यूहन्ना 7
7
यीशु त तसे भाई
1इन्हि बोकी केआं पता यीशु गलील राज्य अन्तर ईं हंटता रेहा। से यहूदिया राज्य जे घेण ना चहन्ताथ किस कि यहूदी नेते तस मारणे कोशिश करण लगो थिए। 2तपल यहूदी मेह्णु के डेरा बाड़ी त्योहार#7:2 ए त्योहार यहूदी मेह्णु के टाई बोडे त्योहारे बुच यक असा। इस त्योहार बुच से अठ रोज डेरा लाई कइ बिश्ते। इस टेम से ई याद कते कि परमेश्वर कत दाह कता, त से कीं सम्हाड़ी कइ रखो असा। बि नीड़ा एई गो थिआ। 3त तसे भाई तस जे बोलुण लगे, “इठिआ नश कइ यहूदिया राज्य जे गा, ताकि जे जे कम तु कता, तस तें चेले बि हेर सकियेल। 4किस कि अगर कोई मेह्णु अपु शान चहन्ता, त से नियोक कइ कम ना कता। पर तु अगर ई सोब कम कता, त सम्हाई मेह्णु के सामणि घेण दे।” 5(तेन्हि ई बोक तोउं बोली, किस कि से बि तेस पुठ विश्वास ना कतेथ।) 6तोउं यीशु तेन्हि जे बोलु, “में टेम अपल तकर नेईं अओ; पर तुस कपले बि घेई सकते। 7मेह्णु तुस रशुणे नेईं, पर अउं रशुणा असा, किस कि अउं तेन्के बारे ई उगाह देन्ता कि तेन्के कम बुरे असे। 8तुस त्योहार जे घिए, अउं अभेईं इस त्योहार जे ना घेन्ता, किस कि में टेम अपल तकर नेईं अओ।” 9से तेन्हि जे ईं बोल कइ गलील राज्य अन्तरे बिशा।
डेरा बाड़ी त्योहार पुठ यीशु
10पर जपल यीशु भाई त्योहार जे गे, त से बि चुपचाप, मेह्णु केआं नियोक कइ त्योहार जे गा। 11यहूदी नेते त्योहार बुच तस ई बोल कइ तोपुण लगे कि “यीशु कोठि असा?” 12तपल किठिए मेह्णु बि अपफ बुच बोक विचार करण लग गे। कोई बोतेथ कि “से खरा मेह्णु असा”, त केहि बोतेथ, “ना, से त मेह्णु ठगता”। 13पर यहूदी नेती केईआं डर कइ कोई बि मेह्णु तसे बारे खुल कइ ना बोतेथ।
14त जपल त्योहार आधा खतम भोई गा, त यीशु देहेर अन्तर घेई कइ शिचालुण लगा। 15त मेह्णु तस शुण कइ हैरान भोई गे त बोलु, “एन त केसे गुरु केईआं नेईं शिचो। फि बि अस एत ज्ञान कोढ़िआ मेईंया?” 16यीशु तेन्हि जे बोलु, “ए शिक्षा में ना भो, पर परमपिता परमेश्वरे भो, जेन अउं लंघो असा। 17अगर कोई तसे इच्छा जुए जीण चहन्ता, त तस में शिक्षा बारे पता लगाल कि ए परमेश्वर केआं असी, ना अउं अपफ एस बणाई कइ बोलुण लगो असा। 18जे अपु इज्जत चहन्ता, से ईं अपफ बणाई कइ बोता, पर जे अपु लंघाणे बाड़े इज्जत चहन्ता, से सच्चा असा त तस अन्तर कोई दुरबुध नेईं। 19मूसे तुं धे परमेश्वरे नियम दिता। तोउं बि तुसी बुच यक जेईं बि तस ना मानते। त तुस मोउं किस मारुण चहन्ते?” 20त मेह्णु तस जे बोलु, “तु जगरी गो असा! तोउ कोउं मारण चहन्ता, आं?” 21यीशु तेन्हि जे जवाब अन्तर बोलु, “मेईं भक्ति करणे रोज यक चमत्कारे कम किआ, जेस हेर तुस सम्हाई परेशान भोई गो असे। 22पर तुस अपफ बि त भक्ति करणे रोज कम कते, जपल तुस मूसे दुतो नियम मान कइ मेह्णु खतना कते। सच्चाई त ई असी कि ए नियम तुसी मूसे केआं नेईं बल्कि दादु पड़दादु केआं मेओ असे। 23मूसे नियम मनुण जे अगर तुस भक्ति करणे रोज बि मेह्णु खतना कइ सकते, त भक्ति करणे रोज अउं मेह्णु किस ना ठीक कइ सकता?#यूहन्ना 5:9-10 त मोउं पुठ तुस इरुह दोष किस लान्ते? 24टीर बंद कइ पंची ना करे, पर सोब चीज हेर कइ पंची करे।”
यीशु बारे मेह्णु के चर्चा
25तपल कतु यरुशलेम शेहरे मेह्णु बोलुण लगे, “ए कि से मेह्णु ना भो ना, जेस मारण जे कोशिश भुण लगो असी? 26पर हेरे, ए त सोबी के अगर शिक्षा देण लगो असा त कोई कुछ बोलुण नेईं लगो। ई त नेईं कि हें नेते मनी गे कि ए मसीह भो? 27मसीह जपल एन्ता त केसे पता ना लगता कि से कोठियाणि भो, पर इसे बारे त असी सम्हाई पता असा।”
28तपल यीशु देहेर अन्तर शिक्षा देन्ते हक दी कइ बोलु, “तुसी में पता असा त अउं कोठियाणि भो तसे बारे बि पता असा। अउं त अपफ नेईं ओ, पर परमेश्वर जेन अउं लंघो असा, से सच्चा असा। तुस तस ना जाणते। 29तस अउं जाणता, किस कि अउं तस केईआं अओ असा, त तेन अउं लंघो असा।”
30इस बोक पुठ तेन्हि तस टाणे की, पर तस कोई कुछ ना कइ बटे, किस कि तसे कष्ट सेहणे त मरणे टेम अपल तकर नेओथ ओ। 31त हुसुड़े केआं सुआ मेह्णु तस पुठ विश्वास किआ त बोलुण लगे, “जपल मसीह एईयाल, त से कि जे चमत्कारे कम एनि किओ असे, इस केआं बि ज्यादा चमत्कारे कम से कता ना?”
