Néra Njékaḭkulaje 11
11
Piɛrə ɔr gin kula rəa no̰ Eglisə’d gə́ Jerusalem
1Njékaḭkulaje ləm, gə ŋgako̰ na̰je gə́ d’isi dɔ naŋg gə́ Jude ləm tɔ lé d’oo to gə́ njépole-magəje kara taa ta lə Ala lé ya tɔ. 2Loo gə́ Piɛrə tel ree Jerusalem mba̰ ndá ŋgankojije gə́ to gə́ njékḭja tamɔd deeje lé d’un ta pa səa pana: 3I andə kəi lə njé gə́ lal kinja tamɔd dee ləm, i sɔ sə dee né ləm tɔ.
4Yen ŋga Piɛrə teggin né gə́ teḛ lé gə ŋgaŋgee béréré-béréré ar dee d’oo. 5Yeḛ ula dee pana: Ma m’isi mee ɓee gə́ Jope ndá loo gə́ m’isi m’ra tamaji lé ndá m’oso naŋg rəb, né teḛ dɔm’g gə́ némḭdi bèe, to né gə́ to asəna gə kubu gə́ tad bərərə gə́ tɔ kúla dɔ kumeeje’g sɔ gə́ ḭ dara ree jururu njal teḛ rɔm’g. 6Kəm wəi dɔ kubu gə́ neelé sḭ am m’tən néje gə́ to keneŋ soo-soo ndá m’oo daje gə́ dɔ naŋg nee gə́ gɔl dee sɔ-sɔ ləm, gə daje gə́ wala ləm, gə néje gə́ d’ag naŋg ləma, gə yelje gə́ d’aw dara ləm tɔ. 7Tɔɓəi m’oo ndu dəw gə́ ɓar rɔm’g pana: Piɛrə, maji kam m’uba naŋg m’ḭta m’tɔl dee m’usɔ. 8Nɛ ma m’ilá keneŋ m’pana: Wah! Mbaidɔmbaije, néje gə́ ram gə néje gə́ to kḛji togə́bè lé uba tam ndag nda̰ el. 9Ndu dəw ḭ ɓar dara ɔm gə́ gɔl joo am m’oo pana: Né gə́ Ala ɓaree né gə́ àr ŋgad-ŋgad lé maji kam m’ɓaree né gə́ ram el. 10Né neelé ree togə́bè as gɔl munda ndá rəm ne kə̰geŋ d’aw ne dara gogo. 11Aa ooje, léegəneeya dəwje munda gə́ d’ula dee rɔm’g lé d’ḭ Sejare ree tɔ, d’aar takəi gə́ m’isi keneŋ lé. 12Yen ŋga Ndil ɓa ulam gə mba karm m’aw sə dee ɓó m’tila gə tila el. Dəwje gə́ misa̰ gə́ to gə́ njéndamje lé ɓa d’aar nee, ndá jeḛ j’andə na̰’d j’aw mee kəi’g lə Kɔrnəi. 13Dəw neelé teggin né gə́ yeḛ oo mee kəi’g ləa ar sí, to gə́ dəw gə́ dara teḛ dəa’g təsərə ulá pana: Maji karee ula kula Jope ɓar Simo̰ gə́ deḛ d’unda ria lə Piɛrə ar dee ree səa. 14Yeḛ nja ɓa a kulá néje lai gə́ yeḛ a kaji ne, gə njémeekəije ləi na̰’d tɔ. 15Loo gə́ m’un kudu pata ndá Ndilmeenda ree ɔm dɔ dee’g to gə́ yeḛ ɔm ne dɔ síjeḛ’g dɔtar lé bèe tɔ. 16Yen ŋga məəm aḭ haar teḛ dɔ ta gə́ Mbaidɔmbaije pa pana: Ja̰ ɓa ra dəwje batɛm gə mán, nɛ seḭ lé d’a ra sí batɛm gə Ndilmeenda#NNk 1.5. 17Bèe ndá to gə́ Ala wa sə dee noji gə́ to asəna kára ba gə noji gə́ yeḛ wa sə síjeḛ gə́ j’ɔm meḛ sí dɔ Mbaidɔmbaije Jeju Kristi lé bèe ndá ŋga, see ma m’askəm kɔs Ala lé rəw to gə́ banwa.
