ILOOWALI 47
47
Tei Yako mola lotaalua woli olongia lo Masiri
1-2Lapatao̒ tei Yusu malodelo mao̒ mongo wutatio limolota tulusi mola lotaalua woli olongia. Ualio mao̒, “Ti paapa wau mongo wutato lowatia malonao̒ mai lonto Kanaa̒n wolo himbala batade wau himba, sapi wau totoonulalo miliki limongolio. Botia timongolio woluo tomadala Gosyen.” Lapatao̒ piloo̒taalio mao̒ mongo wutatio boito toli olongia. 3Ti olongia malohintu mao̒ olimongolio, “Wolo kalajamu?”
Timongolio lolametao̒, “Amiaatia botie diiti debo odelo loluuhuru lamiaatia. 4Amiaatia lonao̒ mai odia mai motibiluloa̒ tolipu botie, kalana tohuta lo Kanaa̒n ilodungga lo polibiti ulaba-labaalo, tilinggula diduluo mao̒ huo̒yota duo̒lo himbala batade wau himba lamiaatia. Poluasia mai amiaatia motibiluloa̒ tomadala Gosyen.” 5Lapatao̒ malo loi̒ya ti olongia odelei Yusu, “Botia ti paapamu wau mongo wutatumu mawoluo tewe. 6Anggapualo mao̒ lipu lo Masiri odelo lipumu lohihilao. Huliyalo mao̒ timongolio mamo titatapu tomadala Gosyen, madala u mopiohe daa̒ tolipu botie. Wau wohia mao̒ tuugasi to tamotota mokalaja u mongulusi bibiahumu.”
7Tei Yusu olo lopoo̒taa mao̒ oli paapalio toli olongia. Tei Yako lobalakati mao̒ oli olongia, 8wau ti olongia lohintu mao̒ olio. “Ngoolo mao̒ umulu li Paa̒a?”
9Tametao̒ lei Yako, “Watotia matilu-mumulo ngohetuto tolo pulu lotaunu odelo taa lonao̒ deu̒ toonulalo mao̒ lou̒ diila opatuju. Tutumulo lowatotia boito polupolu lou̒ suukali wau limbu-limbu wonu pobandingio mola wolo umulu loluuhuru lowatotia odelo taa lonao̒ deu̒ toonulalo mao̒ lou̒ diila opatuju.” 10Lapatao̒ uito tei Yako lohintu mohualinga wau longohi mao̒ balakati u mobuua̒ya. 11Tei Yusu helomantu oli paapalio wau mongo wutatio lotitatapu to Masiri. Yilohilio ode limongolio huta odelo miliki limongolio to wimbihu u mopiohe daa̒ tolipu boito, totili lokota Rameses, tutuuu̒de wolo palenta li olongia. 12Wau tei Yusu lopo wimumutao̒ polo dapato ua̒alo odeli paapalio, mongo wutatio, wau ngoa̒amila mongo ilaatolio, demola tamuuda daa̒.
Sembo lo polobiti
13Polobiti boito malo laba-labaalo, tilinggula tou̒ toonulalo mao̒ diduuluo ua̒alo. Ulipu lo Masiri wau ulipu lo Kanaa̒n molulupuhu wau diilalo o lotolo kalana hipolaanga. 14Timii̒du timongolio motali pale, tei Yusu helo himoa̒ao̒ doi pomayali pale boito, tulusi tilahulio mao̒ to bele biluloa̒ saaha li olongia li olongia. 15Lapatao̒ malo pulito doi to Masiri wau to Kanaa̒n tau-tauwalo Masiri helonao̒ mai odelei Yusu wau loloi̒ya mao̒, “Wohia mai amiaatia ua̒alo! Diila mao̒ polulia amiaatia mate. Doi lamiaatia malo pulito.”
16Tametao̒ lei Yusu, “Wonu doimu malo pulito, wohia mai bibiahumu; wau̒ mamongohi mai ua̒alo olemu.” 17Lapatao̒ timongolio longohi mao̒ bibiahi mongolio odelei Yusu, wau tio helongohi ua̒alo ode limongolio odelo tuloo̒ wadala, himba, batade, sapi wau kolodai limongolio. Totaunu boito tei Yusu longohi mao̒ ua̒alo ode limongolio wau timongolio helo mayali wolo bibiahu.
