Zouao 6
6
Zeso madirra 5 mil quenarrarideni inarripabaqquirrari
Mateo 14.13-23; Maraco 6.30-44; Roca 9.10-17
1Nani zotodepe zama arobeni Carireacca coriza onini onihipe Tiberiacca coriza quequenanarrari rrippeuarri Zeso pouaza rrauirrarrarode. 2Madirra bazima naco Zesotoui inatti rrarrauimissa narraride. Pocca nauatoueza comaqquiri narrarideni tonomirizemanaui qqui toquenaporra narrarirrine Zeso pouatoui quenarrari. 3Nazapa Zeso ssonouarri toqquemoraza poua uatimadedeni ia naqui pouaza rrauirremorade. Naniza rrassi inezape Zeso naco iazama uittarraride. 4Arrirraro uima torrarrarope zodeodenicca errete onini Pascoa bacco tabote nezade. 5Naniza rrassi inezana madirra bacco namissemanaui Zeso qqui inabaqquirraride. Nazapa Zeso poua uatimade Piripiza uati tade: —Nerrecouarri madirra sibema rripemanauiuarrine taparideni mitta inapazarra? −nade Zeso. 6Zesopa madirra inarripabaqquiuiuarrine nauato taporaha ecomeza: —Piripipa atti nerrecoma naui? −naza uati tarrari. 7Naraha Piripi attipa: —Ziniro uemani pina 200 denarioza madirra taparideni mitta inazapa bazira bazira tarizaraha motadenipa ai tocanireuitoui −nade.
8Naraha Zeso uatimade orraria onipa Adere, pouapa Simao-Pedoro ouaha narrarina zabisso pao carriui qqui tazapa Zesoza uati tarraride: 9—Arrarrari zabissona pao 5, aba pama naha carriraha madirra bazima rripemanauiuarrine parrire-rraraui. Madirrapa uapi taui −nade.
10Nazapa Zeso iaza uati tade: —Madirra rrassi tarizauiuarrine uati tinabaqquimanarro −nade. Nazapa uati ineza naui mina bica taniza rrassi tarizade. Maqquiderre pouarapa 5 mil quenarraride. 11Nazapa Zeso pao inaccaza Deoza uati tarrari: —Rrehe, peperri. Ticca danirri iaza bica taui −narrari. Nazapa Zeso canauatori canarrarirrine pao touapizapa madirra rrassi rrassi teri narrarideniza da inabaqquirizade. Aba naco narrarissa inanarrari. Nazapa bazimaza inaparrirebaqquiuissa tade. 12Madirra bazima rripemanaha accaremanazapa Zeso iaza uati tade: —Mota torrarraripa tinaccanirize-manarro. Mota tinebomana tarrararro −nade. 13Nazapa pao 5 narrari rripemanarrari arrarideni mota inaccarizemanazapa quiqui 12 naha irririzade.
14Nazapa Zeso canauatori canaui qqui toquenazapa uimahaha canade: —Parrissa arrarraripa Deo Atti cacomerabote. Maittaccazama uima imittaporrarope: “Arrirraro zamaza bacco nauitoui” quequenanapode −quenade bazima. 15Nazapa madirra attideni: —Rrari, Zeso dama inaza icca tamine torrauiuarrine iaccanina −quenaraha Zeso pouaza nama quenauiuarrine nauato tapozapa madirra inebobaqquipomaza poua motta madiuiuarrine ssonouarri denima toqquemorade.
Zeso passo tetepi ccamissarrari
Mateo 14.22-33; Maraco 6.45-52
16Nezape marri amossi nabote naza Zeso uatimade iape corizauarri rrauirrezipparrarode. 17Zesotoui imadizape zomebote torreraha Zeso qquezipparrarazapa darroniza rrauirrezeza coriza rrippeuarricca oza panani Capenaouarri iaccade. 18Nezape coriza nocconi iaqqueraha rrorrode rro rro nezape coriza rriba rriba nade. 19Nani coriza nocconi iaccanerre inattiuarri passo tetepi Zeso ccarronaui qqui inezape icappina nade. 20Naraha poua cacomerade: —Ticappinemana terrerarri, ouape oua! −narronade. 21Nezape etizeza pouaza: —Darroniza tiqquezarri −inade. Nezape amazati Capenaouarri bacco inade.
Zesotoui quenarrarideni Capenaouarri rrauimissarrari
22Narraro ssiuarraza madirra mota arra coriza rrippeuarri ibomanarrarideni uatideni uatomaza: —Zeso uatimadedenipa darroni carrarie caponarraroza rraui torraraha Zesopa pouadeniza tocca narrarade −quenarrari. 23-24Nazapa nauiza Zesotoui, poua uatimadedenitoui qqui narizemanaraha bacco inabaqquimana-rrarazapa: —Rrina, rrippeuarri rrauirrana −quenanarra oza panani Tiberiauarricca darroni onihi bacco bacco canarrone-manarraro quenade. Naui Zeso poua Deoza uati taza: —Rrehe, peperri. Ticca danirri iaza bica taui −napoza pao da da ihinabaqqui naui uarrira taniuarri uana uana canarrone-manarrari. Nazapa nauiza ibomanarrarideni narraro darroni onihiza onihiza rraui torrezarizazapa Capenaouarri rrauimissarraride Zesotoui.
Zesopa madimana-zanapouiuarrinecca pao torrarrari. Narrarizana tocassiuauerauiuarrine
25Zesotoui zotode rrauimissarrarideni darroni onihiza bacco bacco namissemanade. Nazapa Zesoza uati toquenade: —Ia Maride nerrecoma neza arrauarri bacco tarronarrarotte? −quenade. 26Naraha Zeso pouadeniza uati tade: —Rrehe, parrissehera tiadeniza uati onana: Ouape tiadeni onarripabaqquiza teccaremanarrarorrine otoui tiquenarraro. Naraha occa marinarra, ocanauatori canani timittemananissa terrerezape narraro occa marinarratoui oua qquizo tarronemana-rrerani −nade Zeso pouadeniza. 27—Naraha tiadenipe ticcadeni rrirripa rricaca tauicca touira tibodideni uato-rrerarri, onarraro. Rrirripa rricaquera tauicca touira tibodideni uatomemanarri −nade. —Ouape Madirra Bedi orrarraroa rrirripa rricaquera tauiccara tiadeniza da onarizauiuarrine, onarraro. Nazama narraro cacauehepe occa Abi Deo ouaza da ineza occarronarraro −nade Zeso.
28Naraha manaco pouaza uati toquenade: —Deo nacassa tauicca inananiuarrinepe nerrecoma inaniuarrine? −quenade. 29Naraha Zeso pouadeniza uati tapomade: —Deopa arrima tiquenezana nacassa tarrari. Arri oua Deocca zossenirriza parrissa tiquenezana Deo touini narrari −nade.
30Naraha manaco pouaza uati toquenapomade: —Nerrecora inoccoza ticanauatori canani qqui ineza tiaza parrissa inaniuarrine? Nerrecora tinauatouiuarrine tiparrireni? Qqui inana −quenade. 31—Rrari, pina maittaccazama icca idideni zama uamoniuarri Moizeza rrauirizazapa rrirripa oni mana rrirripemana naui quenade. Narraro uima Deo Atti dozo nanizape arrima narraro: “Pouadeniza memeuarricca pao da inazapa rrirripemana narrari” quequenanade −quenade Zesoza.
32Naraha Zeso pouadeniza uati tapomade: —Parrissehera tiadeniza uati onana: Narrari pao memeuarriccapa Moizecca danirri rraraui. Abi Deona pouadeniza da da nanarra narrari. Naraha rridapanaccapa memeuarricca pao parrissehecca occa Abi Deo tiadeniza da inarrari. 33Narraripa Deocca danirri memecca ccaronarrari, zama bazimaza camittehe rriquerreranicca da inarizaniuarrine −nade Zeso. 34Naraha pouadeni attipa: —Rrari, Mamaride, narrari pao iaza da da tizanaporro −quenade.
