G%E9nesis 18
18
I Dios kusujuj jun rak'al mam Abraham
1I Ajwal xuk'ut chik rib' che mam Abraham, are kul xol uchija re umujb'al chi o naqaj che i nimaq taq che' chi re Mamre, ile laj ktik'i i ij are xuk'ulmaj. 2I mam Abraham le are kul xol uchija re umujb'al xaqte'et xeril oxib' achiyab' je tak'al pan chwach. Are uri x-e la pa'anem, chuya'ik rutzil kiwach, xaq lik xxuki chkiwach xuqajsaj upalaj k'a chwach ulew, 3are uri xub'ij che:
—Nim laj Ajwal, we o rutzil ak'ux chwe, kintz'onoj utzil uri chawe chi matik'aw suk'ulik. 4We kuk'ulaj awach, kintaq ni uk'amik jub'i' ya kich'ajb'ej re iwaqan, te'uri kixuxlan jub'i' chi muj re i che' le, 5man kitij nu b'i iwa, te'uri kimaj chub'i ib'e, man xixik'aw tan waral ru' imokomi. Ike xkib'ij:
—Utzi', cha'ana pacha i xab'ij le —xecha che mam Abraham.
6Are uri mam Abraham juntir x-e la ru' ja ipa o wi tit Sara, xaq xub'ij che:
—Chab'isoj, chayijb'a kawinaq ral taq k'ox rutzil arin re trigo, cha'ana or che, te'uri cha'an la lejom wa che —xcha.
7I mam Abraham le pa'anem x-e la chik ku' i chikop, xu'ul li jun ral me' chi lik ti'oj, xuya la che utaqon; i taqon le juntir xuyijb'ala. 8I mam Abraham le xaq xuk'am b'i mantekil, leche xaq i ti'ij re i me' chi xuyijb'a i taqon, xuya chke achiyab' re kkitijo. Tz'aqat are ketijin achiyab' le che i wa'im, i mam Abraham tak'al ku' chila chi muj re i che'.
9Are xkimayij wa'im xkitz'onoj che mam Abraham:
—¿Ipa o wi tit Sara chi awixoqil?
Ire xub'ij:
—O pa ja.
10Are uri i ángel xub'ij che:
—Kink'un tan chik chasolixik junab', are uri awixoqil tit Sara kalax ni rak'al —xcha. I tit Sara ktijin chutayik i tzij le chrij uchija re kimujb'al. 11I mam Abraham xaq i tit Sara le lik je rij chik, je nimaq taq winaq chik, i tit Sara umayim chik rilik rik'il, 12rumali xtzen puk'ux, xaq xuch'ob'o: “Lik utz teri wetene k'a kalax jun wak'al; xwiri lik in rij chik, xaq keje i wachijil lik nim laj winaq chik.” Xcha. 13Xwiri i Ajwal xub'ij che mam Abraham:
—¿B'uchak ktzen tit Sara? ¿Kukoj ti b'ari chi lik kalax ni jun rak'al tupu rij chik? 14Xatab'a o jun b'iroxik chi ktiki ti Ajwal chu'anik? Che i junab' jun chi kk'unik kink'un chik chasolixik che taq i ij pacha i ij chi oj o wi wo'or, are uri che taq i ij le, i tit Sara kalax ni jun rak'al —xcha.
15I tit Sara are xuta wach xb'ixik, xuxij rib', rumali xruwaj uwach chi xtzenik, xub'ij:
—Xintzen taj —xcha.
Xwiri i Ajwal xub'ij che:
—Qatzij ti xab'ij le man yet lik xattzenik —xcha che.
Mam Abraham klapan ru' Dios pkiwi i aj Sodoma
16Te'uri i achiyab' le, xewalijik xkimaj b'i kib'e pa tinimit Sodoma xaq i mam Abraham xerachnimaj b'ik, ijlab'al b'i ke. 17Are uri i Ajwal xuch'ob'o: “¿Rajwaxik kinb'ij che mam Abraham wach i kinch'ob' u'anik? 18Man saq laj tzij lik kin-an ni jun nim laj tinimit chke umuq uxikin, xaq lik o ni ki'ij; man rumal i mam Abraham le kya' ni utzil chomal pkiwi konojel i tinimit chwach i jyub' ta'aj. 19Yin xin-ul ire le, man keunawsaj i rak'al xaq i ralk'uwal; man keje ile lik kko'taj ti inb'e Yin chi in Ajwal; kki'an i utz xaq i suk'ulik. We kki'an ile i Ajwal ku'an ni uri ronojel pacha usujum chke.” 20Are uri i Ajwal xub'ij che mam Abraham:
—I ukojik kimak aj Sodoma xaq i aj Gomorra lik kch'ijaw ti chik, xaq i kimak lik nti chik roqxik, 21rumali kinqaj nu b'i chrilik, kwilb'ej re we lik qatzij ketijin chu'anik pacha b'ital chwe; o we qatzij taj, lik kwetamaj ni uri —xcha.
22Te'uri i achiyab' le xkimaj b'i kib'e, xe'e pa Sodoma; xwiri mam Abraham k'a xtak'i kan chwach i Ajwal. 23Are uri i mam Abraham le xtejeb' pan chwach i Ajwal xub'ij che:
—¿Kachup nawi kiwach i utz laj taq winaq junam ku' i utz ti laj taq winaq? 24Moqxa je o lajuj kawinaq (50) utz chkixol konojel i winaq pa tinimit, ¿Kachup nawi uri kiwach, lik kakuy ti nawi uri kimak konojel i winaq le, rumal k'axnab'al ke i lajuj kawinaq (50) utz je o chila? 25Kmajaw taj chi kakamsaj i utz laj winaq junam ru' i utz ti laj winaq; ¿Xatab'a chekeb' xaqjun kimak xki'ano? Lik ka'an ti ile. Yet chi at atol tzij puwi ronojel uwach i jyub' ta'aj ¿Xatab'a ka'an ti suk'ul laj atb'al tzij?
26Are uri i Ajwal xub'ij che:
—We keinriq lajuj kawinaq (50) utz laj taq winaq pa tinimit Sodoma, kinkuy ni uri kimak konojel i winaq re i tinimit le, k'axnab'al ke i utz laj taq winaq chi je o chila.
27I mam Abraham xub'ij chik:
—Chakuyu inmak, Wajwal, rumal i tzij chi xinb'ij le; man Yet lik at Dios i yin xa in uk'aj ulew. 28Xwiri moqxa ketz'aqat ti jo'ob' chke i lajuj kawinaq, (50) chi je utz laj taq winaq, ¿Xatab'a kachup uwach i tinimit le kumal i jo'ob' chi ketz'aqat ti chke?
—Kinchup ti uwach i tinimit le we keinriq jo'ob' kawinaq (45) utz laj taq winaq chke —Xcha i Ajwal.
29Xwiri mam Abraham xub'ij chik:
—We xa kawinaq (40) keriqtaj chila chi je utz.
I Ajwal xub'ij:
—Kinchup ti uwach i tinimit le rumal k'axnab'al ke i kawinaq (40) le —xcha.
30I mam Abraham xub'ij chik:
—Mpe awoywal chwe, Wajwal, xaq mina'atij che i lapanik awu'. We xa lajuj juwinaq (30) keriqtaj chila chi je utz.
I Ajwal xub'ij:
—Kinchup ti uwach i tinimit le, we keinriq lajuj juwinaq (30) utz laj taq winaq chila —xcha.
31I mam Abraham xub'ij chik:
—Weta'am chi lik inminom wib' che i tzij awu', Wajwal, xwiri wach nawi ka'ano we xa juwinaq keriqtaj chila, chi je utz.
I Ajwal xub'ij:
—Rumal k'axnab'al ke i juwinaq le kinchup ti uwach i tinimit.
32I mam Abraham k'a xub'ij chik:
—Mpe awoywal, Wajwal, xwiri chaya ni chwe, chi kinch'aw julaj chik awu'. We xa je lajuj keriqtaj chila chi je utz, wach nawi ka'ano.
I Ajwal xub'ij:
—Rumal k'axnab'al ke i lajuj le kinchup ti uwach i tinimit le.
33I Ajwal are xuk'is lapanik ru' mam Abraham, xel chila, xaq i mam Abraham x-e chi rachoch.
Επιλέχθηκαν προς το παρόν:
G%E9nesis 18: ACHICUB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Biblia Achí de Cubulco, Derechos reservados de Sociedad Bíblica de Guatemala