संत.मत्ती 13
13
बिहाईन हेरोई आला गाम
(संत.मरकुस 4:1–9; संत.लुकास 8:4–8)
1ईसु हेन हिला गी ओड़ाअ तरअः उडुंग केते, समुदर दौंड़ी रे सेन केते दुड़ूः नेनाय। 2#सं.लुका 5:1–3आउर हुनी दुबाःड़े नोकान होड़ तुन्दरा नेनाकु ची हुनी बड़े डाहा रे मियांड डोंगा रे रकाःब केते दुड़ूः नाय, आउर जामा तुन्दरा होड़ दौंड़ी रे तिंगु ताही नेनाकु। 3आउर हुनी हुंकू के ढेर कंहड़ी के गाम रे उदूः कु केनाय।
हुनी कंहड़ी लःअय, “आयुमेपे, मुसिङ मिहोंड़ बिहाईन हेरोई बिहाईन हेरोः उडुंग नेनाय। 4जब हेरोः बेरा थोड़ेक होरा दौंड़ी रे नुर नेना, होना के ओड़े हीःग केते, हलांग जोम केदाकु। 5आउर थोड़ेक बिहाईन सेरेंग ओत रे नुर नेना, होंड़े बगरा हास का-ताही नेना लःअय झट के ओमोन नेना। एता लःअय ची होनाःड़े गहीड़ जगुत हास का-ताही नेना। 6बकिर बोंगा तुर नेनाय, हिमीन रे सितोम रे कुंभलाव ना, आउर जाईर ते का-जारीयाव दाड़ी नेना लःअय रोहोड़ ना। 7थोड़ेक बिहाईन जानुम झुंड़ रे नुर नेना, आउर होना के झुंड़ हरा केते तेपेःड केदाय। 8बकिर थोड़ेक बिहाईन बेस ओत रे नुर नेना, आउर होना ओमोन हरा केते जो नेना, ओका साव गुना, ओका साईठ गुना, ओका तीस गुना हुयाव नेना।”
9“जेकर लुतूर एदनाअ हुंकू आयुमेपे।”
गाम रेनअः मतलोब
(संत.मरकुस 4:10; संत.लुकास 8:9,10)
10ईसु आलकु चेला हीःग केते हुनी के बेता लियाकु, “होड़कु के आम गाम रे एतान लःअय सिकछा एमा कुआम?”
11ईसु कंहड़ी लःअय, “आपे के सिरमा राईज रेनअः उकु उना बारे पापाड़ी लःअय बरदान भेटाव ताना, बकिर हुंकू के कोवान। 12#सं.मत्ती 25:29; सं.मर 4:25; सं.लुका 8:18; 19:26एता लःअय ची जेकर दुबाःड़े कटिःग केन एदनाअ, हिनी के गी आउर एमा कियाकु आउर हुनी दुबाःड़े ढेर हुयाव कोआ। बकिर जेकर दुबाःड़े एतान होः कनोआँ, जे हुनी दुबाःड़े एदनाअ हुनी तरअः होना के होः इदी केआकु। 13ईङ हुंकू के गाम रे सिकछा एमा कुईंग, एता लःअय ची हुंकू नेनेल रे होः काकु नेलेआ, आउर आ-आयुमे कु रे होः काकु आयुमेआ, आउर ना बुझाआकु। 14#जसा 6:9,10हुंकू रअः बारे रे इसायस आला नोःआँ आगमजानी पुरायोआ,
“‘आपे आ-आयुम कोआपे, बकिर एरपे बुझाआ,
आपे नेनेल कोआपे, बकिर आपे एरपे चिनहाया,
15एता लःअय ची नुकू होड़कु आला मन आरमोट ना,
आउर हुंकू लुतूर तरअः काकु आ-आयुम नामा,
नुकू आकु आला मेःड के जापिःड केदाकु।
कोवान दो हुंकू मेःड तरअः नेले केते,
आउर लुतूर तरअः आयुम केते,
मन तरअः बुझाव केते,
ईङ पखी मन रूवाड़े कु,
आउर ईङ हुंकू के चंगा कुईंग।’