35Naraha Zeso pouadeniza uati tade: —Arri ouaparriua pao timadimana-zanaponiuarrinepe. Ouaza parrissa quenarraridenipa pemimana-rrarauitoui, baccodeni naco rrocomana-rrarauitoui. 36Neza taide tiadeniza uati uati onapode. Oua qqui tiqueneraha ouaza parrissa tiquenerrerani, onapode. 37Neraha ouape occa Abicca danirri ouaza rrauirronarrarideni bazimapa ouattarrobaqqui-rrarauitoui. 38Arri oua memeuarri occaronarrarope oua oua motta touini onanicca onananiuarrine rrerani. Occa Abi oua cazosserrari. Poua nacassa tauicca touini oneza ozepe irririzarraro. 39Oua cazosserrari poua touini naniccapa arrima narraro: Abi Deo ouaza madirra inanabaqquirraripa ouacauabaqquiuissa tazapa amossi narra canima-rrarauitoui. Niza uada rricarinicca bacco tezape bazima onauatoni-baqquiuitoui. 40Nazama occa Abi poua touini nauicca onihipe arrima narraro: Madirra bazima Deo Bedi qqui toquenaza pouaza parrissa quenazapa camittehe rriquerreranicca carrimanauitoui. Niza uada rricarinicca bacco tezape narrarideni bazima onauatoni-baqquiuitoui −nade Zeso.
41-42Nazapa zodeodeni Zeso atti: —Ouape pao memeuarricca occaronarraro −naui mittemanazapa pouama attitti cosseri nade: —Arrarrari Zesopa Zoze bediraha “Ouape memeuarri occaronarraro” naua. Pocca abi amideniza inocco rrizaqquiri narraroqui? Nauatoqquiri inani! −quenade.
43Naraha Zesopa pouadeniza uati tade: —Ponima attitti ticossarrarope tinebomanarri! 44Occa Abi Deo oua Cazossedepa madirra ouaza inanabaqqui-rrarazapa ouaza toquerrena-rraraui. Naraha occa Abi ouaza inanabaqquirraridenina ouaza totoquerrena narrari. Narraridenipa niza uada rricariniccaza onauatoni-baqquiuitoui, onarraro. 45Deo Atti cacomeraqquiri narrarideni dozo iquenaporraroza naqui arrima nani: “Deona madirra bazima mari icanabaqquiuitoui” quenapoui nade. Narraroa arra madirra bazima Abi Deo Atti mittemanaza tocauatterarraridenina ouaza totoquerrena nauitoui.
46—Nazama madirra bazimapa Abi qqui toquena-rrararaha orrariana Abi qqui tarrari. Narrarope oua parri. Ouape Deo pocca occarronarraro. 47Ouape parrissehera tiadeniza uati onarraro: Madirra ouaza rrehe quenarraripa camittehe rriquerreranicca carrimana-zanapouitoui, onarraro −nade Zeso.
48—Rrehe, ouape pao timadimana-zanaponiuarrinecca. 49Naza maittaccazama ticcadeni idideni zama uamoniuarri rrauirizazapa pao oni mana rripemanaporraripa bazima rricarizarrari. 50Naraha arra pao memeuarricca ccaronarrari tauimari uati uati onarraro rripemanarraridenipa rriquemana-rrarauiuarrine, onarraro. 51Ouape pao camittehecca orrani memeuarricca occaronarraro. Narrari pao madirra rripemanarraripa madimana-zanapouiuarrine, onarraro. Tiadeniza pao da onarraripa ouassire. Madirra zama bazimacca tocassiuauerauiuarrinepa ouana oua ouaccoranitoui −nade Zeso.
52Nazapa zodeodeni Zeso atti mittemanaza pouadenira arrauarri uati arrauarri uati quenarraripa: —Poua poua assire nerrecoma inaneza ia tonarripabaqquiuiuarrine? Ssamo tani! −quenarraride.
