Luk 14
14
Jisas nanda' anona aman alop nalatawanai bo'ona
1Anona nemaf esis Juda sapoma noma'wanai sa'i Sabat Jisas nafe' naloma anona aman Farisi na' gwa'aimi ipat ananinai. Ea' esis sanda'ana naep di'indi'ana endilisi. 2Anona aman lagufi bo'wagah malatawana kwapete'i nape Jisas opafunama. 3Ea' Jisas nati aman anama, nahali' amam gawaimi mawalipasa mi'uli Godi maloma amam Farisi na'i, “A'i afa' onda' aman awes nanda'anai bo'ona nemaf anama Sabat mapoma noma'wanai, o owa'?”
4Ea' amam masopama malogof. Ea' nahapila aman anama nanda'ana bo'ona nasapa'ana nafe'.
5Ea' Jisas nahali'am na'i, “I'i anona aman ipe'inai awani ananini o anona bulmakau ananinai sowala hul lounai nemaf anama Sabat sapoma noma'wanai, a'i aman anama ahalomas asasinai nefe' nigiasi mehip nemaf anama o owa'? Endilisi, nefe' nigiasi.”
6Ea' amam basef a'am.
Basef womun etina lawag owa' nil nola su'utipi
7Ea' Jisas nati esis safi'mai gwa'aimi amama sa'i sope siaifah bu'wami matawa sali'i bo'wagoma atogon. Ea' na'ipasa basef womun etin na'i, 8“I'i anona aman nofalepama anom gwa'aimi lu'wami sonda'ama aman naso' nemata'wi ma pefe', ipe' owa' pefe' petoma pili' siaifah bu'wami amam dambami atom matomami, owa'. Na'ama aman anama nofo'o nofalai anona aman agel lu'unai nikila' agel ine'inai. 9Ama aman anama nofalena nifi'i ni'ipina ni'i, ‘Ine' kwahomana sia inima bu'wani aman anae'.’ Nonda'am na'ama, ine' ambal aona endilisi. Ea' nonda'ena nefe' nepe nigi'i ipat basagaf. 10Ea' i'i anona aman nofalena nefe' nea' gwa'aimi nelomana, ine' nefe' nepe nigi' ipat basagaf. Nenda'am na'ama ma atuwasi nofalena nie'i, ‘Alupinai, ine' nifi'i nepe nili' bo'ogoma!’ Anan nonda'am na'ama, atuwasi nefa' agel lu'unai ma naep epes isima hiesi sa' gwa'aimi salominai. 11Dei' main, epes emi egafis sefela agof asasimi atom, God nonda'as sisila'. Ea' epes emi egafis senda' agof asasimi misila'i, anona nemaf God nefela agofa esis.”
Basef womun etina anona aman nofala enis epes sifi'mai gwa'aimi
12Ea' Jisas na'ipa aman anama nahali'ana nafe'ma gwa'aimi amama na'i, “I'i ine' nenda' anom gwa'aimi lu'wami o sa'umi, ine' owa' nefala alupisi soloma sahin owan wambota ine'isi wambel atona amamaga hiamisi, owa'. I'i nenda'am na'ama, nambimb esis sofalena ma nefe' nea' gwa'aimi ifagw asasimi, ea' sogwamena gwa'aimi ine'imi. 13Ine' nenda' gwa'aimi lu'wami, nefala isima kwahusa amamagai, bo'wagah awomisi, naep mase'asi. 14Epes isima ina la'ifisa sogwamena gwa'aimi ine', owa'. I'i ine' nenda'am na'ama, nendanifel nepe andeande'. Ea' anona nemaf God nogwamena amamaga amama bu'wami nemaf anama epes isima sanda' waf bu'unai saga'i sohafel wapoti'.”
Basef womun etina gwa'aimi lu'wami
(Mt 22:1-10)
15Anona aman asasinai na' gwa'aimi nalomas name' basef amama, na'ipa Jisas na'i, “Emi egafis sepe sea' gwa'aimi lu'wami wambel Godi, esis sendanifel.”
16Ea' Jisas na'ipana basef womun etin wapoti' na'i, “Anona aman na'i nonda' anom gwa'aimi lu'wami. Ea' nofalai epes hiesi safi'mai gwa'aimi amama. 17Nemaf danda' endilisi ma gwa'aimi amama mataga, ea' nasapa' anona nanda' maola anani nafe' na'ipa epes isima fowa' nofalasi. Ea' na'ipas na'i, ‘Ipe' fi'i. Amamaga hiami mandandombam mape ea'.’
