Luk 15
15
Basef womun etina sipsip higilalanai
(Mt 18:12-14)
1Epes hiesi saloma anom mofa' takisi maloma enis epes sanda' waf aonai safi'i felefele'ma Jisas same' basef ananimi. 2Ea' amam Farisi maloma amam mawalipasa mi'uli Godi manda' megah mahama anan ma'i, “Aman anama naloma epes isima sanda' waf aonai nofalas alupisi nalomas na gwa'aimi.”
3Ea' Jisas nase'ama basef amama womun etin na'ipam na'i, 4“I'i anona aman ipe'inai numafi anom sipsip 100-peleim ama anona atotona hegililana, aman anama ata' nokwaha sipsip amama 99-peleim mitu mea' otalef anagon, anan ata' nefe' nogolopa anona hegilalanai. Nogolopana nafe' nafe' natolona nafelana 5nowandefana ekaf ananinai, nandanifel nefa'ana nafi'i. 6Nafi'i nataga ipat ananinai, nofalai esis alupisi ananisi saloma esis wambel atona sandakolas etifigin. Ea' na'ipas na'i, ‘Ipe' pendanifel peloma ae'! Anona sipsip ae'anai hegilalana, ea' ae' afe' agolopana atolona efa'anai ea'.’ ”
7Dei' Jisas na'ipas na'i, “Ae' a'ipipa na'ama etina esis amam nematawa sape heven ilifi sandanifel ma epes isima 99-peleis ambo'wes, ina sanda' waf aonai ma sotanima somboma opalef, owa'. Ea' i'i enin epen nenda' waf aonai ni'i nemboma opaf, esis sape heven ilifi sondanifel endilisi ma enin. Danifel asasinai nikila' sandanifela epes isima sape bu'wasi.
Basef womun etina anona moni higilalanai
8I'i ano'w nemata'w anona moni 10-peleina siliwa anona atotona higililana, atuwasi konda' maina kogolopana kwutolona? Akwa'w kwakata lam kombefagon ipat nomon kogolopana andeande' hi'alagon kofe' kofe' ma kwatolona. 9Akwa'w kwatolona ea', kofala esis alupisi wambel akwa'unai sondakolasi ea' kwi'ipas kwi'i, ‘Ipe' pendanifel peloma ae'! Anona moni ae'anai higilalana, ea' dei' agolopana afa' atolona etanima efa'anai ea'.’ 10Dei' ae' a'ipipa na'ama etin si'i amam ensel Godi mandanifela enin epen nanda' waf aonai nemboma opaf nafe'ma God.”
Basef womun etina nogalomana higilalanai nakwaha ahalomana
11Ea' Jisas na'ipam wapoti' na'i, “Anona aman batausan biam. 12Aonama awagufunai nafe' na'ipa ahalomana ananinai na'i, 'Ahalome, ae' okom napoma otamba maim amamaga afa' ofa'ami ma nemaf ine' nega'. Dei' ae' a'i efa' tu'wanim ae'ami. Ine' niwalom biefim newalogamafam afa' biafa. Ae' a'i ine' nese'eam dei'.’
Ea' ahalomam nawaloga amamaga hiami ananimi mafe'ma amam batausana biam.
