यूहन्ना 15
15
यीसु साची अंगूरो री वेल
1“साची अंगूरो री वेल म्हैं हूं, अर म्हारा पिता किसान है। 2जिकौ डाळी म्हारै मांय है, अर वा नीं फळै, तो वे उणनै काट दैवै है, अर जिकौ फळै वो उणनै सांगै ताकी वो सुद्ध हो वळै फळ लावै। 3इण वचन रै खातर जिकौ म्हैं थांनै पैला ऊं कयौ सुद्ध हो। 4थै म्हारै मांय बणिया रैवौ, अर म्हैं थांरै मांय। ज्यूं कोई डाळी वेल मांय नीं बणयोड़ी रै, तो अपणै आप ऊं नीं फळ सकै। व्यौंही थै भी जे म्हारै मांय नीं बणिया रौला तो नीं फळ सकौ।
5“म्हैं वेल हूं, थै डाळियो हो। जिकौ ई म्हारै मांय बण्यौ रैवैला अर म्हैं उण मांय वो अणूंतौ फळै ला। क्यूंकै म्हारै ऊं न्यारा होयनै थै कीं नीं कर सकौ। 6जे कोई म्हारै ऊं न्यारौ व्है, तो उणनै बेकार डाळी रै ज्यूं फेंक दियौ जावैला, अर वो सूख जावै। जद लोग उणनै भेळौ करनै लाय में नोख दैवै, अर वे बळ जावै है। 7पण जे थै म्हारै मांय बणिया रैवौ अर म्हारै वचन नै मांनौला, तो जिकौ चावौ वो मांगो अर वो थांरै वास्तै हो जावैला। 8म्हारै पिता री महिमा इण ऊं होवै है, के थै घणाहारा फळजौ, तो इज थै म्हारा चेला कहीजौ ला।
9“ज्यूं पिता म्हारै ऊं परैम राख्यौ, ऐड़ौ इज परैम म्हैं थांरै ऊं राख्यौ। अर म्हारा परैम मांय बण्या रैवौ। 10जे थै म्हारी आग्याओं नै मांनौला, तो म्हारै परैम मांय बण्या रैवौला, ज्यूं के म्हैं पिता री आग्याओं नै मानूं, अर उणारै परैम मांय बण्यौ रैवूं हूं।
11“म्हैं थांनै ऐ बातां इण खातर केई है, की म्हारौ आंणंद थांरै मांय बण्यौ रैवै, अर थौरो आंणंद पूरौ व्है जाय। 12#यूह 13:34; 15:17; 1 यूह 3:23; 2 यूह 1:5म्हारी आग्या आ है, की ज्यूं म्हैं थोरै ऊं परैम राख्यौ, व्यौंही ई थै ई एक दूजा ऊं परैम राखौ। 13इण ऊं मोटो परैम किणी रौ कोनीं, की कोई आपरै बेली रै खातर आपरौ जीव दैवै।
14“जिकौ आग्या म्हैं थांनै देवूं, जे मांनौ तो थै म्हारा बेली हो। 15अबै ऊं म्हैं थांनै दास कोनीं कैवूंला, क्यूंकै दास कोनीं जांणै, की उणरौ मालिक कांई करै है। पण म्हैं थनै बेली कयौ है, क्यूंकै म्हैं जिकौ बातां अपणै पिता ऊं सुणी, वे सगळी थनै बताय दीनी है।
16“थै म्हनै कोनीं चुणियो पण म्हैं थांनै चुणीया अर थांनै नियुक्त करिया के जायनै चौखौ फळ लावौ जिकौ थौरो फळ हमेसां बणियो रैवै, की थै म्हारै नाम ऊं जिकौ ई कीं पिता ऊं मांगो, वो थांनै दैला। 17म्हैं थांनै ऐ आग्या देवूं की थै एक-दूजै ऊं परैम राखौ।
संसार रौ बैर
18“जे संसार थांरै ऊं बैर राखै तो याद राखजौ की वे थांरै ऊं पैली उणै म्हारै ऊं बैर राख्यौ। 19जे थै संसार रा व्हैता, तो संसार अपणौ ऊं परैम राखतौ। पण इण कारण की थै संसार रा कोनीं, मतलब की म्हैं थांनै संसार मांय ऊं चुण लिया, इण वास्तै संसार थांरै ऊं बैर राखै है।
20 #
मत 10:24; लूक 6:40; यूह 13:16 “जिकौ बात म्हैं थांरै ऊं कही ही, ‘दास आपरै मालिक ऊं बढ़ौ कोनीं होवै,’ उण बात नै याद राखौ। जे उणौ म्हनै तंग करयौ, तो थांनै ई तंग करैला। जे उणौ म्हारी बात मांनी, तो थोरी भी मांनैला। 21पण ऐ सगळा म्हारै नाम रै कारण थांरै साथै करैला, क्यूंकै वे म्हनै भेजणे वाळै नै कोनीं जांणै। 22जे म्हैं कोनीं आवतौ अर उणौ ऊं बातां नीं करतौ, तो वे गुनेगार नीं व्हैता। पण अबै उणौरै खनै खुद रा पाप ऊं बचणै रौ कोई बहानो कोनीं है। 23जे कोई म्हारै ऊं बैर राखै, तो वो म्हारै पिता ऊं ई बैर राखै। 24जे म्हैं इता मोटा कांम उणौरै सांम्ही नीं करतौ तो ऐ पापी नीं ठैरता। पण अबै तो उणौनै उण कांमां नै देख दिया, तद भी वे म्हारै ऊं अर म्हारै पिता ऊं बैर राखै है। 25ओ इण वास्तै होयौ, की वो वचन पूरौ हो, जे उणरी व्यवस्था मांय लिख्योड़ौ हो, ‘वे बेमतळब म्हारै ऊं बैर राख्यौ।’
26“पण जद एक मददगार आवैला, जिणनै म्हैं थांरै खनै पिता री तरफ ऊं भेजूंला, अरथ सत्य री आतमा जिकौ पिता री तरफ ऊं निकळै है, जिकौ म्हारी गवाई दैला। 27अर थै ई म्हारा गवाई हो क्यूंकै थै सरूआत ऊं म्हारै साथै रिया हो।”
Επιλέχθηκαν προς το παρόν:
यूहन्ना 15: RWR
Επισημάνσεις
Αντιγραφή
Σύγκριση
Κοινοποίηση
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© NLCI CC BY-NC-ND 4.0