Mataio 20
20
1Nouri Toboro babubati nou moto abea aibori; hiwio kiheheaiwa nou naibaha o’uro vine bati emaipo oubi naibaha iaubuairo. 2Wia nou ta’uwa kowaati mere nei noumu wiha modobo na’u shilling naibaha imapoi, nou vine batito nouro nei naibaha itiodoi. 3Ina 9 o’clock owa nou naibaha o’uro wia oubi amida nouro naibaha iauri pake batiwa emidioumo, iwaati tato. 4Wia nou neido naiba iaowa: Mo vine batito rio naibaha tarohomo, wia nouri moni nou meahari, mo rioido ainaimaati; wia nei naibaha o’umo. 5Ina tariwai 12 o’clock wia tariwai 3 o’clock nou naibaha o’uwaro wia naiba naiba idodiaiwa. 6Wia tariwai 5 o’clock nou naibaha oroho wia owaati tato kotoi oubi amida nouro naibaha ivia, wia nou neido naibaha iaowa; Touna rememidiowadumo rio nouowa, owaati tato hiwio tutunu? 7Nei nouido naibaha iaowaumo, mabu nouri dubu ataro imo kowaati imapoi biahai: Ina nou neido naibaha iaowa: Vine batito rio naiba tarohoumo, wia nouri moni nou gamooihari, nou aibo rioo aiwaimo‐oweai. 8Ina doho dohowa vine bati pai‐duburo nou himia opuito kowaati mereido naibaha iaowa: Kiwaati mere taitua wia nei wiha na’i neido taimaati, dooudo mere opuito wia opuito mere dooudori. 9Wia nou ta’uwa, 5 o’clock owa kemapoi oubii naibaha o’uwaumo nei auwoha na’u shilling naibaha imeiwaumo. 10Ina nou ta’uwa opuito oubi naibaha o’uwaumo, nei naibaha iraromodiowaumo wiha auwo noweadaidumo, ata nei na’u modobo, oubi auwoha, na’u shilling naibaha imeiwaumo. 11Wia nou ta’uwa neiio naibaha iviaumo, moto‐abea mea neiio nouido naibaha emama’utiwaumo. 12Nei naibaha iaowaumo: Nouri do’oudo oubi, na’u ta’u nei naibaha iwaatitutiumo wia ro neido na’u modobo imo aibo idodiawa, wia imovia auwoha hiwio kokowa nimowaatitutiumo. 13Wia neimu kemidio dubuido na’u nouro naibaha omowameai: Mo mabu dubu, uba kidia roido moro idodiai biahai. Ro momu na’u shilling modoboha idodiai tatora? 14Ro himia nana taimidai wia ro naveito ta’u; nouri dooudo oubido ro nana aibo moro ainaimaati. 15Nou meara ina mo himia nana’i idodiai naiba mo himia niro? Ro idomai uba oitira mabu nouri mo meahari? 16Nouri dooudo oubi doo nei opuitori wia opuito oubi doo nei dooudori. Mabu nouri, oubi godogodo nei kitua oubiri wia kimeibomai oubi godo biahai.
17Iesu Ierusalemaito kioro tariwai wia nou 12 kitomudio mere nouro navewa naibaha itateai wia neido nou naiba iaowa: 18Taaurimo! Imo Ierusalemaito iomoi wia Oubiha‐mere haupo aiwaimowoi, auwokohena oubido wia titi oubido; wia neiio nou epiamoi aiwaimo‐apoiwai. 19Wia douboi oubido neiio nou aiwaimo‐imaai; neiio nou aiwaimo‐ematioutiwai wia aiwaimo‐epiatutiwai wia sataurowa aiwaimootomai.
20Nou ta’uwa, Sebedaia mere neewa, neiti himia mamu, Iesuido nou himia meremu naibaha o’ubumo; wia Iesuido nou naibaha oroboria wia na ata nouido naiba atodoi. 21Ina Iesu nouido naiba iaowa: Touna niroi ro? Nou nouido naiba iaowa: Emi‐bati taimaaimama neitido, mo mere neewa’i, na’u ro himia tuiha hapuowa ata ro himia pere hapuowa emiwatoi ro himia bubu‐batiwa. 22Wia Iesuro naibaha omowameai, nou naiba iaowa: Rieti umo biahai nouri nana rieitio nou ratodoidudo. Mo tariwai kidio koimo’i rieiti kidio umora, wia mo tariwai nouowai babatiso’i rieti babatiso iwai‐mamaira? Neiti nouido naibaha iaowaudo: Imeiti umori ainidodiaidaidudo. 23Wia nou neitido naiba iaowa: Naiheha mo koimo’i noudo rieitio aiwaidoidioi wia mo kowea babatiso’i rieitio aiwaido‐oweai; ata kemi bati mo himia tuiha hapuowa wia mo himia pere hapuowa moro imaatimama raihe. Nouri oubido nouri mabuwa mo Abearo nou idodiai, neiti oubido nouro aiwaimaatimamai. 24Ina 10 kitomudio mereo idaorovidiowaumo, neivia gunuuni iatiwaumo niamara namura’i neitido. 25Wia Iesuro nou mabuito nei naibaha itua wia neido naiba iaowa: Riovia umori douboi oubi pai‐oubii ina kimaduduo oubi, neivia pai aibori; wia nei himia auwoauwo oubi, kokoiha oubi aibo. 26Ata rio naiba idodiai raihe, wia nouri dubu nou auwo oiti nirorimahebidio, nou meaha nouvia kowaati mere aiwaiti. 27Wia nouri dubu nou opuito nirorimahebidio, nou meaha nouvia rio kowaati mere aiwaiti. 28Nou aibo Oubiha‐mere nou airo’uro; nou niro biahai oubio nou omotoi, nou niro amida oubi nouro imotoi, naiba nou niro nou himia kiiro imaati oubi gema tiwo na aibo.
29Ina nei Ierikoudo naibaha emeheaiwaumo, oubi gema nou dooudo naibaha orobodowaumo. 30Wia dubu neewa idomai tatori, nave barawa naibaha emidioudo. Ina Iesuro naibaha ihodaimama neitio naibaha orovidioudo, neiti naiba iaowaudo: Iesu! ro Davida mere, imeitido niainiai tanimahebidiomamaro. 31Wia oubi gema neitido imadohutiwaumo, neiti mubaha naibaha oitiudo: wia neiti auwo niimo naibaha imakakaiwaudo, naiba iaowaudo: Iesu ro Davida mere, niainiai tanimahebidiomama imeitido. 32Wia Iesu naibaha otoa, neiti naibaha ituamama naiba iaowa: Touna niaiidaii mo rieitido, rieti nou niroi? 33Neiti nouido naiba iaowaudo: Pai‐dubu e, imeiti niro idomai iravodaitoi. 34Nouri Iesuro neiti niainiai imahebidiomama wia neiti idomai nouro iatibodoimama, ina nou ta’uwa neiti mea mea naibaha irawodaiudo, wia neitio navewa nou dooudo naibaha orobodowaudo.
Επιλέχθηκαν προς το παρόν:
Mataio 20: KXW1941
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Published by the British and Foreign Bible Society in 1941.