PILOTIMUA̒TA 4
4
Allahu Taa̒ala longohi mai olei Musa kawasa helohutu u moo̒linggolabe
1Lapatao̒ tei Musa lolametao̒ ode Eeya, “Bo woloolo mola wonu humaya tau-tauwalo Isirai̒lu diila mohuto palacaya wau diila mohuto momandungi loi̒ya lo watotia? Wolo u musi pohutuo lo watotia wonu humaya timongolio moloi̒ya mai deu̒ Eeya diila lopo bilohei lobatanga ode watotia?”
2 Eeya lohintu mao̒ odelei Musa, “Wolo to uluu̒mu boito?” tametao̒ lei Musa, “Tunggudu.”
3Tahuda mao̒ lo Eeya, “Pomahula mola uito ode huta.” Tei Musa malo pomahula mola, tulusi tunggudu boito lobolio̒ lowali tulidu wau tei Musa tilumetea̒ lopoo̒ lamingao̒. 4Eeya lotahuda odelei Musa, “Pohimbideo̒ ode tulidee boito wau dihuma mao̒ patahio.” Tei Musa malo himbideo̒ wau loheu̒upao̒ tulidee boito u hua̒a luli lobolio̒ lowali tunggudu todelomo uluu̒ lei Musa. 5Tahuda mao̒ lo Eeya, “Pohutua mao̒ odito alihu tau-tauwalo Isirai̒lu palacaya deu̒ Wau̒, Eeya, Allahu Taa̒ala nenemoya limongolio. Allahu Taa̒ala lei Abraham, Isihaka wolei Yako, malo pobilohei lobatanga to olemu.”
6 Eeya luli lotahuda odelei Musa, “Potuwota mao̒ uluu̒mu ode delomo boo̒mu.” Tei Musa lodudua̒ao̒, wau tou̒ tio lomantangai uluu̒lio ode bulemengio, uluu̒ boito malo putia̒ daa̒ sababu ilotuhata longongoto lo alipo u moo̒tihela hapato. 7Lapatao̒ Eeya lotahuda mao̒, “Muli potuwota mola uluu̒mu ode delomo boo̒mu.” Tei Musa lohutu mao̒ odito, wau tou̒ tio luli lopolualai, uluu̒ boito maloluli. 8Tahuda mao̒ lo Eeya, “Wonu timongolio diila mohuto palacaya olemu, meaalo diila yakini lapatao̒ loo̒onto mao̒ u moo̒linggolabe u bohulio, yi u moo̒linggolabe botie mamohutu mao̒ olimongolio palacaya. 9Wonu timongolio debo diipo olo mohuto palacaya to olemu eleponu maloo̒onto oluo lou̒ moo̒linggolabe botie, wau timongolio diila mohuto momandungi loi̒yamu, hamawa mao̒ taluhu ngoi̒di lonto dutulaa Nil wau huwata mola ode huta. Taluhu boito mamobolio̒ mowali duhu.”
10Bo tei Musa loloi̒ya, “Yaa, Eeya, watotia botie taa u diila motota mobisala, mopio omooo̒molu mai meaalo botia, lapatio mao̒ Eeya lotahuda mai ode watotia. Dila lowatotia mobuheeto, mobisala moboyu wau diila moolato.”
11 Eeya lotahuda mao̒ olio, “Tatoonu tamongohi mai tunggilo to manusia? Tatoonu tamohutu olio diila mowali mobisala wau talodu? Tatoonu tamohutu olio mowali moo̒onto meaalo pitoo̒? Diila bo Wau̒lo, Eeya? 12Botia, ponao̒lo, Wau̒ mamo tulungi mai olemu mobisala wau mongaajali wolo umusi bisalamu.”
13Bo tei Musa loloi̒ya, “Watotia momolohone, diila mao̒ polao olo watotia, yaa Eeya, ahuliilo mao̒ taa wewo.”
14Lapatao̒ Eeya malo muluka odelei Musa wau lotahuda mao̒, “Diila mayio̒ tao̒ wutata tai̒lunte Haruna? Otaawa-U̒ tio motota mobisala. Tutuulio mao̒ tutu, tio donggo tononao̒lio mai odia, wau tio masanangi modunggaya wolemu. 15Pobisalaalo wolio wau poo̒taa mao̒ olio wolo umusi loi̒yaalio. Wau̒ mamo tulungi mai olimongoli duulota wau mongaajali mai wolo umusi loi̒ya wau pohutuo limongoli. 16Tio musi mobisala to tanggulumu totalu ulipu. Tio mamowali tamoo-tohualea olemu wau yio̒ anggapuolio debo odelo Allahu Taa̒ala talo tahuda mao̒ wolo umusi loi̒yaalio. 17Delowalo mola tunggudu boito, yio̒ mamohutu mao̒ u moo̒linggolabe woleeto.”
