BEGGAR 28
28
Jakubnvn Laban Dookub Kanamnam
1Ho Aisak Jakubnvn goqbnv hoo mwam lvqc citwl hoo mwam tomswrnum, “No hoggub nyijaqkam Kanaan nyem mam noqg nywxwb naama bvka. 2Gorabl noqg annwg ab Betuel nammwb Paddan-aram wno, hoo noqg annwg vbw Labanwg nyem ko akwn noqg nywxw naato. 3Mwlwngam ator yaanbo Pwnbov nam lvqc citayin hoo nam mipar-gooiyiql hoo nam dumtwq-miilyw mvtayin, ho no jaqt bo nyiilu gob nyitayin. 4Mwv Abrahamnvn lvqc cinbov namkam lvqc gvnka hoo noqg hotam mamkam lvqc gvnka, ho noqg doodu ko gvda ham Pwnbov Abrahamnvn jinum, ham no gumn doog gvnka!” 5Ho Aisak Jakubnvn wwm kunum. Hoo mwv Paddan-aram, Betuel ko tuup Laban, Aramean, Jakub la Esug ann, Rebekag vbw dookub wnum.
Esu Ismaiyel Nyem Ak Naanam
6Aisak Jakubnvn lvqc tvl mwam Paddan-aram wl nywxw ak naam dvb mwam lvqc cil mwv tomswrl soq sib bilwqnum, “No hoggub nyijaqkam Kanaan nyi tulu hoqgv nyem naama jijaqbv,” hvl betwl kanam nvmlwqnam mam Esu kaapanum, 7hoo Jakub mwwg ab gvla annwg benam mam tanv Paddan-aram wknum. 8Ho Kanaan nyem tulungv mwwg ab Aisaknvn loomanam mam Esu kaapa tvl, 9Esu Ismaiyel dookub wnum, hoo mwwg nywxw tulug lvvgho mwv Ismaiyelg nyem ko Mahalat, Abraham gv ko hosiqkv, Nebaiot bwrm mam mwv nywxw akgob naaknum.
Jakubg Yuma maanam
10Jakub Beerseba lengk nv hoo Haran daiyab wnum. 11Hoo doonyiv haai kukam, mwv nyook golo hvvc kunv hoq aiho ho yubnum. Nyook hoqg wlw pwg naarabnv mwwg dumpo uraho mwv twlwqtvl hoq nyookho yubdwb karranum. 12Hoo mwv yuma maanum, kaato, sobia ak swcw soqgv biaca tvl doonum hoo hoqg niqtuqkv ao gvdangam bvvcnum. Hoo kaato, Pwnbog gumtw tulungv hoq aoho cao gvi hoo ipoq gvi nyil doonum! 13Hoo kaato, hoq aoho At Sw daqtwl hoo benum, “Ngo At Sw, noqg ab Abraham gv Pwnbov hoo Aisak Pwnbov. Noqg yubk gvda sam nam la noqg hosiqkam ngo jitayin. 14Noqg hosiqkv swcwg diimwr hvbjaq nyitayin, hoo dou-caga bvkam ho haaga bvkam hoo nyoodum bvkam ho nyooko bvkam noqg nyookv lywtayin, hoo noqg hoola hoo noqg hosiqho swcw soqg imiq dvpar mwlwngam lvqc citayin. 15Kaato, nam ngo dooba dvn hoo noqg wk mwlwho ngo svka tayin, hoo nam ngo lokta soq gvda so bookur tayin. Hoggab ngo nam hoggv dingrnam ham nyima deedib ngo nam wleqram.” 16Ho Jakub yubpel huurab kunv hoo benum, “Jvqtw jaqb At Sw soq nyook si doodo, hvbmab ngo ham cengmanum.” 17Hoo mwv boskunv hoo benum, “Hwdjaqgo soq nyook si bosnam go! Soq si hiyv gvkam namlo ma hvbmabde Pwnbog namlo go, hoo soq si ao gvdag toggoq go.”
18Ho Jakub ar komc gorab layil mwwg dumpo uraho wlw dumtamnam mam naarab kunv swwrwb diidaq tvl hoq aoho kutiam toopupnum. 19Mwv hoq nyook hoqg eminam Betel hvl goqnum, hvbmabde bopam hoqg otuqg eminv Luj hvl goqnum. 20Ho Jakub dingrwl begamv, “Pwnbov dooba baloqkam hoo ngoqg lamta wnam sam ngam svka baloqkam, hoo dvsam la vjam koosam ngam jibnyiloqkam, 21ngo lokta ngoqg abwg nammwb swrsob hookur taikun, ho At Sw ngoqg Pwnbob nyitayin, 22hoo soq wlw sam ngo soq swwrwb diipnam so Pwnbog dvrwq namlob nyitayin. Hoo noqg ngam hog mwlwngam jinam hoqgv ngo nam jibwq sanam mam bwwr dvb jitayin.”
Currently Selected:
BEGGAR 28: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.