ILOOWALI 43
43
Mongo mohuhula lei Yusu lomonggato ode Masiri pee̒-pee̒enta wolei Benyamin
1-2Polobiti to Kanaa̒n lebe mao̒ laba-labaalo, wau lapatao̒ ngaalaa̒ lei Yako malo poo̒pulito ngoa̒amila pale u dilelolio mai lonto Masiri, oditolio malo loi̒ya tei Yako ode mongo walai̒o, “Muli ponao̒po odito mola wau potali mai pale ode olanto.”
3Lapatao̒ tei Yehuda loloi̒ya mao̒ olio, “Ti gubolonulu lo Masiri malo poe̒elai tio̒otutua deu̒ amiaatia diila mowali mola motaalua wolio wonu amiaatia diila modelo mola tawaliyali daa̒ lamiaatia boito. 4Wonu ti Paapa mopoluasi mao̒ tawaliyali lamiaatia moduduo̒, amiaatia mohuto monao̒ odito mola motali mai ua̒alo. 5Bo wonu ti Paapa diila mopoluasi olei Benyamin moduduo̒, yi amiaatia diila mohuto monao̒, sababu ti Gubolonulu boito loloi̒ya mai deu̒ amiaatia diila mowali mota motaalua wonu tawaliyali daa̒ lamiaatia diila modudua̒i.”
6Ualei Yako, “Yilongola timongoli mopoo̒suusa olau̒ lou̒ lopoo̒taa mao̒ totau boito deu̒ timongoli donggo o wutato tawaliyali daa̒?”
7Tametao̒ limongolio, “Tau boito lololaalaaita helohintu pasali lamiaatia wau pasali lo ngaalaa̒nto, ualio mao̒, ‘Wolo donggo tumu-tumulo ti paapa limongoli? Wolo timongoli donggo owutato tawaliyali talolai̒ wewo?’ Amiaatia bolo pakusa lolametao̒ ngoa̒amila yiyintulio. Woloolo mola amiaatia moo̒ lantobe deu̒ tio mamopoa̒hu mai olamiaatia modelo mota tawaliyali daa̒ lamiaatia boito?”
8Lapatao̒ tei Yehuda malo loi̒ya mao̒ odeli paapalio, “Poluasiyalo mai walao̒ boito moduduo̒, wau de watiyalo tatihu-tihula to olio. Amiaatia mahua̒a momonggato alihu diaaluo penu boli ngotaa mao̒ tamonto olanto mate lo polobiti. 9Watiyalo tapongaku, wau ti Paapa mowali mohile wolo moo̒ohuu̒ tomimbihu olio to olaatia. Wonu tio diila pohualingai lowatia wolo moa̒ahu, watia tamomanta hukuumanilio ngotupa lo tutumulo lowatia. 10Humayaalio ito diila lohima odito hiheolio, tantu amiaatia botia mapoo̒oluo lohuualinga.”
11Lapatao̒ ti paapa limongolio loloi̒ya mao̒, “Wonu memangi musi odito, delowalo mola tilapulo ulaba-labaalo mopiohe monto lipu botie todelomo kadomu odelo palaseni odeli gubolonulu boito: hungo lo angguru mohengu udiila obotulio, hula lotiia̒, ramba-ramba, hungo lobintalo, wau hungo lobadam. 12Delowalo olo doi daatalio poo̒oluo piu̒wa, sababu doi umaa ilodungga todelomo kadomu boito musi pohualingao̒ limongoli. Otanu uito tuwaulio lototala. 13Delowalo mola tawali-yaliimu daa̒ boito, wau hua̒a pohualingai. 14Hinta Allahu Taa̒ala Taa Laba-labaalo kawasa mohutu mao̒ hilaa li gubolonulu boito molaasa motolia̒ngai olimongoli, tilinggula tio mohuto mopo walingai olei Benyamin wolei Simeon ode limongoli. Tomimbihu olau̒ botie, wonu wau̒ memangi musi oolia lomongo walau̒uu̒, bolo mao̒ pongola.”
15Lapatao̒ mongo wutatee Yusu malodelo mola palaseni boito wau doi poo̒oluo piu̒wa daatalio, lapatao̒ malo monggato ode Masiri pee̒-pee̒enta wolei Benyamin. Tou̒ malei dungga mola odito, timongolio lodunggaya wolei Yusu. 16Tou̒ tei Yusu loo̒onto mao̒ olei Benyamin wau mongo hulangio, malo loi̒ya tio to tamoomayawa olio taa tau̒tau̒wa to ngaalaa̒lio. “Delowalo mota tau-tauwala boito ode beleu̒. Timongolio mamo lamela pee̒-pee̒enta wolau̒ todulahee botie, sababu uito olotalo mao̒ binatangi bibiahe tuwau lapatao̒ podapato mao̒.” 17Tamoomayawa boito lopohutu mao̒ palenta boito wau malodelo mota mongo wutatee Yusu ode bele li gubolonulu.
