Lucas 17
17
Ca caracat wa, je pain ca om mana' caracan xijexi' pain ca ara cup xijexi' quem
Mateus 18.6-7; Mateus 18.21-35; Marcos 9.42
1Tomi' pan ac cocon na co taxipa' ca Jeju: Ma' paxi' na oro carawa ca to' caracat nain ca wari' wa ca', je cwerein mao na. Ane ximin tamana pan ta' ca wari' co to' caracat non win ma' ca ne. Wap tamana pan toron Iri' Jam ta. 2Mo xi tucu xine iri' cote ne pacun ca mam' ep xine trigo pain paramacon ma', mo xi xin pocom mi' tocwa pain cote ne com quem, jain jain pije' ac ca xira. Pain ca to' caracat con wari' co an xiho' non pije' co om hwara' opa ma' iri xira ne, mija tamana pan ac ne xira ca jain jain ca pain ca wap ton con Iri' Jam ta tata. 3Ma' tara xumuhu', xuruxut xo' je ta ac tococwa na quem.
Je ca tomi' xuhu' ca', tomi' inem con win howa ma co caracat ma' ac tococwa na. Mo ta caracat ca, mo ta ara cup quem, tomi' xo' ac mon tara. Mo ta cwirin' pin ca, je i ma' ta, mana' mana' om pin inem pain ca caracat nem ac mon tara. 4Mo ta ara cup quem, mo ta ara cup mami' quem quem, mo ta ma' 7 pin ne ca ara cup mami' quem, pain ca xica' pe nein xec quem. Mo ta ma' 7 pin ne ca in hwet quem, mo ta tomi' ca' quem: Caracat ina, cwirin' pin inain ca ara cup xim ca', mo ta tomi' ac i ma' quem. Je i ma ta, mana' mana' om pin inem pain ca caracat nem ta ac mon tara ta na ca tomi' tococwa na.
Ca howa xun Jeju
5Tomi' ac cocon na Jesus oro apóstolo ma': Howa paxi' urut pum Taramaxicon nuxut. To' hwara' pin rain ca howa nuxut quem me na ca tomi' cocon ma'.
6Je i ma' ira ac tococwa na. Noro jein wijimain tocwi mostarda ma'. Iri' wijimain na. Iri' wijimain ac i ma' paxi' tara ca howa nuhu' quem. Je i ma' ira, mo ta howa wijimain e' mahu', ha' ac cuhu' tara pain ca tomi' ca' hwein pana ma': Hot pin xijem, oin' pe xijem pain cote ne com ta, ac i ma' tara ca tomi' hwein. Tomi' ha' ac cuhu' tara quem na ca tomi' tococwa ma'.
Ca taramaja mi' e' xun Iri' Jam
7Je ca tomi' xuhu' ca' ac tococwa na, tomi' inem pain ca ma' ca wari' co taramaja mi' e' nem ma'. Am taramaja pe cain totam, am querec wet cain ovelha nem. Pi' pin iri tara ca taramaja nucun ne, in qui' iri tarain xirim ne, tomi' ac i ca' ton ma ra: Hap ra, xao pe rain i ca', cao' ra, ac i ma' tara ca tomi' mon ra? 8Om na, om ta tomi' ac i ma' mon ta. Ca' tara ca tomi' mon: Hoc mi' ne pain carawa ca cao' wa, pe xo' ac mon tara wom, xat pe ho' ac mapa' tara pain ca cao' ta' ta' ca', je pain ca toc ta' ta' ca' ac mon tara. Pi' pin iri tara ca cao' ne ca' ne, cao' pan ac ma tara, toc pan ac ma tara, ac i ma' tara ca tomi' mon ma'. 9Cain' cain' ton ma pain ca ara ara pi' pin cain oro ca taramaja nucun ca ara ra mon quem? In ac inem pain ca taramaja nem ma', tomi' querec te inem pain, ac i ma' tara ca tomi' ton ma ra? Om na. Xi wara tomi' ha' ne ara mon ta, je ca na e' ne pain ca tomi' ha' quem ma'.
10Je ca tomi' xuhu' ca', ac i ma' tara pain ca taramaja nuhu' ma' quem, pain ca taramaja mi' hun Iri' Jam ma' ac tococwa na. Ara ara pi' pin iri jein oro ca taramaja nuhu' ca ara je cuhu' ne, na e' na pain ca tomi' ca' xujuhu': Je i ma' ira, taramaja mi' e' urun Iri' Jam ma', na e' na pain ca tomi' ha' xun pain oro ca ara je capari' ca', ac i ma' tara ca tomi' xujuhu' ta na ca tomi' tococwa ma'.
Ca 10 caca co quep xio pin wawa pain caji nan
11Mama' xin Jerusalém ta ac ca na Jeju ma', mama' ac caca na. Xuruxut nanain wana ca ac mao nain cacarain Samaria je Galileia ma'. Pe nain quiricon xina Samaria ma', pe nain xijein quiricon Galileia ma', xuruxut mama' nanain wana ca ac nain ximijain. 12Tan' mama' iri nanain ca paric to ne xirim ma' ne, xuruxut qui' ac caca na co ma' nonon caji nan. Ma' 10 nana wari' co ma' nonon caji nan. Om ca wixicam cocon, mo mo to ca' nonon. 13Merem mip ac caca na: Jeju. Taramaxicon co ca' na taxipa' capijacon Iri' Jam nana. Xiram pa' xut na ca merem mip caca ma'.
14Querec iri tata ne, tomi' ac tococwa na: Jein hwet jujun oro sacerdote co taramaja to nanain cote ne xiricon Iri' Jam cain. Noro jein curuxut ca' ac huhun tara na ca tomi' tococwa ma'#17.14 Je cwerein cocon oro judeu pain cara pane. Ma' na ca xirao' xo' nucun Moisés con wari' co ma' non caji nan. Aram aram om pin iri na oro nan nucun ne, na e' na pain ca hwet con sacerdote co taramaja pe nain cote ne xiricon Iri' Jam. Noro rain cwere ca' ac con na. Am xio pin ta' ca', noro xo' ne me. Mo ta querec pin' mapa' pain ca xio pin ne ca', tom tain' mi' ac mon pain tara carawa ne Iri' Jam me, querec pin' ac cacapa' tara oro wari' pain ca xio pin ne ca' quem, ac i ma' na ca tomi' con sacerdote pane..
Mama' ac caca na. Pain ca xuruxut xuruxut wet nucucun ma', om pin nonon caji nan. To' xio pin tata.
15Querec pin' querec pin' pi' pin paxi' xucucun pain ca xio pin caca ma', ane ma' xica' pe ca co in hwet non Jeju ne. Tomi' querec te tamana na, merem mip na pain ca awi na Iri' Jam awi na Iri' Jam ta ca ma'. 16Pe torotop mi' ac con na pain caximacon. Tomi' querec te tamana inem pain ca to' xio mapa' ca' ac con na. Co ma' co to' xio wa ma', om ca judeu ca. Wari' nein Samaria na.
17Cain' cain' xira quem ac ca na Jeju. Om ca ma' 10 caca co to' xio pin ta' quem? Main ca to caca oro xucucun ma' quem, co ma' 9 nana ma' quem? 18Je xi in hwet cacapa' quem? Je xi an hwet cacain ca tomi' querec te nucucun pain ca awi na awi na cocon Iri' Jam quem? Xica' pe na co cwa', co tatirim cwa', xica' pe na co cwa' co in hwet napa' cwa'. Xica' pe na co cwa' co an hwet nain ca tomi' querec te nucun pain ca awi na Iri' Jam awi na Iri' Jam ta ca ca' na ca tomi' tococwa ma'.
19Tomi' ac con na co xio pin ma': Tequi' pe ra e', mao ac ma tara. Xio pin ma, xi om ne ca howa ara mapa' pain ca to' xio taxi' ta' ca' na ca tomi' con ma'.
Ca taramaxicon pe ho' xim capari' Iri' Jam
Mateus 24.23-28; Mateus 24.37-41
20Maqui' ac ne na xec pain ca tomi' querec cocon Jeju oro fariseu ma'. Ma' xec ca taramaxicon pe ho' xim capari' Iri' Jam quem na ca tomi' querec cocon ma'.
Xi ma' ne ca querec pin' ac xine xec pain ca taramaxicon pe ho' xun tococwa oro wari' ta ac tococwa na. 21Om ta querec pin' xine iri' maxinain ca taramaxicon pe ta' ca quem. Om ta tomi' ac caca wari': Co cwa' ta, pe nain i ca', om ta tomi' ac i ma' ac caca. Mon cwain, pe nain i cain, om ta tomi' ac i ma' ac caca quem. Xi wara taramaxicon pe ho' ara cuhu' ta na ca tomi' tococwa ma'.
22Tomi' ac tococwa na co taxipa' ca ma': Main maqui' tara oro xec pain ca coromicat xim mahu' pain ca Iri' Wari' ta' ca'. Wara maqui' xira na urut pain xec nein ca querec xim urut pum pain ca Taramaxicon pin ta' ma ma', ac i ma' paxi' tara ca jain jain xim mahu'. Ane om maqui' hap ta' ne xec nein ca Taramaxicon pin ta' ta' ne. 23Tomi' ca' tuturuhu' oro wari': Mon cwain, pe nain i cain, ac i ma' tuturuhu'. Tomi' ca' tuturuhu' oro xucucun ma' quem: Mon cwa', pe nain i ca', ac i ma' tuturuhu'. Ta howa huhun me, ta ja' tequi' hap huhun pain ca querec xi' e' huhun me. 24Maqui' ta' iri tara xec nein ne, pain ca in qui' ta' ta' pain ca Iri' Wari' ta' ca', ane ane maqui' ac ta' tara, querec querec pi' pin tatarapa' oro wari' pain oro xijein macan'. Win ne ca ane ane coc wein ca comerem ma', pain ca coc wein qui' cain pira pain quirinain pawin cain, ca coc wein mao ac cain na xijein quirinain pawin cain quem, ac i ma' ta' pain ca maqui' hap ne ta. Querec querec pi' pin tatarapa' oro wari' ta. 25Ame hwe e' ac tococwa na. Na e' na pain ca jain jain cain' ta'. Jain jain tamana ta'. Oro wari' co e' e' wet nana pain xocori ca', noc tatarapa' quem.
26Ac pain oro xec nein ca e' e' wet ca Noé cara pane tara, ac i ma' tara pain oro xec nein ca in qui' ta' ne ca', pain ca Iri' Wari' ta' ca' ac tococwa na. 27Noro jujun oro win ma' ca Noé pane. Ara e' nanain oro ca ara taxipa' caca oro wari' pane. Co cao' nana, co toc nana, co cut nana narima', co cut nana tarama' pain ca narima' nequequem ma' quem. Ac i ma' ac i ma' nana, om om maqui' pa' ac cocon na xec nein ca corom cain mam' horoho wa Noé cacam oro ca nari nucun pane. Pan' tamana ac ne na cote ne xowi', to' om to' om pi' pin ac tococwa na oro wari' co om corom to nanain mam' horoho wa, je oro carawa ca om corom ma' quem.
28Ac i ma' na pain oro xec nein ca e' e' wet ca Ló cara pane quem. Oro win ma' ca pane, ara e' nanain ca ara taxipa' caca oro win ma' caca pane. Co cao' nana, co toc nana, co cut nanain carawa, co vender nanain quem, co oin' nanain xitot, co quep nanain xirim. 29Maqui' pin iri na xec nein ca paca' cain cidade ca to caca Ló pane ne, je Sodoma pane, camara' qui' ac nein na pawin xe je pacun ca weo pane. Ac xowi' na pain ca camara' qui' nein pawin. To' om to' om pi' pin ac tococwa na oro wari' co om paca' nanain Sodoma pane.
30Ac i ma' tatara oro wari' pain xec nein ca in qui' ta' ne quem. Om ta maqui' ca ma' tatarapa'. Ara ara e' tatarain oro ca ara taxipa' caca ma', ane ane hwet pa' ac toton tara. Wata' pain ca Iri' Wari' ta' ca', ane ane hwet pa' ac toton tara ta. 31Maqui' iri tara xec nein ca maqui' ta' ta' ne, mo mao hap e' tara wari' co hwet pe ca' nain xiricon. Om ta na ne pain ca corom in mao cain xiricon pain ca cut tain cain caramaxicon ca corom to nain. Mo mao hap e' tara ta. Ac i ma' tara wari' co pe nain totacon ma' quem, om ta na ne pain ca in mao cain xiricon, mo mao hap e' tara ta. 32Mam' pe wet jem manacon Ló cara pane#17.32 Pain ca tomi' ha' harahap xine me tococwa ma', tomi' mi' nonon con Ló cam manacon cacam mana panxica pane. Ta an xiho' hwem manacon pain ca om tomi' ha' cama pane tata. Ta in querec in hwe me ta paxi' tata pane, ane in querec in cama manacon ne. Mi' pin ac cama na. Mi' tequi' pe na, sal pin ac ne na cwerequem. Xat ac cama ma' na pane. . 33Wari' co win xumu e' tain nain ca param pan nucun pain macan' ca', om ta e' cara pe cain pawin ta. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', wirico tara co e' cara pe tain nain pawin ta. 34Je ca tomi' xuhu' ca' ac tococwa na. Mo ta in qui' towa ta', am ma' 2 caca co pi'am to ho' xucucun ma'. An mao ac tocwa tara xucun, an pe pin ac tocwa tara xucun. 35Am ma' 2 cacama oro narima' co ep wi nana. An mao ac tacama tara xequem, an pe pin ac tacama tara xequem quem. 36Am ma' 2 caca co taramaja to nanain xitot. An mao ac tocwa tara xucun, an pe pin ac tocwa tara xucun ma' quem na ca tomi' tococwa ma'.
37Tomi' querec ac cocon na co taxipa' ca ma': Main quem Taramaxicon nuxut? Ca tomi' nem ca' ne, main xi ara pe ne quem nonon.
Om na, win ne pain ca mi' pin pe nein mahweri carawa ma' ac tococwa na. Taxi' taxi' pi' pin nanain oro wari'. Xi om ne ca cut in to cut in to ara cain i ma' maho ta na ca tomi' tococwa ma'.
Επιλέχθηκαν προς το παρόν:
Lucas 17: TBPN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright 2023 Missão Novos Tribos do Brasil