Mwa Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ĩsyĩtwa yĩĩ, “Mwambĩlĩĩlyo” ũelesyo wayo nĩ “Wumo.” Ĩvuku yĩĩ yĩtũtavasya ĩũlũ wa kũmbwa kwa ĩtu na nthĩ, wumo wa andũ, na wambĩlĩĩlyo wa naĩ na mathĩna ma kũũ nthĩ. O ta ũu ĩvuku yĩĩ nĩyĩwetete ĩũlũ wa nzĩa ĩla Ngai ũthũkũmanaa na andũ. Ĩvuku yĩĩ ya Mwambĩlĩĩlyo nĩyĩaanĩtw'e ilungu ilĩ nene:
(1) Kũmbwa kwa nthĩ na ũvoo wa tene wa andũ. Kĩlungunĩ kĩĩ nĩtũtavĩtw'e ĩũlũ wa Atamu na Awa, Kaini na Aveli, Noa na ĩla mbua ya kĩw'ũ kingĩ, na ũla Mwako mũtũlu wa Mbaveli (kĩlungu 1—11).
(2) Ũvoo ĩũlũ wa aaũmae ma tene ma andũ ma Ĩsilaeli. Wa mbee nĩ Avalaamu, ũla weesĩkĩe nũndũ wa mũĩkĩĩo wake na nũndũ wa kũmwĩw'a Ngai. Ũvoo ũla ũatĩĩe nĩ ĩũlũ wa mwana wa Avalaamu Isaka na mwĩsũkũũe wa Avalaamu Yakovo (ũla kwa ĩsyĩtwa yĩngĩ weetawa Ĩsilaeli), na ĩũlũ wa ana ĩkũmi na elĩ ma Yakovo, ala nĩmo wambĩlĩĩlyo wa mbaĩ ĩkũmi na ilĩ sya Ĩsilaeli. Ve ũvoo wa mwanya ũnenganĩtwe ĩũlũ wa mwana ũmwe wa Yakovo ũla weetawa Yosevu. O ta ũu nĩtũtavĩtw'e ĩũlũ wa maũndũ ala matumie Yakovo e na ana ala angĩ make mathi kũtũa Misili (kĩlungu 12—50).
Ĩvuku yĩĩ nĩyĩnenganĩte ũvoo ĩũlũ wa andũ, na mbee mũno nĩyĩwetete ĩũlũ wa maũndũ ala Ngai wĩkĩte. Nĩyĩtũĩkĩĩthasya kana Ngai nĩwoombie syĩndũ syonthe ila syĩ ĩũlũ wa nthĩ na ila syĩ ĩtunĩ, na yĩkaminũkĩlya na ũtianĩo wa kana Ngai akaendeea kũsũvĩa andũ make. Ĩvukunĩ yĩĩ yonthe Ngai nĩwe ũkwoneka ayĩka maũndũ onthe. Nĩwe ũsilĩlaa, na kũkany'a ala mekĩte naĩ; nĩwe ũtongoeasya na kũtetheesya andũ make, o vamwe na kũmony'a ũndũ mekwĩka. Ĩvuku yĩĩ ya tene yaandĩkiwe ĩũlũ wa maũndũ ma mũĩkĩĩo wa andũ, na yĩimatetheesya maendee kwĩthĩwa na mũĩkĩĩo ũsu kĩla ĩvinda.
Maũndũ ala me Ĩvukunĩ Yĩĩ
Kũmbwa kwa ĩtu na nthĩ na kũmbwa kwa andũ 1.1—2.25
Wambĩlĩĩlyo wa naĩ na mathĩna 3.1-24
Kuma Atamu kũvika Noa 4.1—5.32
Noa na ĩla mbua ya kĩw'ũ kingĩ 6.1—10.32
Mwako mũtũlu wa Mbaveli 11.1-9
Kuma Semu kũvika Avalamu 11.10-32
Aaĩthe maitũ mũĩkĩĩonĩ: Avalaamu, Isaka, na Yakovo 12.1—35.29
Nzyawa sya Esaũ 36.1-43
Yosevu na ana-a-ĩthe 37.1—45.28
Andũ ma Ĩsilaeli me Misili 46.1—50.26
Επιλέχθηκαν προς το παρόν:
Mwa Ũelesyo wa Ĩvuku Yĩĩ: KAMBA
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBLE SOCIETY OF KENYA © 2011