13Ea' ina ata' nogota laona aonama awagufunai nefa' amamaga hiami ananimi nafe' napani anona wambel laogoma ea' nase'asam amamaga hiami ananimi ma waf naninani aonai anan naila okom ananinai na'i neanda'anai. Ea' otamba ananimi hi'alama ma waf aonai. 14Anan nakwaha otamba ananimi hi'alam, nogota nolomahasanai nataga lu'una etap anama hiagoma hi'alagon. Ea' anan amamaga a'ana nape wafina. 15Ea' anan nafe' nanda' maola anona aman etap anamainai. Aman anama nasapa'ana nafe' etap ananinai ma numafi bogof ananimi. 16Bogof amama ma' su'utip lawahim, ea' anan wapoti' na'i nea' su'utip amama ma opaf ananinai. Anan ina enis sase'ana gwa'aimi, owa'. 17Anan nape na'ama anom nimeguf, okom ananinai nogawa andeande' ea' na'iam na'i, ‘Amam hiami manda' maola ahalome ae'anai amam gwa'aimi hiami endilisi. Ea' ae' ape na'ae nolomahe endilisi. 18Hapaimi, ae' atuwasi ehafel efe'ma ahalome ae'anai. Ea' i'ipana i'i, “Ahalome, ae' anda' waf aonai ma God ine' wapoti'. 19Dei' ae' ina aman bu'uwei ma ine' nefala ae' nogalomena ine'iwei, owa'. Ine' nenda'e epe si'i anona nanda'mena maoli.” ’
20Ea' nohafel nafe'ma ahalomana.
Ea' anan ata' nafi'i laogon ahalomana natolona, okom nainailana endilini nasagih nafe' nahapilana nombalo'ana nasisi' dalogw. 21Ea' nogalomana na'ipana na'i, ‘Ahalome, ae' anda' waf aonai ma God ine' wapoti'. Ae' ina ata' aman bu'uwei ma ine' nefala ae' ni'i nogalomena ine'iwei, owa'etin.’
22Ea' ahalomana na'ipa amam manda' maola anani na'i, ‘Ipe' fa'ai lowaf bu'unai launai namunai ae'anai pefa'ana pifi'i ulal pewaho'manana anan. Ea' pelamana anona ring faf ananinai, pelamana su bo'wagah ananimi. 23Fa'ai bulmakau noganai anama lu'unai gigititi'i pehana ma ape' mea'ana mondanifel molomana. 24Dei' main, nogalome anama ae'anai andowelamana si'i naga'i, ea' dei' ambal napaina wapoti'. Anan higilalana ea', dei' matolona wapoti'.’
Ea' esis sandanifel salomana.
25Ea' nogalomana dembenama napani aof nafi'i. Ea' anan nafi'i nataga felefele'ma ipat, name' maguf sanda' musik salemb.
26Ea' nofala anona nanda' maoli nahali'ana na'i, ‘Esis sanda' main?’
27Ea' anan nanda' maoli na'ipana na'i, ‘Owalomena ine'inai notanima nafi'i, ea' ahalomena ine'inai nandanifel nalomana, na'ama dei' naha anona bulmakau lu'unai. Dei' main, anan notanimai ina ata' nape aona, owa'. Nape andeande'.’
28Ea' nogalomana dembenama okom wandafuna ea' nandaiwa'ma nuwis nomon ipat. Ea' ahalomana nawisi ande' na'ipana mehipa nuwis nomon, owa'etin. 29Anan nagwamana basef ahalomana na'i, ‘Afagof hiami ae' ahapila maol ine'inai si'i agel a'e anda' maol atona. Ae' ina esambala basef mi'uli ine'imi anona nemaf, owa'. Ea' ine' owa' nese'e anom amamaga so'umi atom si'i meme noganai ma eandanifel eloma alupisi ae'asi, owa'etin. 30Ea' sa'usa'uni anama ine'inai anan nase'awa amamaga hiami ine'imi ma awau nematawa gembaiwai. Ea' dei' notanimai, ine' okom napomana dei' nahamana bulmakau anama anan.’
31Ea' ahalomana na'ipana na'i, ‘Nogalome, la'ela'ef afa' biafa wape etifigin. Ea' amamaga ae'ami amama ine'imi atom. 32Ea' dei' afa' ondanifel, opalef afa'imi mope bo'om. Dei' main, owalomena anama ine'inai fowa' nafe' laogon si'i naga'i, ea' dei' nafi'i nataga ambal napaina wapoti'. Anan higilalana, ea' dei' afa' watolona wapoti'.’ ”
Επιλέχθηκαν προς το παρόν:
Luk 15: aojF
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2013, Wycliffe Bible Translators, Inc. All rights reserved.