Mǒhtûlû̌hǎhtûsa 1
1
Ta̤bǒlò̤
1Bǎ Cǒmaradû̌ bǒlò̤sakhû̌lû̌ ta̤nukha a bǒlò̤ mǒkhû̌ ta hǎkhû̌. #Jowǎ̤ni̤ 1:1-2; Ebrephû̌ 1:10 2Bǎ a bǒlò̤sakhû̌lû̌pe akhanu, hǎkhû̌ ayo̤agînu ate̤bǎte̤to dǐcǎ hǒtò̤, a ǒkoyope pwǎ. Dě shidû̌shite̤we̤ akhû̌nu akhǐsuwupe pwǎ. Dě Cǒmara a sǎcahtǐ cû̌gecû̌le̤ shikhû̌.
3Htodě Cǒmaradû̌ hî̌, “Ta̤lî htûhtò̌ mò̌,” dě ta̤lî htûhtò̌. #Kòrî̌tiaphû̌ ginǐ̤bǎ tabǎ 4:6 4Cǒmaradû̌ kè̌shǐ ta ta̤lîhtǒo awǒ dě asò̌phlǒmo̤ mè̤mè̤̌, dě a bè̌htò̌khǒkè ta̤lîhtǒo ta ta̤khǐ. 5Ta̤lîhtǒonu Cǒmaradû̌ kaǎ ami̤ ta lṳmṳsha, dě ta̤khǐhtǒonu a kaǎ ami̤ ta lṳmṳkhǐ. Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ awǐgutṳ̌ ti̤ni̤ hǒ.
6Dě Cǒmaradû̌ hî̌po̤, “Mǒsò̌polo htûhtò̌ mò̌ shi ginǐ̤kho aplǎkû, dě bè̌ khǒkè shi mǒla̤ ta shi hǎkhû̌ htǒonu.” #Petru ginǐ̤bǎ tabǎ 3:5 7Hǐnudě Cǒmaradû̌ bǒlò̤ mǒsò̌polo, dě a bè̌khǒkè shi ǒ mǒsò̌polokhû̌nu ta shi ǒ hǎkhû̌bǎo toǒ. Dě a htûhtò̌bò pwǐ a hî̌nu. 8Dě mǒsò̌polo htǒo Cǒmaradû̌ kaǎ ami̤ ta mǒla̤. Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ ginǐ̤ni̤ ti̤ni̤.
9Dě Cǒmaradû̌ hî̌po̤, “Shi mǒla̤nu toǒ ǒplǒ tònò cû̌khǒkè tò̤glò htodě deklakhwekhû̌ ǒlṳhtò̌ mò̌,” dě a htûhtò̌bò pwǐ a hî̌nu. 10Cǒmaradû̌ kaǎ deklakhwe htǒo ami̤ ta hǎkhû̌, dě a kaǎ shi dě a cû̌ǒplǒ khǒnû̌ûhtǒo tò̤glò ami̤ ta shidû̌shite̤we̤, dě Cǒmaradû̌ kè̌shǐ ata̤ma̤htǒo mî̌ awǒ dě asò̌phlǒmo̤ mè̤mè̤̌. 11Cǒmaradû̌ hî̌po̤, “Sǒlǎsǒdo pṳ̂̌꤮ tacǎ dǒhtò̌phǎhtò̌bò mò̌. Sǒsǎwû̌pho pṳ̂̌꤮ tacǎ phohtò̌sǎhtò̌bò mò̌, sǒmṳwû̌bo lǒ̤bò sî, dǒhtò̌phǎhtò̌bò mò̌ bǎ hǎkhû̌bǎo pwǐ akhli la̤klo sǎhtò̌nu nî̌,” dě a htûhtò̌bò pwǐ a hî̌nu. #Ebrephû̌ 6:7 12Dě hǎkhû̌ ǐ sǎhtò̌phohtò̌ sǒlǎsǒdo, sǒsǎwû̌pho ta sǒmṳwû̌bo lǒ̤꤮ bò pwǐ akhli ta akhli la̤klo sǎhtò̌nu. Dě Cǒmaradû̌ kè̌shǐ ata̤ma̤ htǒo mî̌ awǒ dě asò̌phlǒmo̤ mè̤mè̤̌. 13Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ suni̤ ti̤ni̤.
14Cǒmaradû̌ hî̌po̤, “Ma̤pûhǐ lṳmṳkhǐ ta lṳmṳsha bè̌khǒnû̌û ayanu ta̤lî htûhtò̌ mò̌ mǒla̤nu, dě noma̤dòǐlṳ te̤bǎte̤to bǎ kò ta ta̤akhîakha, mṳni̤mṳsa ta něla toǒ. 15Dě ta̤lî htǒo lîhtò̌ mò̌ mǒla̤ dě lî shěrakhalò̤ bǎ mò̌ hǎkhû̌ bǎo.” Dě a htûhtò̌bò pwǐ a hî̌nu. 16Cǒmaradû̌ bǒlò̤ ta̤lîmî̌kodû̌ ginǐ̤ma, a lîshěkhlo tama mî̌ lṳmṳ htǒo dě a nolî nû̌û lṳmṳsha, a lîjakhlo tama mî̌ la htǒo dě a nolî nû̌û lṳmṳkhǐ, dě a bǒlò̤po̤ shǎ sîtoǒ. 17Ma̤pûhǐ ta̤lî lîshěrakhalò̤ bǎ hǎkhû̌ ayanu, Cǒmaradû̌ bè̌ǒ ta̤lîmî̌kodû̌ toǒ dě mǒla̤. 18Htohǒtò̤ a bè̌ǒ ta̤lî htǒotoǒ dě a glè pǒǐ lṳmṳkhǐ ta lṳmṳsha dě a bè̌khǒkè tû̌ ta̤khǐ ta ta̤lî. Dě Cǒmaradû̌ kè̌shǐ ata̤ma̤htǒo mî̌ awǒ dě asò̌phlǒmo̤ mè̤mè̤̌. 19Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ lǐ̤ni̤ ti̤ni̤.
20Cǒmaradû̌ hî̌po̤, “Bò ta̤bǒlò̤ pṳ̂̌꤮ tacǎ htě ayò̤ shikla sîtoǒ htûhtò̌ dě ǒbehtò̌mò̌ shiklanu. Htû̌phû̌ pṳ̂̌꤮ tacǎ htûhtò̌mò̌ dě wi̤mò̌ mǒla̤nu.” A hî̌ dě a htûhtò̌bò pwǐ a hî̌nu. 21Hǐnudě Cǒmaradû̌ bǒlò̤ ta̤phû̌ta̤li̤dû̌ toǒ shidû̌shite̤we̤kû ta ta̤phû̌ta̤li̤ shikla lǒ̤bò toǒ dě a ǒbetî̌pî̌htò̌bò shidû̌shite̤we̤kû. A bǒlò̤ htû̌phû̌yṳphû̌ pṳ̂̌꤮ tacǎ htě a wi̤ mǒla̤ sîtoǒ, dě Cǒmaradû̌ kè̌shǐ ata̤ma̤htǒo mî̌ awǒ dě asò̌phlǒmo̤ mè̤mè̤̌. 22Cǒmaradû̌ howi̤bò ta̤phû̌ta̤li̤ htǒotoǒ dě a hî̌, “Ta̤phû̌ta̤li̤ htě a ǒ shidû̌kûnu toǒsî꤮, phû̌phǎhtò̌plṳ̂ lǒkho nî̌꤮, phû̌htûphû̌phǎ phû̌ǒwo̤ǒplṳ̂ lǒkho nî̌꤮,” dě a hî̌po̤ htû̌phû̌yṳphû̌ sîtoǒ, “Phû̌phǎhtò̌plṳ̂ lǒkho hǎkhû̌bǎo nî̌꤮.” 23Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ yè̤̌ni̤ ti̤ni̤.
24Htodě Cǒmaradû̌ hî̌po̤, “Kǒ꤮ hǎkhû̌, ǐǒhtûhtò̌mò̌ ta̤phû̌ta̤li̤ htě abî̌ toǒ bǎbǎ, ta̤mi̤ta̤mò̤ htě aplò̤ toǒ bǎbǎ, adû̌dû̌ apî̌tî̌tî̌ lǒ̤꤮ bò pwǐ akhli ta akhli ǒ tû̌nu,” dě a htûhtò̌bò pwǐ a hî̌nu. 25Hǐnudě Cǒmaradû̌ bǒlò̤ ta̤phû̌ta̤li̤ htě abî̌ bǎbǎ, ta̤mi̤ta̤mò̤ toǒ bǎbǎ, adû̌dû̌ apî̌tî̌tî̌ lǒ̤꤮ bò pwǐ akhli ta akhli tû̌ pwǐhè̌onudě Cǒmaradû̌ kè̌shǐ ata̤ma̤htǒo mî̌ awǒ dě a sò̌phlǒmo̤ mè̤mè̤̌. 26Cǒmaradû̌ hî̌po̤, “Pa bǒlò̤plǒnû̌û kòyòhǎkhû̌phû̌ htě alò̤ta pana̤ htǒonu hò꤮. Htodě ta̤phû̌ta̤li̤ ǒ shiklanu toǒ bǎbǎ, htû̌phû̌yṳphû̌ wi̤ dě mǒla̤nu toǒ bǎbǎ, ta ta̤mi̤ta̤mò̤ ǒ dě mi̤klanu toǒ bǎbǎ, ta̤phû̌ta̤li̤ htě kò bǔǐyǎ dokûnu toǒ bǎbǎ, adû̌dû̌ apî̌tî̌tî̌ lǒ̤꤮ bònu pa ǐ kòyòhǎkhû̌phû̌ dě nopǒǐbò yǎta asî hò꤮,” a hî̌ hǐnu.
27Hǐnudě Cǒmaradû̌ bǒ sǒsǒ kòyòhǎkhû̌phû̌ ta ana̤ dě a bǒ sǒsǒ makhû ta mamǔ ta ana̤ htǒonu. #Mǒhtûlû̌hǎhtûsa 5:1-2; Matěo 19:4; Mǎ̤riko 10:6 28Htodě Cǒmaradû̌ howi̤homò̤ asî dě a hî̌, “Phû̌ǒwo̤ǒphǎ lǒkho ǒbebò hǎkhû̌ dě pǒǐ tû̌ nî̌꤮. Dě ta̤phû̌ta̤li̤ ǒ shidû̌shite̤we̤kûnu toǒ bǎbǎ, htû̌phû̌yṳphû̌ htě a wi̤ dě mǒla̤nu toǒ bǎbǎ, ta̤phû̌ta̤li̤, ta̤mi̤ta̤mò̤ htě a cû̌ hǎkhû̌nu toǒ pṳ̂̌꤮ tacǎ bǎbǎ pǒǐbò tû̌ asî nî̌꤮.” 29Htodě Cǒmaradû̌ hî̌po̤, “He ǐlò̤ bǎ sî sǒdosǒlǎ ta a sǎhtò̌phohtò̌ bǎ sî la̤ǎla̤o aya, ta sǒsǎwû̌pho htě a bǎ sǎhtò̌phohtò̌ sî la̤ǎla̤o aya dě hǎkhû̌ teběbò htǒonu hǒ. 30Pwǎ̤ta ta̤mi̤ta̤mò̤ lǒ̤bò ǒ hǎkhû̌ bǎonu toǒ, ta htû̌phû̌yṳphû̌ wi̤ mǒla̤nu toǒ ta ta̤phû̌ta̤li̤ htě adû̌dû̌ apî̌tî̌tî̌ lǒ̤꤮ bò ta asò̌phlǒhtûpwa̤ ǒnu toǒ la̤ǎ aya, he ǐlò̤ bǎ asî mi̤mṳ ta sǒdosǒlǎ.” Dě a htûhtò̌bò pwǐ a hî̌nu. 31Dě Cǒmaradû̌ kè̌shǐbò a ma̤ ta̤ htǒotoǒnu a wǒ mè̤mè̤̌ akhû̌akhî, a sò̌phlǒmo̤ mè̤mè̤̌. Lṳmṳkhǐ htodě lṳmṳlîbû hè, dě a behtò̌ ti̤ni̤, hǐnu ti̤ni̤ mî̌ ani̤ susǒ.#Timò̤̌te awǐlǒ tabǎ 4:4
Επιλέχθηκαν προς το παρόν:
Mǒhtûlû̌hǎhtûsa 1: KRC
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Wycliffe USA