Mataio 15
15
1Nou ta’uwa titi oubi wia Parisea oubi Iesuido Ierusalemaudo naibaha o’umo wia neiio naiba iaowaumo: 2Ro kitomudio mereo mamusi mamusi bubui teiriri imeheaumo, ina nei dou imidaimowa nei tu iroduutimo biahai. 3Wia nouro nei naibaha imowameai wia neido naiba iaowa: Iehova bubui rioo teiri emeheaumo rio abeamio wadewa? 4Nouri Iehovaro wade modoboito naibaha iaowa; Ro mamura abeara niainiai taimahebidiomama neitido, wia nouri dubu nou abeara mamura ubauba wadeito imama’utimamawa nou moihiai. 5Ata rioo naibaha iaowaumo: Nouri dubu nou abeaido wia nou mamuido naibaha waroi: Mo moni nouri rieitimu batia ata nou Iehovaido kemaairi. 6Ina mamura abeara nou niainiai imahebidiomama biahai, nouro mea aiwaiti. Nouri Iehova bubui, buru aibo rioo idodiaiwaumo, rio abeamio wadewa. 7Rio kiromohuwodio oubi, Isaia naiheha peroveta wade rioido nou itomututi, nou naiba iaotuti:
8Nouri oubi nei mo tarito, maata ramu, o’umo, wia neiio mo puruoito nemabitidiodumo;
Ata nei imini mo aueudo auwowai.
9Wia neiio mo ainemabitidiodumo buru naito,
Wia nouri bubui neiio nou riatomuaidumo nou oubi buburi.
10Wia Iesuro oubi gema naibaha itua nouido o’umoi wia neido naibaha iaowa: Tarovidioumo wia umo taitimo. 11Nouri nana dubu maataito idowa, dubu uba owai raihe; wia nouri nana maataudo ihuodutimowa neiio dubu uba kowaimoi. 12Ina nou kitomudio mere naibaha o’umo wia nouido naiba aroumo: Ro umo tatora Parisea oubi roido gunuuni nou riatidumo nou ta’uwa nouri kiao wade nei naibaha irovidioumo? 13Wia nouro nei naibaha imowameai naiba iaowa: Nouri na mate auwoha ina mo Abearo ibo biahai nei auwoha aiwai ia’uboi. 14Nouwa miia. Neivia idomai tato oubi wia idomai tato oubi ata nei naibaha riwaboiadumo; ina idomai tato dubu, idomai tato dubu ataro naibaha owaboiia, doo neiti gowawa aiwai‐iomoamamai. 15Wia Pitaro naibaha omowameai, nouido naiba iaowa, Oro aibo wade nouri roro imo umo taniwairo. 16Wia Iesu naibaha iaowa: Rio imini nei aibo ia tatora? 17Rio umo tatora, nouri na nou maataito idouwa nei tuburuito rido’utidumo wia doo niro giriudo naibaha kihuomoi; 18ata maataudo kihuoduti na’i, iminiudo ko’uri; wia neiio dubu ubauba kowaimoi. 19Mabu nouri ubauba kiraromodio nana’i, oubi kirowoto kidia, siwokori kidia, iwo kidia, piro kidia, kiromohuwadio wadei, ubauba kiao wadei, neiio iminiudo ko’uri. 20Wia nei aibo nana’i, dubu ubauba kowaimoi; ata tu ido’uti tato ihomowa, dubu uba owai raihe.
21Ina Iesu nouri mabudo naibaha emeheai wia auwo‐turi baraito, Turora Sidonara hapuoito, nou naibaha o’uro. 22Ina na’u Kanena o’bo auwoturi baraudo naibaha o’uwaro wia nouido nou aiimakakai naiba iaowa: Au dubu e, Davida mere, moido niainiai tanemahebidioro, mo behera uba urioro gooa romowaidio ine. 23Wia wade ata nouido Iesuro omowameai biahai. Ina nou kitomudio mere naibaha o’umo, naiba atodoumo, naibaha iaowaumo; Nou tatiodoiro, mabu nouri imo dooudo nou naibaha rimakakaiwadioro. 24Wia Iesuro naibaha omowameaiwa, naiba iaowa: Ata oubido mo otiodoi raihe, na’u katoai mamoe Isaraela gu, nei na’uri. 25Ina o’bo naibaha o’uro, nou nouido naibaha oroboria, naiba iaowa: Au Dubu e, mo tanawabai. 26Wia Iesuro naibaha omowameai, naiba iaowa: Nou mea biahai mere aueudo dou imidai ina kaukauido imaati. 27Wia nou naiba iaowa: Auwo‐dubu nou naihehari; ata kaukau, auwo‐dubu dodooudo koromoouti dou huopii, neiio naiba ihomoi. 28Ina Iesuro nou naibaha omowameai, nouido naiba iaowa: O’bo e, ro kiraromodio na’i nei auwo‐auwori. Nana roido mododiai naiba ro niroi. Ina ta’unu nouri, nou behera mea tau roiti.
29Wia Iesu nouri mabudo naibaha emeheai wia Galilaia auwoturi tariwai nou naibaha o’uwaro, wia akabuito nou naibaha iorowa wia nou nouowa emidio. 30Wia oubi piipiiha nouido naibaha o’umo, daiie oubi neimu wia idomai tato oubi, wia mauo oubi wia karawo oubi wia oubi amida godogodo, nei naibaha iwoumo. Wia Iesu kono mabuwa neiio nei naibaha iwutaatutiwaumo wia nouro nei meaha naibaha iwaiwa. 31Nouri oubi gemao naibaha emaeawaumo, nou ta’uwa mauo oubi wade kiaowa, naiba karawo oubi mea koitiwa, naiba daiie oubi korohowa, naiba idomai tato oubi kirowowa, neiio naibaha iauriwaumo; wia Isaraela Urio‐abeaido neiio naibaha emabitiwaumo.
32Wia Iesuro nou kitomudio mere nou mabuito naibaha itua, naiba iaowa: Mo niainiai nimahebidiowa oubi gemanu neido; neivia hiwio neewa na’u doihabuo momu kemidioi wia nei dou iho tatori. Moro nei itiodoi raihe ina nei navewa tamaduduruo oromooutimo tore. 33Wia nou kitomudio mere nouido naibaha iaowaumo: Imo dou godo buru batiwa baudo nimidaidaidumo, oubi gemanu nei aibo niro iapeutimoi? 34Wia Iesu neido naibaha iaowa: Rio dou kopi taibari? Nei nouido naiba aroumo: 7 wia na keke godo biahai. 35Wia oubi gemaido nouro wade modoboito hopu ohuwa emiwamoi. 36Wia 7 dou kopi, na badi, nouro naibaha imidai naiba emabiti naiba ikekuti wia nou kitomudio mereido nouro naibaha imaatiwa, wia neiio oubi gemaido naibaha imedeamowaumo. 37Wia neiio auwoha naibaha ihowaumo wia nei niro naibaha iapeutiwaumo; neiio kiraho dou nia’e ibiwaumo, 7 hao iapeuti. 38Wia nouri kiho oubi nei modobo 4,000 wia upira merera badi. 39Wia oubi gema nouro naibaha iaho’iuti wia peito naibaha orovia wia Magadana auwo‐turi baraito naibaha o’u.
Επιλέχθηκαν προς το παρόν:
Mataio 15: KXW1941
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Published by the British and Foreign Bible Society in 1941.