ILOOWALI 39
39
Tei Yusu wau dile lei Potipar
1Tei Yusu madilelo mola ode Masiri lotau-tauwalo lei Ismai̒lu boito, wau pilotali odelei Potipar, ngotaalio lo polowila li olongia tau̒wa lo tamoo-kawalia bele biluloa̒ saaha li olongia. 2Eeya helo tulungi mai olei Yusu tilinggula tio laito otilapulo todelomo ngoa̒amila kalajaalio. Tio lotibiluloa̒ tobele li tuanilio, taulo Masiri boito. 3Ti Tuanilio loo̒onto mao̒ deu̒ Eeya malo tulungi mai olei Yusu wau kalana uito tei Yusu otilapulo u mopiohe todelomo totoonulalo u kilalajaalio. 4Tei Potipar sanangi olei Yusu wau lomintaa̒a olio lowali tamoomayawa duo̒lo batangalio; lapatao̒ yilohialio tuugasi tei Yusu helo ngulusi ngaalaa̒lio wau ngoa̒amila hakuulio. 5Tumulalo mai tosaaa̒ti boito, domi olei Yusu, Eeya malo balakati mai dilea taulo Masiri boito wau totoonulalo wolo u mililikiilio, mopio u tobele meaalo u tohalabolu. 6Totoonulalo u hitua-tuawua u mililiki lei Potipar pilo malacayaalio mao̒ olei Yusu. Lou̒ odito tei Potipar sama-samaata diila mohuto motota mao̒ pasali ulusani lo dileaalio, ngopohia sua̒li lo ua̒alolio.
Tei Yusu gaaga boli molamahu. 7Tou̒ diila lohiheo mola, dile lei Potipar mailo bilahi to olei Yusu, lapatao̒ tabohulotau boito hileingio motuluhe pee̒-pee̒enta wolio. 8Tei Yusu diila lohutu wau loloi̒ya mao̒ olio, “Maa̒apu, Nyonya, tituani Potipar malo popalacaya mai to olaatia totoonulalo milikiilio. Tio diilalo palalu momikilangi wolo-wolo tobele botie. 9Tewe kawasa laatia tutuuwauwa udaa̒alio wolo kawasaalio. Diaaluo penu boli tuwau mao̒ u diila pilo malacayaalio mai to olaatia ngopohia li Nyonya. Diila pongalo aakali watia mohutu huhutu u moleeto boito wau mowali odusa to Allahu Taa̒ala?” 10Eleponu dile lei Potipar hemo malutao̒ olei Yusu timii̒du dulahu, tabohulotau boito debo diila mohuto motuluhe wolio.
11Todulahee tuwau tou̒ tei Yusu tilumuwotao̒ ode delomo bele u mohutu mao̒ kalajaalio, diaaluo penu boli ngota mao̒ teto. 12Dile lei Potipar lomantanga olei Yusu to jumbalio wau loloi̒ya mao̒, “Dulo ito motuluhe pee̒-pee̒enta.” Tei Yusu malo jangga-jangga wau loo̒huli, tulusi tio tilumeteo̒ ode bulemengio, bo jumbalio leitolaa to uluu̒ lotaabua boito. 13Tou̒ dile lei Potipar loo̒onto mao̒ deu̒ tei Yusu matilumeteo̒ wau jumbalio leitolaa, 14tio malo tiyangai tahipo mayaalio wau loloi̒ya mao̒, “Nte bilohi! Taulo Ibrani tadilelo mai lodile laatia ode bele botie malohina olanto. Tio tilumuwotao̒ ode delomo huwali lowatia wau mamo polokosa olaatia. Bo watia malo nguwatio̒ uda-udaa̒alo mao̒. 15Tou̒ loo̒dungohe wuwaatio̒ laatia, tio tilumetea̒ ode bulemengio wau jumbalio leitolaa.”
16Lapatao̒ dile lei Potipar malolahu mao̒ jumba boito tunggula dilelio lohualingai. 17Yinta leidungga mai dilelio, tio hua̒a losilita mao̒ sua̒li boito ode dilelio, ualio mao̒, “Taulo Ibrani tadilelomu mai boito, maa tilumuwota ode delomo huwali wau lohina olaatia. 18Bo tou̒ watia longuwatio̒, tio tilumeteo̒ ode bulemengio wau jumbalio leitolaa.”
19Tei Potipar maloingo daa̒. 20Wau tio hua̒a lei̒ wau̒upao̒ olei Yusu wau pilopo tuwotio ode delomo tutupa, tambati u hepo ngulungalo mongo olongia. 21Bo Eeya helo tulungi mai olei Yusu wau lomonu olio tulusi, tilinggula tau̒wa lotutupa aahudu olio. 22Tio malo popalacaya mao̒ tahi tahangia wewolio olei Yusu, wau tei Yusuulo tatihu-tihula tou̒ totoonulalo kalaja u pohutuolo todelomo tutupa boito. 23Tau̒wa lotutupa boito diilalo helo ngimato olio tou̒ ngoa̒amila upilo malacayaalio mao̒ to olei Yusu, sababu Eeya helo tulungi mai olio tilinggula tio ilotilapulo todelomo totoonulalo kalajaalio.
Επιλέχθηκαν προς το παρόν:
ILOOWALI 39: LAIGOR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε