Mataio 24
24
1Wia Iesu naibaha ohuowa wia Tana‐moto naibaha emeheaiwa wia nou kitomudio mere nouido o’uwaumo Tana‐moto nuumo nouido emapoiwamoi. 2Wia Iesu neido naiba iaowa: Nouri nana auwoha rioo ariauridumo? Naiheha mo rioido ainiao, Na’u akabu amida akabu ohuwa ia raihe, doo auwoha hopuwa aiwaimo‐iherei.
3Ina Iesu Oliveta akabu ohuwa naibaha emidio, kitomudio mere nouido piroha naibaha o’uwaumo, naiba iaowaumo: Taro imoido taiba wairiiai na’i. Wia ro ko’u modobo’i wia batibati oropoiio modobo’i taiba wairiiai. 4Wia Iesuro imowameaiwa neido naiba iaowa: Taiaurimo meaha, oubio rio imatuhuti tore. 5Nouri oubi godogodo mo painawa aiwaumo‐o’ui naiba aiwaimo iaoi, mo Kerisori. Neiio oubi godo aiwaimoimatuhuti. 6Nou ta’uwa kihi wade wia kihi pai rioo aiwaimo‐irovidioi, tore iatimo aue; nana nouri ko’uiha aiwaumo’ui, ata modobo oropoiio raihe. 7Na’u oubi ata oubimu aiwaimo‐orowotoi, na’u bububati ata bububati oubimu aiwaimo‐orowotoi. Wia due ta’ua wia gooa ta’ua batibati amida aiwaumo‐o’ui wia bati atawa hopu mumuruoro aiwai‐iriti. 8Nouri nana auwoha mibo ta’uwa airowahorodai. 9Ina neiio rio aiwaimo‐iwoi gooa iwaimoi wia neiio rio aiwaimo‐iwotoi wia oubi auwoha neiio rioido oriha aiwaimo‐imeauri mo himia painawa. 10Wia hiwio’i nouowa oubi godogodo neiio gunuuni aiwaimo‐iati, wia nei himia himia aiwaimo‐erematuhuti wia nei himia himia oriha aiwaimo‐ereauri. 11Wia kiromohuwodio peroveta oubi godogodo aiwaimo‐o’ui wia neiio oubi godogodo aiwaimo‐aratiuti. 12Ina oubi godo nei himia niro kemahebidio na’i nou kekibuo aiwaiti, mabu nouri ubauba kidia nou godogodo airia. 13Wia nouri dubu hiwio modobo nou giieha airohidio, nouro kiiro aiwaveai. 14Wia nouri pai‐mea batibati auwohawa, oubio totomuito aiwaimo‐iaodioi, batibati oubido imapoiwai; ina nou ta’uwa koropoiio mabu aiwauro’ui.
15Ina hiwio nouri rioo ubauba nana aiwaimo‐iauri Tana‐batiwa otoiwa, naiba Daniela peroveta duburo tau aroro (Dubu nou kiapo nou umo umoiti) 16Nou ta’uwa Iudeawa kemidio oubii giminito nei umodaumo. 17Dubu nou moto ohuwa emidiowa, moto kupoito oruo aue nana amida nou motoudo imei. 18Wia dubu nou bati mabuwa emidio, nou araiwai aue nou himia hipura emidai. 19Niainiai nirowa kiworoho mere’i wia bamu kiworoho mere’i hiwio’i nouowa. 20Iehovaido tatodoimo, rio kodau hiwio nou nou ko’u biahai uuto ta’uwa wia Sabati hiwiowa. 21Mabu nouri nou ta’uwa uba ubaiha waai nana naiba o’u biahai, ta’uo hiwio nouowa batibati auwoha kowahoro ta’uwa, wia doihabuo hiwionu; oo ata nou aibo o’u raihe. 22Ina hiwio nouri komuha iwai biahai, oubio iiro raihe. Ata hiwio nouri komuha aiwai‐iahiai kimeibomatuti oubii, nei mabu. 23Ina oubi amida rioido aiwaimo‐iaoi: Taieauri Keriso nouri, taieauri Keriso noura; orovidioumo aue. 24Mabu nouri kiromohuwodio Keriso’i wia kiromohuwodio peroveta oubii nei aiwaumo‐o’ui wia auwo modobo’i wia tiahatiaha nana neiio aiwaimo‐iwaeviai ina nei kidodiai umowa, neiio kimeibomatuti oubi aiwaimo‐aratiuti. 25Taiaurimo rio nana auwoha opuito moro tau naro rioido. 26Mabu nouri ina neiio rioido aiwaimo‐iaoi, Taiauri! Nou buru batiwari, rio idoumo aue; Taiauri! nou moto nuumo turiwari, rio orovidioumo aue. 27Naiba babasi hiwio kiheheai batii noudo imirisai wia hiwio kahoiia batito naibaha imeivia; Oubiha‐mere ko’u hiwio’i nou aibo waai. 28Goho tobatiwa koari, nouri batiwa warie nouowa waimo‐idabuai.
29Nou ta’uwa gooa nouri oropoiiowa, ta’ui nouowa hiwio durii naibaha waiti wia bara nou himia pida araditi raihe wia huri toboroudo naibaha aiwaimo‐oromoouti wia pupuo nana’i toborowa aiwaimo‐erederioi. 30Nou ta’uwa Oubiha‐mere nou himia modobo toborowa aiwaimeiiwotai, batibati oubio aiwaimo‐ododidioi wia Oubiha‐mere toboro bubuwa o’uwa neiio aiwaimo‐eauri, auwo pupuo na’i nou ramu wia tiaha moari na’i nou ramu. 31Wia nou himia gururu‐oubi tuture, diamo gema ramu, nouro aiwauro‐itiodoi wia nou himia kimeibomatuti oubi neiio aiwaiwariiatuti neewa wia neewa huramaudo, toboro oomuoudo wia oomuoudo.
32Doihabuo suke nua oroaibo wade rioido imatomidioi. Nou ta’uwa nou keteri iwatatutiwa wia paha naibaha omobodiaiwawa, rio umori koko hiwio tariwai. 33Nou aibo nou ta’uwa nouri nana auwoha rioo aiwaimo‐iauri umo taitimo, nou tariwai, biri kahitowa. 34Naiheha mo rioido ainaro: Nouri aramio oroihimo raihe, ta’ui nouowa nana auwoha aiwaimo‐idodiai. 35Toboro wia hopu aiwaimo‐oropoiioi, mo himia wade oropoiioumo raihe. 36Hiwio nouri, ta’ui nouri, oubi umo biahai, ina gururu oubi umo biahai ina mere umo biahai. Mo Abea na’u nou himia umori. 37Wia Oubiha‐mere ko’u hiwio, Noe hiwio’i nou aibori. 38Hiwio nouowa ina karuru ko’u biahai, oubi nei airihodiodumo wia airimediodumo wia upira dubura airoitutidumo wia upi dubido rimaatidumo, hiwio’i nouowa Noe auwo pewa naibaha orovia. 39Wia nei umo biahai karuru ko’u ta’ui ina karuru nou naibaha o’uro wia nei auwoha naibaha iwodaudio. Oubiha‐mere ko’u hiwio nou aibori. 40Nou ta’uwa dubu neewa batimabuwa aiemidioudo, na’ubu waobuai, ata aiwabeede. 41Wia o’bo neewa dou waido ototoi, na’ubu waobuai ata aiwabeede. 42Mabu nouri, taiaurimo meaha! Taiba hiwio rio Pai‐dubu aiwauro o’ui rio umoitimo biahai. 43Nouri na rio umo taitimo; ina moto abea piro dubu ko’u hiwio’i nouowa nou umori: nourowia meaha waauri wia nou motoito odorowa nouro aiwamopai. 44Nouri rio himia nana meaha taidodiaimo, mabu nouri tou hiwio rio araromo biahai, Oubiha‐mere tou hiwio wauro’ui. 45Ina botiro gamooiha wia imini mea kowaati mere. Nou pai‐dubu nou himia moto oubido nouro nou pai aiwawai: kihona neido imaati hiwio auwoha. 46Nouri kiwaati mere nou tiaha geiiri, ina nou pai‐dubu o’uwa wia nou kowaati meaha naibaha emeauri. 47Naiheha mo rioido ainaro; nouro nou pai aiwawai nou himia nana auwoha. 48Ina ata, nouri uba kiwaati mere nou himia iminiwa naibaha wararomoi: Mo pai‐dubu hagohagoha ko’u biahai. 49Wia noumu kiwaati mere ata nouro kimowoto warohoi, wia ihomoi idiomoi koiioi oubimu. 50Nouri kiwaati mere pai‐dubu aiwauro o’ui nouri hiwiowa hiwaa mere eauri biahai wia nou ta’uwa nou umo biahai. 51Wia nou goho turiwa nou himearo aiwarahiai wia kiromohuwadio oubi wiha nouro nouido aiwaimapoi wia idebi irotutimoi wia niimo imotooubutimoi nei nouowa waimo‐emidioi.
Επιλέχθηκαν προς το παρόν:
Mataio 24: KXW1941
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Published by the British and Foreign Bible Society in 1941.