Yohanes 7
7
Antun Yesus kotahin Moraya Ondo Bahai Tonyuap Doun
7:1-52
Yesus kuloi kotika kawan konduang-Eh nyuhu Are porahan Arop-Eh
7:1-9
1Opah iyoh, Yesus nyolana koliling propinsi Galilea. Are aroko kolu hia derah Yudea tului kawan pomimpin agama Yahudi nyan idi nyau ngompatoi Are. 2Hiah waktu iyoh, ocop jonyo ondo bahai dulun Yahudi, iyohonon Moraya Ondo Bahai Tonyuap Doun. 3Kawan konduang Yesus mantun ma-Eh, “Tulakbat ingkan intoi. Mahah Yudea ina kawan murid-Mu lian noto kawan aang co mosotahir co tongompiam Mu. 4Amun ico dulun nyau jarin botarung, are aroh nguan alogawi socara tonih-tonih. Jadi, amun Iko nguan aang co mosotahir, porahan arop-Mu ma kokon dulun nyan dunia.” 5Kawan konduang-Eh mantun sanioh, awi iroh mahi tonyata aroh porocaya ma-Are.
6Hien Yesus ma iroh, “Waktu co tonantu Mohotara indang-Kuh arinai okot. Tapi horoholuh oko waktu co tangar indam me. 7Kawan dulun nyan dunia arelu oko alasan ika dolee ikan. Tapi iroh dolee Akuh awi Akuh horoholuh mara ma iroh bahawa alogawin doh jahat. 8Ikan leh tulak hia pesta cioh. Akuh aroko tulak hia intin awi incah arinai waktueh indang Kuh.” 9Isanioh boh Yesus mantun ma kawan konduang-Eh, hintang Are nukui nyan Galilea.
Yesus tonih-tonih tulak hia Yerusalem
7:10-13
10Tapi, opah kawan konduang-Eh tulak hia pesta cioh, paluh Are tulak ka, tapi Are tulak arelu oko dulun co monaueh. 11Kawan pomimpin agama Yahudi nganyap Are nyan pesta cioh. Hien doh, “Nyan omohboh Dulun cioh?” 12Dulun ngarun molai hotosinok tintun Are. Oko co mantun, “Are dulun co pio atoi.” Tapi co bokon mantun, “Are aroko pio! Are nyasat dulun orong.” 13Tapi, arelu oko dulun co bohanyi bopander sak rak tintun Are tului iroh takut ma kawan pomimpin agama Yahudi.
Antun Yesus bujur-bujur ingkan Mohotara
7:14-24
14Hiah dahat pesta cioh, Yesus muntam hia lopo Mohotara holuh majar nyan intin. 15Kawan pomimpin agama Yahudi hurong lau. Hien doh, “Maindeoi Dulun cotuh boraoi orong aang co tomonau? Podahar Are aroko umba sokulah Hukum Torat.”
16Useh Yesus ma iroh, “Ajaran-Kuh aroh borasar ingkan arop-Kuh tarop, tapi ingkan Mohotara co nyoruhan Akuh. 17Uras dulun co kolu nguan kojere Mohotara, iroh angar monau amun ajaran-Kuh bujur-bujur ingkan Mohotara, atawa baya ingkan arop-Kuh tarop. 18Dulun co majar ma antun dolang ingkan arop eh tarop, are baya nganyap hurmat indan arop eh leh. Tapi dulun co nganyap hormat indan Are co nyoruhan eh, dulun cioh bujur. Arelu oko co sala nyan arop eh. 19Musa ocop mihi porentah hintang poraturan Mohotara indam me nyan Hukum Torat. Tapi aroko ico mahi dulun nyan halo ikan co nuhit eh. Kura ikan nyau ngompatoi Akuh?”
20Dulun ngarun yoh museh, “Iko tonyarung setan! Ome co nyau ngompatoi Iko?”
21Useh Yesus ma iroh, “Bopira waktu co ohut, Akuh baya nguan ico alogawi hiah ondo Sabat, paluh kokom me hurong. 22Musa mihi ikan poraturan ika hobalak. (Sobujur eh, poraturan cioh bokon ingkan Musa tapi ingkan tatu hiang to sorinai Musa.) Oluco ondoeh ika hobalak tangar nyan Ondo Sabat, ikan tenden nguan iyoh. 23Amun ikan sobulih malak nyan Ondo Sabat, ikan nguan iyoh ina ikan aroh molangar poraturan Musa yoh. Jadi, kura ikan sangit ma-Akuh kotika Akuh pomambuh ngolauh betin ico dulun nyan Ondo Sabat? 24Aroh mutus dulun sala atawa buah ma ome co leha, tapi mutus dulun ma kosucing.”
Dulun ragu amun Yesus iyohco Laca Co Tomonjanji Mohotara
7:25-36
25Opaiyoh, pira-pira dulun Yerusalem mantun, “Mositi dulun cotuh iyohco dulun co nyau tongompatoi kawan pomimpin to? 26Tapi, porhatieh! Bebas leh Are bopander nyan muka umum. Iroh aroko mantun ome-ome naleh Are. Mainbat iroh ocop monau bahawa Are iyohco Kristus, Laca Co Tomonjanji Mohotara? 27Tapi waktu Kristus dombut, arelu oko ico dulun mahi co angar monau ingkan omoh asar-Eh. Tapi kokon to monau ingkan omoh asar Dulun cotuh.”
28Jadi, waktu Yesus majar nyan polontaran Lopo Mohotara, Are mantun ma suara muhat, “Ikan nyono Akuh, hintang ingkan omoh asar-Kuh! Tapi Akuh aroko dombut ma kojere-Kuh tarop. Akuh tonyoruhan Are co bujur. Ikan aroko nyono Are. 29Tapi Akuh nyono Are awi Akuh dombut ingkan Are. Areboh co nyoruhan Akuh.” 30Tului iyoh, iroh bousaha nawan Yesus, tapi arelu oko ico beti mahi co lian umpi ome-ome ma-Eh, awi waktu co tonukas Mohotara indan iyoh arinai okot.
31Tapi, nyan halo dulun ngarun yoh oko orong co porocaya ma Yesus. Hien doh, “Are tuh ocop umpi orong aang co mosotahir. Mainboh Kristus lian nguan meleh orong aang co mosotahir kole waktu Are dombut?”
32Bopira pomimpin agama Yahudi ingkan kolompok Parisi ngoneh dulun ngarun hotosinok nain iyoh tintun Yesus. Jadi, iroh samah-samah ma kawan imam kopala nyuhu pira-pira ponjaga Lopo Mohotara ina tulak nawan Yesus. 33Jadi, Yesus mantun ma dulun ngarun, “Baya sonyulu oni Akuh halo ikan. Opah iyoh, Akuh angar hopuli hia Are co nyoruhan Akuh. 34Ikan angar nganyap Akuh, tapi ikan aroh angar nyopopak Akuh. Tului, ikan aroko lian dombut hia ika Kuh nukui daai.”
35Tului iyoh, kawan pomimpin agama Yahudi mantun ico ma co bokon, “Are nyau tulak hia omoh dapot ito aroko boraoi sopopak ma-Are? Mainbat Are bomaksut ika tulak hia kawan dulun Yahudi co nukui nyan kawan derah bokon, nyan halo dulun Yunani, paluh majar mara dulun Yunani? 36Omebat maksut waktu Are mantun, ‘Ikan angar nganyap Akuh, tapi ikan aroko angar nyopopak Akuh. Ikan aroko hegah dombut hia ika Akuh oko daai.’?”
Yesus samah isan danum co mihi kobolum
7:37-44
37Ondo tontiput porayaan Ondo Bahai Tonyuap Doun yoh ocop dapot. Iyoh ondo co poko penting nyan porayaan cioh. Nyan polontaran Lopo Mohotara, Yesus tonjok paluh mantun ma suara muhat, “Akuh mantun ma kokon dulun co haus, dombutleh hia-Akuh ika ngorih! 38Sika dulun co porocaya ma-Akuh, are samah isan antun cotuh co tonulih nyan Surat Borasih: ‘Kawan talet danum co mihi kobolum angar nalet ingkan ponah atoieh.’ ”#7:38 Ayat ingkan kitab suci co tomaksud Yesus oko orong komongkinan: Yesaya 44:3; 55:1; 58:11; Yeheskiel 47:1-12; Yoel 3:18; Jakaria 13:1; 14:8; Koluaran 17:6; Bilangan 20:11. 39(Ma antun cioh, co tomaksut Yesus iyohonon Roh Mohotara. Kokon dulun co porocaya ma Yesus angar norima Roh Mohotara. Tapi hiah waktu cioh, Roh Mohotara arinai dombut hia iroh awi Yesus arinai nukat hia sorga hintang arinai tomihi kohurmatan pian Mohotara.)#7:39 Maksud nyan ayat cotuh, Yesus arinai topohunyung nyan kaju sompolaki atawa Yesus arinai tomohi kohurmatan hia ika co bokuasa nyan Sorga.
40Orong dulun ngoneh antun Yesus yoh. Oko pira-pira co mantun, “Mositi Are tuh iyohco Nabi cioh co tonundui to!” 41Co bokon mantun, “Mositi Are tuh iyohco Kristus, Laca cioh Co Tomonjanji Mohotara!” Tapi co bokon kole mantun, “Bokon! Kristus yoh aroko dombut ingkan Galilea isan Are! 42Surat Borasih mantun bahawa Kristus iyohco koturunan Laca Daud. Surat Borasih mahi mantun bahawa Kristus angar dombut ingkan lowu Betlehem, lowun tukui ika Daud.” 43Jadi, oko kohokoleang nyan halo dulun ngarun yoh tintun Are. 44Nyan songkolang kawan dulun taiyoh oko co jere nawan Are, tapi aroko ico mahi co lian nawan-Eh.
Orong pomimpin dulun Yahudi aroko porocaya bahawa Yesus ingkan Mohotara
7:45-52
45Kawan ponjaga Lopo Mohotara taiyoh dombut hopuli. Kawan imam kopala hintang kolompok dulun Parisi yoh mantun ma iroh, “Kura ikan aroko mehen Are hantoi?”
46Kawan ponjaga taiyoh museh, “Aroko inai piji oko dulun co majar mara isan are!”
47Kawan dulun Parisi mantun ma iroh, “Mainboh ikan mahi tonyasat piai-Eh?” 48“Arelu oko ico beti mahi nyan halo kawan pomimpin atawa dulun Parisi co porocaya ma-Eh! 49Tapi dulun ngarun tatuh co aroko nyono hukum Torat, Mohotara angar mohukum iroh!”
50Nyan halo iroh, oko dulun Farisi co araieh Nikodemus, co batuh piji dombut hia Yesus. Hien Nikodemus ma kolompok pomimpin taiyoh, 51“Monurut Hukum Torat, ito aroko boraoi mohukum ico dulun sorinai ito morisa Are, sorinai ito monau co tongompiai-Eh.”
52Useh doh, “Mainboh iko mahi ingkan Galilea? Mombaca Surat Borasih nyan idi iko angar monau bahawa arelu oko nabi co angar dombut ingkan propinsi Galilea!”
Bawe co umpi dosa hokoruh
7:53–8:11
53Opah poristiwa cioh, kokon doh buli hia lopo hopomasing.
Επιλέχθηκαν προς το παρόν:
Yohanes 7: TBSS
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε