योहन 7
7
यीसु को भाऊ गीनको अबिस्वास
1एको मंघा, यीसु ना गलील मा फिरयो, काहेका उ यहुदिया ला नही फिरन चाव्हत होतो, काहेका वहान को यहुदी अधिकारी ओला मार डाकन चाव्हत होतीन। 2यहूदिगीन को झोपड़ी को तिहार कठा होतो। 3एको लाई यीसु को भाऊ लोकगीन ना ओको लक कहीन, यो जघा ला सोड़के यहुदी नगर मा जाय, काहेका जोन काम तु करासेस, ओला तोरो मघा चलनवारो चोवेत। 4जोन जग जाहीर होवनो चाव्हासे वा लूक के काम नही करासेत। जब तू असो काम करासेस ता सबको पूढा आपरो काम दिसाव। 5काहेका यीसु को भाऊहुन तकन ओमा भरोसा नही करत होतीन।
6तब यीसु ना उन लक कहीस, तुमरो लाई हरेक बेरा साजरो से, पर मोरो लाई अबा साजरो बेरा नही आईसे। 7यो दुनिया तुमरो लक बैर नही करासे, पर मोरो लक बैर करासे, काहेका मी उनको बिरोध मा यो गवाही देवासू का उनको काम बुरो सेति। 8ऐना तिहार मा तुमी लोक जावो, मि अबा यो तिहार मा नही जाहु, काहे की मोरो बेरा पूरो नही भईसे। 9असी गोस्टी कव्हन को मंघा यीसु गलील नगर मा रुक गयो।
झोपड़ी को तिहार मनानो
10जबा तिहार मा ओको भाऊहुन चली गईन ता उ भी गयो पर उ खुल्लो रुप लक नही, चुप्पई चाप गयो होतो। 11यहूदी मुखिया यीसु ला तिहार मा यो कव्हके तलास कर रही होतीन का, “उ मानूस किता से?”
12लोकगीन ओको बारे मा चुप्पई लक लगत पिरकार को गोस्टी कर रही होतीन, काही कव्हत होतिन, का उ साजरो मानूस से, अना काही कव्हत होतीन, नही उ लोकगीन ला भरमावासे। 13ता भी यहूदिगीन को भेव लक कोनी मानूस ओको बारे मा नही साँगत होतो।
यरुसलेम मा यीसु को पिरवचन
14जबा तिहार अरधो बीत गयो होतो, तबा यीसु मंदिर मा गयो अना ओना पिरवचन देवनो सुरु कियो। 15तबा यहूदिगीन चकित होयके कव्हन लगीन, यो मानूस कबच वाचन करन लाई पाठसाला नही गयी से, मंग एतरो काही कसो लक जानासे?
16यीसु ना जवाब देइस, मि जोन पिरवचन ला देसू उ मोरो कन लक नही, पर मोरो धाड़न वालो परमेस्वर को कन लक से, जोन ना मोला धाड़ीसेस। 17अदी मानूस उ करनो चाहे, जोन मोठो दाअजी को मरजी से ता उ यो जान जाहे का जोन पिरवचन मि देवासू, उ मोठो परमेस्वर को से, मंग मि आपरो कन लक नही देय रही सेउ। 18जोन आपरो टोंड लक कव्हन चाव्हासे, उ आपरो बड़ाई चाव्हासे, पर जोन आपरो धाड़न वालो की बडाई चाव्हासे, वाच खरो से, अना ओमा अन्याय#7:18 खोट नाहती। 19का तुमला मोसे को नियम ला नही देई गयी से? मंग तुम्हि मा लक कोनी मोसे को नियम पर नही चलासे। तुमी मोला कायलाई मार डाकन चाव्हासो?
20लोकहुन ना जवाब देइन, “तोरो पर भूत घुस गयी से जोन तोला मारन को तक्का पर से।”
21यीसु उनला जवाब देसे की, मि तुमरो लाई एक अदभुत काम ला करयो अना तुम्हि ता चकित भयो सेव। 22एनाच मकसद लक मोसे ना तुमला खतना को रिवाज सौप देयि होतो। (असो नही का यो रिवाज मोसे को कन लक से, पर तुमरो आजा-पुरखा लक चलके आय रहयो होतो।) अखीन तुमी बिसराम दिवस मा टुराहुनार को खतना करासेव। 23जबा पवीतर दिवस मानूस को खतना कियो जासे, तबा मोसे को नियम को हुकूम बनो रव्हासे, तो तुमी मोरो पर काहे गुस्सा करासो की मिना एक मानूस ला पूरी तरीको लक साजरो करीसेऊ। 24गोस्टी जसी से वसो चोवके न्याय करो, टोंड चोवके न्याय नोको करो।
का यीसु च मसीहा आय?
25तबा यरुसलेम का रव्हनवालो लोकहुन मा लक काही ना कहिन, “का यो वोच मानूस नही से, जोनला लोक मार डाकन चाव्हसेत?” 26चोवो, उ ता लोकहुन को बीच खुल्लमखुल्ला#7:26साफ-साफ गोस्टी कर रही से अना कोनी ओला काही नही कव्ह सका सेत, का यो नही होय सका यहुदी मुखिया ला सही मा मालुम भयो, का योच खरोखर मसीह से? #7:26परमेस्वर का धाडयो हुयो। 27“येला तो हमी जानसेजन, का यो कहाँन को से? पर जब मसीह आहेत, तबा कोनी नही जान पाहेत, की उ कहाँन को सेत?”
28यीसु ना मंदिर मा जोर लक कहयो, “का तुमी सच मा नही जानासेव, मि कोन सेऊ अना किता लक आयीसेऊ?” मि आपरो हक लक नही आयीसेऊ, काहेका जोन ना मोला धाड़ीसेस उ सच्चो से, तुमी ओला नही जानासेव। 29मि ओला जानासू, काहेका मि ओको कन लक आयी सेऊ, अखीन ओने मोला धाड़िसेस।
30मंग वय ओला बंदी बनावन को कोसिस करन लगीन, पर कोनी भी ओको पर हात नही डाक सकया। काहेकि ओको बेरा अबा नही आयी होती। 31मंग भीड़ मा लक लगत सा लोक ओको पर भरोसा कर लेईन। अना कव्हन लगीन, “मसीह जबा आहे तबा का येको लक लगत निसान करेत जोन एना चोवायीसेस।”
यहुदी हुनको यीसु ला धरान की कोसिस
32मुखिया याजक अना मोसे को नियम को गुरू गीन ना सुनगुन-सुनगुन यो गोस्टी ला लोकगीन ला करत आयकिन, एकोलाई मोठा याजक अना मोसे को नियम को गुरु ना ओला धरन लाई सिपाही धाड़िन। 33तबा यीसु ना कहीस, “मी काही बेरा तुम्हरो संग सेव, तबा मि आपरो धाड़न वालो परमेस्वर को जवर चलो जाहुँ। 34तुमी मोला ढुँढ-ढाँढ#7:34खोज करो करहो, पर मि तुमला नही मिलुँ, काहेका मि जिता जासू, वहान तुमी नही आय सकसो।”
35यहुदी अधिकारी आपसी मा कहिन, “उ किता को जघा ला जासे का हमी ओला नही पायबिन?” का उ युनानी नगर ला ता नही जासे का वहान तितिर-बितिर रव्हन वाला यहुदी गीनला, युनानी मा सिक्सा सांगेह? 36यो गोस्टी को का मतलब से? का उ कव्हसे का तुमी मोला तपासो पर नही पायबिन, अखिन जिता मि जाहु उता तुमी नही आय सकबिन।
जिन्दगी को पानी को नद्दी
37तिहार को आखरी दिवस मा यीसु उभो हुयो, अना जोर लक कव्हन लगयो, “जोन कोनी भी तहान होय, उ मोरो कठा आयेत।” 38जोन कोनी बिस्वासी होयके मोरो मा लक पिहे, पवितर गिरंथ मा असो लिख्यो से, ओको भितर लक जिंदगी को पानी को झरना#7:38धारा बोह जाहेत। 39यीसु ना यो गोस्टी पवीतर आतमा को बारे मा साँगयो होतो, जेनला ओको पर भरोसा ठेवन वालो पावन वालो होतीन। काहे की पवीतर आतमा अबा तकन नही उतरयो होतो। काहे की यीसु आपरो महिमा अबा तकन नही भेटयो होतो।
40भीड़ मा लक काही लोकहुन ना यीसु ला यो कव्हत आयकिन अखिन कहिन, “यो मानूस ता वाकई मा भविस्यवक्ता आय!”
41अना दुसरो ना कहिन, “उ ता मसीह आय!”
पर कोनी-कोनी कव्हन लगीन, “का मसीह गलील नगर लक आहेत?” 42का पवितर गिरंथ मा यो लिख्यो से? का मसीह दाऊद को खानदान, बैतलेहम गाँव मा जलम लियो, अना दाउद को नगर लक आहेत, जहान दाऊद रव्हत होतो। 43तबा असो गोस्टी को कारन लक, भीड़ मा फुट पड़ गई। 44उनमा लक काही लोकगीन ओला धरनो चाव्हत होतीन, पर वा कोनी को हात मा नही आयो।
यहुदी मुखिया को अबिस्वास
45जबा सिपाही वापिस होयके मुखिया याजक अना मोसे को नियम को गुरू जवर आइन। तबा उनना सिपाही लक पुसिन, “तुमी काय लाई ओला नही आनयत?”
46सिपाही ना साँगिन, “आज तकन आमिना ओको जसो कोनी मानूस ला गोस्टी करता नही चोया!”
47मोसे को नियम को गुरू गीनना उनला कहीन, “का तुमी भी भरमाया गया सेव?” 48कोनी भी यहुदी मुखिया अना मोसे को नियम को गुरू गीनना ओको पर भरोसा नही करीन? 49यो लोक जोन मोसे को नियम नही जानासेति वय सापित सेति।
50नीकुदेमुस जोन पुढा वोको जवर आयो होतो, उ उनमा लक एक होतो, उनला कहीस। 51का आमरो मोसे को नियम मा, असो नही लिख्योसेत? का जबा तकन वोको बारे मा यो जान नही लेव, उ काजक करासे, कसो दन्ड ठहरायो जाहेती?
52ओन्हीसिन ओला जवाब देईन, का तु भी गलीली सेस? तू ढूढ-ढान्ड कर अना खोज, का गलील मा कोनी भविस्यवक्ता भयो से? 53तबा वय सब वहान लक आपरो घर ला चली गईन।
Επιλέχθηκαν προς το παρόν:
योहन 7: NTPSP23
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The New Testament in Powari Language © The Word for the World International and Powari Madhya Pradesh, 2023.