GÉNESIS 26
26
Isaacpa Gerarta risqan
1Chay hallp'apitaq yarqay karqan, Abrahampa tiemponpi kasqanmantaña, hinaqtinmi Isaacqa rirqan Filistea runakunaq reynin Gerarpi kaq Abimelekman. 2Señor Diostaq Isaacman rikhurispa nirqan: —Ama Egiptoman uraykuychu, qanta nisqayki chay hallp'api tiyakuy. 3Kay hallp'api tiyarillay, qanwanmi kasaq, saminchasqaykin, qanman mirayniykimanwan kay llapan hallp'ata qonayrayku. Abraham taytaykiman prometesqaytataq hunt'asaq. 4Hanaq pacha ch'askakunata hinan mirayniykita askhayachisaq, hinaspan kay llapan hallp'ata paykunaman qosaq. Kay pacha lliw hatun suyukunataq: Paykunata hina saminchawayku, ninqaku, 5simiyta Abraham kasusqanrayku simiyta llapa kamachikusqaykunatawan hunt'asqanrayku, nispa.
6Gerarpin Isaacqa tiyarqan. 7Chaypi tiyaq runakunataq payta warminmanta tapurqanku, hinan payqa kutichirqan:
—Panaymi, nispa. Manchakurqanmi “Warmiymi” niyta, sonqonpi yuyaykurqan: Paqtan chayneq runakuna Rebecarayku wañuchiwankuman, nispa. Rebecaqa sumaq rikch'ayniyoqmi karqan.
8Unayña pay chaypi kaqtintaq, Filistea runakunaq reynin Abimelekqa ventanamanta qhawaspa Isaacta rikurqan warmin Rebecata munakushaqta. 9Hinaspanmi Abimelekqa Isaacta waqyaspa, nirqan:
—¡Yaw, payqa warmiykimá kasqa! ¿Imaynataq nirqanki: Panaymi, nispa?
Hinan Isaacqa payman kutichirqan:
—Nirqaniqa: Paqtan payrayku wañuchiwankuman, nispaymi, nispa.
10Abimelektaq nirqan:
—¿Imaraykutaq chayta ruwawankiku? Faciltan mayqen runapas warmiykiwan puñunman karqan, hinaspan huchallichiwankikuman karqan, nispa.
11Hinaspanmi Abimelekqa llapa runakunata kamachirqan:
—Pipas chay qharita otaq warmintapas tupaykunqa chayqa, wañunqapunin, nispa.
12Chay hallp'apin Isaacqa tarpurqan, hinaspan chay wata hoqarirqan askhallataña, Señor Dios payta saminchasqanrayku. 13Qhapaqyasharqanmi allinyasharqanmi ancha atiyniyoq kapunankama. 14Karqanmi oveja t'aqanpas, waka t'aqanpas, hinallataq askha llank'aqninkunapas, chaymi Filistea runakunaqa payta envidiakurqanku. 15Taytan Abrahampa tiemponpin Abrahampa kamachinkuna p'uytukunata t'oqosqaku, chaykunatan Filistea runakuna wisq'arapusqaku, hallp'awanpas hunt'arachipusqaku. 16Hinan Abimelekqa Isaacta nirqan:
—Qayllaykumanta ripuy, ñoqaykumanta aswan atiyniyoqmi kapunki, nispa.
17Chaymi Isaacqa chaymanta ripurqan, hinaspan Gerar wayq'opi karpakuspa chaypi tiyarqan. 18Hinaspanmi Isaacqa wakmanta hasp'irqan taytan Abrahampa tiemponpi hasp'isqaku chay unu p'uytukunata, chaykunatan Abrahampa wañukapusqan qhepata Filistea runakuna wisq'apusqaku. Hinaspan p'uytukunata suticharqan taytanpa sutichasqan sutiwan. 19Isaacpa kamachinkuna wayq'opi t'oqoqtinku, hinaspa chaypi phullpuq unuta tariqtinkutaq, 20Gerarpi michiqkunaqa ch'aqwarqanku Isaacpa michiqninkunawan: Ñoqaykuqmi unuqa, nispa. Chaymi Isaacqa p'uytuta suticharqan “Ch'aqway” sutiwan, paywan seqachinakusqankurayku. 21Hinan huk p'uytuta t'oqorqanku, chay hawapas ch'aqwallarqankutaq, chaymi suticharqan “Cheqninakuy” sutiwan.
22Chaymi chaymanta t'aqakurqanku, hinaspan wak p'uytuta t'oqorqan, manataq chay p'uytu hawa ch'aqwarqankuchu, suticharqantaq “Kachariy” sutiwan. Hinaspan nirqan: Kunanqa Señor Diosmi kacharichiwanchis, kaypi allinyananchispaq, nispa.
23Chaymantataq Beersebaman wicharqan. 24Chay tutapin Señor Diosqa payman rikhurispa, nirqan:
—Ñoqan kani Abraham taytaykiq Diosnin,
ama manchakuychu, ñoqan qanwan kashani,
saminchasqaykin, mirayniykitan askhayachisaq
kamachiy Abrahamta munakusqayrayku, nispa.
25Hinan chaypi huk altarta perqaspa Señor Diosmanta mañakurqan, karpantapas chaypi sayarichirqan. Isaacpa kamachinkunataq chaypi huk p'uytuta t'oqorqanku.
26Huk p'unchaymi Abimelekqa Gerarmanta payman hamurqan, reqsinakuqmasin Ahuzatpiwan, ejército umalli Fikolpiwan. 27Hinan Isaacqa paykunata nirqan:
—¿Imaqtaq hamuwankichis? Cheqnikuwarqankichismi, qankuna ukhumantapas wikch'umuwarqankichismi riki, nispa.
28-29Paykunataq kutichirqanku:
—Rikuykun qanwan Señor Diosqa kashasqanta, hinaspan yuyaykuyku qanwan rimanakuyta. Rimanakusunqa ama ima mana allintapas ruwawanaykikupaq, ñoqaykupas manan imanaykikupaschu, aswanpas allillantapunin ruwapurqaykiku, hinaspan allinpi kachapurqaykiku, kunanqa Señor Diosmi saminchashasunki, nispa.
30Hinan payqa paykunapaq hatun mikhunata wayk'uchirqan, hinaspan mikhurqanku ukyarqanku. 31Pacha illarimuytataq hatarispanku jurachinakurqanku, hinaspanmi Isaacqa paykunata kacharparipurqan, paykunapas allinpi ripurqanku.
32Chay p'unchaypin Isaacpa kamachinkuna hamurqanku, hinaspan t'oqosqanku p'uytumanta payman willarqanku:
—Unutan tarimuyku, nispa. 33Chaymi chay p'uytuta “Juramentota” suticharqan, chayraykun chay llaqtaq sutinqa chaymantapacha Beerseba #Beerseba sutin Hebreo rimaypi “Juramento p'uytu” ninanta nin, otaq “Qanchispa p'uytun” (Gen. 21.31). nisqa kapurqan.
34Esauqa tawa chunka watayoqña kaspa casarakurqan Het runa Beeriq ususin Juditwan, Het runa Elonpa ususin Basematwan ima. 35Hinan Isaacpaqpas Rebecapaqpas sonqo nanay karqanku.
Currently Selected:
GÉNESIS 26: QC88
Highlight
Share
Copy
Want to have your highlights saved across all your devices? Sign up or sign in
Biblia en Quechua de Cuzco © Sociedades Bíblicas Unidas, 1988.