MATIUS 1
1
Yesus Kristus arafas ow bajucucumiras
(Luk. 3:23-38)
1A atakam, Yesus Kristus arafasutmar juwas bajucucumiras ara. Aramat ipic Daud urpis arawen. Daudam Abraham urpis arawen.
2Bare, Abraham atiw Ishak arawen. Ishak atiw masirin, Yakub arawen. Yakub atiperes masirin, Yehudaam, arepcewesam, arewcewesam, arawen. 3Yehuda atiperes masirin, Peresam, Seraam, arawen. E ow arosowoc masirin, Tamar arawen. E Peres atiw masirin, Hesron arawen. 4Hesron atiw masirin, Ram arawen. Ram atiw masirin, Aminadab arawen. Aminadab atiw masirin, Nahason arawen. Nahason atiw masirin, Salmon arawen. 5Salmon atiw masirin, Boas arawen. E Boas arosowocam Rahab arawen. Boas atiw masirin, Obed arawen. E Obed arosowocam Rut arawen. Obed atiw masirin, Isai arawen. 6Isai atiw masirin, e raja ipic juwas Daud arawen. Daud atiw masirin, Salomo arawen. Salmon arosowoc masirin, e Uria bap atewetef cowoc arawen. 7E Salomo atiw masirin, Rehabeam arawen. Rehabeam atiw masirin, Abia arawen. Abia atiw masirin, Asa arawen. 8Asa atiw masirin, Yosafat arawen. Yosafat atiw masirin, Yoram arawen. Yoram atiw masirin, Usia arawen. 9Usia atiw masirin, Yotam arawen. Yotam atiw masirin, Ahas arawen. Ahas atiw masirin, Hiskia arawen. 10Hiskia atiw masirin, Manasye arawen. Manasye atiw masirin, Amon arawen. Amon atiw masirin, Yosia arawen. 11Yosia atiw masirin, Yekhonyaam, arewcewesam, arawen. Er, e Babel ow, e Israel ow, e Babel capinmi jiwis atuwumosomfes jofay arawen.
12Ar e ow jiwis atuwumosomfes masirin, Yekhonya, Sealtiel aricipic aememefen. Sealtiel atiw masirin, Serubabel arawen. 13Serubabel atiw masirin, Abihud arawen. Abihud atiw masirin, Elyakim arawen. Elyakim atiw masirin, Asor arawen. 14Asor atiw masirin, Sadok arawen. Sadok atiw masirin, Akhim arawen. 15Akhim atiw masirin, Eleasar arawen. Eleasar atiw masirin, Matan arawen. Matan atiw masirin, Yakub arawen. 16Yakub atiw masirin, Yusuf arawen. E Yusufam Maria armipic arawen. E Mariaam e Yesus ajispetiwefen. E Yesusam juwas Kristus arawen.
17Bare, e Abraham ajitemef, wunam e Daud ajitemef jofay ajiwar, aram owcamwey empat belas ajiwar arawen. Er masirin, e Daud ajitemef, wunam e Babel ow e Israel ow Babel capinmi jiwis atuwumosomfes jofay ajiwar, aram owcamwey empat belas ajiwar arawen. E masirin, e Babel ow, e Israel ow, Babel capinmi jiwis atuwumosomfes, wunam e Kristus ajisamesef jofay ajiwar, aram owcamwey empat belas ajiwar arawen.
Yesus Kristus ajisamesef
(Luk. 2:1-7)
18Bare, e Yesus Kristus ajisemesef atakam inim ara: Arosowoc Maria arawen. Bapnak ara, aramat cowoc jipic juwas Yusuf ower bajuwut aememefen. E nat, ar e ipic bajuwut opok ara, e Roh Kudus e Maria jak asumapomefen. Mariaam e ajak asuapef aporefen. 19E nat, e ajuwutcow ipic juwas Yusuf, jipic tarowat arawen. Ar e cowoc namke bakam pwicaken. Inimas ar e cowoc batewet opok, inim atakam curuw asakamtiwefen. 20Aramat ipic inim bi binip aceceremefen. Inim bi binip aceceremef masirin, isi atamwitefen. Isi atamwitef ara, aram Tuhan amalaikat bi aporefen. E malaikatam atakam Yusuf aotawefen. “Yusuf. Or Daud urpis ara. Or e Maria batewet omar arapok. E jak asuapmaras, bare Roh Kudus aemefas ara. 21Aramat cowoc jipic jiwi ajispetiwcema. E jiwi, e arow, e adosa ajortewcema. Inimas or e jiwi juwas Yesus aamcemem.” E malaikat inim aeefen.
22-23Ametnak ara, Tuhan, atakam e aratakam botaw ipic aotawefen. E ipic masirin, e atakam asmat ow aotawefen: “Cemen ban amsom opok cowoc jak asuapcema. Aram jipic jiwi ajispetiwcema. Ow, aramat ipic, juwas Imanuel aamcemes.” Inim aeefen. Inimas ara, ow eras takas e atakam jipu aemfesen. “Imanuel” daratakam juw buwumtew, “Allah dar akac ara.”
24Barewen. E Yusuf isi ajitefen. Isi ajitef masirin, ar e Tuhan amalaikat atakam jipu aemefen. Ar e Maria atewetefen. 25Aramat ipic nat, e arem, e jiwi ajispetiwef jofay ajiwar, cen ban opok cowok arawen. Bare, Yusuf e jiwi juwas Yesus aamefen.
Επιλέχθηκαν προς το παρόν:
MATIUS 1: LAICNS
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
LAI 1985