Luka 22
22
Okorua kw’obong’ainereria kwa Yudasi
(Mat 26:1-5,14-16; Mar 14:1-2,10-11)
1 #
Okong’ 12:1-27
Rituko Rinene ri’Emegati etabekiri memera, rikorokwa Epasaka, rigaika. 2Abakuani abanene na aborokia b’amariiko bakarigia enchera y’okomoita, ekiagera nigo bairogete abanto.
3Saitani agasoa Yudasi okorokwa Iskariota. Yudasi nigo arenge oyomo bwa baria ikomi na babere. 4Akagenda agakwana nabakuani abanene na abatang’ani b’abarendi buna aranyare komobeeka ase amaboko abo. 5Bakagoka bakabwatana nere komoa chiropia. 6Agancha, akarigia ribaga akomoruera ase bare emeganda etaiyo.
Okwearigania kw’Endagera y’omoerio
(Mat 26:17-19; Mar 14:12-16)
7Rituko ri’Emegati etabekiri memera rigaika, eri’emanwa y’eng’ondi y’Epasaka egwenerete konyenywa. 8Erio Yeso agatoma Petero na Yohana, akabora, “Genda motoroiserie Epasaka, erinde toyerie.”
9Bakamobooria, “Ng’ai origetie toyeroiserie?”
10Akabateebia, “Rora, ekero mwasoire omochie, namoumerane nomosaacha obogoretie enyongo ere namaache; momotunyane goika enyomba agosoa, 11moteebie omonyene enyomba: Omworokia nkoboria are: Ng’ai enyomba y’abageni ere, inyare koriera Epasaka amo naborokigwa baane? 12Omonto oria naboorokie akanyomba akanene ka irongo karoisirie; agwo moariganie.”
13Bakagenda, bakanyora buna abateebetie, bakaarigania Epasaka.
14Erio ensa egachia goika ang’e, agaikaransa amo nabatomwa. 15Akabateebia, “Ninganetie mono koria Epasaka eye amo nainwe ritang’ani ntarachaandwa, 16ekiagera nabateebirie, tinkoyeria naende goika yaikeranigwe ase oborwoti bwa Nyasae.”
Endagera y’omoerio
(Mat 26:20-30; Mar 14:22-26; 1 Abakr 11:23-25)
17Akabogoria egekombe, na ekero airaneirie ng’a mbuya mono, akabora, “Bogoria eke, mosaange inwe ase inwe; 18naki nabateebirie, korwa bono tinkonywa okwama kw’omosabibu goika oborwoti bwa Nyasae boche.”
19Akabogoria omogati, na ekero airaneirie ng’a mbuya mono, akayosamunyora, akabaa, akabora, “Oyo nomobere one orurwe ase engencho yaino. [Kora iga ase okong’inyora.” 20#Yer 31:31-34Naboigo akabogoria egekombe magega ase okoria, akabora, “Egekombe eke nokobwatana okoyia ase amanyinga aane, aitekire ase engencho yaino.] 21#Zab 41:9Korende rigereria, okoboko kwaye ere oyokondua nigo kore amo nainche ase emesa. 22Ekiagera Omwana‐o‐Mwanyabaanto nkogenda are buna yachiigetwe; korende obobe nobwaye omonto oria okomorua!”
23Na barabwo bagachaaka koborania barabwo ase barabwo, gose ning’o ase bare orakore ring’ana eri.
Obonene bw’ekeene
24 #
Mat 18:1; Mar 9:34; Luk 9:46 Gokaba okoamererania ase egati yabo, gose ning’o ase bare obarirwe koba omonene kobua abande. 25Yeso akabateebia, “Abarwoti b’abaanto b’ebisaku nigo bakogambera abanto; naende abare nokobua igoro ase bare barokwa Abakori Abaya. 26#Mat 23:11; Mar 9:35#Mat 20:25-27; Mar 10:42-44Korende ase more inwe taibo, otatiga oyore omonene oino nabe buna oyore omoke; na ere oyokobatang’ana nabe buna omokoreri abande. 27#Yoh 13:12-15Inee! Ning’o ore omonene, noyoikaransete ase endagera, gose noyogokorera? Tari ere oyogoikaransa ase endagera? Korende inche nigo inde ase egati yaino buna omokoreri.
28“Inwe ninwe mwabeire mogendererete amo nainche ase ogoteemwa kwane, 29na inche nabaeire inwe oborwoti buna Tata ang’ete, 30#Mat 19:28monyaare koria na konywa ase emesa yane ase oborwoti bwane, na goikaransa ase ebirogo bi’obonene, na kogambia abanto b’ebisaku ikomi na bibere bi’Abaisraeli.”
Ogokana gwa Petero gokobanwa
(Mat 26:31-35; Mar 14:27-31; Yoh 13:36-38)
31Akabora, “Simioni, Simioni, rora Saitani nabarigetie abaire anyaare kobasoonga buna engano, 32korende nagosabeire, erinde okwegena kwao tikoera, na aye gokwaonchokire, obeeke abamiino chinguru.”
33Akamoteebia, “Omonene nigo inde ang’e kogenda amo naye echela, nonya nase ogokwa.”
34Akabora, “Nagotebirie Petero, reero etuoni etarabuga nonkane ara gatato ng’a tomanyeti.”
35 #
Mat 10:9,10; Mar 6:8,9; Luk 9:3; 10:4 Akababoria, “Inee! Ekero nabatomete motari nebimoya, ne chisaaro, na ebikoroto, imwaremeretwe na gento?” Bakamoiraneria, “Yaya”. 36Akabateebia, “Korende bono oyore nekemoya akebogorie, na esaro boigo, na ere oyotari nomoyio o birende aoonie eganchwa yaye, agore oyomo. 37#Isaya 53:12Naki nabateebirie, eriarigetwe ndigwenerete goikeranigwa ase ’nde. Ere nigo abareranetigwe amo nabasaria, ekiagera ayarigetwe igoro ase ’nde aikeranigwe.”
38Bagateeba, “Omonene, rora ntore nemeyio ya birende ebere aa.” Akabateebia, “Nabo aisanire.”
Yeso ore Gethisemane
(Mat 26:36-46; Mar 14:32-42)
39Agasooka, akagenda goika egetunwa ki’Emezeituni, buna engencho yaye yarenge, na aborokigwa baye bakamotunyana. 40Agachia goika aase aria akabateebia, “Saba, erinde timosoa ase ogoteemwa.”
41Ageatanana korwa ase bare, ekerengo gi’okoruta rigena, akabeeka amaru inse, agasaba, 42ogoteeba, “Tata, koranche, onduserie egekombe eke,#22:42 Rora Mat 26–42 korende tari buna ndigetie inche, korende buna origetie aye, bikoreke.” 43Omomalaika akamoorokera korwa, igoro, akamobeka chinguru. 44Na ere ekiagera arenge nomoichano mono, akamenta ogosaba nomokia; ebigeri biaye bikaba buna amatoima y’amanyinga agoiteka inse. 45Agachia koimoka korwa ase ogosaba agachiera aborokigwa baye, akabanyora bararire ase ogoichana. 46Akabateebia, “Inaki mwararire? Boka, mosabe, erinde timosoa ase ogoteemwa.”
Okobwatwa kwa Yeso
(Mat 26:47-56; Mar 14:43-50; Yoh 18:2-11)
47Ekero arenge gokwana, rora, omoganda ogaacha, na oria okorokwa Yudasi, oyomo bwa baria ikomi na babere, obatang’aine. Ere akamoika Yeso ang’e komonyunyunta. 48Yeso akamoteebia, “Yudasi, nkomorua ore Omwana‐o‐Mwanyabaanto ase okomonyunyunta?”
49Na abwo barenge amo nere bagachia korora ayakorigia koba, bakaboora, “Omonene, inatorwane nomoyio o birende?” 50Oyomo obo agaaka omosomba bw’Omokuani omonene, akamobutora ogoto gw’okorio.
51Yeso akabora, “Tiga tokora igo.” Akamokuna ogoto, akamogwenia. 52Yeso agateebia abakuani abanene, na abanene b’abarendi be Hekalu, na abagaaka, baria bamoocherete, “Iga mwachire nemeyio ya birende ne chinungu buna mogochiera omouri. 53#Luk 19:47; 21:37Ekero narenge amo nainwe ase Hekalu kera rituko timwaramborete amaboko mombwate, korende bono ensa eye neyaino, ekero omosunte okogamba.”
Petero okomokana Yeso
(Mat 26:57-58,69-75; Mar 14:53-54,66-72; Yoh 18:12-18,25-27)
54Bakamobwata, bakamoira, bakagenda nere nyomba ime ase Omokuani omonene. Na Petero akamotunyana korwa magega ore egeka. 55Bagachia gouta omorero egati y’egoora, bagaikaransa amo, na Petero agaikaransa ase egati yabo. 56Erio omoiseke oyomo akamorora oikaransete ang’e nomorero, akamobeta amaiso akabora, “Oyo nere igo arenge amo nere.”
57Agakana, akabora, “Omokungu, timomanyeti.”
58Naende ake omonto onde akamorora, akabora, “Aye noyomo obo ore.”
Petero akabora, “Omonto oyo, tai inche.”
59Na magega y’ensa eyemo, omonto onde akabetereria mono, akabora, “Ekeene, oyo nigo arenge amo nere, ekiagera nere n’Omogalili.”
60Petero akabora, “Omonto oyo, timanyeti eri ogokwana.”
Erio kegima kagokwana, etuoni ekabuga. 61Omonene akeonchora, akarigereria Petero. Petero akainyora ring’ana ri’Omonene, buna amoteebetie, “Reero, ritang’ani etuoni etarabuga nonkaane ara gatato.” 62Agasoka isiko, akarera nobororo.
Yeso ogosekererigwa na goakwa
(Mat 26:67-68; Mar 14:65)
63Abanto baria babwatete Yeso, bakamosekereria, na komoaka. 64Bakamotuba amaiso, bakamobooria, “Bana! Ning’o ogoaka?” 65Bakamokwana bobe amang’ana ande amange ay’okomorama.
Yeso ase obosio bw’abakuani abanene
(Mat 26:59-66; Mar 14:55-64; Yoh 18:19-24)
66Ekero bwachia gokia, abagaaka b’abaanto, na abakuani abanene, na aborokia b’amariiko bagasangererekana amo, bakamorenta ase ekegambero kiabo, bakoboora, 67“Onye aye naye Kristo, toteebie.”
Korende akabateebia, “Ninsa kobateebia, timokonyaara gwancha; 68naende nimbaboria, timokong’iraneria. 69Korende korwa bono Omwana‐o‐Mwanyabaanto naikaranse ensemo y’okoboko gw’okorio kw’obonene bwa Nyasae.”
70Bakaboora bonsi, “Aye naye Omwana o Nyasae.”
Akabateebia, “Inwe mwateebire ng’a ninche ere.”
71Bakaboora, “Mborori ki torigetie goetania obo? Naki intwe abanyene twaigure amang’ana korwa ase omonwa oye.”
Επιλέχθηκαν προς το παρόν:
Luka 22: EKGE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
©Bible Society of Kenya, 2021