Matayo 5
5
1Ili Yesu andelolya syamu ya vandu, karwa uron Ili andemaa ikaa rembo, vanalosho vamwi vakanserikya kufui. 2Kataṛambua kana kamwi kavalosha eereraa: 3Vva ngoma valya vakee vakiva ngooń, amu wwo umangi lwa iṛuvewu luvaa lwawo. 4Ngoma valya vawore unaari, amu wwo vakaa vawiiṛyo muu. 5Ngoma valya vawore utele, amu wwo vakaa varwaa dińu ya isanga. 6Ngoma valya vaworwa nsoto na nyura ya usumani, amu wwo vakaa vawuuruswa. 7Ngoma valya vawore ililya, amu wwo vakaa valilyo. 8Ngoma valya vakee va ngoo sheelwa, amu wwo vakaa vandelolya Iṛuva. 9Ngoma valya vakundye unambwe, amu wwo vakaa vandevaangwa vana va Iṛuva. 10Ngoma valya vatuṛulwaa kiimba kya usumani, amu wwo umangi lwa Iṛuva luvaa lwawo. 11Ngoma ini mukee irumwa vvandu na yumbutwa na ifingyo firero fikasha foose kya wongo kiimba kyakwa. 12Fureń kyeseń! Amu maṛe anu mmeengi iṛuvewu. Mfo kuro vaumbuta na vaauya fisuku valya veemwiryee mbele.
13Ini mukee munyu wa isanga li. Kake munyu ukavva kyoongyo ushiiswaa neeki ulore? Ukivaa kutu ndi kita ikumbwa na ivario̱vario̱ vvandu. 14Ini mukee langa ya isanga li. Muṛi wa vandu ukee uroń uvaa ifisa ndi. 15Nta eefo nndu aataa taa na iifunikya mengetoń ndi. Kake eevanikaa kivanikoń, nayo imulikye woose vakee numba. 16Mfo kuro neeni veń vandu vamulikyaa vengi, amu valolie mitanye yanu misha, vautye-wo ińinisa Nde yanu wa iṛuvewu.
17Manya mutakusaṛe sheeli nansha, amu nrete mavavaso na firero fa vaauya fisuku, wode, nansha ireta ndi, kake nansha yawutya. 18Nkue namuia kikee kya dede: Iṛuvewu na isanga fisyaa, kake iifo nta mitisine itisiṛie mavavasoń irekaa ndi, kumande foose faawukyaa. 19Kyasiań nndu akaṛyaa aanguse ivavaso limwi ifo mavavasoń na akwaa nkirere kimwi tubu kitisiṛie-fo na ilosha vandu kuro, ito aaṛulwaa munnya kita vengi ifo umangiń lwa iṛuvewu. Kake nndu aindyaa mavavaso va na ilosha vandu kisumani, ito aaṛulwaa nnini ifo umangiń lwa iṛuvewu. 20Namuia: Usumani lwanu lutankilyakilya usumani lwa vaaṛia va mitisine na lwa Vafarisayo, mufikaa umangiń lwa Iṛuva kutu ndi.
21Mwamiita kilya vakuuku va mbele vaio̱: Manya kutawaa vandu! Na ulya awaa nndu ungi aumisyoo. 22Kake niń namuia: Ulya woose anaa na nndu ungi kya ruu, aumisyo̱o̱. Na ulya arumaa nndu ungi kya ruu, arawaa kikweniń kya masiingo. Na ulya aiaa nndu ungi kya ruu: Kusule Iṛuva, arawaa muroń utakisyaa. 23Kiimba kya iki kwakooya kwannde nsimbika wafo andu a irasya Iṛuva na lia eni kwakumbuya-fo sheeli nndu ungi awore shuu nawe, 24tia nsimbika wafo kitaare kwaniingya, kwende mbele mundekwitanisa na nndu ulya. Na numa kusheń iniingya Iṛuva nsimbika wafo. 25Mukwitanise ree na nndu ulya awore mwaandu nawe, ili mukikee shień ya yenda kikweniń. Amu nndu ulya atakufite kwa mangi, na mangi atakurambikye nseṛo wamwi, nawe kurawaa kifingyoń. 26Nakwia kya dede: Kuukaa-fo ndi kumande kumaa itaa foose kutu.
