BEGGAR 43
43
Josapg Vbw-bor Tulungv Ijiptho Hookurnam
1Ho gvdaho dwr rwdwqkv hvraqb nyidunum. 2Hoo hwdlo bulug Ijipt hoqgv dvr rvnam mam dvnyia yukam, bulug abv bulam benum, “Lokta wn, ngul gab dvs loq rvta.” 3Hvbmabde Juda mwam benum, “Nyi akv dingl ngulam pvtil begamv, ‘Nulug boram nulug lvgab haag mabnyiloqkam nulv ngam nyuqm kaakin mabka hvnum.’ 4No ngulug boram ngulug lvgab kanam baloqkam, ngulv igdvl hoo noqgab dvs rvtayin. 5Hvbmabde no mwam kanam mabalo ngulv ikram, hoggab nyi akv ngulam benum, ‘Nulug boram nulug lvgab haag mabnyiloqkam nulv ngam nyuqm kaakin mabka hvnum.’” 6Israel benum, “Hog nyitwl nulv nyi akam nulv bor akta doodnvk hvl betaml ngam al looda maadwb nyigyin?” 7Bulv birwqnum, “Nyi akv ngulam tox gvi hoo ngulug imiq dvparam tvi-tamil hingky loodab ngulam toxnv, begamv, ‘Nulug ab sija godab dooxiqdo i? Nulv bor akta doodo i?’ Soq toxnam tulu sam ngulv mwam betamnum. ‘Nulug boram soqb bool ta hvl’ mwv bei nvp hvl ngulv vcwr gokam mwwmiq kama?” 8Hoo Juda mwwg ab Israelnvn benum, “Kongam ngoqg lvgab kanam to, hoo ngulv wrab deen, ho ngulv rub hoo no rub, hoo ngulug ko tulu ngvrub simab swwl doodwb. 9Ngo mwwg swrso gob dingrwl gorgy naatayin. Ngoqg alaq soqgv mwam no pw-hwwiya ku. Ngo mwam nam bookur jikul hoo noqg agaho doom kuma baloqkam, ngam nwrba gob timb yaaka. 10Ngulv soq sib oyu nyingv manyiloqkam, ngulv lwnyig wpekul hookur sudkuco.”
11Ho bulug ab Israel bulam benum, “Hvb paknyiloqkam, soq sam nyito: gvda soqg mwlwngam alyanbo aaxy lo nulug naaraho naagdvl baqgwn, hoo anyo go puun-yarn nanloq, tong ngola loq, duiyup-twwgab loq, mirr loq, pistakio aaxy loq, hoo almond aaxy loq baqlayil nyi akam aky bvjta. 12Nulug lvgab twngkam hvdkalam lwqbw tvl baqdwn. Ho kenlo nulug tuila gamb ho twngk boqkur kunam ham hvraqb baqgwn. Lokam hoqham kvvmwq-kvvlwql bade. 13Nulug boram kam boogwn, hoo nyi akwg dookub lokta wrabl wn. 14Mwlwngam koi yaanbo Pwnbov nulam nyi akwg agaho aya kaapa mvgnvka, hoo mwam nulug vbw-bor akwn hamla hoo Benjaminnvn wkur mvdwb jignvka. Hoo ngo nyiloqkam ngoqg ko tulu gab mwwdwq deek bolo, ngo mwwdwq dwql dootayin.”
15Ho nyi tuluhv aky jidy sanam mam naanum, hoo bulv twngkam hvdkalam lwqbwnum hoo Benjamin bulug lvgab wmin gvnum. Bulv wrab kunv Ijiptho iknum hoo Josapg agaho daqnum.
16Hwdlo Josap bulug lvgab Benjaminnvn daqmin gvdwb kaapa yin, mwwg nam hoq nyera tulungam mwv benum, “Soq nyi tulu sam namho boato, hoo svdin loq patab gvdwl mwx-mvaqto, hoggab soq nyi tulu si soolo ngoqg lvgab dvs dvtayin.” 17Nyi akv Josap hoggub benum hvb mwv nyinum hoo nyi tulungam Josapg namho boanum. 18Hoo bulam Josapg namho boa ko-gab nyi tuluhv bosnum hoo bulv benum, “Soq si kenlog ngulug haaco yikho ngulug tuila ho twngkam boqkur ko-gab, ngulam so boa paku, ho mwv ngulam nyijab-nyiyiqnv ngulug aoso caajabnv hoo ngulug svdam tulungam naareql ngulam nyera gob mvta yi.” 19Ho bulv wnv Josapg nyerangam nammwg viyap yabtam ho agam goonum, 20hoo benum, “Oa, ngoqg ata, ngulv kenlo dvg rvtab otuqho haanum. 21Hoo hwdlo ngulug liit doonu ko ho ngulv ngulug tuilangam mvkonum, hoo ngulug vx-cwrwg tuila gamb ho ngulug twngkv bumpwb doonum. Ho ngulv ham lokta ngulug lvgab baqa yukun, 22hoo ngulv dvg rvdwb asaq twngkv hvraqb ngulug lvgab haag yin. Ngulv cengma hiyv ngulug tuila ho ngulug twngkam vlwq jinum.” 23Mwv birwqnum, “Swrsongv nulug lvgab doon ka, bos maabv. Nulug Pwnbov la nulug abwg Pwnbov nulug tuila ho nulgab gumnam vlwq jipa. Ngo nulug twngkam nvvrwqnum.” Ho mwv Simeonnvn bulug agaho boolinum. 24Hoo hwdlo nyera akv nyi tulu ham Josap namho boatvl hoo bulam issiv jinum, hoo bulug lvpiangam bulv hursnum, hoo mwv bulug svdam tulungam dvs jinum, 25Josap aal lvpaho hoodu dvk hvl bulv mwx-mvaqnum, hoggab bulv hoqho dvs dvtayin hvl bulv tapanum.
26Hwdlo Josap namho haai kukam, bulam mwwg nammwb boanum ho bulug aky baqnam mam bulv bwwlayil kedho pvxwl mwam xumnum. 27Hoo mwv bulug al-koram toxnum hoo benum, “Nulug nyekam bo nyi akam benam hv, ngulug abv al sude i? Mwv hvraqb dooxiqdo i?” 28Bulv benum, “No nyera ngulug abv al sudo; mwv hvraqb dooxiq dvn.” Hoo bulv bulug dumpongam pvxwl hoo bulv atv-atv bumjo tvl xumnum. 29Hoo mwwg vnyiqkv piorab banv mwwg annwg ko tuup, mwwg bor Benjaminnvn kaanum, hoo benum, “Soq si i nulug bor anyangv, hiyam nulv ngam betamnum? Ngoqg ko, Pwnbov nam anya gvnka!” 30Ho Josap nyebia alwb hoqgv wleqnum, hoggab mwwg vbw-bor tulu gab mwwg hang sibil biinamv cwqla kumanum, hoo mwv xabk nyook ak meegaqnum. Hoo mwwg pwqlwho mwv haanum hoo xabnum. 31Ho mwwg nyuqm mam mwv moomiq peekul hoo lvvgwb lengnum. Hoo mwv atv cwqknv mwv benum, “Dvsam jito.” 32Bulv mwwg dvky koho mwam horjnum, hoo bulam atam-atam dvmnum, hoo Ijipt nyi tulungv atv-atv mwwg lvgab dvnum, hoggab Ijipt nyi tulungv Hibru nyi tulu lvgab dvbam dvb nyimanum, hoggab hoqhv Ijipt nyi tulu gab bulum-kac dvb nyinamv. 33Hoo bulv mwwg agaho doonum, vbw cociq hoqgv naalayil bor anya namgub. Hoo nyi tuluhv akwn-akwn kaako-kaapeql swrdorxeq gob mwwnum. 34Josapg tebol hoqgv dvsam joobo jinum, hvbmabde Benjaminnvn jibwqnamv bulam jinam hoqgv lvng gob koi dvb jinum. Hoo bulv twwk-dvknv mwwg lvgab hwnyir-hvmarl soomin-nyirminum.
Currently Selected:
BEGGAR 43: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.