Mark 9
9
1Nahaƞ ake owiċakiyake, "Le oċiciyakapi, Wak̇aƞṫaƞka ṫawokicuƞze ki waṡʹagya hi ṡni haƞni, huƞḣ nitʹapi kte ṡni."
Le Amaḣpʹosaƞṫagleya#9.1 Silhouette = Amaḣpʹosaƞṫagleya Hinajiƞ
(Matthew 17.1-13; Luke 9.28-36)
2Aƞpetu iciṡakpe hehaƞl Jesus e na Peter e na James e na na John iwiċaċ'u, na paha waƞkatuya waƞ ekta awiċai, heċiya iṡnala ipi. Ayutapi yuƞk̇aƞ Jesus ṫogye waƞyaƞkapi. 3Na ṫahayapi ki lila ska, yujajapi eyaṡ mak̇a akaƞl takuni hehaƞyaƞ ska kte ṡni. 4Na Peter e na James e na John ihakab-unpi ki yamni waƞyaƞg najiƞpi, yuƞk̇aƞ Elija, e na Moses Jesus kiċi woglakapi. 5Yuƞk̇aƞ, Peter Jesus hekiye, “Waunspekiya, le uƞhipi ki le taƞyaƞ yelo, ċa tiyobleca yamni pawosla iyeuƞyaƞpi kte ki waƞji niṫawa kte, waƞji Elija ṫawa kte, na uƞma ki iƞṡ Moses ṫawa ktelo.” 6Iye, na uƞma ki k̇okiṗapi ċa takeyapi kte ṫaƞiƞ ṡni.
7Hehaƞl maḣpiya waƞ kuta hiyu na aohaƞziwiċaye, na hetaƞl wiċaho waƞ heye, “Le miċiƞkṡi ṫewaḣila ki he e yelo ċa anaġoptaƞpo!” 8Okṡaƞkṡaƞ etuƞwaƞpi eyaṡ isam tuweni ṡni; Jesus ecela kiċi uƞpi.
9Paha etaƞhaƞl aiyoḣpeya kupi hehaƞl Jesus leċel icuƞwiċaṡi, “Taku waƞlakapi ki lena oyakapi ṡni yo, tokṡa tohaƞl miye, Wiċaṡa Ċiƞhiƞtku ki, matʹiƞ na wakini ki hehaƞl.
10Iyuha taku iwiċaṡi ki anaġoptanpi, tk̇a iyuha ake iwoglakapi, "matʹin na wakini ki he?" le taku k̇api hwo? 11Na Jesus iyunġapi, "Takuwe le wooṗe awaƞyaƞkapi ki Elijah tokaheya hi kta keyapi hwo?"
12Ċa Jesus awiċayupte, "Elijah tokaheya u kte na taku iyuha yuwiƞyeya kte. Ṡk̇a lena wowapi wak̇aƞ ki lecel owa yaƞke he Ikċe-wiċaṡa ki lila kakijiƞ na wiċakelapi kte ṡni. 13Owiċakiyake, Elijah ehaƞni hi na oyate ki tokeċinkċiya okuwapelo, hel wowapi ki owapelo.
Wak̇aƞ-ṡica Ki Hokṡila Wan Ṫaƞmahel Uƞ Ċa Jesus Asniye
(Matthew 17.14-21; Luke 9.37-43a)
14Hehaƞl Jesus ena James ena Peter ena John pahataƞhaƞ gliyoḣpayapi. Ihakab-unpi uƞma ki wiċota wiċapaokiyuṫapi wanyaƞkapi. Moses-Ṫawooṗe-Awanyaƞkapi ogna wauƞspewiċakiye ki ob taku akiniċapi. 15Oyate ki Jesus waƞyaƞg'iheyapi na lila inihaƞpi. Etkiya iƞyaƞkapi na nape yuzapi. Ho na Jesus ihakab-unpi ki 16hena iwiċayuƞġe, “Le takuwe ċa lena ob waayakinicapi hwo?”
17Yuƞk̇aƞ wiċotapi ki hetaƞ wiċaṡa waƞ hekiye, “Waunspekiya, miċiƞkṡi waglohi yelo. Ṫaƞmahel wak̇aƞ-ṡica waƞ uƞ welo. Ċa iya okihi ṡni yelo,” ekiye. 18“Tohaƞl le wak̇aƞ-ṡica ki le hokṡila ki ahiṫakpa ċaƞna k̇ul iḣpeye, ċaƞna ṫaġe ki hiyu welo. Na hi ki aglatʹiƞza ċaƞna ataya ṫaċaƞ ki nawotʹiƞye yelo. Na le nihakab-uƞpi ki lena owiċawakiyakelo, eyaṡ takuni okihipi ṡni yelo.”
19Jesus hewiċakye, “Wowicala ninicapelo! Le tohaƞyaƞ nikiċipi wauƞ kta hwo? Naiƞṡ tohaƞyaƞ leċanuhaƞpi kta hwo? Hokṡila ki makaupo.” 20Ċa hokṡila ki Jesus el ahipi.
Wak̇an ṡiċa ki Jesus wanyaƞka hehaƞ hokṡila ki le kul iḣpeye, yunk̇an ataya nagwagwakin na i onataḣtunya ḣpaya ċa Jesus wanyanke. 21Jesus waƞċak atkuku ki iyuƞġe, “Le hokṡila ki tohaƞyaƞ leċeca hwo?”
Atkuku ki ayupte, “Tohaƞtaƞ ki heċeca yelo. 22Na wak̇an siċa ki lila miċiƞkṡi kte waċiƞ, mni na ṗeta el k̇o iḣpeyelo. Oyakihi ehaƞtaƞṡ ouƞkiyapo. Uƞṡiuƞlapo.”
23“Ohaƞ!” Jesus ekiye. “Tuwa wowicala yuha ehaƞtaƞṡ ecela taku okihi kte,” ekiye.
24Atkuku ki waƞċagna ċeya iyaye na heye, “Haƞ! Wowicala bluha yelo. Eyaṡ iyenakeca ṡni. Omayakiye ki wowicala miċiwaṡʹakiƞ ktelo,” ekiye.
25Oyate ki lila el au ċa Jesus slolye, ċa waƞċak wak̇aƞ-ṡica ki wokiyake. “Wak̇aƞ-ṡica nuniḣcaƞ hwo?, takuni slolyaye ṡni, ċa hokṡila ki le etaƞ glinaṗa yo. Na icinupani hektakiya ake mahel iyaye ṡni yo,” ekiye.
26Ċa wak̇aƞ-ṡica ki ċeya iyaye, na ehake hokṡila ki lila ċaƞċaƞye na hehaƞl etaƞ glinaṗe. Hokṡila ki ṡkaƞṡkaƞ ṡni ḣpaya ċa tokinaṡ tʹa keċiƞpi, na oyate ki “tʹelo,” eyapi. 27Eyaṡ Jesus hokṡila ki isto el oyuspiƞ na yunajinkiye.
28Ohakab, ḣeyab iyayapi hehaƞ, ihakab-unpi ki Jesus le iyunġapelo, "Takuwe le wak̇an-ṡica ki kaḣeyab iyaya unkokihipi sni hwo?"
29"Wocekiye he ecela okihi yelo," Jesus awiċayupte; "takuni ṫokaƞl okihi sni."
Jesus Tʹin Kte He Ake Iwokiglake
(Matthew 17.22, 23; Luke 9.43b-45)
30Ho hehaƞl Jesus ihakab-unpi ki ob hetaƞhaƞ iyaye, na Galilee opta iyaye. Jesus tuktel yapi ki he tuweni slolyekiya ċiƞ ṡni. 31Iċiƞ Jesus ihakab-unpi ki wauƞspewiċakiye ki uƞ: “Ikċe-wiċaṡa ki wiċakʹu kte kihaƞ ktepi kte. Eyaṡ aƞpetu iciyamni ki kini kinajiƞ kte.”
32Eyaṡ Jesus wauƞspewiċakiye ki le okaḣniġapi ṡni na piya iyuƞġapi kte ki k̇okiṗapi.
Tuweca Ihankeya Ḣca Hwo?
(Matthew 18.1-5; Luke 9.46-48)
33Wana Capernaum el ihuƞnipi na tima iyayapi ċa Jesus ihakab-unpi ki iwiċayuƞġe, “Uƞkupi ki iċuƞhaƞ taku ayakinicapi hwo?"