18Ea' epes isima hiesi atona etin sohafel sa'i basef sa'i esis ina safe', owa'. Anona aman na'ipana na'i, ‘Ae' andaiwa'ma efo'o. Ata' efe' etopa'ma aof ae'anai.’
19Ea' anona na'ipana na'i, ‘Ae' atala bulmakau 10-peleim monda' maol mowala etap, ea' dei' efe' endondomam. Ea' ae' ina efo'o.’
20Ea' anona na'i, ‘Dei' etef ae' aso' nemata'w. Na'ama ae' ina efo'o, owa'.’
21Ea' aman anama nanda'mana maoli notanima nafe' na'ipa dembinai ananinai ma amama. Ea' ofagenama ipati opaf wandafuna ea' na'ipa nanda'mana maoli na'i, ‘Ine' mehip fo'o eaf hianai lu'unama sa'onama ma taun anama ea' nefa'ai isima falafisi, naep mase'asi, lagof bo'wagah awomisi ine' ne'wasi sifi'i suwisi nomon ipat ae'anai.’
22Ea' aman anama nanda' maolananai na'i, ‘Dembinai, ae' aila basef ine'imi ea', ati ipat ina dei' si'ina, ata' owa'.’
23Ea' dembinai na'ipana na'i, ‘Ine' fo'o eaf hianai lu'unama sa'onama nila indalelemb nefe' aof ea' ni'ipasa basef la'ifimi sifi'i suwisi nomon ipat ae'anai ma si'ina. 24Ae' a'ipina endilisi, epes isima hiesi fowa' ali' efalasi, dei' andaiwa' ma sea' gwa'aimi ae'ami.’ ”
Esis ukup la'ifim sogawa andeande'i amama atom sila Jisas
(Mt 10:37-38)
25Amam nematawa hiesi safi'i saloma Jisas, ea' nandamboma na'ipas na'i, 26“Emi egafis sifi'mai Ae', ma esis owa' sesambala mamasas wauhiamas wauhupawa batawisas asasisi soloma sahin owan wambota asasinai, ea' ambagof asasimi wapoti', esis ina nambimb sepe la'ifis sepe alupisi ae'asi, owa'. 27Ae' efa' nimanim awami anda' maol Godi sehe ega' lawag usi'inai tu'wanainai. Emi egafis owa' senda'am na'ama etin si'i ae' ma sieili, epes isima ina la'ifis setaga alupisi ae'asi, owa'.
28Enin epen ipe'ini i'i nenda' anona ipat lu'unai nolata ilif, enin nenda'am ni'imama? Enin ata' nope nomonas motamea andeande' nili' ma nogawa andeande' otamba amama nanda' ipatami. Nambimb otamba ananimi mondahama ipat anama hi'ilana o owa'? 29I'i owa'etina nenda' amama meali', ma nili' nonda' simen etina owa' nonda' ipat anama hi'ilana. Nambimb epes hiesi satolonai si'i basef aman anama sonda' findiwana 30si'iam si'i, ‘Epen inima nasefela ipat anama, ea' enin owa' la'ifin nembefanae.’
31Anom basef wapoti' amama. I'i anona aman dembinai king ni'i nofe' nopa' noloma anona king, anan ata' nope okom notanea andeande'. Soldia ananimi 10-tausen etin, ea' king anama nagi'i anan nifi'i noloma soldia ananimi hiami 20-tausen. Ea' king anama nali'i na'i ata' nili' nogawa na'ama. Anan nambimb nopa' noloma king anama nagi'i la'ifinama notofam o owa'? 32Anan nonda'am na'ama ma i'i nogawa anan ina la'ifina, naumbih ananimi ata' mopani laogon, nili' nosapa' anom amam mofe'ma anan mofalana mi'ipana basef mi'i wandaf hapainai. 33Ea' ipe' na'ama etin. Ipe' emi egafipa owa'etina pewa' alafugah ma amamaga ipe'imi ma pesambalom, ipe' ina nambimb la'ifipa pepe alupipei ae'ipei, owa'.
Jisas na'i basef womun etina sol owa' usihimi
(Mt 5:13; Mk 9:50)
34Ipe' pegawa sol amama bu'wami. Ea' i'i sol amama mumbul owa' usihim, owa'etin. Nambimb ipe' penda'am pi'imama usihim wapoti'? Owa'. 35Sol amama ina bo'oma ape' monda'am aof, o mokwahom moloma umba bulmakaum, owa'etin. Ape' mokwahom etin. Emi egafipa aligah magalipei pame' basefi, pilam.”
Επιλέχθηκαν προς το παρόν:
Luk 14: aojF
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2013, Wycliffe Bible Translators, Inc. All rights reserved.