BEGGAR 47
47
Jakubg Imiq Dvparv Gosenho Nvmcw Dooknam
1Ho Josap wknv Paronvn betamnum, “Ngoqg ab la ngoqg vbw-bor tulungv bulug sviya pvtwngam la sibin-svv hoo bulug hog mwlw doognam mam baqlayil Kanaan gvda hoqgv haapa ku. Bulv sija Gosen gvda tv doodo.” 2Hoo mwwg vbw-bor pengko hoqgv mwv ang gon bulam Parog dook ho haagnum. 3Paro mwwg vbw-bor tulungam benum, “Hoggv nulv nyidwn?” Hoo bulv Paronvn birwqnum, “Ngulug ab tulug nyinam hvb, ngoqg nyera tulungv ngulv sviya rvky bob nyidwn. 4Bulv Paronvn benum, “Kanaan gvda lo dwr rwdwq wggam gab, noqg nyera tulug sviya pvtwngv nwmw dvs dook ma, hoggab ngulv gvda so nyiogy haaikun. Hoo sija anya mwwpa gvdwl noqg nyera tulungam Gosen gvdaho doogw mvtbv.” 5Ho Paro Josapnvn benum, “Noqg abv la noqg vbw-bor tulungv noqg dookub haapa ku. 6Ijipt gvdangv noqg haabo hv doodo. Noqg abam la noqg vbw-bor tulungam diibuqbo gvdaho nvmcw doomto. Bulam Gosen gvdaho nvmcw doomto, hoo bulug pengko hoqgv pwbw bo nyi loq ngoqg tuun-meengam rub kaam dvb sitin to.”
7Ho Josap mwwg ab Jakubnvn boalayil mwam Parog agaho daqmnum, hoo Jakub Paronvn lvqc cinum. 8Hoo Paro Jakubnvn benum, “No hog hwd vnyw dukun?” 9Hoo Jakub Paronvn benum, “Ngoqg soq sib nyiody bool nvmcw doogaq kunamv vnyw 130 gob nyidkun. Ngoqg swwca lo anyo mood go almab nyinamv haanum, hvbmab hoq tuluhv ngoqg ab tulug nyiody bool nvmcw doogaqnam vnywngam kwc nyoram.” 10Hoo Jakub Paronvn lvqc cipekul Parog dook hoqgv lvvgwb lengknum. 11Ho Josap mwwg abam la mwwg vbw-bor tulungam gvda nvmcw doa mvnum hoo Parog gaml jikjaqb mwlwngam alyanbo Ijipt gvdag Rames nyi tulug dook ho bulam gvdangam gumn jiknum. 12Hoo Josap mwwg abam la mwwg vbw-bor tulungam, hoo mwwg abwg imiq dvparam bulug ko tulungam xitaql dvs-twwsam jiknum.
Josap la Dwr Wnam
13Hoq moodho gvdaho dwr rwdwqkv wggam gab mwlw gvdaho dvs dook maanum, hoqgab Ijipt gvda ngvla Kanaan gvdangv laanyi kumanum. 14Hoo Josap Ijipt gvda gvla Kanaan gvdaho twngk mwlwngam dvgwb kwlil nookum kunum. Hoo Josap twngkam Parog namho baqa jinum. 15Hoo hwdlo Ijipt gvda gvla Kanaan gvdag twngkam dvg rujur naknum, Ijipt nyi tulungv Josap dookub haanum hoo benum, “Ngulam dvs jitwb. Hoggub ngulv noqg vnyiq kaagaho sitayin? Hoggab ngulug twngkam ruiyum nvtkuba.” 16Hoo Josap birwqnum, “Nulug twngkam ruiyum nvp kuloqkam, nulug tuun-meengam jito, hoo ngo nulam tuun-mee kwlib dvs jitayin.” 17Ho bulv bulug tuun-meengam Josapnvn boa jinum, hoo bulug svpur, sviya, sibin-svv, hoo svdam tulug kwlib bulam Josap dvs jinum. Hoo hoq vnywho bulug tuun-mee kwlib bulam dvs jinum. 18Hoo hwdlo hoq vnyw hv wnya yukun, bulv vnyw nywgwn ho mwwg dookub haanum hoo mwam benum, “Ngulv ngoqg atwg hoqgv kvs ko dooma, ngulug twngkam muiyum tukba. Tuun-meengv ngoqg at gvku. Ngoqg at ngulv hog akkam dookma hvbmabde ngulug gv apongv la ngulug kediv dootwq do. 19Ngulv la ngulug kedam doom tvl, hoggab noqg vnyiq kaagaho ngulv sitayin. Ngulam la ngulug kedam dvs gab rvtbv, hoo ngulv ngulug ked lvgab Parog nyera gob swwtayin. Hoo ngulam vly iss loq jitbv hoo ngulv siram, hoo gvdangv danyib dooram.”
20Ho Josap Ijipt gvda mwlwngam Paro gab rvknum, hoggab Ijipt nyi mwlwngv bulug rongongam dwr rwdwq wggam gab puqknum. Gvdag kediv Paro gab dooknum. 21Nyiilungam, Ijipt gvda taqgwn hoqgv taqgwnam gob bulam mwv nyerab mvknum. 22Nyub tulug gvda ked arongam rvmanum, hoggab nyub tulungam Paro hoqgv bul gab xirwl jinamv doonum hoo bulam Parog jinam hoqgv bulv swwl doonum; hoqgab bulug gvda kedam bulv puqmanum.
23Ho Josap nyiilungam benum, “Kaato, ngo soolo nulug gvda kedam Paro gab rvpa kun. Si nulgab vly liisv, hoo nulv gvda kedam vly liito. 24Hoo vly naaikun nulv Paro gab ang hoqgv akwn jila ka, hoo piin gonhv nulug atgab, rongo vmly-miily gab, nulug atwg dvs gab hoo nulug imiq dvpar gab, nulug ko tulug dvs gob nyitayin.” 25Hoo bulv benum, “No ngulug swwgam ywwlin jipa ku; hoqham ngoqg atwg bekwb nyim tvka, ngulv Parog nyera tulub swwtayin.” 26Ho Josap Ijipt gvda gab pvvb mvknum, hoo hv soolo godab doodwn, Paronvn ang hoqgv akwn jidwn; nyub tulu arog gvda kediv Paro gab doomanum.
27Hoqgab Israelv Gosen, Ijipt gvdaho nvmcw dooknum. Hoo bulv hoqgv gumn paaknum, hoo mipar-gooiyiq hoo dumtwq-miilyw koijaqb swwknum. 28Hoo Jakub Ijipt gvdaho vnyw camleq kvn go swwknum. Ho swwnam aalv vnyw 147 gob nyiknum.
29Hoo hwdlo Israelwg sid moodv hvvnwq yukho, mwwg ko tuup Josapnvn mwv goqnv hoo mwam benum, “Noqg kaagaho ngo kvvlwql mwwsw dvb nyip nyiloqkam noqg alaqkam ngoqg xarpo so mamdaq tvl anya mwwpa gvdwl jvqtwngam ngam nyij tayin hvl dingr to. Ngam Ijipt gvda so svma liima bvka, 30hvbmabde ngam ngoqg abwg lvgab liiya bvka. Ngam Ijipt soqgv baqlin gvdkul ab tulug svma liik ho liiya bvka.” Mwv birwqnum, “No hoggv bepan ham ngo nyitayin.” 31Hoo mwv benum, “Ngam dingr tvb”; hoo mwv mwam dingr kunum. Ho Israel mwv atv mwwg kartamho dumpo pvxwnum.
Currently Selected:
BEGGAR 47: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.