27Mwamiita sheeli vakuuku vaio̱: Manya kutaaike! 28Kake niń namuia: Ulya woose allaa nka wa nndu ungi kwa illanga, ammaa yaaika nae ifo nrimiń wamwi. 29Na kwakooya iriso lyafo lya uko usha likwendye nsindaṛa, liiṛue kwalikumba neefo likuuke. Amu llyo ńwana kyeenga kyafo kimwi kireke kita ili vvili wafo woose weeṛwaa muroń utarunyikaa. 30Na kwakooya uko lwafo usha lu-kwendye nsindaṛa, luminye kwalukumba neefo lukuuke. Amu llyo ńwana kyeenga kimwi kireke kita ili vvili wafo woose weeṛwaa muroń utarunyikaa. 31Nkirere lingi: Nndu kalakana na nka wamwi, kyawara anniinge barua ya llakanu. 32Kake niń namuia: Ulya woose alakanaa na nka wamwi kitaare nkwa mboni ya waaisi amwaṛua kava mwaaisi. Na nndu kaora nka ulya andetio ni mmi amaaika. 33Na lingi mwamiita sheeli vakuuku vaio̱: Manya kutalye ikite lya wongo! 34Kake kwawutye Iṛuva filya foose kwammurekya. Kake niń namuia: Manya mutalye ikite kutu, nta na iṛuvewu, amu llyo kifumbi kya Iṛuva. 35Nta mutalye ikite na isanga, amu llyo Iṛuva aekeṛye marende amwi. Nta mutalye ikite na Yerusalemu, amu nto muṛi wa mangi nini. 36Nta kutalye ikite kwinumbuaa: Nkue na nrwe wakwa! Amu kumakii yaṛua ifuli limwi lya nrwe wafo live yeelwa ana live yuu ndi. 37Mukanumbua: Ee, kive dede. Mukanumbua: wode, kive kya dede. Amu kilanya ya ifo fikee yuka kwa Nkasha.
38Mwamiita sheeli kyarerwa: Iriso litawaa ni iriso na iyoo litawaa ni iyoo. 39Kake niń namuia: Manya mutakutimbiṛite na ukasha. Kake nndu kakukaba ui lwa usaa lu usha mwaṛuye na ilo lungi alukabe. 40Na nndu kakuvaanga akusoke nseto wafo wa irimbika, nreye na wa yeeṛya. 41Na nndu kakukabiṛya yenda nae kyenga kya saa, kyasia enda nae saa yoose. 42Nndu kakwomba kindo nniinge. Na nndu kasha ikwakua manya kutankabe mungo.
43Mwamiita sheeli kyarerwa: Kunda ndoo yafo na kituva kyafo kukisue! 44Kake niń namuia: Kundeń fituva fanu, niingeń valya vakee imuumbuta mboṛa. 45Tanyeń valya vamusule finuru, terevyeń valya vakee imukura nkuru na imuumbuta. Amu mulolyo sheeli mukee vana va Nde yanu wa iṛuvewu. Fulya yye akee irosa saa yamwi ikavaya vakasha na vanuru. Kannde fua yamwi ikakaba kwa iwo va usumani na kwa iwo vabiṛa. 46A kwakooya mwakunda iwo vamukundye ini, ni isekye lingali mukooyaa? A vasańiṛya kyaalo nkuro vatanaa da ndi? 47Na kwakooya mukee iisana ndoo tanu tubu, a kindo mwatana kya mmwasi nkyo ki? 48Kyasia ini veń vandu vasongovye, sheeli Nde yanu wa iṛuvewu asongovye.
Επιλέχθηκαν προς το παρόν:
Matayo 5: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.