34Eyaṡ ayupta ċiƞpi ṡni, iċiƞ upi kʹuƞ hehaƞ tuwa ihaƞkeya ḣca heċi he eċa akinicapi. 35Jesus iyotake na ihakab-unpi ki ake numpa hena iyuha wiċakiċo na hewiċakiye, “Tuwa ṫokaheya ċiƞ ki he ehakela eiċ'ignake ki he oyate ataya ilagyapi kte. 36Hehaƞl wak̇aƞyeja waƞ iċu na wiċiṫokab inajiƞkiye. Ṗaġopta oyuspe na hewiċakiye, 37“Tuwa wak̇aƞyeja waƞji maċaje ki ogna uƞ iċu ehaƞtaƞṡ he iƞṡeya ċaƞte waṡteya imacu welo. Nahaƞ tuwa heċuƞ ki he tuwa hiyumaye ki he iƞṡeya ċaƞte waṡteya iċu welo.”
Tuweċa Unkipajinpi Ṡni Ki Hena Ounkiyapelo
(Luke 9.49, 50)
38Ho ċa John Jesus hekiye, “Waunspekiya! Wiċaṡa waƞ niċaje uƞ wapiya ċa waƞuƞyaƞkapelo, wak̇aƞ-ṡica ṫaƞmahel uƞpi ki hena yuḣeyab iwiċakiċiċu welo,” ekiye. “Na he heċuƞ ṡni uƞṡipelo, iċiƞ le wiċaṡa ki le lel oṗa ṡni eyaṡ heċuƞ welo.”
39“Ayuṡtaƞkiyapi ṡni yo,” Jesus ewiċakiye, “iċiƞ tuweke eyaṡ miċaje uƞ waasniwiċaye ki he ohakab wak̇aƞ-ṡica imagnu kte ṡni yelo. 40Ċa tuwe uƞkipajiƞpi ṡni ki hena ouƞkiyapelo. 41Le oċiyakapi ktelo, tuwa miṫaƞtaƞhaƞ uƞ mni nicʹu ki he wowaṡte yuha ktelo.”
Wowaḣtani ki Iyutaƞyaƞ
(Matthew 18.6-9; Luke 17.1, 2)
42“Ogna tuweḣci wak̇aƞyeja ki le waƞji wiċamalapi ṡnikiyapi haƞtaƞṡ ee ṫahu ki hel iƞyaƞ ṫaƞka waƞji iyakaṡkapi na mni ekta iḣpeyapi kte ki he iyeċeċa kte. 43Ho ċa ninape uƞ wowicala yagnuni ehaƞtaƞṡ, niṫanape ki saƞni kaksa iḣpeya yo; iċiƞ nakuƞ nape ki waƞjila gluha wiċoni ki lel ilale ki waṡte ktelo, eyaṡ nape nuṗiƞ yagluha na ṗeta oihaƞke waƞilya ile ki heċiya nikte ki waṡte ṡni yelo. 45Na nakuƞ si uƞ wowicala yagnuni ehaƞtaƞṡ si ki uƞma kaksa iḣpeya yo!; si ki waƞjila luha eyaṡ wiċoni el taƞyaƞ yauƞ kte, na si ki nuṗiƞ yagluha eyaṡ ognaṡ ṗeta el iḣpeniyaƞpi ki ṡicaya kte. 47Nahaƞ iṡta uƞ wowicala yagnuni ehaƞtaƞṡ iṡta saƞni yuslog iḣpeya yo; maḣpiya wokiċuƞze ki heċiya iṡta saƞnila yai eyaṡ waṡte kte, na iṡta nuṗiƞ yagluha eyaṡ ṗeta waƞ oihaƞke waƞnilya ile ki heċi iḣpeniyaƞpi kte. 48Waglula oṫebwiċayapi ki tohaƞni tʹapi kte ṡni na ṗeta ki tohaƞni sni kte ṡni,'
49"Tuwe ki iyuha ṗeta na mniskuya uƞ wiċayuwaṡtepi kte.
50"Mniskuya ki wasteyelo; tka mniskuya ki skuya ṡni haƞtaṡ taku ikipikta hwo?
x "Mniskuya iyeċel kici'yuwaṡtepo."
Επιλέχθηκαν προς το παρόν:
Mark 9: LKTNT20
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© American Bible Society