53Naraha Zeso pouadeniza uati tade: —Parrissehera tiadeniza uati onapomana: Ouape Madirra Bedi orrarraroa ouime tirripemane-rrerezape camittehe rriquerreranicca ticappiremananitoui. Ouemene ze tiquenerreraza naqui camittehe rriquerreranicca ticappiremananitoui. 54Neraha ouime rripemanarrarideni, ouemene ze quenarraridenina camittehe rriquerreranicca carrimana-zanapouitoui. Nazapa niza uada rricarinicca bacco tezape narraridenina onauatoni-baqquiuitoui, onarraro. 55Nazama ouimepe rrirripa parrissehecca, ouemene naqui zeze parrissehecca orrani. 56Arra ouime rripemanarrarideni, ouemene ze quenarraridenipa ouaza madirizemanarrari. Oua naqui pouadeniza omadirizarraro. 57Abi Deo camitta tarrarina oua zosse naronarraride. Narrari Pouarrine camitta onarraro. Narrarossa onanarraroa madirra oua rripemanarraridenipa narraro camittehe rriquerreranicca carrimanauiuarrine. 58Arra pao memeuarricca ccaronarrari tauimari uati onarrarope pina pao oni mana ticcadeni idideni rripemanarrarissa narraraui. Ididenipa narrari mana rripemanaraha narraridenipa rricaui. Neraha arri ouape pao memeuarricca orrarraro. Narrari pao rripemanarraridenipa madimana-zanapouitoui −nade Zeso.
59Narraro uimape Capenaouarricca Deo Atti mamariuarri Zeso madirra mari icanabaqquirraride.
Zeso attina camittehe rriquerreranicca
60Nazapa Zesocca marinarra poua ime tauimarini mittemanazapa arra pouaza rrauirizarrarideni motapa uimahaha canade: —Arra Zeso uati uati tarraripa imittaniuarrine narro tani. Nerrecorrarina mittaza rrehe nauiuarrine? −quenade. 61Pouadenira attitti cosseri naui Zeso nauato tazapa pouadeniza uati tade: —Arri uima uati uati onarrarope tiadeniza ocassera tarraroqui? 62Naraha ouape Madirra Bedi orrarraroa niza omadiponiuarri occamacossanini qqui tiquenezape nerrecoma tiquenapazerre? Nazana tibodideni uatomanitoui. 63Deo Corimena madirraza camittehe da inarraro. Madirrapa poua tesseza camittehe da inaniuarrine ssamo tani. Ouatti tiadeniza uati uati onarrarope Deo Corimecca danirri. Camittehe rriquerreranicca tiadeniza da inaniuarrine parrireni. 64Naraha tiadeni motape ouattiza parrissa tiquenerreraccani −nade Zeso. Madirra mota pouaza parrissa quena-rrararrarideniza naco nauato taporrari. Poua ccaccoradeza naco nauato taporrari. 65Nazapa denima uati tarrari: —Narraroa ouattipe: Occa Abi madirra ouaza inanabaqqui-rrarazapa ouaza toquerrena-rraraui. Naraha occa Abi ouaza inanabaqquirraridenina ouaza totoquerrena narrari −nade Zeso.
66Zeso narraro uima uati uati tazapa madirra pouaza rrauirizarrarideni uapi taraha motapa rraui torranirizade. Zeso pouaza rrauirizaraha ineboqqui-manarraride. 67Nazapa Zeso poua uatimade 12 inarraroza uati tade: —Tiadeni naqui: “rrauirranina” tiquenaqui? −nade. 68Naraha Simao-Pedoro poua cacomerade: —Ia Zozossede nerrecorrarizara rrauirraniuarrine? Tettina orrarini camittehe rriquerreranicca. 69Iape tiazaha parrissa inapode. Tiazana nauatoqquiri inarraro: Tiape Deocca Erredeni Bicabote tirrani −nade Pedoro. 70Nazapa Zeso uati tapomade: —Arri 12 tiquenarrarope tiadeni ocatterriza-baqquirrarode. Naraha orrariapa pina oua uauadi Tocorime-Taminessa naui −nade.
71Arra Zeso uati tarraripa Simao Iscariote bedi Zoda tauimari uati tarraride. Zeso poua uatimade 12 ineraha narrari orrariana Zeso ccaccorade torrarraride.
Επιλέχθηκαν προς το παρόν:
Zouao 6: KBNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
2020 Impresso na Graafica da Biblia