16 #
सं.लुका 10:23,24 “बकिर आपे आला मेःड धनया एदनाअ, एता लःअय ची हुंकू नेलेआकु, आउर आपे आला लुतूर धनया एदनाअ, एता लःअय ची हुंकू आयुमेआकु। 17ईङ आपे के सचे बेताः दिपीईङ, ची जे बात के आपे नेल दापे होना के उकिन बगरा आगमजानी आउर धरमीकु नेनेल नाम केनाकु। बकिर हुंकू होना के काकु नेल दाड़ी लआ, आउर आपे जे कंहड़ी आयुम दापे, हुंकू होना के आ-आयुम नाम केनाकु, बकिर हुंकू काकु आयुम दाड़ी लआ।
बिहाईन हेरोई आला गाम रेनअः मतलोब
(संत.मरकुस 4:13–20; संत.लुकास 8:11–15)
18“आपे नहाअः, बिहाईन हेरोई आला गाम रेनअः मतलोब आयुमेपे। 19जदि जाहें राईज रअः वचन आयुमेआय, बकिर काय बुझाआ, तब हुंकू आला मन रे जे हेर लअः एदनाअ, होना के खपतान सैतान हीःग केते इदी गोअ तआय। हुंकू नुकू हेके, जे होरा दौंड़ी रे हेर लअः एदनाअ। 20जे सेरेंग ओत रे हेर लअः बिहाईन लकानाकु, जे परमेसर आला वचन आयुम केते, तुरते रिझते तेलायाकु। 21बकिर होना रे जाईर कनोआँ आउर हुंकू थोड़ेक दिन लःअय केटेःग ताहीनोआकु, आउर तयोम परमेसर आला कंहड़ी चलते सताव चाहे दुख बिपाईत हिजोआ, तुरते ठोकोर जेमेआकु। 22आधा होड़ जे रटपट झुंड़ ताला रे हेर लअः बिहाईन लकानाकु, हुंकू नुकू हेके, जे परमेसर आला कंहड़ी के आयुमेआकु, बकिर दुनिया रे जिवीडोः रेनअः सोंच-फिकिर आउर खरचा रअः मोह आउर एटाअ-एटाअ जिनीस रअः लोभ मन रे बोलो केते, परमेसर आला वचन के हरा तेपेःड गुल तआय आउर होना का जोयोआ। 23जे बेस ओत रे हेर लअः एदनाअ, हुंकू नुकू हेके जे परमेसर आला वचन के आयुमेआकु आउर बुझाआकु, आउर ओके मि साव गुना, ओके साईठ गुना, ओके तीस गुना हेर लअः गोटायोआ।”
बुरु रअः बिहाईन रअः गाम
24ईसु हुंकू के आउर मियांड गाम उदूओ लिकुआय, “सिरमा राईज हुनी होड़ लकाना। जे अपन ओत रे बेस बिहाईन हेर थिलाआय। 25बकिर जब होड़कु निन्दोः केनाकु, दो हुनी आली मुदाई हीःग नेनाय, आउर गोहोम हेर लआ रे बुरु बीर बिहाईन के हेर केते सेनोः नाय। 26जब ओमोन नेना आउर गेले नेना, तब बुरु बीर बिहीन होः नेल नेना। 27नोःआँ रे बंधाउवाकु हीःग केते ओत मुंवार के बेता लियाकु, ‘गोमके, आम अपन ओत रे बेस बिहाईन काम हेर थिलाआ एतान? होना रे ओका तरअः बुरु रेनअः बीर हीःग नेना?’ 28हुनी हुंकू के बेता लिकुआय, ‘नोःआँ जाहें मुदाई आला काम हेके।’ तब बंधाउवाकु हुनी के कुली लियाकु, ‘आम चहाअ तनाम एतान?’ ची आले सेन केते बुरु बीर के जवारे आले। 29मलिक कंहड़ी रूवाड़ लःअय, ‘कोवान, नोकान आलु हुयाव कोअ, ची बुरु बीर के र-रचाअ बेरा गोहोम होः रचाअ कोआ। 30इरोअ जगुत बनार के साँघे-साँघे हराअ चापे। इरोअ बेरा ईङ बनहींयारकु के बेता कुईंग, पहिल रे बुरु बीर के जवार केपे, आउर ति-तियांग लःअय बोझा तोल केपे। तब ईङ आला पोटोम रे गोहोम के जवारेपे।’”
राई गोटा रअः गाम
(संत.मरकुस 4:30–32; संत.लुकास 13:18,19)
31ईसु आउर मियांड हुंकू के गाम उदूः लिकुआय, “सिरमा राईज राई गोटा लकाना, जेके इदी केते जाहें होड़ अपन ओत रे हेर लःअय। 32होना दो जामा बिहाईन तरअः होः छोटेआ, बकिर ओमोन हरा केते, नोःआँ बगान रअः जामा साःग पात तरअः बड़े हरा जुनोआ आउर नोकान सिङ लकान हुयाव जुनोआ, ची सिरमा रिनकु ओड़े हीःग केते, होना रअः डाईड़ रे डेरायाकु।”
खमीर रेनअः गाम
(संत.लुकास 13:20,21)
33हुनी आउर गी मियांड गाम कंहड़ीओ लिकुआय, “सिरमा राईज होना खमीर लकान एदनाअ। जेके जाहें आउराईत ईदी केते, पे-पसरी आँटा होलोंङ रे मेसा लःअय आउर जामा सुवेःड-सुवेःडते गी जो-जोअ ना।”
गाम के काम रे आ-आगु
(संत.मरकुस 4:33,34)
34ईसु नोःआँ जामा बात के तुन्दरा होड़कु के गाम रे समझाव कुकेनाय, हुनी बेगार गाम उदूः ते हुंकू के एतान होः काय उदूः कु केनाय। 35#सिरिंग 78:2जेकर से ची आगमजानी आला कंहड़ी लअः पुरा जुनोः,
“ईङ गाम रे कंहड़ी किईंग,
दुनिया रअः सुरू तरअः जे उकु ओना एदनाअ, होना के ईङ दिसतारिईंग।”
बुरु बिहाईन रअः गाम रेनअः माने
36ईसु होड़कु के बिदा केते ओड़ाअ रूवाड़ नेनाय, हुनी आलकु चेलाकु हुनी दुबाःड़े हीःग केते बेता लियाकु, “ओत रेनअः बुरु बीर रअः गाम आले के समझाव लेमे।”
37हुनी, हुंकू के कंहड़ी रूवाड़ोः लिकुआय, “बेस बिहाईन हेरोई मनवा होपोन हेके, 38ओत दुनिया हेके, बेस बिहाईन राईज रिनकु होड़ हेके, बुरु बीर खपतान सैतान आलकु होपोन हेके, 39बुरु बीर हेरोई बैरी सैतान हेके। इ-इरोअ दुनिया रअः आखरी हेके, आउर इरोअ कु सिरमादूत हेके। 40जे लकान होड़ बुरु बीर के जवार केते सेंगेल रे तियांङ गोअ तआकु, हिना लकान दुनिया रअः आखरी रे हुयाव कोआ। 41मनवा होपोन आनेःग आलकु सिरमादूतकु के कुलगोःड किकुआय, आउर हुनी, हुनी आला राईज रअः जामा ठोकोर खि-खियाव कु आउर गादुस कामीकु के, 42जवार केते सेंगेल रेनअः भठा रे घलाव किकुआकु, होनाःड़े हुंकू ईयाम केआकु, आउर डाटा रिड़िःग केआकु। 43तब धरमीकु अपन बाबा आला राईज रे सिंङ बोंगा लकान लवकाव कोआकु। जेकर आ-आयुम लःअय लुतूर एदनाअ, हुंकू आयुम केपे।
उकु ओना खजाना रअः गाम
44“सिरमा राईज ओत रे उकु ओना धन लकाना। जेके जाहें होड़ नामेआय आउर दोबारा उकु गोअ तआय। तब हुनी रिझते सेनाय आउर जामा के आखरिंग केते, होना ओत के किरिङेआय।
मंहगा मोती रआ गाम
45“आउर सिरमा राईज मियांड कार-बेवहार कु लकाना, जे किमती मोती रअः खोजाईर रे ताहिनाय। 46जब हुनी के मियांड मंहगा मोती भेटाव नेना, दो हुनी सेन केते जामा जिनीस आखरिंग केते, आउर हुनी होना के किरिङ लःअय।
जाल रेनअः गाम
47“आउर सिरमा राईज समुदर रे लगाव ओना जाल लकाना जे जामा किसीम रिनकु हाकु के साऊंठाव आगु कुआय। 48जाल रे हाकु पेरेःग जुनोआकु, दो होना के दौंड़ी रे ओर आगुयाकु, तब हुंकू दुड़ूः केते बेस हाकु के निबाड़-निबाड़ बसान रे जवार कुआकु, आउर का-बेस हाकु के गिड़ी कुआकु। 49दुनिया रअः आखरी रे निकान हुयाव कोआ, सिरमादूत सेन केते धरमीकु मेसे खपतानकु के आलगे किकुआकु 50आउर पापीकु के भठा रेनअः हिदकाः सेंगेल रे घलाव किकुआकु, होनाःड़े हुंकू ईयाम केआकु आउर डाटा रिड़िःग केआकु।
नावाँ आउर मारी सिकछा रअः मतलोब
51“ईसु अपन चेला के कुली लिकुआय, ‘आपे नोःआँ जामा कंहड़ी के बुझाव नेनापे एतान?’”
हुंकू बुझाव नेनाले बेता लियाकु।
52ईसु हुंकू के बेता लिकुआय, “मि-मिहोंड़ धरम पुथी सि-सिखावकु, जे सिरमा राईज रअः बारे रे सिकछा नाम चुकाव तदाकु, हुनी किसान लकानाकु, जे अपन कोठा तरअः नावाँ आउर मारी जिनीस के उडुंगेआय।”
नासरत रे ईसु के काकु बेस ऊ लिया
(संत.मरकुस 6:1–6; संत.लुकास 4:16–30)
53नोःआँ जामा गाम के कंहड़ी केते, ईसु होनाःड़े तरअः सेनोः नाय। 54हुनी अपन सहर हीःग केते, हुनी होड़कु के बिनती ओड़ाअ रे उपदेस एमाकु केनाय, आउर ढेर होड़ आयुम केते मोकाव नाकु, “नुई के नोःआँ लुर-बुधी आउर नोःआँ समरथ रअः काम रेनअः सवांग ओकाःड़े तरअः भेटाव नेना? 55नुई हुनी बढ़ाई आली होपोन नलागे एतान? जे मरियम आली होपोन, आउर याकुब, जोसेफ, सिमोन आउर जहुदा नुई आलकु बोको नलागे एतान? 56आउर नुई आलकु जामा बहिन आबु तलारे काकु ताही नोःआँ एतान? दो नुई के नोःआँ जामा ओकाःड़े तरअः भेटाव नेना?” 57#सं.जोह 4:44आउर हिना लःअय हुंकू हुनी बारे ठोकोर कु जोम लआ।
बकिर ईसु हुंकू के बेता लिकुआय, “जाहें आगमजानीकु आला अपन डिही आउर ओड़ाअ के बाई केते, जामा दुबाःड़े माईन भेटाआ।” 58आउर होड़कु आला अनबिसवास रअः चलते, हुनी होनाःड़े जादे समरथ रअः काम काय कामी लआ।
Επιλέχθηκαν προς το παρόν:
संत.मत्ती 13: ASR
Επισημάνσεις
Κοινοποίηση
Σύγκριση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023 NLCI CC BY-NC-ND 4.0