Luk 17
17
Waf aonai nahambombaga bale'ef epesi
(Mt 18:6-7,21-22; Mk 9:42)
1Ea' Jisas na'ipa alupumi ananimi na'i, “Endilisi amamaga amama meagwambipei motagamepa ma penda' waf aonai. Endilisi amamaga anona nemaf miatagai, ea' emi egefis sonda' amamaga amama awami motaga, ae' ati esis uwahipis endilisi. Dei' main, esis anona nemaf sefa' nimanimi lu'wami. 2I'i enis epes sofa' epes isima sepa' owap lu'unai nil bagafowa asasimi, sofa'as sefe' sokwahis sowala naoh mami lu'wami ma afis, esis ata' sepe awes. I'i epes isima senda' enin so'uso'win nekwaha nembale'efa Ae', epes isima anona nemaf sepe awes endilisi sikila' sewala naoh afis. 3Ipe' pindumafuma andeande'. I'i owalomepa ipe'inai nonda' waf aonai, pi'ipana basef mehipa nokwahana. Ama i'i anan nemboma opaf, ipe' pekwahomana waf aonai ananinai. 4I'i anan nonda'mepa waf aonai ma ipe' la'ela'ef 7-peleif nemaf atotona, ama anan netanima nifi'mai ipe' 7-peileif ni'i, ‘Ae' amboma opaf.’, ipe' pekwahomana waf aonai anan nanda'anai.”
Waf ape' mombale'efanai
5Ea' amam Aposel Jisasi ma'ipa Dembinai amamunai ma'i, “Ine' nenda' afa' ombale'efena la'ififa wikila' wali' ombale'efena.”
6Ea' Dembinai na'ipam na'i, “I'i bale'ef ipe'inai so'ona nendahama si'i nalelef sa'umi mastetimi lawag, nambimb ipe' pi'ipa lawag nanima su'utip mailanai pi'i, ‘Ine' degia neloma ofagena nefe' newala naoh embel nomon,’ ea' nila basef ipe'imi.”
Waf epes sanda' maoli sanda'anai
7“I'i anona aman ipe'inai nofa' anona aman nanda' maola anan nowala etap aof o numafi sipsip, ea' wambomota notanimai nifi'i ipat, atuwasi dembinai numafi anani ni'ipana ni'i, ‘Ine' fi'i mehip nepe nea' gwa'aimi’? Owa'etin. 8Atuwasi ni'ipana ni'i, ‘Ine' nendondomba gwa'aimi ae'ami, newaho' let, nenda'me gwa'aimi ae' nili' nefa'am nifi'i. Ma ili' ea'am, ine' nigi' nea' ine'imi.’
9Ea' atuwasi anan ninifela aman anama nanda'mana maoli ma nila basef ananimi? Owa'etin. 10Ea' ipe' wapoti' na'ama etin. I'i ipe' penda' amamaga hiami hi'ilam si'i God na'ipipa, ipe' pi'i basef pi'i, ‘Afa' wanda' maoli aofai. Amamaga afa' wanda'ami, amama maol afa'imi atom.’ ”
Amam 10-peleim awes aonai nanda' alop amamunai nambo', Jisas nanda'am bo'om
11Ea' Jisas nafe' eaf na'i nefe' Jerusalem, nafe' la'afena etap hiagoma biefigin Samaria naloma Galili. 12Anan nataga anona wambel, ea' amam 10-peleim awes aonai nanda' alop amamunai nambo' mafi'i eaf ata' maituwi laogon, 13mofalana mehip ma'i, “Jisas, Dembinai, ine' niti uwahipifa!”
14Ea' Jisas natolom na'ipam na'i, “Ipe' fo'o pihi'amba alop ipe'inai ma amam pris.”
Amam ata' mafe' etin, alop amamunai nataga bo'ona.
15Anona aman amamunai nati alop ananinai bo'ona, notanima nafe' noga na'i mehip nafela agel Godi. 16Ea' natambe nowafa notawa etap felefele'ma bo'wagah Jisasi nanifelona. Anan ina Judainai, owa'. Anan Samariainai.
17Ea' Jisas natolona na'i, “Ae' a'i ipe' 10-peleipa ambo'wepa etin. Dei' 9-peleim emuma? 18Amam motanima mifi'i mefela agel Godi? Aman anama anona wambelinai, anan atotona.”
19Ea' Jisas na'ipana na'i, “Ine' hafel fo'o. Ine' nembale'efa ae', amama atom dei' nataga bo'wena wapoti'.”
Nemaf anama epes hiesi siowis wambota Godi Dembinai numafias nambimb neataga
(Mt 24:23-28,37-41)
20Anom Farisi mahali' Jisas ma'i, “Maina nogota nemaf anama bu'unai notaga ma ape' miowis wambota Godi numafiapa?”
Ea' anan nagwamama basef amam na'i, “Amama esis ina satolom naep, owa'. 21Esis ina anona nemaf si'i, ‘Piti, amama mape na'ae, o mape gani, owa'etin.’ Peme'! Amama mape opalef ipe'imi nomon ea'.”
22Ea' Jisas na'ipa alupumi ananimi na'i, “Anona nemaf notaga, opalef ipe'imi pelef endilisi pi'i, ‘Ape' ma'i aman anama notaga epen nofa' alop epesi ata' nifi'i notaga ulala ata' mutolona.’ Owa'etin. Ipe' ina petolowe, owa'. 23Ea' nambimb enis epes si'ipipa si'i, ‘Piti nani nape gani,’ enis si'i ‘Piti anan nape na'ae.’ Ea' ipe' ina peme'as pigi'mas, owa'. Hapaisi. 24-26Ipe' pegawa pelele'ala ma otaga dilulum bogwalag pele' pele' nafe'agon hi'alagon. Ea' ae' ataga epen endilisiwei, anona nemaf enda'am na'ama etina nemaf ae' iefi'ianai. Ea' ae' ata' ili' efa' nemanimi hiami ma epes anai'isi dei' sowa' alafugahe. Waf fowa' gani sanda'ana nogota anama Noa napeinai, ea' na'ama etin si'i anona nemaf esis sonda'ana nemaf anama felefele'ma ifi'i etaga etap anae'. 27Sa' gwa'aimi, sa' embel, amam nematawa sindikikila'ma sandase'ama etin safe' safe' sataga nemaf anama Noa nafe' nawis sip. Ea' embel lu'wami mataga maha esis amam nematawa hiesi afis hi'alas.
28Esis sanda' waf na'ama etin si'i nogota anama Lot napeinai wapoti'. Sa' gwa'aimi, sa' embel, satala amamaga sase'asam safe'ma enis satalom, sawa amamaga aof, sala' ifagw. 29Ea' Lot nakwaha Sodom nafe', ma nemaf anama atona nif maloma otamba salfa fandumi mowai heven si'i asaf nalai ea' mahambombaga amam nematawa hiesi saga' hi'alas.
30Ea' na'ama etina nemaf anama ae' ataga epen endilisiwei iefi'ianai. 31Nemaf anama emi epen neape ipat andi'i felefele'i, ina ata' netanima nuwis nefa'ai amamaga ananimi ipat nomon, owa'. Ea' na'ama etin epen napani aofi, ina ata' netanima nefe' ipat, owa'.
32Ipe' nomonas mondanda'ma Lot waulu'mana. 33Emi egafis si'i sili'akwa ambagof asasimi, ambagof asasimi anona nemaf higililam. Emi egafis sesambala ambagof asasimi, anona nemaf ambagof asasimi mope andeande' la'ela'ef hihif. 34Endilisi ae' a'ipipa, nemaf anama owamb amam biam mo'oh ipat lehis atifim, God nofa' anona, anona nokwahona nope. 35Anowa nematawa biawa onda' maola plaua onda' bret, atuwasi God nofa' ano'w, nokwaha ano'w kope.” 36[Amam biam meape aofi, atuwasi God nofa' anona, nokwaha anona nope.]
37Alupumi ananimi mame' basef amama mahali'ana ma'i, “Dembinai, amama anona nemaf motaga eti?”
Ea' Jisas na'ipam na'i, “Anama alop saga'i sa'oma, ea' anama atogon anona nemaf komemb mufi'i mondowa'anima.”
Επιλέχθηκαν προς το παρόν:
Luk 17: aojF
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2013, Wycliffe Bible Translators, Inc. All rights reserved.