Laataanooji 25
25
Danygol Ibrahiima bee Ketura
1Ibrahiima te'i debbo feere, innde maako Ketura#1 HN 1:32-33.. 2O danyani mo Zimran e Yoksan e Medaan e Mediyan e Yisbak e Suhak. 3Yoksan danyi Seba e Dedan. Ɓiɓɓe Dedan ngoni: Assuuri'en e Letusi'en e Lewmi'en. 4Ɓiɓɓe Mediyan ngoni: Efa e Efer e Hanok e Abida e Elda'a. Ɓe fuu ɓe yimɓe danygol Ketura. 5Ibrahiima hokki Isiyaaku mardi muuɗum fuu. 6Ɓiɓɓe sulaaɓe maako boo, o hokki ɓe dokke. Hiddeko o maaya o neli ɓe haa fuunaaŋge, daayiiɗum bee ɓiyiiko Isiyaaku.
Maayde e uweeki Ibrahiima
7Ibrahiima waɗi duuɓi teemerre e cappanɗe joweeɗiɗi e jowi (175). 8Ɓaawo ndottaaku mbooɗŋgu keewŋgu e caftuki balɗe, o maayi, o hawtoyi bee kaakiraaɓe maako. 9Ɓiɓɓe maako: Isiyaaku e Isma'iilu uwi mo nder lowol Makpela haa ngesa Efruuna ɓii Cohar Hetiijo, haa fuunaaŋge Mamre. 10Ibrahiima soodno ngesa ka'a haa Heti'en. Ton Ibrahiima e debbo muuɗum Saraatu uwa#Laat 23:3-16.. 11Ɓaawo maayde Ibrahiima, Allah barkiɗini Isiyaaku, ɓiyiiko. Isiyaaku jooɗi haa kommbi ɓulndu Lahay-Roy.#25:11 Laar Laat 16:14; 24:62.
Danygol Isma'iilu
12Ndaa habaru danygol Isma'iilu ɓii Ibrahiima, mo Hajara Misraajo, korɗo Saraatu, danyani ɗum. 13Ndaa inɗe ɓiɓɓe Isma'iilu bee tokkindirki: Nebayot woni afo Isma'iilu, nden Keedar e Adbeel e Mipsaam 14e Misma e Duuma e Massa 15e Hadat e Teema e Yetuuru e Naafis e Keduma. 16Kamɓe ngoni ɓiɓɓe Isma'iilu sappo e ɗiɗo, ɓe inndi gure maɓɓe e caŋngeeje maɓɓe bee inɗe maɓɓe. 17Isma'iilu waɗi duuɓi teemerre e cappanɗe tati e joweeɗiɗi (137). Nden o maayi, o hawtoyi bee kaakiraaɓe maako. 18Danygol maako jooɗi hakkunde Hawila bee Sura, gal fuunaaŋge Misra, gal laawol yahugo Assuura. Ɓe njooɗi daayiiɗum bee banndiraaɓe maɓɓe fuu.
Danyeeki Isuwa e Yaakubu
19Ndaa habaru danygol Isiyaaku ɓii Ibrahiima: 20Isiyaaku woodino duuɓi cappanɗe nayi yaake o te'i Rebekka, ɓii Betu'iila Aramiijo, mo lesdi Paddan-Aram, deerɗiraawo Laban. 21O tori Jawmiraawo ngam daliila debbo maako, ngam o dimaro. Jawmiraawo jaɓi tornde maako, debbo maako Rebekka reedi. 22Ɓikkoy ciwtukoy ɗonno lukkindira nder reedu maako. O wi'i: “To non ɗum laatake kam, ngam ɗume ɗum warani yam?” O yehi ƴamugo Jawmiraawo. 23Jawmiraawo wi'i mo: “Ummaatooje ɗiɗi ngoni nder reedu ma, jama'aaje ɗiɗi cenndoto diga wurtaago maaje nder reedu ma. Jama'aare woore ɓuran ndeya semmbe, mawniraawo huuwanan minyiraawo.#Rm 9:12.”
24Saa'i danyugo maako yotti, ɗum siwtuɓe ngoni nder reedu maako. 25Arano wurti, o boɗeejo, o fuu maako bana alkibbaare sannyaande bee gaasa. Ɓe inndi mo Isuwa#25:25 Isuwa yiɗi wi'go ɗuuɗa-gaasaajo. . 26Ɓaawo man deerɗiiko wurti, juŋngo maako jogi teppere Isuwa. Ɓe inndi mo Yaakubu#25:26 Yaakubu yiɗi wi'go teppere.. Isiyaaku mari duuɓi cappanɗe joweego, saa'i ɓe ndanya.
27Ɓiɓɓe worɓe ɓe'e mawni. Isuwa laati gawjo baawɗo, goɗɗo ladde. Yaakubu laati de'uɗo, mo ɗonno tum haa saare. 28Isiyaaku yiɗi Isuwa, ngam kusel ladde welani hunnduko maako. Ammaa Rebekka yiɗi Yaakubu.
29Nyanndere go Yaakubu waɗi nyaamdu, Isuwa boo warti ladde, o comɗo. 30Isuwa wi'i Yaakubu: “Accu mi nyaama boɗeejum ɗu'um ngam mi comɗo.” Ngam maajum o ewna Edoom#25:30 Edoom yiɗi wi'go boɗeejum.. 31Yaakubu jaabi: “Soorranam daraja afaaku ma hannde nden tawon.” 32Isuwa wi'i: “Ndaa, mi ɗon maaya, ɗume afaaku man nafatammi?” 33Yaakubu wi'i: “Hunanam tawon!” O hunani mo, o soorrani Yaakubu daraja afaaku maako#Ibr 12:16.. 34Nden Yaakubu hokki Isuwa tamseere bee irin nyebbe defaaɗe. O nyaami, o yari, nden o ummi, o dilli. Bana non Isuwa yawri daraja afaaku muuɗum.
Επιλέχθηκαν προς το παρόν:
Laataanooji 25: FBDC
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
DEFTERE ALLAH © Alliance Biblique du Cameroun, 1994.