18Loo gə́ d’oo ta neelé mba̰ ndá meḛ dee oso naŋg po̰ ar dee d’ula rɔnduba dɔ Ala’g pana: Ala lé ya ar njétareeje d’wa ndòo rɔ dee dɔ kaiya’g lə dee gə mba kar dee-deḛ nja kara d’a si ne gə kəmə lé tɔ.
Deḛ tum gin Eglisə mee ɓee gə́ Antiɔs
19Deḛ gə́ d’aḭ sanéna̰ gə mbata kəm dee gə́ d’ula ndòo ndɔ kwəi’g lə Etien lé d’aḭ saar teḛ Penisi ləm, d’aw dɔgoré-loo gə́ Siprə ləma, d’aw Antiɔs ləm tɔ. Jibje ya gə kar dee ba ɓa d’aw d’ila mber tagə́maji lé d’ar dee#NNk 8.1-4. 20Nɛ dəwje gə́ na̰je mbuna deḛ gə́ d’ḭ Siprə gə Sirèn lé deḛ ree Antiɔs ndá d’aw rɔ Grekje’g d’ula dee tagə́maji lə Mbaidɔmbaije Jeju. 21Ji Mbaidɔmbaije nai dɔ dee’g ar dəwje bula d’ɔm meḛ dee dɔ ta’g lə dee ləm, d’un meḛ dee d’ar Mbaidɔmbaije ləm tɔ.
22Soree oso mbi barkəm Eglisəje gə́ Jerusalem ar dee d’ɔr Barnabas d’aree aw saar teḛ Antiɔs. 23Loo gə́ yeḛ teḛ keneŋ aa loo oo noji gə́ Ala wa sə dee lé ndá yeḛ ra rɔlel, tɔɓəi yeḛ ndəji dee bər-bər mba kar kɔm meḛ lə dee gə́ d’ɔm dɔ Mbaidɔmbaije’g lé d’a reḛ́ keneŋ rḛ́-rḛ́ ya. 24Mbata Barnabas lé to majikoji ləm, Ndilmeenda taa mée pəl-pəl ləma, yeḛ to njemeekun gə́ dum dɔ loo ləm tɔ. Togə́bè ɓa boo-dəwje bula nam ne kaar Mbaidɔmbaije’g lé.
25Barnabas ɔd aw Tarsə gə mba saŋg Sool keneŋ. 26Loo gə́ yeḛ iŋgá mba̰ ndá yeḛ ɔree ree səa Antiɔs. As ləb kára doŋgɔ lé deḛ d’wa dɔ na̰ gə Eglisəje loo-kwa-dɔ-na̰je’g lə dee ndá deḛ ndoo dəwje bula né keneŋ. Ɓee gə́ Antiɔs lé to loo gə́ dɔtar gə́ deḛ d’unda ri njékwakiláje ɓar dee ne njétaamee-Kristije.
27Mee ləb’g neelé njéteggintaje d’ḭ Jerusalem ree Antiɔs. 28Dəw kára mbuna dee’g ria lə Agabus uba naŋg ḭta pata gə́ Ndil ɓa aree pa pana: Ɓoo-boo a koso dɔ naŋg nee gə loo lai ya. Tɔgərɔ ɓoo-boo neelé oso mee ləb gə́ Klodə to ne njeko̰ɓee lé#NNk 21.10. 29Njékwakiláje d’unda kudu dee na̰’d mba kula gə néje lə dee gə goo nékiŋgaje lə dee lə dee mba la ne gə ŋgako̰ deeje gə́ d’isi Jude lé. 30D’ɔm néje lə dee ji Barnabas gə Sool’g d’ar dee d’aw ne d’ar ŋgatɔgje lé tɔ.
Επιλέχθηκαν προς το παρόν:
Néra Njékaḭkulaje 11: SBA2015
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Ngambai Bible © Alliance Biblique du Tchad 1989, 2015.