Tei Musa luli lohualinga mola ode Masiri
18Lapatao̒ uito tei Musa lohualinga mota ode bele lei Yitro tipaapa moluhengio, wau loloi̒ya mao̒ olio, “Poluasia mai watia muli mohualinga ode Masiri mola momilohe mongo wutato lowatia wau momilohe wolo timongolio donggo hitumula.” Tei Yitro loloi̒ya mao̒ odelei Musa, “Ponao̒lo wolo moa̒ahu.”
19Tou̒ tei Musa donggo tohuta lo Midian, Eeya lotahuda mai to olio, “Pohualingolo mola ode Masiri. Ngoa̒amila taa ohilaa momate olemu mate-mateelo mao̒ mailate.” 20Yi tei Musa malo heinga dile wau mongo walai̒o wau lopotae̒ mao̒ olimongolio ode yitaato kolodai lapatao̒ lomonggato pee̒-pee̒enta woli mongolio ode Masiri. To palenta lo Allahu Taa̒ala, tei Musa malodelo olo tunggudu.
21 Eeya lotahuda mai odelei Musa, “Wau̒ malongohi mai kawasa to olemu u mohutu totoonulalo moo̒linggolabe. Oditolio de wonu yio̒ malo hualinga mola ode Masiri, pohutua mao̒ totoonulalo u moo̒linggolabe boito totalu li olongia lo Masiri. Bo Wau̒ mamohutu olio baa̒ngiyolo, tilinggula tio diila mohuto mongohi bangusa boito monao̒. 22Lapatao̒ polelea mao̒ odeli olongia boito deu̒ Wau̒, Eeya, lolahuli mai odie: ‘Isirai̒lu yito walau̒u-U̒ tamohuhula daa̒, 23wau yio̒ maa pilalenta-U̒ mai u mongohi mao̒ walau̒u-U̒ boito monao̒ alihu tio mowali moi̒baadati to ola-U̒, bo yio̒ diila mololimo. Botia Wau̒ mamomate walau̒mu tamohuhula daa̒ mate-mateelo mao̒.’ ”
24Totambati tuwau u hepo tikemaalo todelomo nonao̒ boito, Eeya lonao̒ mai odelei Musa wau ohilaa momate olio mate-mateelo mao̒. 25Ti Jipora, dilelio, lohama mao̒ botu molalito tuwau wau longoyodeo̒ singgolongo wuti lo walai̒o, lapatao̒ pilopo dedetio mao̒ to oa̒ato lei Musa. Uali Jipora, “Yio̒ dile duhu duo̒lou̒.” 26Sua̒li boito yiloi̒yaalio aa̒aita wolo upacala lotuuna. Yi Eeya didu lomata lomate olei Musa yila-yilateelo mao̒.
27Sambela uito Eeya malo tahuda odelei Haruna, “Ponao̒lo ode huta udatahu wau luasi udelita mola modunggaya wolei Musa.” Tei Haruna malonao̒, lapatao̒ lodunggaya wolo tawali-yaliilio tohui̒dee mantali, wau lodiilao̒ olio. 28Tei Musa helo hunggili mao̒ odelei Haruna ngoa̒amila u pilotahuda mai lo Eeya to olio tou̒ tio luli pilei̒ walinga-Lio mola ode Masiri, wau olo pasali lou̒ ngoa̒amila u moo̒linggolabe umusi pohutuolio. 29Lapatao̒ tei Musa wolei Haruna lonao̒ mola ode Masiri wau helo ngambu mao̒ ngoa̒amila tau̒wa lo Isirai̒lu. 30Tei Haruna lopo tunggulao̒ ode limongolio totoonulalo u pilotahuda mai lo Eeya odelei Musa, wau tei Musa helohutu mao̒ ngoa̒amila u moo̒linggolabe boito totalu lotau-tauwalo boito. 31Yi maa pilalacaya timongolio, wau tou̒ timongolio loo̒dungohe deu̒ Eeya malo poo̒tuotai bangusa lo Isirai̒lu wau maloo̒onto ngoa̒amila polodutoli mongolio, timongolio losujudu lolubo.
Επιλέχθηκαν προς το παρόν:
PILOTIMUA̒TA 4: LAIGOR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε