Yohanes 16
16
Yesus mihi somangat kawan murid-Eh ina horoholuh porocaya ma-Are
16:1-4a
1Akuh mantun kokon aang cioh ina ikan aroko umbot porocaya ma-Akuh. 2Angar oko kawan dulun co ngosiit ikan umba hokumpur bat ponah lopo ika sombayang dulun Yahudi. Waktueh angar dombut, kawan dulun co ngompatoi ikan angar bopikir iroh molayani Mohotara ma alogawi taiyoh. 3Iroh angar umpi kokon iyoh awi iroh aroko nyono Tamang-Kuh atawa Akuh. 4aTapi makitu Akuh mantun kokon iyoh ma ikan ina kotika aang taiyoh tojadi, maka ikan angar mingkat bahawa Akuh ocop maraeh ma ikan tintun aang taiyoh soun ma iyoh.”
Gawin Roh Mohotara
16:4b-15
4b“Hiah waktu ikan molai umba Akuh, Akuh aroko mara ikan tintun kawan aang taiyoh. Awi, Akuh incah hokohalo ma ikan. 5Tapi makitu Akuh angar hopuli hia Tamang-Kuh co ocop nyoruhan Akuh. Oluco sanioh, arelu oko ingkan ikan co ngisok ma-Akuh, ‘Hia omoh Iko tulak?’ 6Poko tului iyoh, atoi me jorung lau tului Akuh mara ikan tintun kawan aang taiyoh. 7Tapi sobujur eh, meleh pio indam me amun Akuh tulak. Antun-Kuh yoh bujur! Awi, amun Akuh aroko tulak, maka Roh Pondohop aroko angar dombut hia ikan. Tapi amun Akuh tulak, maka Akuh angar nyoruhan Are hia ikan. 8Waktu Are dombut, Are angar umpi kawan dulun nyan dunia tohoku: tintun dosa, tintun ome co buah, hintang tintun hukuman Mohotara. 9Are angar umpi iroh tohoku tintun dosa, awi iroh aroko porocaya ma-Akuh. 10Are angar umpi iroh tohoku bahawa Akuh bujur awi Akuh hopuli hia Tamang-Kuh paluh ikan aroko kito Akuh bat. 11Are angar nguan iroh tohoku tintun hukuman Mohotara awi lacan setan co monguasa dunia tuh ocop tomohukum.
12Akuh incah oko orong aang ika tomara indam me. Makitu, ikan arinai sangup norimaeh. 13Tapi, hiah waktu Roh Mohotara dombut, Are angar dohop ikan ina paham kokon aang co bujur. Awi, Are aroko angar hapo antun ingkan arop-Eh tarop, tapi Are angar porapot antun co tongoneh-Eh ingkan Tamang-Kuh. Are mahi angar mara ma ikan kawan aang co angar tojadi nyan ondo pongaan. 14Are angar porapot ma ikan antun co tonorima-Eh ingkan Akuh. Ma cara cioh, Are angar porahan Akuh korinah tohormat. 15Kokon aranaang co tioh Tamang-Kuh iyohco ta-Kuh ka. Iyoh tuluieh Akuh mantun: Roh Mohotara angar porapot ma ikan antun co tonorima-Eh ingkan Akuh.”
Kojorung co tonongkomo murid Yesus daai angar tonganti ma kojorih
16:16-33
16 Yesus mahi Mantun, “Sonyulu oni, ikan aroko lian kito Akuh, tapi sonyulu oni opah iyoh ikan angar noto Akuh kole.”
17Ngoneh iyoh, pira-pira murid Yesus mantun ico ma co bokon, “Ome maksut eh Are mantun ma ito, ‘Sonyulu oni, ikan aroko lian kito Akuh, tapi sonyulu oni opah iyoh ikan angar kito Akuh kole?’ Ome maksut eh ka Are mantun, ‘Awi Akuh tulak hia Tamang-Kuh?’ ” 18Iroh horoholuh ngisok, “Ome maksut-Eh, ‘Sonyulu oni?’ Ito aroko paham antun-Eh.”
19Yesus monau bahawa iroh nyau ngisok ma-Are tintun kawan aang taiyoh. Jadi, Are mantun, “Niin Akuh mantun, ‘Sonyulu oni, ikan aroko lian kito Akuh. Tapi sonyulu oni opah iyoh ikan angar kito Akuh kole.’ Onon pai co tomander nyan halo ikan? 20Ngoneh ehboh! Tuu bujur co tomantun-Kuh tuh: Sonyulu oni ikan angar nangih hintang nohuang tului ome co angar tojadi ma-Akuh. Tapi kawan dulun nyan dunia tuh co aroko porocaya, iroh angar jorih. Mula ikan angar jorung lau, tapi kojorung cioh angar tokalik jarin kojorih. 21Aang cioh isan bawe co nganak. Hiah waktu are jere nganak, are jorung awi koporoh eh. Tapi opah are nganak anak eh, aroko ingkat eh bat are ma koporoh eh yoh. Tului, are jorih ma anak ua co ocop tonganak nyan dunia. 22Sanioh ka ma ikan. Makitu ikan jorung. Tapi Akuh angar sopopak kole ma ikan. Nyan waktu cioh, atoi me angar jorih. Arelu oko ico dulun mahi co lian monu kojorih me yoh. 23Nyan waktu cioh, ikan aroko angar ngisok ome-ome bat ma-Akuh. Ngoneh ehboh! Tuu bujur co tomantun-Kuh tuh: Tamang-Kuh angar mihi indam me ome bewe co tonyawot me ma-Are ponah arang-Kuh. 24Dapot makitu, ikan arinai nyawot ome-ome ponah arang-Kuh. Nyawotleh, maka ikan angar norima. Ikan angar norima ina kojorih me jarin somporaka.
25Akuh mantun kokoieh non ma ikan hapo tindung. Tapi angar dombut kotikaeh Akuh aroko bat mantun ma ikan hapo tindung. Akuh angar hopander sak rak tintun Mohotara Tama. 26Hiah waktu cioh, ikan angar nyawot ma Tamang-Kuh ponah arang-Kuh. Akuh aroko porulu nyawot ingkan Tamang-Kuh indam me. 27Awi Tamang-Kuh leh tomongasi ikan, tului ikan ocop mongasihi Akuh hintang porocaya, bahawa Akuh dombut ingkan Mohotara. 28Akuh borasar ingkan Tamang-Kuh hintang dombut hia ponah dunia. Tapi, sonyulu oni, Akuh naat dunia tuh paluh hopuli hia Tamang-Kuh.”
29Paluh, kawan murid-Eh mantun, “Wah, Makitu Iko bopander sak rak, aroko hapo tindung. 30Makitu, kaih monau bahawa Iko monau kokon aranaang. Iko aroko porulu dulun ngisok ome-ome ma-Iko awi ocop koraom-Mu ome co angar tongisok doh. Awi iyoh, kaih porocaya bahawa Iko dombut ingkan Mohotara.”
31Hien Yesus ma iroh, “Mainboh ikan porocaya makitu? 32Porhatiehboh! Daai angar dapot kotikaeh, malah ocop dapot kotikaeh yoh, ikan angar topisah darai. Ikan angar buli hia lopo hopomasing, naat Akuh tarop. Tapi, sobujur eh Akuh aroko tarop awi Tamang-Kuh oko halo-Akuh. 33Akuh mantun kokoieh non ma ikan ina me oko kongolandah kongolami awi ikan hokohico ma Akuh. Ikan angar mondorita nyan dunia tuh. Tapi, tabah lehboh atoi me! Akuh ocop pokalah kuasa nyan dunia tuh!”
Επιλέχθηκαν προς το παρόν:
Yohanes 16: TBSS
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε