Génesis 3
3
Adánwan Eva Dios Yayata mana cäsuyanqan
1Dios Yaya llapan kamanqan wätakunapitapis mas sabïdum culebraqa karqan.#Apoc. 12.9; 20.2. Tsaymi warmi kaykanqanman witiykur nirqan: <<¿Rasunpaku Dios niyäshurqayki mayqan jachapa wayuynintapis mana mikuyänaykipaq?>>
2Tsaynam warmi nirqan: <<Llapan jachapa wayuyninta mikuyänäpaqmi niyämashqa. 3Peru huerta chawpinchö kaykaq jachapa wayuyninpaqmi sïqa albertiyämashqa mana mikuyänäpaq ni yatayllapis mana yatayänäpaq. Tsay jachapa wayuyninta mikurqa wañuyäshaqshi>>.
4Tsaynam warmita culebra nirqan: <<Manam wañuyankitsu. 5Tsay jachapa wayuyninta mikuskirqa Diosnömi musyayanki alli o mana alli kanqantapis. Tsaymi Diosqa munantsu mikuyänaykita>>.
6Tsaynö niptinmi tsay jachapa wayuynin munapaypaqta rikar alläpa munaparqan. Tsaymi allita o mana allita musyayta munar jachapa wayuyninta pallaskir mikuskirqan. Tsaypitam ollqunta makyaptin paypis mikuskirqan. 7Tsaynö mikuskirmi imayka ñawinkuna kichakaqnö jina höra tantiyakuskiyarqan qalapätulla kaykäyanqanta. Tsaymi hïgus jachapa rapranta jirarkur penqayninkunata tsapäkuyarqan.
8Tsay tardi rupay jeqaykaptinnam huertachö Dios Yaya puriykarqan. Tsaychö puriykanqanta tantiyaskirmi jachakuna rurinman tsinkakuyarqan. 9Tsaymi Dios Yaya qayarnin nirqan: <<Adán, ¿maychötan kaykanki?>>
10Tsaynam Adán nirqan: <<Taytay, huertachö puriykanqaykita tantiyaskirmi qalapätulla kar penqakurnin tsinkakushkä>>.
11Tsaymi Dios Yaya tapurqan: <<¿Pitan nishushkanki qalapätulla kaykanqaykita? ¿<Ama mikunkitsu> ninqaq jachapa wayuynintaku mikuskiruyki?>>
12Adánnam nirqan: <<Taytay, warmïpaq kamanqayki warmi apamuptinmi tsay jachapa wayuyninta mikurqü>>.
13Tsaypitanam warmita Dios Yaya tapurqan: <<¿Imatatan rurarquyki?>>
Warminam nirqan: <<Culebra engañamaptinmi tsay jachapa wayuyninta mikurqü>>.#2Cor. 11.3; 1Tim. 2.14.
Jutsata rurayanqanpita Adánwan Eva sufriyänanpaq ninqan
14Tsaymi culebrata Dios Yaya nirqan:
<<Tsaynö engañanqaykipitam llapan wätakunapitapis maldicionashqa kanki.
Lätayllapanam purinki.
Allpata mikurllam kawanki.#3.14 Allpata mikurllam kawanki ninqanqa alläpa penqakuyman churashqam kanki ninanmi.
15Kananpitam warmiwan alläpa chikinakuyanki.
Tsaynöllam warmipita yuriqpis qampita miraqkunata rikayta munanqatsu.#Apoc. 12.17.
Warmipita yuriqtam atakanchö kaninki.
Paymi sïqa umaykita pakit jarunqa>>.
16Evatanam nirqan:
<<Tsaynö ruranqaykipitam alli ñakarnin qeshyaq kanki.
Alläpa nanakurmi qeshyakunki.
Ollquykitam podernikichö katsiyta munanki.#3.16 O ollquyuq kaytam munanki.
Peru paypa mandädunchömi kawanki>>.
17Adántanam nirqan:
<<Mana mikunaykipaq nikaptiqmi warmikita cäsurnin tsay jachapa wayuyninta mikurquyki.
Tsaynö mikunqaykipitam chakrakunapis maldicionashqa kanqa.
Tsay jutsaykipitam waran waran alläpa sufrir mikunaykipaq arunki.
18Chakrachöpis tukuyläya kashakunawan cardonkunam wiñämunqa.#Rom. 8.20; Heb. 6.8.
Tsaynö kaptinpis jachakunapa wayuyninkunatam mikunki.
19Kawanqaykiyaqqa mikunaykipaq alläpa sufrirninmi arunki.
Allpapitam kamashqa kanki.
Tsaymi wañurpis allpallaman kutinki>>.
20Tsaypitanam warminpa shutinta Adán churarqan Evata.#3.20 Hebreo idiömachö Eva ninanqa kaway ninanmi. Tsay shutita churarqan payllapita llapan runakunapis mirayänanpaq kaptinmi. 21Adánwan Eva shukukuyänanpaqmi wätakunapa qaratsanpita llatapankuna Dios Yaya rurarqan.
22Tsaypitanam Dios Yaya nirqan: <<Kananqa runa noqantsiknönam alli y mana alli kanqantapis musyanna. Tsaynö kaykarqa imayyaqpis kawatsikuq jachapa wayuyninta ama mikutsuntsu. Tsayta mikuskirmi imayyaqpis kawanqa>>.#Apoc. 22.14.
23Tsaymi Edén huertapita Dios Yaya runata qarqurqan allpapita kamashqa kar chakrachö arur kawananpaq. 24Runata tsaynö qarquskirnam rupay yarqamunan läduman querubinkunata#Éxo. 25.18-22; 26.31; 1Rey. 6.23-29; Eze. 10.1-22; 41.18-19. Dios Yaya churarqan nina rupaykaq espädawan huertata täpayänanpaq. Tsaymi querubinkuna täpayarqan imayyaqpis kawatsikuq jachaman pipis mana yaykunanpaq.
Επιλέχθηκαν προς το παρόν:
Génesis 3: qxn
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2011, Wycliffe Bible Translators, Inc. All rights reserved.