18Tou̒ timongolio madilelolio mota ode delomo bele lei Yusu, timongolio mailoohe wau hemo mikilangi, “Ito dilelolio mai odia, sababu doi umaa ilodungganto todelomo kadonto tou̒ ito lonao̒ mai bohulio. Timongolio debolo mamoheu̒pa olanto, lapatao̒ mohama kolodainto wau mopowali olanto wato limongolio.” 19Sababu uito, totili lohuhebu bele lei Yusu, timongolio malo loi̒ya ode tau̒wa lou̒ ngaalaa̒, 20“Maa̒apu, Tuani amiaatia mapee̒enta lonao̒ mai lotali ua̒alo. 21-22To wuwalingaa mota lamiaatia, tou̒ amiaatia ohilaa motitihui, amiaatia lomuo̒ mao̒ kado lamiaatia. Diila ota-otaa mao̒ ngoa̒amila doi u pomayali pale lamiaatia woluo toitaato pale. Diila otaawa lamiaatia tatoonu tamalo potuotao̒ doi boito. Botia maluli dilelo mai lamiaatia odeli Tuani. Wewolio mao̒ amiaatia donggo helodelo mai doi olo muli motali ua̒alo.”
23Ualo tamoomayawa boito, “Diila oohe mao̒. Diila mao̒ polawalo, Allahu Taa̒ala Eeyamu, deu̒yito-yito Allahu Taa̒ala tahe pujaa li paapamu, Tiolo tahelo potuotao̒ doi boito ode delomo kadomu. Watia malo lolimo mao̒ doi halaga lopale u pilomayali mai limongoli boito.”
Lapatao̒ dilelolio mao̒ tei Simeon ode limongolio, 24tulusi dilepitio mota timongolio ode delomo bele. Tio longohi mao̒ olimongolio taluhu u pongulo oa̒ato, wau olo ua̒alo ode kolodai limongolio. 25Lapatao̒ uito timongolio lopohetu mao̒ palaseni u wohilio odelei Yusu de wonu tio monao̒ mai tou̒ ngoputu lodulahu, sababu timongolio mapilo leleyalio mao̒ deu̒ timongolio mamolamela pee̒-pee̒enta wolio. 26Tou̒ tei Yusu leidungga mai ode bele, timongolio malongohi mao̒ papaa-laseniyalo boito odelei Yusu wau losujudu to olio. 27Tei Yusu lohintu mao̒ sua̒li owowoluwoa limongolio, lapatao̒ loloi̒ya mao̒, “Timongoli malo hungguli mai to olau̒ pasali li paapamu u mapanggola boito. Woloolo mola owowoluwoalio? Wolo tio piopiohu?”
28Tametao̒ limongolio, “Wato li Tuani, ti paapa lo mongowatotia, mopiohe owowoluwoalio.” Lapatao̒ timongolio malo sujudulo mola to olio.
29Tou̒ tei Yusu loo̒onto mao̒ olei Benyamin, tawali-yalilio, malo loi̒ya tio, “Oditolio, wolo mau̒ti-utieelo tawali-yaliimu daa̒ boito, tahe o tanggulamu to olau̒? Pohileaala dua̒ Allahu Taa̒ala mobalakati mai olemu, walau̒uu̒.” 30Hilaa lei Yusu diilalo iloo̒tongalio sababu mooloolo wau motolia̒ngo to tawali-yaliilio. Wimbideo̒ diilalo o otongalio mao̒ batangalio, sababu uito debolo malonao̒lo tio lonteto tulusi tilumuwotao̒ ode huwaliilio wau hilumoyongo. 31Lapatao̒ uito tio malo limamuto, tulusi luli yilumualai, wau lou̒ hemo ngotonga hilaalio, lei̒hinta mai ua̒alo. 32Tei Yusu lolamela tomeja tuwau uwiwi-wiwi, wau mongo wutatio tomeja uwewo. Tau-tauwalo Masiri tawoluo teto lolamela tomeja uwewo poli, sababu timongolio molaasa hina wonu molamela pee̒-pee̒enta wolo taulo Ibrani. 33Mongo wutatee Yusu pilopo tambatilio mao̒ tomeja u tataalua wolio lodudua̒ toyunuto lo umululio ngota-ngota tumulalo mai monto tamohuhula daa̒ demola tawaliyali daa̒. Tou̒ timongolio loo̒onto mao̒ dudutu lo huhuloa̒a lo tangota-ngota boito, timongolio tinggai mabibiilohe wau hilinggolabe. 34Timongolio yilohiyalio ua̒alo lonto meja lei Yusu, wau tei Benyamin yilintalio poo̒olimo daatalio wolo mongo mohuhulalio. Tulusi malo lamela wau longilu timongolio pee̒-pee̒enta wolei Yusu tilinggula lotolu-toluulo mao̒.
Επιλέχθηκαν προς το παρόν:
ILOOWALI 43: LAIGOR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε