संत.मत्ती 21
21
जिरोसालेम रे ईसु हिजोअ रअः खुसी मा-मनाव
(संत.मरकुस 11:1–11; संत.लुकास 19:28–40; संत.जोहन 12:12–19)
1जब हुंकू जिरोसलेम हेनाःड सोदोर नेनाकु, आउर जैतुन टुंगरी रे बैतफगे डिही रे सोदोर नेनाकु। हिमीन रे ईसु चेला ताय के नोकान कंहड़ी केते कुलगोःड लिकिनाय, 2“निआँ हेनाःड रेनअः डिही सेन बेन, होनाःड़े सोदोरोः तुली आबेन के मियांड तोल लिनी गधा भेटाव कोआय, आउर हुनी लोः मियांड गधा छउना होः भेटाव कोआय। हुनी के राड़ा केते ईङ दुबाःड़े आगुई बेन। 3जदि जाहें आबेन के जहान मेन गेआकु, दो आबेन ‘नुई के परभु आला दरकार एदनाअ’ बेता कुबेन, हुनी तुरते नुई के रूवाड़ उपे-केआय।”
4नोःआँ निआँ लःअय हुयाव नेना, ची आगमजानीकु आला वचन पुरा जुनोः,
5 #
जखरि 9:9
“सियोन आली माई तेके बेताई पे,
नेलेमे आम आली राजा आम दुबाःड़े दराईया,
हुनी नमाराय आउर गधा तेंग रे दुड़ूः तनाय,
हाँ, मियांड ककामी जनवर आली छउना तेंग रे दुड़ूः तनाय।”
6जे लकान ईसु बेता थिलकुआय, चेलाकु सेन केते हिकान लअकु। 7गधा आउर छउना तेके आगु केते, हुनी तेंग रे अपन गेन्दरअ के बिल लअकु, आउर हुनी तेंग रे ईसु दुड़ूः नाय। 8तब ढेर तुन्दरा होड़कु हुनी के प-पाईरघाव लःअय अपन गेन्दरअ के होरा रे बिल लअकु, थोड़ेक होड़कु सिङ रेनअः डाहुड़ा डाईड़ के मांअ आगु केते, होरा रे बिल लअकु। 9#सिरिंग 118:25,26जे तुन्दरा होड़ ईसु मड़ांग-मड़ांग सेनोः केनाकु, आउर तयोम-तयोम सेनोः केनाकु,
“दाऊद आली होपोन के होसन्ना,
जे परभु आला नुमू रे हिजोअ तनाय हुनी धनया एदानिया,
सिरमा रे होसन्ना।”
10जब ईसु जिरोसलेम हीःग नेनाय, दो गोटा सहर रे आंदोर ना। आउर जामा कंहड़ी तानाकु, “नुई ओके हेके?”
11तेकार तुन्दरा होड़ कंहड़ी तानाकु, “नुई गलील रअः नासरत सहर रिनी आगमजानी ईसु हेके।”
बड़े बिनती ओड़ाअ रे आ-आखरिङकु के उ-उडुंग
(संत.मरकुस 11:15–19; संत.लुकास 19:45–48; संत.जोहन 2:13–22)
12बड़े बिनती ओड़ाअ रे ईसु बोलो नेनाय आउर होनाःड़े तरअः जामा कार-बेवहार कु के बाहरी ते उडुंग किदकुआय। हुनी ढिबुवा भ-भांजाव कु आला टिबुल के, आउर पेरवाँ किरिङ-आखरिङकु आला चौकी के उलटाव केदाय, 13#जसा 56:7; जिर 7:11आउर “लिखा लअः एदनाअ, ‘ईङ आला ओड़ाअ, बिनती ओड़ाअ कहलाव कोआ।’ बकिर आपे होना के हुंकू रे-रेःगकु आला मांड़ा बनायापे।”
14बड़े बिनती ओड़ाअ रे अंधरा आउर लंगड़ाकु ईसु दुबाःड़े हीःग नेनाकु, आउर हुनी हुंकू के बेस लिकुआय। 15जब बड़े पुरोहितकु आउर धरम पुथी सि-सिखावकु हुनी आला छकितोः काम के नेल केते, आउर “दाऊद आली होपोन के, होसन्ना” बड़े बिनती ओड़ाअ रे कोड़ा चेंगाकु आला नोःआँ गुल आयुम केते हुंकू मुरुक जोड़ खीस नाकु। 16#सिरिंग 8:2आउर हुंकू ईसु के कुली लियाकु, “आम काम आयुमेआ, हुंकू एतान मेनोः तानाकु?” ईसु हुंकू के बेता लियाकु, “हाँ आयुम दिंग आपे ओका हिला होः कापे पढ़ाव ताना एतान, चेंगाकु आउर नु-नुनू चेंगाकु आला आहा तरअः महिमा चिई तदकुआम।” 17ईसु नुमिन कंहड़ी केते, हुंकू के बाई केते, आउर सहर बाहरी उडुंग केते, हुनी बैथनिया सेन नेनाय। आउर हिनाःड़े निदा बिताव लःअय।
अंजीर रअः सिङ
(संत.मरकुस 11:12–14,20–24)
18दोसरा हिला निदवा बेरा सहर पखी रूवाड़ोः केनाय, दो ईसु के रांगेःग आदा लिया। 19दो हुनी होरा दौंड़ी रे मियांड अंजीर सिङ के नेल केते, होनाःड़े सेन नेनाय, बकिर सेकाम के बाई केते, एतान होः का ताही नेना। तब हुनी, होना सिङ के कंहड़ी लःअय, “नहाअः तरअः आम रे फिन जुग-जुग आलु जो कोअ।” अंजीर रअः सिङ हेने घड़ीक रोहोड़ ना। 20चेलाकु नोःआँ के नेल केते, छकित नाकु, आउर कंहड़ी लअकु, “नोःआँ अंजीर सिङ तुरते एता लकान रोहोड़ ना?” 21#सं.मत्ती 17:20; 1 कुरि 13:2ईसु हुंकू के बेता लिकुआय, “ईङ आपे के नोःआँ सचे कंहड़ी तानिङ जदि आपे के बिसवास एदनाअ आउर आपे कापे सकेआ दो आपे हिना भाईर एरपे कामिया, जे लकान ईङ जे अंजीर सिङ लोः कामी चुकाव तानिङ, बकिर जदि आपे नोःआँ बुरु खाटखुंड़ के नोःआँ कंहड़ी पे, बिरिःड केते समुदर रे नुर जुनोः मे, दो हेंकान कोआ गी। 22आउर आपे जेके बिसवास केते, बिनती रे कोयापे होना आपे लःअय भेटाव कोआ।”
ईसु आला हाक रेनअः सवाल
(संत.मरकुस 11:27–33; संत.लुकास 20:1–8)
23जब ईसु बड़े बिनती ओड़ाअ रे सोदोर केते उपदेस एमाकु केनाय दो, बड़े पुरोहितकु आउर जाहुदी होड़कु आलकु पुरखाकु हुनी दुबाःड़े हीःग केते बेता लियाकु, “आम ओका हक रे नोःआँ जामा कामीः दाम? ओके आम के नोःआँ हाक एमा लेमेआय?” 24ईसु हुंकू के कंहड़ी रूवाड़ोः लिकुआय, “ईङ होः आपे के मियांड सवाल कुकुली नाम तानिङ। जदि आपे ईङ के नोःआँ रअः उतारा एमेआपे दो, ईङ होः आपे के उदूः पिईंग ची ईङ एतान हक रे नोःआँ जामा कामीः दिंग। 25जोहन आला बतिस्मा ओकाअड़ाः ताहिना? सिरमा रअः चाहे होड़कु आला?” हुंकू आकु-आकु रे गुटिना केते, कंहड़ी तानाकु, “जदि आबु कंहड़ीयाबु ‘सिरमा रअः, दो नुई आबु के कंहड़ी केआय, तब आपे होना रे एतान लःअय कापे बिसवास लअः?’ 26जदि आबु कंहड़ीआबु, होड़कु पखी तरअः दो आबु होड़कु तरअः बोर एदनाअ, एता लःअय जामाकु जोहन के आगमजानी मनाअ केनाकु।” 27हिना लःअय हुंकू, हुनी के कंहड़ी रूवाड़ोः लियाकु, “आले काले पड़ीआ” नोःआँ चलते ईसु हुंकू के बेता लिकुआय, “तब दो ईङ होः आपे के इरिंग उदूः पेआ ची ईङ एतान हक रे नोःआँ जामा कामी तानिङ।”
बनहोंड़ होपोन किन आला गाम
28“आपे आला एतान विचार एदनाअ? जाहें होड़ आलकिन बनहोंड़ होपोन थिनाकिन, हुनी पहिल रे बड़ेई दुबाःड़े सेन केते बेता लियाय, ‘बाबु! जु तिसिंग अंगुर बाखड़ी रे कामी में।’ 29हुनी कंहड़ी रूवाड़ लःअय, ‘ईङ इरिंग सेना,’ बकिर तयोम हुनी पछताव नेनाय, आउर हुनी सेन नेनाय। 30तेकार एटाअ होपोनते दुबाःड़े बाबा ते सेन केते हेंकान गी बेता लियाय। हुनी उतारा एम लःअय, ‘हाँ, हुजूर’ बकिर हुनी काय सेन नेना। 31बरहोंड़ मेसे ओके अपन बाबाते आला मरजी के पुराव लःअय?” हुंकू ईसु के कंहड़ी रूवाड़ोः लियाकु, “पहिल रिनी” नोःआँ चलते ईसु हुंकू के बेता लिकुआय, “ईङ आपे के सचे बेताः दिपीईंग मालगुजारी ताइसलावकु आउर ब्यबिचारीकु आपे तरअः पहिल रे परमेसर आला राईज रे बोलो कोआकु। 32#सं.लुका 3:12; 7:29,30जोहन आपे के जिनगी रअः धरम रअः होरा उउदूः लःअय हीःग ताहिनाय आउर आपे हुनी रे कापे बिसवास लअः, बकिर मालगुजारी ताइसलावकु आउर ब्यबिचारीकु हुनी रे बिसवास लअकु। नोःआँ के नेल केते, तयोम होः आपे कापे पछताव नेना आउर आपे हुनी रे कापे बिसवास लअः।
सझेदारी किसानकु आला गाम
(संत.मरकुस 12:1–12; संत.लुकास 20:9–19)
33 #
जसा 5:1,2 “आउर मियांड गाम आयुमेपे, जाहें मियांड किसान अंगुर बाखड़ी लगाव ची लिकुआय, होना रअः चागुरदी घोरना राम ची लिकुआय, होना रे मियांड अंगुर रस जा-जवार लःअय रस कुंड़ बनाव ची लःअय, आउर ओ-ओगरा लःअय माचा बनाव ची लिकुआय, तब होना के किसानकु के सझा एमा केते परदेस उडुंग नाय। 34जब अंगुर बिलीयोः बेरा हुनी हुंकू किसानकु दुबाःड़े बंधाउवाकु के होना बाखड़ी तरअः, जे अंगुर हुयाव ताहिना के हाटिङ आगुयाकु, मेन केते कुलगोःड लिकुआय। 35बकिर किसानकु हुनी आलकु बंधाउवाकु के सःब केते, ओके के दो हुमाअ लिकुआकु, ओके के दो गोएःग लिकुआकु आउर ओके के दो टुकू तरअः छेछोम लिकुआकु। 36नोःआँ तयोम हुनी पहिल तरअः जादे बंधाउवाकु के कुलगोःड लिकुआय, आउर किसानकु हुंकू लोः होः हिकान लिकुआकु। 37आखरी रे हुनी नोःआँ सोंचाव केते अपन होपोन तेके कुलगोःड लियाय, ची हुंकू ईङ आली होपोन के मरजाईद कियाकु। 38बकिर होपोन तेके नेल केते, किसानकु आकु-आकु कंहड़ी उपड़ींगोः तानाकु, ‘नुई दो मुंवार आली होपोन हेके, दु नुई के गुजियाबु, आउर हुनी मुंवार आली होपोन आला के अंबलायाबु।’ 39हुंकू हुनी के सःब लियाकु, आउर अंगुर बाखड़ी तरअः बाहरी उडुंग केते, हुमाअ गोएःग लियाकु। 40जब अंगुर बाखड़ी रिनी गोमके रूवाड़ोआय, दो हुनी हुंकू किसानकु के एतान किकुआय?” 41हुंकू ईसु के बेता लियाकु, “हुनी हुंकू किसानकु के गोएःग चबाअः ची किकुआय आउर आनेःग आला अंगुर बाखड़ी रअः बाँटा एटाअ किसानकु के एमा किकुआय, जे बेरा सिरे खिती रअः हिसा-बाँटा एम एका केआकु।” 42#सिरिंग 118:22,23ईसु हुंकू के बेता लिकुआय, “आपे धरम पुथी रे नोःआँ के ओका हिला होः कापे पढ़ाव ताना एतान?
“‘करीगारकु जे टुकू के बेकार समझाव केते उडुंग थिलआकु,
हिना गी कोना रअः टुकू पाड़ी नेना।
नोःआँ दो परभु पखी तरअः हुयाव नेना,
नोःआँ आबु आला नेनेल रे ताजुक एदनाअ।’”
43हिना लःअय ईङ आपे के कंहड़ीओ दिपीईंग परमेसर आला राईज आपे तरअः रेःग केआकु आउर नोकान जाईत के एमा किकुआकु, जे नोःआँ रअः सही जोअ पैदा केआकु। 44“जे नोःआँ टुकू रे नुरोआय, हुनी छेछरा चबा कोआय आउर जेकर तेङ रे होः टुकू नुरोआ, हुनी के जनताव सेरेःड कियाय।” 45बड़े पुरोहितकु आउर फरीसीकु हुनी आला जामा गाम के आयुम केते बुझाव नाकु, ची हुंकू रअः बारे कंहड़ी तनाय। 46हुनी के हुंकू सा-सःब नाम केनाकु, बकिर हुंकू होड़कु तरअः बोर केनाकु, एता लःअय ची हुंकू ईसु के आगमजानी मनाअ केनाकु।
Επιλέχθηκαν προς το παρόν:
संत.मत्ती 21: ASR
Επισημάνσεις
Κοινοποίηση
Σύγκριση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023 NLCI CC BY-NC-ND 4.0