32जपल मुख्य पुजारे, त फरीसी मेह्णु यकी होरी कन पतूं घुश-घुशात कते शुणे त यीशु टाण जे देहरे सपाही लंघाए। 33त यीशु बोलु, “अउं थोड़ी देर तकर तुसी जुए असा, तोउं अउं अपु लंघाणे बाड़े केईं घेई घेन्ता। 34तुस मोउं तोपते, पर अउं तुसी ना मेता। त जेठि अउं भुन्ता, तुस तठि एई ना सकते।”
35त यहूदी नेते अपफ बुच बोलुण लगे, “ए को घेन्ता जे अस एस तोप ना बटते? कि ए तेन्हि यहूदी मेह्णु केईं घेन्ता, जे गैर यहूदी इलाके अन्तर बिश्ते त गैर यहूदी मेह्णु जे शिचालता? 36इसे मतलब की बणतु कि ‘तुस मोउं तोपते, पर अउं तुसी ना मेता त जेठि अउं भुन्ता, तुस तठि एई ना सकते’”?
यीशु, जीवन देणेबाड़ा पाणि सुजल
37तोउं, जे त्योहारे अखिर रोज थिआ, त बोडा खास रोज थिआ, तपल यीशु खड़ भुआ त जोर जोई हक दी कइ बोलुण लगा, “अगर कोई टिशो असा, त मोउं केईं एई कइ तस पीण दिए, जे अउं देन्ता। 38त जीं धरमे कताब अन्तर लिखो असु,
‘जे मोउं पुठ विश्वास कता,
तसे दिल अन्तर जीवन देण बाड़ी पुओणि सुजली ईं बहिन्तु।’”#यूहन्ना 4:14
39तेन ई बोक तेस शुची आत्मा बारे बोलु, जे तस पुठ विश्वास करणे बाड़ी जे मेणे बाड़ा थिआ। अपल तकर शुची आत्मा विश्वासी मेह्णु पुठ नेओथ अओ, किस कि यीशु अभेईं तकर अपु शान जे नेईं गो#7:39 यीशु मरण केआं पता, दुबारी जी कइ, स्वर्ग जे नेओथ गो।।
यीशु बारे मेह्णु दुमने भुण
40तपल मेह्णु बुच केहि केहि ई बोक शुण कइ बोलु, “ए सच्चे से भविष्य वक्ता भो, जेस अस भाड़ बिशो असे।” 41किछ होरी बोलु, “ए मसीह भो” पर केनि होरी ई बोल कइ पुछु कि “किस, मसीह कि गलील राज्य केआं एन्ता ना? 42धरमे कताब अन्तर कि लिखो नेईं ना कि मसीह दाऊद राजे ऊड़ी त बैतलहम ग्रां केआं एन्ता, जेठिआ राजा दाऊद अओ थिआ?” 43त इस बझई जुए मेह्णु बुच अणबण भोई गई 44तेन्हि बिचा कुछ यीशु टाण चहन्तेथ, पर तसे कुछ कइ ना बटु।
45तोउं देहरे सपाही, मुख्य पुजारे त फरीसी केईं एई गे त तेन्हि तेन्हि सपाही केईआं पुछु, “तुसी से किस ना अण्हा?” 46त सपाही तेन्हि जे बोलु, “आज तकर केनि बि मेह्णु एसे ईं बोके ना की।” 47त फरीसी लेहरी कइ बोलु, “तुस बि ठगी गे ना? 48नेते त फरीसी बिचा कि केनि जेईं तस पुठ विश्वास किओ असा ना? 49पर एन्हि मेह्णु पुठ शराप असा, किस कि ए नियम ना जाणते।”
50पर नीकुदेमुस, जे पेहले यीशु केईं अओ थिआ,#यूहन्ना 3:1,2 त जे तेन्हि फरीसी बिचा यक थिआ, नाराज भोई कइ बोलु 51“हें नियम केस जे बजन बोक शुणणे, त बजन तसे कम समझणे तेस पुठ दोष लाणे ना बोता।”#विधि 1:16-17; 17:4; निसुणे 23:1-3; पुजारोठि 19:15-16 52त फरीसी त नेते तस जे बोलु, “तु बि कि गलीले भो ना? गा त धरमे कताब अन्तर हेरिण दे कि गलील राज्य केआं कोई बि भविष्य वक्ता ना एन्ता।” [53तोउं सम्हाई मेह्णु अपु अपु गी जे गे।
Επιλέχθηκαν προς το παρόν:
यूहन्ना 7: pgg
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023 (Active) Wycliffe Bible Translators, Inc. All rights reserved.