnia a chong rang ani.

21“Miriemngeiin an lâibungngei nanâk khom that rangin la minsûr an ta, ma angdên han pangei khomin an nâingei la minsûr sâng an ta; nâingei khomin an nulepangei doi an ta male that ngei an tih.#Mk 13:12; Luk 21:16 22Keima sikin mitinin nangni mumâk an tih. Aniatachu tukhom among dêna tuongdierpu chu sanminringin om an tih.#Mat 24:9,13; Mk 13:13; Luk 21:17 23Khopui inkhata an nuom nangni an lôn chu khopui danga rotpat roi. Adiktakin nangni ki ril, Miriem Nâipasal a juong mân Israel rama khopuingei murdia nin sintho zoi no tunui.

24“Inchulâi hah a minchupu nêkin lien uol mak; suok khom a pu nêkin lien uol mak.#Luk 6:40; Joh 13:16; 15:20 25Masikin inchulâi hah a minchupu angin hong om rang hah a mulung a minchuk rang ani, tîrlâm khom a pu angin hong om rang hah a mulung achuk rang ani. In pumapa luo Beelzebul, tiin an koiin te, a in mingei vang chu khodôra riming saloi uolin mo an koi rang ni zoi!” #Mat 9:34; 12:24; Mk 3:22; Luk 11:15

Tumo chiruo

(Luk 12:2-7)

26“Masikin miriemngei hah chi no roi. Atûna thupa om murdi lân lang let ata, ippa om murdi la phuong nîng atih.#Mk 4:22; Luk 8:17 27Ajînga nangni ki ril hih sûnkhovâra misîr ungla, kuor kunga nin riet hih inchungsîpa chuongin tânghâi roi. 28Taksa thata ratha that theiloi ngei chu chi no ungla; manêk han Pathien meidîla taksa le ratha anruona that theipu hah chi roi. 29Invâ inik poisakhatin nin rochôk thei, nikhomrese, an lâia inkhat luo nin Pa rachamin ninôn chu pilchunga tak noni ngei. 30Ma anghan nangni rang khom nin samsang tena khom tellet kêng ani. 31Masikin chi no roi; invâ tamtakngei nêkin nin lût uol ok kêng!

Khrista thop le heng

(Luk 12:8-9)

32“Tutu loko rieta ni thop kai chu kei khom invâna ka pa makunga thop ki tih. 33Aniatachu tutu loko rieta ni heng kai chu invâna ka Pa makunga heng ki tih.#2 Tim 2:12

Inngêina niloiin, khandai minlêng rang roi

(Luk 12:51-53; 14:26-27)

34“Rammuola hin inngêina minlêng ranga juongin mi mindon no roi. Inngêina minlêng ranga juong ni mu unga, khandai minlêng ranga juong kêng ki ni. 35Nâipasalngeiin an pangei mindoi rang, nâinupangngeiin an nungei mindoi rang, moi ngeiin an tarpingei mindoi ranga juong kêng ki ni;#Mic 7:6 36na râl saloitakngei chu ni insûng mingei nanâk nîng an tih.

37“Tutu keima nêka an nungei mo, an pangei mo lungkham uol ngei chu ku ruoisi rangin chuk mak ngei; tutu keima nêka an nâipasalngei mo, an nâinupangngei mo lungkham uol ngei chu ka ruoisi rangin chuk mak ngei. 38Tutu an khros ruputa ku nûk jûiloi ngei chu ku ruoisi rangin chuk mak ngei.#Mat 16:24; Mk 8:34; Luk 9:23 39Tutu an ringna man rang bôk ngei kaiin chu machân an ta; aniatachu, keima rang sika an ringna machân ngei kaiin chu man uol an tih.#Mat 16:25; Mk 8:35; Luk 9:24; 17:33; Joh 12:25

Râisânmanngei

(Mk 9:41)

40“Tukhom nangni modôm chu keima ni modôm ani, tukhom keima ni pom chu mitîrpu a pom ani.#Mk 9:37; Luk 9:48; 10:16; Joh 13:20 41Tukhom Pathien tîrlam hah Pathien tîrlam anina sikin a lei modômin chu Pathien tîrlam, râisânman chang sâng a tih. Tukhom misa hah misa anina sikin a lei pomin chu misa râisânman chang sâng a tih. 42Tukhom ku nûkjûi ngei lâia a chîntak khom ka ruoisi anina sikin tuidâi kilât khat khom lei min nêk chu, nangni ki ril, râisânman chu man ngêt a tih,” a tia.

Επιλέχθηκαν προς το παρόν:

Matthew 10: SAKNT

Επισημάνσεις

Κοινοποίηση

Αντιγραφή

Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε

Μάθετε περισσότερα για Pathien Lekhabu Inthieng Chongtung Thar

Matthew 10

Δημοφιλή Βιβλικά εδάφια από
Matthew 10

Ακρόαση Matthew 10

Αγία Γραφή:

Sakachep

Μετάφραση: Pathien Lekhabu Inthieng Chongtung Thar - SAKNT

Matthew 10

Matthew 10

Δημοφιλή Βιβλικά εδάφια από Matthew 10

Ακρόαση Matthew 10

Αγία Γραφή:

Sakachep

Μετάφραση: Pathien Lekhabu Inthieng Chongtung Thar - SAKNT

Matthew 10

Δημοφιλή Βιβλικά εδάφια από
Matthew 10