18Totaunu wumbutio mola timongolio luli lonao̒ mai ode olio wau loloi̒ya, “Amiaatia wolo juujuru toli Tuani deu̒ doi lamiaatia malo pulito wau bibiahu lamiaatia malowali miliki li Tuani. Amiaatia madidu owolo-wolo u mowali wohi mai lamiaatia odeli Tuani, ngopohia batanga lamiaatia lohihilao wau huta lamiaatia. 19Diila mao̒ polulia amiaatia mate! Diila mao̒ polulia halabolu lamiaatia mowali delita. Wohiyalo mai amiaatia wau huta lamiaatia wolo pale odelo bayaliilio. Amiaatia wau huta lamiaatia mamowali haku li olongia. Wohiyalo mai amiaatia pale u pohumbuta tutumulo lamiaatia wau olo bili u pomua̒yade to halabolu lamiaatia!”
20Lapatao̒ tei Yusu malotali ngoa̒amila huta to Masiri uwoli olongia. Timii̒du taulo Masiri helo makusa lopotali mao̒ hutalio, sababu sembo lo polobiti boito malo laba-labaalo; lapatao̒ ngoa̒amila huta to Masiri lowali haku li olongia. 21Ngoilanggubu ulipu lo Masiri pilopo waliilio wato lei Yusu. 22Tuwa-tuwaulo huta u diila tilaliilio yito huta lomongo iimamu. Timongolio diila palalu mopotali lohuta limongolio kalana yilohialio tulahe tatapu li olongia duo̒lo kaparluani tutumuli mongolio. 23Tei Yusu loloi̒ya mao̒ ode ulipu boito, “Bilohilo, timongoli wau huta limongoli matilaliu̒ duo̒li olongia. Uti-utieelo bili u mowali pomua̒yadi mongoli to halabolumu. 24Tou̒ pongotola, timongoli musi mongohi mao̒ ngotayade limo tilapulio odeli olongia. U lebelio mowali pomake limongolio duo̒lo bili wau duo̒lo ua̒alo olemu wau duo̒lo ngaalaa̒mu.”
25Tametao̒ limongolio, “Ti Tuani malo posalaamati mao̒ olamiaatia wau amiaatia mosukuru mai. Amiaatia iloheela lohilao mowali wato li olongia.” 26Lapatao̒ tei Yusu lopowali mao̒ uito lowali wuu̒du tolipu lo Masiri, deu̒yito-yito deu̒ ngotayade limo lonto tilapulo lo pongotola musi mowali haku li olongia. Dilumutu botia wuu̒du boito donggo pohu-pohutu. Bo huta lomongo iimamu u diila lowali haku li olongia.
Hihiile lei Yako u pulitio
27Odi-odieelo mola tau-tauwalo Isirai̒lu helo titatapu to Masiri, tomadala Gosyen. Timongolio lowali kaya wau ilowalao̒ wau ilowombu mola u dadaata mota teto. 28Tei Yako donggo tilimumula mola mopulaa pitu lotaunu to Masiri dilumutu umululio loo̒oma ngohetuto wopato pulaa pitu lotaunu. 29Tou̒ tio mame bideo̒ mate, tiliangio mai tei Yusu, walai̒o boito, lapatao̒ tio loloi̒ya mao̒ to olio, “Podutua mai uluu̒mu towolota lo bungolopau̒ wau motadia mola deu̒ yio̒ diila tamo lobunga olau̒ to Masiri botie. 30Wau̒ motohilaa lobungola totambati mongo loluuhuruu̒; delowa mola milateu̒ monto lipu botie wau lobunga mao̒ todelomo kuubulu limongolio.”
Lapatao̒ ualei Yusu, “Watia mamo pohutu mao̒ wolo u yiloi̒ya li paapa boito.”
31Ualei Yako, “Potadiyalo deu̒ yio̒ mamo pohutu mao̒ uito.” Tei Yusu malo tadia, wau tei Yako lolapali mola syukuru to potuluhelio.
Επιλέχθηκαν προς το παρόν:
ILOOWALI 47: LAIGOR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε